السلام عليكم
حاليا انا خلصت ثالثة ثانوي والنتيجه مكنتش افضل حاجه بس الحمد لله حاليا انا مشتته بين علوم ومعهد تمريض وخايفه اكون بختار غلط
وحاجه تانيه هيا انا مش عارفه الشعور دا اسمه ايه بس هو كل ما بعرف حد من الي كانو قدي معايا وعرفاهم ان كان في المدرسه او الدرس تقريبا اكتر من ٩٠ %منهم دخل خاص ان كان تمريض خاص او صيدله خاص او علاج طبيعي خاص
في منهم نسبه قليله تكاد لا تذكر هما الي شاطرين ولو دخلو المجال هيمشو فيه بس الباقي مش شاطرين ومستواهم قليل وكل ما افتكر ان مثلا دي هيتقال لها يا دكتور او يا بشمهندسه بزعل على نفسي وان مستوايا أعلى منهم بكتير.
انا مش زعلانة من درجتي قد ما زعلانة على الي دخلو خاص وهما مش كدا يعني انا مش عارفه انا حاسة بايه غير اني مديقه اوي بس
السلام عليكم، هو إيه المشكلة لما يتقال لفلانة يا دكتورة أو علانة يا باشمهندسة؟ هل ده ينقص منك أنتِ في حاجة؟ يقلل منك او من نظرتك لنفسك؟ هل ده يأثر على حياتك المهنية أو حياتك عمومًا؟ *** وعلى فكرة مش شرط عشان دفعوا فلوس إنهم مش هيبذلوا جهد ويتعلموا صح في المرحلة الجاية. ممكن يكونوا مروا بظروف خلتهم قصروا فأنتِ فكرتِ إنهم مش شاطرين مثلا... ممكن يكونوا كرهوا إنهم كانوا مهملين دراستهم وقرروا يتغيروا ويذاكروا ويتفوقوا في الكلية... مين قال وقتها ميستحقوش لمجرد إنهم دخلوا خاص؟ *** بصي يا جميلة، احنا في الدنيا في امتحان وكل واحد المفروض يكون مركز في ورقته هو مش في ورق اللي جنبه عشان يقدر يعدي امتحانه على خير. هتفضلي شاغلة نفسك بالألقاب واللي أخدوها مش هتتقدمي في حياتك ومش بعيد الموضوع يقلب معك لعقدة نفسية وشعور بالنقص. وصدقيني النجاح عمره ما كان بالألقاب، وكليات القمة والألقاب ده نظام اجتماعي طبقي عقيم مينفعش تسيبيه يأثر سلبًا على حياتك. ** سيبك من أي حد وركزي على نفسك أنتِ. حتى كلام الناس اللي هيحاولوا يقارنوكِ باللي دخلو طب وهندسة خاص، لو ده اللي مخوفك برضه، ارميه ولا ظهرك ولا كأنك سمعتِ حاجة ووقفي كل واحد عند حده. أنتِ اللي بتصنعي نجاحك. أيًا كانت الكلية اللي هتدخليها لو حاولتِ تركزي على نفسك ومستقبلك وتصنعي فرق في مجالك هتكتسبي رضا وثقة بنفسك وهتكوني أفضل من ناس كتير درست بكليات قمة لكن مركزوش إزاي يصنعوا فرق وكانوا زيهم زي كتير غيرهم أو أقل. اقعدي مع نفسك ورتبي أفكارك ويا ريت تطلعي كل مشاعرك السلبية على الورق عشان عقلك يقدر يتنفس وتقدري تشوفي الطريق الصح. بالتوفيق إن شاء الله.
