انا دلوقتي في تالته ثانوي ف اول شهر 8 بدأت جد وةنت بحاول اتأسس كويس لان طول سنتين اللي فاتو مكنتش بذاكر وبعد ما نظمت حياتي ووقتي على المذاكرة في اول شهر تسعه حصلت مشاكل ف البيت خلتني مش قادره حتى اني افتح وحولت كلو اونلاين ولقيت ان المدرسين اللي حولت معاهم مخلصين محاضرات شهر كامل اللي هو شهر 8 ولقيت بعد مفهوق ان كل ماده عندي فيها 8 محاضرات
كل محاضره منهم بتاخد مني وقت ومجهود ومش عارفه الم حاجه وبحاول الم بس مش عارفه منعت نفسي من حاجات كتير لكن برضو في تسويف بحاول التزم بس نفسي مش عارفه
النوم عندي بطريقه رخمه بطول ف النوم عاوزه افوق بجد بس مش عارفه عاوزه انجح عاوزه مسوفش والتزم واذاكر بس مش عارفه كل حاجه مراكمه وكل مدرس عامل امتحانات ومطلوب مني ادخلها واجيب فيها درجه كويسه وإلا هتصفى وهتطرد
حد عندو حل يقولي اعمل ايه او حتى يفوقني محتاجه حد يفوقني من اللي انا فيه ومسوفش ومنامش كتير
السلام عليكم، أولا استهدي بالله كده وهدي نفسك وبلاش تضغطيها زيادة، مفيش حاجة مش ملحوقة بإذن الله. اقعدي مع نفسك في خلوة هادئة كده وورقة وقلم واكتبي كل أفكارك والدروس المتأخرة واللي مطلوب منك، وبعدها حددي الأولويات. إيه الأهم تبدئي به، وإيه تخصصي له أكتر وقت وطاقة عندك. طول ما بتبصي على الجبل المتراكم عمرك ما هتتحركي خطوة وهتفضلي بس شايلة هم إنك وراكِ كتير ومش عارفة تخلصي ولا تبدئي منين. *** جايز اللي حصل في شهر ٩ خلاكِ عملتِ عقبة نفسية جواكِ، المشاكل بتحصل ومتوقع يحصل drop في حياتنا يبوظ الخطط اللي راسمينها فلازم يكون فيه مرونة وبرمجة لأفكارك إن لسه قادرين نلحق، والشهر اللي وقع ده ملحوق إن شاء الله. لكن أنتِ غرستِ في عقلك الباطن فكرة إن اللي أسستِه في شهر ثمانية ضاع في شهر تسعة ومش هنقدر نلحقه. **** ممكن تستعيني بالذكاء الاصطناعي وتعطيه أمر هندسي يعمل لك خطة مرنة لمذاكرة المحاضرات المتراكمة مع المحاضرات الجديدة بحيث تكوني بتوفقي بين الاتنين. اطلبي منه يسألك عن أي تفاصيل محتاج يعرفها عشان يضع الخطة، زي المواد والوقت وهكذا وهو هيظبط لك الخطة إن شاء الله. *** حاولي تذاكري بطرق ذكية توفر وقت وتخليكِ تحصلي أكبر قدر في أقل وقت وبأكبر تركيز. شوفي فيديوهات (ذاكر أقل ذاكر بذكاء) واستخدمي الطرق اللي تناسبك منها. https://www.youtube.com/results?search_query=ذاكر+أقل+ذاكر+بذكاء *** فكرة منع نفسك من حاجات كتير مش هي الحل، لأن ممكن تمنعي لكن التسويف يفضل مستمر، وده لأنك مبرمجتيش نفسك ولسه جواكِ حاسة إن المذاكرة بتشكل لك ضغط ولسه وراكِ مجهود كبير للمتراكم. فالأفضل بدل المنع التام إنك تقسمي المذاكرة لفترات قصيرة وتحسسي نفسك إن مفيش مجهود ولا حاجة وإنكم هتذاكروا وقت بسيط وبعدين تكافئي نفسك بحاجة بتحبيها. لما تشيلي الضغط النفسي والخوف والقلق اللي رابطاه بالمذاكرة والتراكمات، كل المشكلة هتتحل بإذن الله. **** النوم الطويل غالبا زي التسويف، مهرب من الضغط اللي المذاكرة والتراكمات عاملينه لك. لكن برضه عشان تستبعدي أي أسباب عضوية، اكشفي باطنة وتأكدي إن مفيش أنيميا أو نقص فيتامينات، وحسني أكلك ومارسي رياضة ولو عشر دقائق في اليوم، هتجدد نشاطك وتفوقك وتحسن نفسيتك. *** والاهم من اللي فات، استعيني بالله وتوكلي عليه ورددي كتير خلال اليوم ذكر (لا حول ولا قوة إلا بالله العلي العظيم) وإن شاء الله ربنا يوفقك.💚💚
