ماذا أفعل حيال شبابي الذي ضيعته في المذاكرة دون جدوى؟

Question

السلام عليكم ، أنا تالته ثانوي علمي رياضه ، المدرسين قرروا كلهم يبدأوا في شهر سبعه ونا كنت لسه يعتبر مأخدتش اجازه ولا استمتعت فقررت إن ابدأ تمانيه، اتراكم عليا حاجات كتيره اوي اوي لإن في مدرسين بينزلو ب ال٣ محاضرات في الأسبوع ، انا باخد كلو أونلاين يعني مبنزلش من البيت خالص ، و طول عمري مكنتش بنزل دروس سنتر ،، المهم قولت هحاول ألم و عملت جدول مشيت في بدايتو و جيت ف اخر اسبوعين منو راكمت كل حاجه فيهم ده غير المتراكم الي قبلو ، حاولت ألم بقيت واصله لمرحله إن انا مبطلعش من الأوضه و بصحى من الفجر الفاصل الوحيد الي باخدو بيبقا عشان أكل ، لدرجه ان انا مبقتش اقعد مع عيلتي بقيت ف عُزله تامه بقالي كدا اكتر من ٣٧ يوم ، عامله ذي الروبوت مبيعملش حاحه غير إن بيذاكر ، بس تعبت بجد و فقدت امل مش عارفه ألم حاجه حاسه ان بكروت و كل مدى م الموضوع بيسوء عملت كذا جدول بس لسه كل حاجه متراكمه نفسيتي بقت ف الأرض حاولت أفصل يوم حتى ، ضميري بيأنبني ع اليوم ده و برجع أندم لإن كل يوم او ساعه بتضيع براكم اكتر ، اي يوم اجازه احاول افصل بالحاجه الي بحبها محسش إن مستمتعه نهائي من كتر التفكير ، أنا وصلت لمرحله إن ونا نايمه بحلم باللي ذاكرتو و بحل مسائل عليه كمان ، مراكمه رياضه جدا و مراكمه كيميا اوي حاسه ان مبذاكرش رغم إن مبقومش من ع الكتاب مش عارفه في ايه و مضغوطه اوي اوي انا قربت انسى شكل العالم الخارجي من كتر منا مبنزلش ، أنا بيتوتيه بس حاسه بإرهاق شديد عمري ما حسيت بيه ، بقيت صاحيه بس عقلي واقف مش شغال ، بعيط كتير و مش عارفه أضحك ولا اهزر مع اخواتي حتى دايماً سرحانه حاسه أن بقيت مريضه نفسياً و محتاجه اتعالج ، و كل ده في البدايه بس ، حاسه كلو بيجري ف السباق وأنا لسه المتأخره ، الي ف سني خلصو فرعين رياضه ونا لسه ف فرع و نفس الكلام ف باقي المواد أنا كارهه الدراسه بشكل كبير أوي بتعب جدا لما بدخل فيها عمري ما حسيت ف مره ونا ف الأجازه إن عايزه أرجع للدراسه ، الموضوع ده بدأ من صغري كت بذاكر كتير اوي كان كلو ياخد اجازه اخر السنه ونا بذاكر ، حاسه المذاكره ضيعت شبابي كلو معنديش ذكريات ، منكرش إن بقيت ناضجه بسببها عن اي حد ف سني ب شهاده ناس كتيره بس انا مش عايزه النضج ده أنا عايزه أعيش سني و حياتي ذي كل الي قدي ، طول عمري مستوايا حلو بس انحدر ف ثانوي ذي ميكون خلاص طاقتي نفذت و مفيش حاجه تشحنها أبدا لا ممارسه هواياتي ولا حتى الخروج أنا مُرهقه بجد و مفيش أي دافع مخليني قادره أكمل حاسه إن مش قد اي حاجه و إن اختياري لثانوي من البدايه كان أكبر غلط ، اسفه ان طولت و شكراً لو حد قرأ للأخر

Accepted Answer

السلام عليكم التوازن فى الحياة اهم من اى حاجة ولو فى فترة هتبقى بدون توازن زى الثانوية هتبقى بتتعاملى معاها انها مؤقتةعشان متحسيش انك بتضيعى عمرك ولا حاجة المدرسين بيوزعوا الدروس واالفيديوهات الاون لاين بالذات عشان تحسى بأهمية الموضوع...الحقيقة ان ممكن ده يتجمع فى عدد فيديوهات او حصص اقل من كده فانتى اللى بتقولى انك مراكماه حاليا هتدورى ليه على حصص مراجعة تلميه فيها وتكملى الباقى بالنظام المعتاد إن شاء الله.

