السّلام عليكُم ورحمةُ اللّهِ وبركاته ^^
عساكُم بخير جميعاً ان شاء اللّٰه.
أنا بواجُه مشكلةة بتسببلي ضغط كبير عليا، ألا وهيا إن انا أي حد أما بيشوفنِي بيتوقع فِيا شخصيةة مش بتغلط و مثقفةة وعاقلةة وممتازة فِي دراستها وفقيها فِ الدين وصفات وكِده،اعتقد انهم بيفكروني كِده عشان طريقةة لبسي فاهمين أو ان كلامِي قُليل بس الطبيعي إني قاعده وسط ناس اول مرة أشوفهم او قعدتي معاهم قُليلة طبيعي يكون كلامِي قليل " عِند الحاجةة " ولو حصل تصرف مثلا زي لو روحت عملت إختبار تحديد مُستوى ومجبش الدرجةة المطلوبةة عشان أتقِبل بيبوصلوي بطريقةة واضحةة كده معناها الإستنكار او لو اتصرفت تصرف طبيعي مش هقول تلقائِي إندفاعي بغرض ان اخليهم يتكلمو معايا عادي بدون تكلُف ف المُعاملةة منهم نحيتي بيحسسوني إني خذلتُهم هو انا مش فاهمةة هيا الناس فاهمة النُضج غلط او الناس مش قادرة تستوعب ان احنا كلنا بني آدم وبنغلط وبنتوب عادي مش قادرين يستوعبو ان مفيش انسان كامل،لي بحس ان الناس بتحب الأشخاص اللي بتشوف نفسها عليهم انا مش بتصرف كده بس اما بيكون كلامي قليل بيكون فيه احترام وتقدير أوفر أوي ونا مش بحب حد يتكلف ف المُعاملة معايا بالطريقةة دي خصوصا لو في بنات من سني او اكبر مني لان انا شكلي اكبري من سني عندي 17 سنة فاهمين عادي بحب التعامل اللي بيكون فيه احترام و حدود بس بستغرب اوي لما اعامل حد كويس ويقلل من احترامو معايا لمجرد اني اتكلمت معاه شويةة يعني شيء يجنن بصراحةة او نظرة الخُذلان دي بجد والله بتجرحني من جوايا انا مش مسؤلة انك تشوفني كِده يعني الواحد بيحاول انه يلتزم على قد ما يقدر بس انا مش فاهمةة الناس بتفكر ازاي بجد أتمنى بجد مساعده انا بتعب لما بلاقي حد حاطط توقعاته فيا كبيرة كده واحس اني خذلته من وجهة نظره هو، الموضوع ده مش عموما انا ونا صغيرة ونا فِ 2 إعدادي كان في ناس بتقول عني بنت مش كويسة بيقولو ان ده احساس بيجلهم كده وهما شخصيتين، انا اتخطيت الموضوع الحمد لله انا مكنتش بعمل حاجةة غلط بس عارفين احساس ان واحده تيجي تقولي طنط بتسأل عليكي المُدرسين عشان بتقول انها مش مطمنالِك، انا اتخطيت الموضوع ده الحمد لله بس مشكلتي دلوقتي ف اللي بيحط فيا توقعات انا مش مش قدها بس لازم الناس تفهم ان الشخص العاقل ده مش بيكون مولود كده يعني. معلش كلامي متلغبط شويةة بس انا مش عارفةة اعبرلكم ازاي كويس لو في حاجةة مش واضحةة ممكن تسألوني.