تم النشر السبت، ١٠ أكتوبر ٢٠٢٦
بصي يا بنت الحلال ابدئي وقفي تراكم القديم مؤقتا وركزي في أحدث محاضرة نزلت عشان ما تغرقيش أكتر والقديم اسحبيه محاضرة واحدة في اليوم جنب الجديدة بالسرعة العالية وبالنسبة للنوم سيبي التليفون بعيد عن السرير خالص واعملي كذا منبه مزعج عشان تقومي غصب عنك وعشان موضوع المدرسين والامتحانات اللي مخلياكي مرعوبة وخايفة تتحذفي امسكي واجب الأسبوع الحالي وحليه حتى لو هتبصي في الإجابات عشان تعدي الاختبار ده وماتطرديش وبعدين ابدئي عالجي القديم بهدوء خطوة بخطوة. . وبالتوفيق
تم النشر الأحد، ١١ أكتوبر ٢٠٢٦
يا بنتي، أول حاجة أقولها لك إن اللي بتمرّي بيه دلوقتي صعب جدًا، وإحساسك بالإرهاق والتراكم طبيعي بعد اللي حصل في البيت والتحول المفاجئ للأونلاين. بس خليني أقولك الحقيقة بصراحة وحنان: النجاح مش هيجي لوحدة، ولا هيحصل لو استنيتي "اللحظة المناسبة" أو حد يفوقك. أنتِ اللي هتفوقي نفسك، وده ممكن لو بدأتِ بخطوات صغيرة وواقعية دلوقتي. ابدئي بتقسيم المواد والمحاضرات الـ8 لكل مادة على أيام محددة، مش كلها مرة واحدة. خدي محاضرة واحدة في اليوم كحد أقصى في البداية، واكتبي جدول يومي بسيط: ساعات مذاكرة ثابتة (مثلاً من 8 الصبح لـ12، وبعد الظهر ساعتين)، وحددي امتحانات المدرسين الأولوية حسب مواعيدها. النوم الرخم ده هيحتاج روتين صارم: نامي في وقت ثابت كل ليلة، واستخدمي منبه قوي بعيد عن السرير عشان تقومي فورًا. لو لقيتي نفسك بتسوفي، قولي لنفسك "هعمل 15 دقيقة بس" وهتكملي غالبًا. وادعي ربنا بالتوفيق والعزم، لأن الإرادة من عنده، واستعيني بالصلاة والذكر عشان تهدي نفسك وسط الضغط ده. أنتِ قادرة على النجاح، واللي فاتك ممكن تتعوضيه لو التزمتِ حتى لو ببطء. جربي الطريقة دي لأسبوع وشوفي الفرق، ولو عايزة نصايح إضافية ابحثي عن أسئلة مشابهة على فدني عشان تلاقي تجارب بنات تانيين. أنا هنا معاكِ، وأنتِ مش لوحدك في المعركة دي.
تم النشر السبت، ١٠ أكتوبر ٢٠٢٦
ثانيا روحي لصديقه تشرحلك المتراكم حتى لو مادتين وتروحيلها كل اسبوع وحاولي تتقبلي الوضع لانك لو مش طايقه المذاكره مش هتثبت حاولي تطمني نفسك انا كنت ضايعه في الانجليزي وحبيت الماده لاني لقيت اللي يشرحهالي صح سواء مستر او صديق وباقي المواد خديها تحدي ولو كل يوم خلصتي ٣محاضرات كل ماده محاضره تبقي عملتي انجاز طبعا
تم النشر الأحد، ١١ أكتوبر ٢٠٢٦
اولا النوم حاولي تطبقي يوم واوعي تنامي في نصه ولو منفعش اكشفي احتمال في نقص فيتامينات مخليكي كسوله وبتنامي كتير
تم النشر الأحد، ١١ أكتوبر ٢٠٢٦
لعرض السؤال في فدني اضغط هنا