لو سمحتِ بعاني من إني مش عارفه أفهم مشاعري هي أليمه لكن مش عارف افهمها حاسه بالضياع والشتات الشديد وحاليا الفتره دي بحس بتوتر جامد وبتخيل كتير وبحاول اوقف دا بس مش عارفه التخيل دا من زمان مش الفترة دي
السلام عليكم 🤍 خليني أوضح في الأول نقطة مهمة جدًا، في شوية معلومات دايمًا بتكون ناقصة في النوع ده من الأسئلة، زي السن أو المرحلة العمرية، لأن في مراحل معينة بيكون فيها التشتت وأحلام اليقظة حاجة شائعة جدًا وطبيعية. لكن هحاول أجاوبك بشكل عام وبطريقة تفيدك فعلًا أولًا: أحلام اليقظة معناها إيه؟ أحلام اليقظة أو الخيال غالبًا مش حاجة وحشة في حد ذاتها، هي طريقة بيستخدمها العقل علشان -يخفف ضغط -يتعامل مع مشاعر مش فاهمها -يهرب مؤقتًا من واقع مرهق أحيانًا بتكون وسيلة حماية نفسية، وأحيانًا لو زاد بتبقى علامة إن في مشاعر محتاجة إننا نفهمها مش نتجاهلها. ثانيًا: إزاي أفهم مشاعري أصلًا؟ وده سؤال مهم جدًا 👌 ناس كتير فاكرة إن الإنسان بيتولد وهو فاهم مشاعره، لكن الحقيقة إن فهم المشاعر مهارة بتتعلّم. الخطوة الأولى: التعلّم ابدأي إنك تتعرفي على المشاعر: في مشاعر أساسية (حزن – خوف – غضب – فرح…) وكل شعور ليه درجات وتفريعات وكل شعور ليه إحساس جسدي مختلف ممكن تدوري على "عجلة المشاعر" وتشوفي كل شعور بيبقى شكله إيه، و تبحثي اكتر عن معنى كل شعور وانعكاسه على الجسم. الخطوة التانية: الوعي بالمشاعر مش بس “حاسّة بإيه”، لكن: حسّيتي بإيه؟ إمتى؟ إيه اللي حصل قبلها؟ جسمك كان حاسس بإيه؟ ممكن تعملي ده بالكتابة، حتى لو سطرين في آخر اليوم: النهارده حسيت بتوتر لما حصل كذا… يمكن علشان كنت خايفة / متضايقة / مضغوطة. في الأول هتحسي الموضوع صعب ومش واضح، وده طبيعي جدًا، لكن مع التكرار دماغك بيتعلم يلاحظ ويفهم أسرع. ثالثًا: بخصوص التشتت والخيال هنا مهم نسأل نفسنا شوية أسئلة بصراحة: هل الخيال بقى بياخد وقت كبير من يومي؟ هل بيأثر على دراستي أو شغلي؟ ولا هو مجرد مهرب وقت التوتر؟ لأن في فرق بين خيال صحي وخيال هروبي بيبعدك عن حياتك. اخيرا في نقطة مهمة جدًا، انتِ مش مطلوب منك تفهمي نفسك مرة واحدة ولا تبقي “واعية” فجأة ولا تبطلي تحسي بلخبطة. مجرد إنك بتسألي وعايزة تفهمي ومش بتهملي نفسك ده في حد ذاته خطوة كبيرة جدًا 🤍 ابدأي بالوعي، والباقي هييجي واحدة واحدة. بعد كدا هنقدر نحدد هل الخيال محتاج تنظيم، ولا التوتر محتاج تفريغ، ولا في ضغط نفسي محتاج يتفهم؟
تم النشر الاثنين، ٢٩ ديسمبر ٢٠٢٥
لعرض السؤال في فدني اضغط هنا