أنا معرفش ليه أنا فاشلة فعلاً بجد. كل حاجة عندي حاسة إني فاشلة فيها خالص. كل حاجة أحاول فيها كده تدل إنّي فاشلة: في المذاكرة، وفي الشغل، وفي الدراسة، وفي البيت، وفي الصلاة برضو… كل حاجة. أنا مش ناجحة في أي حاجة بجد.
تعبت من إني فاشلة ومش ناجحة. المشكلة إني مش لاقية سبب ليه كده. كل حاجة أحاول فيها أكون مقصّرة. حاسّة إني مش قادرة… تعبت. عايزة أبعد عن كل الناس حواليّ. كل حاجة…
الناس بتقول عليّ إني هبلة. أنا مضايقة من كده… ليه هبلة؟ ليه لما أكون بتعامل بتلقائية أبقى هبلة؟ ليه يعني؟
الناس كلها… معنديش صحاب، مفيش حد جنبي خالص، محدش حاسس بيا خالص. ليه؟ أنا عملت إيه بجد؟ ليه كل حاجة بعملها أفشل فيها؟
لحد نفسي… مش واثقة فيها وشكلي مش حلو. أنا كارهة نفسي وحياتي بجد. مش عارفة أنظم حياتي…
كل حاجة عشوائية. تعبت بجد، حاولت بس معرفتش… زهقت. أنا فعلاً تعبت… أعمل إيه؟
أنا مش أنجح في أي حاجة بجد… لا دراسة ولا شغل ولا حياتي. ليه كل حاجة عليّا كده وأنا مش قادرة أقوم؟ لما تبقي لوحدك ومش عارفة تساعدي نفسك تعبت. تعبت خلاص مش قادرة."
السلام عليكم، ارجعي كده للسؤال واقرأي كم مرة كررتِ كلمة فشل وفاشلة ومش ناجحة ومش ومش... كل دي توكيدات سلبية عمالة تأكديها على عقلك الباطن، ودي مشكلة كبيرة جدا. عقلك الباطن بيصدق أي حاجة بتغذي بها عن نفسك وبينجحك فيها، هتفضلي تقولي له أنا فاشلة هترسخي الفكرة جواه وهينجحك في الفشل فعلا. أول حاجة عشان تكسري دائرة الفشل دي إنك تبرمجي عقلك من تاني. حتى لو مفيش نجاح انت شايفاه حاليا ابدئي اشتغلي على الأفكار الإيجابية وشجعي نفسك وازرعي في عقلك إن أي فشل أو وقوع مش معناه إني فعلا فاشلة ومفيش نهوض من الوقعة دي، بالعكس كل فشل (من وجهة نظرك) هو خطوة ناحية النجاح في الأساس. كل فشل بنتعلم منه وكل خطوة غلط لما نصححها بتقربنا للطريق الصح. *** عارفة الكلام سهل والتنفيذ أكيد صعب، بس مش مستحيل. *** استعيني بالله الأول وبعدين اشتغلي على نفسك، اقعدي مع نفسك وهاتي ورقة وقلم واكتبي كل أفكارك العشوائية ومخاوفك وفضي دماغك خالص عشان تعرفي ترتبي الأفكار بعد كده وتلاقي أساس المشكلة وطريق الخروج منها. ** ممكن تكتبي على الورقة الفكرة السلبية وتشطبي عليها أو تحطي علامة غلط وتكتبي قصادها الفكرة الصح. يعني تشطبي على كلمة أنا فاشلة وتكتبي قصادها (أنا ليه أستحق إني أكون ناجحة) (ليه وإزاي أنا أقدر فعلا أكون ناجحة) هتلاقي إجابات فعلا ليه تستحقي وليه وإزاي تقدري. ** الموضوع هياخد وقت وجهد لأن التغيير كده محتاج وقت وصبر ومجهود. ** حاجة مهمة كمان لازم تعرفيها، لما تبقي عاوزة تمسكي كل الخيوط مرة واحدة وتحلي مشاكلك كلها وتنجحي في أهداف كتير مرة واحدة هتلاقي نفسك مش قادرة تمسكي حاجة منهم وهتشتتي نفسك ومش هتحققي منهم حاجة، فالحل، تبدئي واحدة واحدة وتمشي خطوة خطوة، أرشح لك تشوفي فيديوهات عن (نموذج عجلة الحياة المتوازنة) هتساعدك تشوفي أوجه القصور في حياتك وإيه أكتر حاجة لازم وضروري تبدئي تشتغلي عليها هتلاقي فيديوهات كتير شارحاه على يوتيوب... ممكن تشوفي الكورسين دول مثلا وإن شاء الله يساعدوكِ. https://www.youtube.com/playlist?list=PL9qj2CGqAHHH2OZCzkiKTLzd2YQQe6pEm https://www.youtube.com/watch?v=eFLyTB9GC8Q&list=PLCnYSnTcuIm8GFg9ONsOZZPv0oUeoy7BD&index=1 *** وخدي راحتك في رحلة التغيير، من غير ما تضغطي نفسك ولا تملأيها بأفكار سلبية. ** وبالتوفيق إن شاء الله.
