اخواتي و اخواني اللي خلصوا تالته ثانوي افيدوني و انصحوني في الدراسه و المواد أو في أي شيء يفيدني (أنا دلوقتي عدى شهر و ١٠ ايام يعتبر مزاكرتش حاجه و كل اللي فات متراكم كنت بسمع عن حلاوة البدايات بس مشوفتهاش و بقول لو دي البدايه ف بعد كدا ايه اللي هيحصل بقا)
ما فيش اي مشكله في ان انت مراكمه دلوقتي هو ما عداش بس غير شهر انت لسه قدامك سنه، بس ده ما ينفيش ان اللي انت عملتيه مش صح وان انت ما ينفعش تفضلي كده لغايه اخر السنه ، والدفعه كلها هتقول لك ، انا ضايعه، انا مراكمه ،انا ما ذاكرتش الدرس ده وهو اهم درس في المنهج مثلا، فكل واحد على حسب بيقضي يومه ازاي؟ بينظم وقته ازاي؟ بيقدر يقعد على الكتاب ويذاكر بجد وقت قد ايه ؟ كل دي فروق بينك وما بين اي حد في ثالثه ثانوي ، بس ان جيتى للحق خليكي متوتره كده فتره ، على ما تلمي وتبداي في الجديد وتخشي في مود المذاكره وتبقي مع المستر ،و كله هيبقى تمام بعد كده ما تخافيش خلي التوتر ده نقطه انطلاق ليكي
تم النشر الأحد، ١٣ سبتمبر ٢٠٢٦
ايه يعني شهر عدي ، حضرتك الوقت اللي باقي أضعاف أضعاف اللي فاتك ، استعيني بالله وابدئي كأن أول يوم النهارده وذاكري الجديد ومعاه درس من القديم بحيث تعرفي تحصليهم + أعرف ناس كتير ذاكرت آخر كام شهر وما شاء الله بتجيب مجموع كويس .. ولو محتاجه نصيحه خليكي ليكي ورد قرآن يومياً ولو صفحه + حافظي على صلاتك وقيام الليل ، ياريت المذاكره تكون من بعد الفجر ، ابعدي عن الموبايل نصحيه لوجه الله خليه بالكتير ساعه في اليوم تشوفي لو حد بعتلك حاجه ع الجروبات وبس ، ولو استفدتي لا تنسينا من صالح دعائك ، بالتوفيق ..
تم النشر السبت، ١٢ سبتمبر ٢٠٢٦
اولا المواد اشتري كتاب المستر وكتاب خارجي واحد فقط وذاكر بذكاء جامد لان الامتحانات معتمده على العيال اللي ذاكروا بذكاء وفاهمين كل نقطه ثم المتراكم ابدأ قديم مع جديد تقدر تعمل كدا لو بدأت بعد الفجر ومن غير فون خالص ومش تشتت نفسك وحافظ على كل دقيقه في يومك ومش لازم بكون عندك شله صحاب وممكن يبقى عندك يوم تنزل تلعب ساعتين لو مخلص كل اللي وراك ودا بيبقى عادي لغايه شهر ١٢ والساعتين دول هتحتاجهم الفون ممكن يتمسك نص ساعه في اليوم تشوف المستر منزل اي فقط وفكك من اناشيد المدرسين ابقى شغل قرآن وتقرب من ربنا اوي اوي وصلي قيام الليل وادعي كتيييير وربنا يوفقك ونصيحه مني كل ما تخلص باب حل من امتحانات السابقه على الباب ده في كراسه خارجيه
تم النشر الأحد، ١٣ سبتمبر ٢٠٢٦
بصي يا بنت الناس ولا تقلقي خالص الوقت لسه بدري جدا واللي فات شهر و10 أيام دا ولا حاجة وتقدري تلميه بسهولة المهم بس تلحقي نفسك من دلوقت وما تسيبوش يتراكم أكتر من كده واعملي جدول بجد واهم حاجة تحلي أسئلة كتير وتلتزمي بالحل أول بأول وابعدي عن التوتر والمقارنة بغيرك والبدايات الصعبة دي طبيعي بتحصل لكل الناس وفي الآخر ربنا مش بيضيع أجر حد اجتهد وتوكلي على الله وابدئي دلوقتي .. وربنا يوفقك ويكرمك
تم النشر الخميس، ١٠ سبتمبر ٢٠٢٦
يا قمر، أول حاجة أقولها لك: اللي فات فات، وده مش نهاية الدنيا. كتير من اللي خلّصوا تالتة ثانوي بنجاح كانوا في نفس موقفك، وبدأوا متأخرين ونجحوا. المهم دلوقتي إنك تبدئي بخطوات عملية وواقعية عشان ما تتعبيش نفسك أكتر. ابدئي بتقييم الوضع بصراحة: خدي ورقة واكتبي المواد اللي متراكمة وأي أجزاء فيها فاهماها وأي أجزاء لأ. بعد كده قسمي المنهج لأجزاء صغيرة يومية، مش لازم تذاكري كل حاجة مرة واحدة. ركزي على فهم المفاهيم الأساسية أولاً، وبعدين الحل والمراجعة. لو علمي رياضة أو علمي علوم، ابدئي بالمواد اللي بتحتاجي فيها وقت زي الرياضيات والفيزياء، وخلي يوم في الأسبوع للمراجعة السريعة للي فات. استخدمي تقنية "البومودورو" (25 دقيقة مذاكرة + 5 دقايق راحة) عشان ما تحسيش بالإرهاق. من ناحية التنظيم، اعملي جدول يومي واقعي يناسب طاقتك، وخلي فيه وقت للنوم الكويس والأكل الصحي عشان دماغك يشتغل. ادعي ربنا كل يوم بالتوفيق والثبات، وتذكري إن الاستمرارية أهم من الكمية. لو حسيتي بالضغط، خدي نفس عميق وفكري في هدفك الكبير (الكلية اللي نفسك فيها) عشان يديكي دفعة. ابحثي على فدني عن أسئلة مشابهة لتالتة ثانوي، هتلاقي نصائح كتير من اللي مرّوا بنفس التجربة. أنتِ قادرة، والبداية المتأخرة مش بتقلل من فرصك لو بدأتِ دلوقتي بجد. لو عايزة نصيحة أكتر تفصيلاً عن مادة معينة، قوليلي. ❤️
تم النشر الخميس، ١٠ سبتمبر ٢٠٢٦
حاسه الدفعه كلها مراكمه معايا الله اكبر ، هنزعل اوى لو فضلنا ندلع كدا ، ربنا يوفقنا جميعا
تم النشر الجمعة، ١١ سبتمبر ٢٠٢٦
لعرض السؤال في فدني اضغط هنا