انا دلوقتي كنت علمي علوم ، و ربنا أراد لي نصيبي انه يكون ف حتة تانية خالص غير الطب
ف قدمت ع آداب ، و دلوقتي انا محتارة بين حاجتين قسم إنجليزي ؟ و لا علم نفس ؟
و انا بحب الاتنين دول جدااااا
ف كنت سمعت عن طريق النت ، انك ممكن بعد م تخلصي دراستك الجامعية ف علم النفس انك تقدمي ع رسالة دكتوراة بعدها و تبقي بعدها دكتورة نفسية و ليك عيادتك الخاصة بيك عادي
ف كنت عايزة اتأكد هل الكلام دا فعلا صح ؟ و لا كله كلام بتاع نت و خلاص ؟
و لو هو فعلا صح ، هي رسالة الدكتوراة دي لازم اخلص دراستي الاول و بعدين اقدم عليها ؟ و لا ممكن اقدم عليها دلوقتي و انا ف الجامعة عادي مافيهاش مشكلة ؟
و إيه الافضل ليا ك مستقبل كويس اني افتح بيه مجالات كتير و اقدر فيه اني اطور من نفسي مرة عن مرة ، قسم الانجليزي ؟ و لا علم النفس ؟
ارجو لو فيه حد اخصائي نفسي موجود هنا لو يقدر يفيدني و يجاوبني ع أسئلتي دي ، هكون شاكرة و ممتنة ليه جداا بجد 🤍🤍 .
بالنسبة لعلم النفس .. ف اه كلامك صح بس فيه حاجات نقصاكي شوية .. بصي همشي معاكي واحدة واحدة .. انتي دلوقتي خلصتي ال 4سنيين كلية تمام .. اول ما تخلصي انتي بقيتي اخصائي نفسي لو عندك قسم اكلينيكي ف الكلية يبقى اخصائي نفسي اكلينيكي .. بيبقى فيه في بعض الكليات قسم اكلينيكي وقسم مدرسي .. بتخصصي في سنة تالته تمام. قسم اكلينيكي بتدرسي فيه الامراض والعلاجات وهكذا .. يعني الجزء العيادي. اما مدرسي بيبقى خاص بالجزء طبعا التابع المدرسة بيؤهلك انك تبقى اخصائي نفسي ف مدرسة. اما الاكلينيكي بيؤهلك انك تبقى ف المستشفي، او المراكز .. او طبعا اي مؤسسة تانية. بعد ما تخلصي سواء اكلينيكي او مدرسي .. ده لو عندك شعب اساسا ف الكلية .. بيبقى فيه دبلومات كتير جدا بتؤهلك انك تتخصصي ف جزء معين من علم النفس .. تمام. اما الجزء اللي بتسالي عنه بالخصوص .. انك ازاي تفتحي عيادة ! الكلام ده له شروط ... اول حاجه ل اما تعملي دبلومة تطبيقية او دبلومة اكلينيكية .. او ماجستير او دكتوراه في مجال علم النفس الاكلينيكي. تاني حاجه سنتين تدريب ف اي مستشفي حكومي. ثالث حاجه .. تاخدي 7 دورات معينه طبعا من الجهات ديه .. الامانه العامة للصحة النفسية بالعباسية. الجمعية المصرية للمعالجين النفسيين. رابطة الاخصائيين النفسيين المصرية. مركز البحوث والدراسات النفسية بجامعة القاهرة. الجمعية الممصرية للعلاج النفسي والسلوكي والمعرفي. وبعد كده بتروحي تمتحني وبتاخدي رخصة من وزارة الصحة بانك معالج نفسي .. وبعدها عادي جدا تقدري تفتحي عيادة. بالنسبة للانجليزي! من وجهة نظري شايفة ان اي حد يقدر يتعلم اي لغة وباتقان بدون ما يدخل كلية خاصة باللغات. ف طبعا فكري وربنا يعمل ليكي الخير كله باذن الله
تم النشر الأحد، ٢٧ أغسطس ٢٠٢٣
بصي قسم إنجليزي ممكن في الاخر تطلعي مدرسه انا سنه تالته ثانوي ادبي ونفسي اوووي ادخل علم نفس فعلا حكايت الدكتوره ده صح انا سالت ناس كتير اوي عنها غير اني اعرف ناس في المجال ده اصلا بس تخاطب وحد تاني عن الادمان علي حسب الرساله اللي عماله انتي اول لما تخلصي 4سنين هتعملي رساله في الحاجه اللي انتي عاوزه تتخصيصي فيها بعد كده دكتوره في الحاجه نفسها مجال علم النفس مش بس جميل لاء ده ممتع بشكل حلو اووي ولانك مدرستيش علم نفس في ثانوي مش عارفه قدايه هو ممتع وسهل كمان انا لسه بدأ تالته ادعيلي ادخل المجال ده لانه حلمي من سنين 🙂💕
تم النشر الأحد، ٢٧ أغسطس ٢٠٢٣
انجليزي احسن وممكن بعد الحامعه تشتغلي باللغه في فودافون او مجال بيطلب اللغه وبتكون المؤتبات حلوه جدا وكبيره
تم النشر الثلاثاء، ٢٩ أغسطس ٢٠٢٣
اشطات تمام ماشي ، شكراً جداً لحضرتك ع النصحية 🤍
تم النشر الاثنين، ٤ سبتمبر ٢٠٢٣
لعرض السؤال في فدني اضغط هنا