تم النشر الثلاثاء، ١٨ نوفمبر ٢٠٢٥
اهم حاجه هي علاقتك بربنا ودي لو انتي ناجحه فيها يبقي كويس جدا جدا ، وكمان حاجه فكرة ان معندكيش اصحاب و انك مش حلوه و عشوائيه و بتتكلمي بتلقائية او هبله زي ما قلتي حلها حاجه واحده بس هي ثقتك في نفسك هتيجي من قربك لربنا طبعاً وانك تكوني مستغنيه عن الناس واهم حاجه نفسك كوني انانيه حبي نفسك اكثر هيكون اه صعب هتيجي في وقت تقولي بس انا عايزه اصحاب ، خلي نفسك هي صديقك الاول و الاساسي صدقيني من بعد اما تحبي نفسك كل حاجه هتتحول ( كنت زيك بالظبط و اسوأ ) الموضوع مش هيكون سهل وهتيجي في وقت تبصي برضوا علي نفسك و تقولي انا ليه لوحدي ليه مش حلوه بس بعدها بشويه هتحسي انك اجمل بنت و غيري مقاييس الجمال عندك، لان مقياس الجمال بالنسبالي هو ان وشي اقدر ابصله علي طول مش بقي فائقة الجمال و الهبل دا و غيري نظرتك لكل حاجه مثلا لو شايفه ان تلقائيتك هبل بسبب ان حد قال كدا بصي بطريقه اخري طب ما يمكن هو اللي معقد ومش عارف يكون تلقائي ف بيحبطني، لو غيرتي المقاييس و نظرتك لكل حاجه هتعيشي ملكه، وطبعاً طريق التغيير مش سهل و طويل كمان
تم النشر الأربعاء، ١٩ نوفمبر ٢٠٢٥
حل كل مشاكلك في صلاتك وعلاقتك بربنا
تم النشر الأربعاء، ١٩ نوفمبر ٢٠٢٥
السلام عليكم ، عذراً ع قسوة كلامي ، بس ف الصلاة مش هقدر أجملك الكلام !، متسأليش ليه بيحصل معاكي كدا و أنتِ مُقصرة و ناسية ربك ! و عموماً حبيت أقولك أول آيتين جم ف بالي لما قرأت السؤال بتاعك [ أَلَمْ يَأْنِ لِلَّذِينَ آمَنُوا أَن تَخْشَعَ قُلُوبُهُمْ لِذِكْرِ اللَّهِ وَمَا نَزَلَ مِنَ الْحَقِّ وَلَا يَكُونُوا كَالَّذِينَ أُوتُوا الْكِتَابَ مِن قَبْلُ فَطَالَ عَلَيْهِمُ الْأَمَدُ فَقَسَتْ قُلُوبُهُمْ ۖ وَكَثِيرٌ مِّنْهُمْ فَاسِقُونَ] ،، [وَلَا تَكُونُوا كَالَّذِينَ نَسُوا اللَّهَ فَأَنسَاهُمْ أَنفُسَهُمْ ۚ أُولَٰئِكَ هُمُ الْفَاسِقُونَ ] ، هكتفي بالرد ب الآيتين و اسيبلك البحث عن تفسيرهم ، و نصيحة توبي قبل فوات الآوان ! [ فَخَلَفَ مِن بَعْدِهِمْ خَلْفٌ أَضَاعُوا الصَّلَاةَ وَاتَّبَعُوا الشَّهَوَاتِ ۖ فَسَوْفَ يَلْقَوْنَ غَيًّا (59) إِلَّا مَن تَابَ وَآمَنَ وَعَمِلَ صَالِحًا فَأُولَٰئِكَ يَدْخُلُونَ الْجَنَّةَ وَلَا يُظْلَمُونَ شَيْئًا ] ، هداكِ الله و وفقك
تم النشر الثلاثاء، ١٨ نوفمبر ٢٠٢٥
اخبار الصلاه ايه
تم النشر الثلاثاء، ١٨ نوفمبر ٢٠٢٥
لعرض السؤال في فدني اضغط هنا