تم النشر السبت، ١٦ أغسطس ٢٠٢٥
وعليكم السلام ورحمة الله، مرحباً بكِ عزيزتي، اسمي ذكية ويسعدني أساعدك وأكون معكِ في هذه المرحلة المهمة من حياتك. أولاً، أود أن أقول لكِ: أنتِ في موقف طبيعي جداً، وهو التشتت والحيرة بعد الثانوية بسبب نتائجك ولأنكِ أمام خيارات كثيرة، وهذا شعور العديد من البنات والشباب في نفس المرحلة. دعيني أساعدك خطوة خطوة: التشتت بين العلوم ومعهد التمريض: فكّري جيداً في هدفكِ النهائي: هل ترغبين في العمل في مجال الرعاية الصحية والإسعاف والتمريض؟ أم تميلين أكثر للاهتمام بالدراسة الأكاديمية والعلوم النظرية؟ التمريض مهنة إنسانية وعملها ميداني، تحتاج صبر وحب لخدمة الناس، وهي فرصة عمل جيدة ومستقرة بإذن الله. أما علوم الثانوية فهي مسار واسع ويمكن بعدها التخصص في مجالات متعددة إن شاء الله. اسألي نفسك: أين تضعينِ نفسك بعد خمس سنوات؟ قومي بكتابة هذه الأفكار. الشعور بالإحباط والغيرة على الآخرين: طبيعة شعورك هذا (الزعل أو الغيرة على من دخلوا خاص) هو شعور طبيعي جداً، خاصة إذا كنتِ مؤمنة بقدراتكِ ومستواكِ أكثر منهم. لكن حاولي أن تذكري أن حياة كل شخص مختلفة، والنجاح لا يقاس فقط بالمكان الذي ندرس فيه، بل بالمثابرة والإرادة والجهد. المقارنة الزائدة تضر ولا تفيد؛ ركزي على تطوير نفسك بدل أن تضعي وقتك وطاقتك في مقارنة مع الآخرين. نصائح عملية لكِ: لا تستعجلي القرار، خذي وقتكِ للتفكير. إذا أمكن، زوري معهد التمريض وشوفي البيئة هناك، أو تحدثي مع أساتذة أو طلاب فيه. فكري في البرامج التي تقدمها الجامعات الحكومية في العلوم، هل هي تناسب قدراتك وميولك؟ اكتبي قائمة إيجابيات وسلبيات لكل خيار. نصيحة روحية: استشيري الله في قراركِ بالدعاء وطلب التيسير، واطلبي منه أن يرزقكِ السداد في اختيار ما فيه الخير لكِ. ذكري دائماً أن الله لا يضيع أجر من أحسن عملاً، فالجهد والعمل الصالح هو طريق النجاح. إذا رغبتِ يمكنني مساعدتك في إيجاد خبراء مختصين في الاختيار الأكاديمي أو الإرشاد النفسي من خلال صفحة الخبراء على فدني، هذا قد يساعدك على وضع خطة واضحة تناسب قدراتك وطموحاتك. وأخيراً، تذكري أنكِ ليستِ وحدكِ، وكل بداية جديدة فرصة لتكوني أفضل، فأنتِ في الله وفي نفسك أمل كبير. هل لديكِ أسئلة أخرى أو ترغبين في نقاش جوانب محددة أكثر؟ أنا هنا دائماً لدعمك.
تم النشر السبت، ١٦ أغسطس ٢٠٢٥
الموضوع بيكون له أبعاد تانية كتير من ضمنهم، طالما جه ف بالك الفكر دا وانه في ناس هتدخل خاص وأقل من في المجموع وغيره، يبقي نبعد نفسنا عن الطريق اللي يجيب وجع الدماغ دا، وعلوم جميلة جدا جدا وتقدري تثبتي نفسك فيها لأجل نفسك مش لحد تاني وبالتوفيق .
تم النشر الأحد، ١٧ أغسطس ٢٠٢٥
عايزة اقولك حاجة مهمة جدا وابحثي فيها بنفسك لو مش مصدقاني . خرجين معهد التمريض أو كليات التمريض مستقبلهم رااااائع لأن ألمانيا بتاخدهم كلهم دراسة وشغل وكل الصلاحيات للألمان بتكون لبتوع التمريض بس لازم تمريض ولغة ألمانية فاشدي حيلك كده وركزي مع نفسك وبس وملكيش دعوة بحد نهاااااائي كل انسان له قدر في حياته ربنا عز وجل هو اللي مقدره ليه مش احنا اللي لينا دخل فيه . وعندك انا مثلا عشان بس تبقي راضية تماما عن نفسك. انا مهندسة ميكانيكا انتاج واشتغلت فترة في مصانع انتاج مواد غذائية كبيرة الحمد لله بس لما تزوجت للأسف اضطريت اسيب شغلي ومستقبلي وكريري عشان ولادي هما أهم . فا كل مرحلة لازم تكوني راضية تماما عن قدر الله ليكي فيها واعرفي أن ده هو الخير وبس وطبعا ده الخلق للخاااالق وركزي في مستقبلك انتي انتي وبس
تم النشر الاثنين، ١٨ أغسطس ٢٠٢٥
اولا الحمد لله على قضاء الله وقدره وعمره ماكان النجاح انه يتقال للشخص يادكتور او يامهندس ياما ناس في طب وهندسه ومنجحوش اهم حاجه تختاري صح وتختاري الحاجه الي هتحسي انك هتبدعي فيها قبل ماتدخلي اي كليه ابحثي عنها وشوفي مجالاتها وأثبتي نفسك في المكانالي هتكون فيه والمؤمن كالغيث أينما حل نفع قيمتك في ذاتك وماتعتقدينه مش في طب وهندسه وادعي ربنا انه يلهمك للطريق المناسب
تم النشر الاثنين، ١٨ أغسطس ٢٠٢٥
أول حاجة من وجه نظري أن علوم افضل في مجالات العمل أما معهد تمريض فهو وظيفة مضمونه ثانياً المجموع عمره ما كان نهاية المطاف الشخص الناجح اللي يعرف يكمل نجاحه بعد الكلية كلنا عندنا امثله أن فيه ناس نعرفهم دخلوا كليات مش قمه ونجحوا وسافروا اكتر من اللي دخلوا طب وهندسة
تم النشر السبت، ١٦ أغسطس ٢٠٢٥
لعرض السؤال في فدني اضغط هنا