Answer

انا والله في نفس همك ده معلش اضغطي نفسك وحاولي تستمري كده شويه مفيش حل تاني هيجي وقت اكيد هتبقي ملاحقاهم تالته سنه مهمه مينفعش حد يقولك كبري دماغك وسيبي اللي وراكي وراكي حاولي بس تسرعي ركزي مع وقت الفيديو والساعه ركزي مع الساعه عشان ميضعش منك وقت كتير عشان تحاولي تستعجلي في شغلك جربي تعملي جدول كده بالمتراكم وتقسمي الدنيا احضري مثلا مراجعه سريعه كده للوحده الاولى في الرياضه تخدي فكره عن كل درس كده بعدين مش مشكله لحقتي تشوفي درس درس تمام ملحقتيش احنا لسه في الاول كده كده وهتراجعوا كتير جدا بس مهم جدا متفقديش الامل ربنا معاكي

Answer

السلام عليكم، ما دام وصلتِ لفكرة إن الكل بيجري في سباق يبقى لازم تقفي هنا وتسألي نفسك هم ليه بيجروا وأنتِ ليه لازم تجري معهم، إيه الغاية؟ لو حاسة إنك بتدوري في ساقية يبقى لازم تجبري نفسك تكسري الدائرة وتوقفي لفترة، أنتِ وصلتِ نفسك لاحتراق نفسي ووظيفي... عشان كده هواياتك نفسها مبقتيش قادرة تلجأي لها عشان وحاسة بفصلان من كل شيء. *** الحل زي ما قلت اكسري الدائرة واقفي. يعني ليه السباق اللي أنتِ مرعوبة عشانه واحنا أصلا لسه هنبدأ شهر 10؟ لسه عندك وقت كتير وتلحقي تعملي حاجات كتير إن شاء الله. ** تفتكري كل الطلبة بدأوا بدري؟ كل اللي نجحوا السنين اللي فاتت بدأوا من أول يوم أو محصلش ومروا بظروف وراكموا؟ الفكرة مش في بتجري وتسبق قد إيه. الفكرة كلها بتجري صح وبتحافظ على طاقتك ولا لأ عشان تفضل مكمل لخط النهاية. إيه الفائدة لما تحرقي طاقة ونفسية من البداية ومتقدريش تكملي في أهم وقت؟ *** انسي خالص اللي بيجروا معك في نفس السباق (ولو إني مش شايفة إن الواحد مننا مجبر يشارك في سباق مع الآخرين) انسي هم وصلوا فين وانتِ لسه فين. انسي المدرسين سابقين في الدروس قد إيه. ركزي بس على خطتك اللي لازم تتضمن جنب دراستك، اهتمامك بعلاقتك بربنا وعدم تقصيرك في عباداتك، تتضمن اهتمامك بصحتك الجسدية والنفسية. مش مطلوب مني أجبر نفسي أشارك في سباق يستنزفني، لكن لو مضطرة أدخل يبقى أدخل بشروطي وخطتي وأهدافي أنا مش اهداف رسمها المجتمع والأهل. *** افصلي من المذاكرة خالص كم يوم وانسي أي حاجة متراكمة، خصصي الكم يوم دول تختلي بنفسك عشان تعيدي ترتيب أولوياتك وأفكارك. اقعدي مع نفسك واكتبي كل اللي شاغلك وكل اللي كنتِ نفسكِ تتعلميه وتحققيه وإيه الصورة اللي عاوزة تشوفي نفسك فيها كمان كم سنة. حددي هدفك من الدراسة إيه؟ أنتِ هدفك مش تسابقي الباقيين، هدفك تتغيري وتتقدمي بكل معلومة جديدة بتكتسبيها كل يوم وإنك تكوني كل يوم أفضل من اليوم اللي قبله. خلي الإجازة القصيرة دي لبرمجة فكرك عشان ترجعي بتفكير صح ومظبوط وافتكري إننا أصلا مش جايين الدنيا عشان ننجح في الثانوية العامة. النجاح في الدراسة ده مجرد وسيلة ضمن وسائل تانية كتير عشان غاية أكبر لوجودنا في الدنيا. ** أرجو أكون أفدتك وإن شاء الله تلاقي الطريق الصحيح. وبالتوفيق إن شاء الله.

ماذا أفعل حيال شبابي الذي ضيعته في المذاكرة دون جدوى؟

نفسية

تعليمية

سؤال من احد أعضاء فدني

تم النشر الاثنين، ٢٩ سبتمبر ٢٠٢٥

4 إجابة

14 تعليق

عندك مشكلة؟ محتاج استشارة؟ فدني مجتمع يساعدك في حل مشاكلك ويجيب عن أسئلتك