وعليكم السلام ورحمة الله وبركاته كويس اوي انك واعية بأن الاشخاص مش ملايكة، وكلنا اكيد فينا صفات كويسة وصفات تانية لأ .. لاننا الخير والشر معا واحنا اللي ب ايدنا نظهر ايا ما كان. في الحقيقة التصرفات النابعة من الناس ديه بالشكل ده .. خاصة لو كانوا غرباء، او مش قربين منك بصفة شخصية .. او بشكل ما احسن حل ليهم هو تجاهل ما يقولونه .. لان ببساطة احنا مش مطالبين نصحح فكرة الكل عننا او اننا نثبت ليهم شئ معين .. تخيلي معايا كده! احنا لو فضلنا نصحح كل شئ عننا للناس.. انا عملت كذا بس انا قصدي كذا ..! لا لا انتي فهمتيني غلط .. انا اكيد مقصدش كده .. هتتعبي لو فضلتي تبرري للناس، او تبرري جوا عقلك كل الكلام ده .. + الناس كلامها كتير اوي، ولازم يدخلوا في اي حاجه. انتي بقى تعملي ايه؟ اتصرفي زي ما انتي معتادة انك تتصرفي، بطبيعتك .. ولو فيه شخص قلل من احترامك بشكل صريح وواضح طبعا اعملي له حدود ووقفة في الكلام بالاسلوب اللي اتعامل بيه معاكي، علشان ده ميتكررش. اهم حاجه انك تعملي حدود لفسك وحدود مع الناس .. علشان محدش يتخطي حدوده معاكي . ودمتي سالمة
تم النشر الأحد، ١٣ أغسطس ٢٠٢٣
وعليكم السلام ورحمة الله وبركاته القوالب وسنينها ...عارفاها انا دى طبع البشر بيدوروا على قوالب للكون كله القوالب دى من صنعهم هما ...فاحنا بنتعب نفسنا لما نحاول نفهم القالب بتاعهم قبل ما نرفضة اصلا الحل للقوالب اننا نرفضها وبس ...وردودنا عليهم تكون بالافعال عشان يشوفوا رفضنا للقالب ....ده يتقال بجملة بسيطة جدا لاى حد بيحاول يفرض عليا القالب اللى هو عامله ( ده رأيك انت بس واتمنى تتعرف عليا انا من افعالى اكتر عشان هى دى طبيعتى بغض النظر عن اى اراء ) من زمان والناس بتستنكر اى حاجة بره القالب بتاعهم ...واكثرها مع الانبياء ( ايه ده هو النبي بياكل زينا ويمشى فى السوق -- ايه ده هو النبيى بيبقى مريض - ايه ده هو ينفع النبى يقف عنه الوحى ده اكيد ربه تخلى عنه ) وكتييير من كده بقى حدودك ومبادئك متسيبيهومش رهن مراجعة الاخرين ...فقط المقربين الثقه اللى بتسمعى منهم لانهم على قدر من الحكمة ...غير كده ...انتى لستى هنا لابهار احدهم ولا لتكونى على قدر قوالبهم او توقعاتهم فلتذهب توقعاتهم مع الريح
تم النشر الأحد، ١٣ أغسطس ٢٠٢٣
متخليش كلام اي حد يأثر عليكي وخليكي واثقه من نفسك مهما قالوا عليكي واللي يحاول يضايقك متحطيش في بالك كوني دايما زي ما انتي عايزه وتكوني بترضي ربنا في اللي بتعمليه وزي ماقلت متتأثريش بكلام اي حد مهما كان وحش وربنا معاكي واتمني اكون ساعدتك شويه
تم النشر الجمعة، ١٨ أغسطس ٢٠٢٣
الموضوع ده أنا بواجه شخصيًا، وبالأخص في الإلتزام، الحمدلله قد منّ اللَّهُ عليَّ بإمامة الناس في بعض الأوقات و ده عمل ضغط أكبر، وأغلب الناس عندهم نفس فكرة الشخص المثالي، بالأخص لو ملتزم، ومش بواجه الموضوع بالعكس بقيت بتقبّله عادي، وأنا هتعب نفسي ليه يعني، وعارف إن مينفعش نجبر حد يطلع عند حسن ظننا، بس مش كل البشر واحد، ما عليكي إلّا أن تتقبلي الأمر، والتعامل معه بأريحية، و ادعي الله بالثبات في الأمر والعزيمة على الرشد، ومهما حصل التزمي بالأمر بالمعروف والنهي عن المنكر واتباع الحق دائمًا، مهما واجهك الناس بغلطاتك لأن ده بيبقى أغلب الرد، و اللَّهُ المُستعان.
تم النشر الأحد، ١٣ أغسطس ٢٠٢٣
لعرض السؤال في فدني اضغط هنا