السلام عليكم
اتمني سوالي يظهر وتفيدوني🤍
دلوقتي أنا ثانويه عامله 3 ثانوي عام
حاسه مستوايا بقى في النازل ولحد دلوقتي لينا تقريبا 4 شهور في الثانويه اهو ومش حاسه بأي تحسن في الدراسه نهائي ولا حتى عدد ساعات مذاكرتي بيزيد وأغلب الوقت بكسل اذاكر وبكون مدايقه ونفسيتي بتأثر ع مذاكرتي
ازاي اعالج ده وازاي اعالج كل المواد اللي عندي يعني عندي مشكله كبيره في الانجلش ودائما بنساه مهما حليت ومهما ذاكرت فمحتاجه حل عشان اثبت القواعد واي اللي يخليني اظبط كل المواد كويس اوي حل وشرح حتى اللي فات (عندي ذاكرة قويه عنه برغم تقصيري الحمد لله) بس دايما بحس إن كده مش كفايه وعاوزه اعمل اكتر من كده ففيدوني نفسي ادخل كليه الطب البشري وتنجح فيها🙏🏻♥️
من بعد اذنكم واسفه لو طولت عليكم اعتبروني اختكم في الله🤍
بصى حاولى تنظمى وقتك تصحى بدرى و تنامى 6ساعات و تنظمى صلاتك فى معادها على قد ماتقدرى و قبل ما تروحى الدرس انتى تعرفى الجزئية اللى هتتشرح تكونى سمعها على اليوتيوب ودة هيساعد المعلومة تثبت و تفهمى اكتر وحلى كتير على قد م تقدرى ومش من مصدر واحد خلى مثلا للمدة كتبين واحد مستواه على والتانى متوسط ودة هيفرق اووى هتعرفى تحلى وتفهمى مستوى الاسئلة وى القديمة حاولى تراجعى و تحلى حصة مثلا من مادة معينة ف يوم وتحلى عليها وهتعرفى تلميها ان شاء الله و الحل الكتير هو اللى هيفرق واسعى وان شاء الله لو ليكى خير ف طب هتدخلى وانتى قدها و متخليش الافكار السلبية ف دماغك شجعى نفسك كل م تعملى حاجة كفي نفسك عليها و اعملى مخطط يومى وهيفرق معاكى و ربنا معاكى انتى قدها
تم النشر الجمعة، ٢١ نوفمبر ٢٠٢٥
بصي نفسيتك وحشه علشان انتي بتوهمي نفسك انها وحشه وعلشان شيطانك عارف انها اهم فترات حياتك بيحاول يوهمك ويبعدك عن المذاكره فاستعيذي بالله كدا من الشيطان الرجيم وصلي عالنبي بصي انا ثانويه ٢٠٢٥ بدات بشغف كبير وكنت بحل في الكميا بس مندليف ونيوتن والامتحان وافوجادو ومذكره خاصه بندرسين مختلفين طبعا هتقولي واو عليكي انتي خليتي دا كله!!؟ هقولك انا غبيه جدا ي ريتني ما حليت دا كله بصي اقسملك بالله الساعه اللي كنت فيها بمتحن ندمت اني ما حفظتش اهم حاجه الحفظ اولا ثم الفهم ولو هتحلي عالدرس سؤالين فدا تطبيق المهم تحفظي وتحلي من حاجه واحده علشان ما تتشتتيش وبالنسبه للكسل كلنا بنكسل والله بس في اوقات بتبقي الطاقه في جسمنا عاليه جدا والشغف عالي جدا ودماغنا بتبقي في اقصي درجات التركيز مثلا انا مكنتش بذاكر طول النهار لان عندي دروس مكنتش بذاكر بالليل علشان لسه راجعه من الدروس تعبانه كنت بعمل اي بقا بصحي عالساعه ٢ واكمل لحد ميعاد الدرس مذاكره وآه لو تحرمي نفسك ملذات الحياه من تلفزيون واتس آب فيس بوك انستجرام هيبقي عال العال مش بقولك ما تفتحيهمش خالص لا ممكن تخصصي وقت نص ساعه في اليوم مثلا ليهم وبالنسبه لمستواكي النازل حابه اقولك إن انا بدات فيزيا شهر ٧قعدت لشهر ٤مش بعرف احل مقاومات لكن التكرار علمني ازاي احل ومستواكي هيتحسن بس في الوقت المناسب لما تنظمي وقتك تذاكري اول باول يعني اي تذاكر اول باول يعني انك تبدأي بآخر حاجه اخدتيها مش من اول درس اخدتيه زي ما كنت هبله وبعمل كدا😂 ماشي وصدقيني شهر ٤و٥ بيفرقوا جدا هتلاقي نفسك بتطلعي والله كان معايا ناس مستواهم مش حلو خالص عملوا اي اشتغلوا علي نفسهم حفظوا جابوا في التمنينات وناس فاهمه وشاطره جابوا ٧٠ وهقولك على اخر حاجه اوعك تسيبي نفسك لدروس اللون لاين حذاري هتراكمي لان مفيش عليكي رقيب الآون لاين دا في شهر ٤ او ٣ والله عندي ملازم وكتب وحاجات مهمه كتير بس الله المستعان مش عارفه كان ممكن اديها لك ازاي ربنا يوفقك وبردو كنت حابه اشرح نحو وبااغه وكمان انجلش ليكي بس الله المستعان مش هعرف 😂ربنا يوفقك❤️
تم النشر الجمعة، ٢١ نوفمبر ٢٠٢٥
السلام عليكم انا كمان طالب ٣ ثانوي ، اللي انتي فيه ده بسبب قلقك و خوفك و ضغطك على نفسك، انتي محتاجه انك تهدي و تاخدي نفسك شويه لو قهوة او شاي او اياً يكن المشروب اللي بتحبيه و تقعدي مع نفسك نص ساعه ف اخر كل يوم، من غير تليفون من غير مذاكرة، اتنفسي بالراحه و افصلي شويه من الكركبه اللي ف دماغك دي، اوعدك ساعتها انك هتكوني احسن، طبعاً الروتين و جدول المذاكرة و تحديد وقت للمذاكرة دي حاجه لابد منها، بس مش تحت شرط تمشي عليها بالدقيقه و الثانيه، انتي إنسانه مش روبوت، و كمان و قت م تحسي انك تعبتي من المذاكرة قومي اعملي حاجه و بعدين ارجعي كملية، يعني مثلاً اغسلي وشك بمايه ساقعه شويه(عشان تصحصحي) او اعملي المشروب اللي بتحبيه، عارف ان دي شوية حاجات بسيطه بس و الله الحاجات لو طبقتيها هتكوني احسن من الاول وساعتها متنسيناش بدعائك و أخيراً ربنا يوفقنا جميعاً
تم النشر الأحد، ٢٣ نوفمبر ٢٠٢٥
السلام عليكم ورحمة الله وبركاته. هو افضل حل لاي طالب في ثالثه ثانويه هو انه يمشي بروتين مظبوط لنومه ويكون ظابطه على حياته بس يبقى ماشي بروتين مظبوط وثاني حاجه يكون قافل سوشيال ميديا خالص ممسوحه كلها ولحد دلوقتي مش عايز اأنزلها ذي قلتها وعلاقه مع ربنا قبل كل حاجه
تم النشر الأحد، ٢٣ نوفمبر ٢٠٢٥
بصي انا وانتي نفس الحال لو حتاجتي مساعدة اختك موجودة نعين بعض انا تلتة ثانوي بردو
تم النشر السبت، ٢٢ نوفمبر ٢٠٢٥
لعرض السؤال في فدني اضغط هنا