نفسي افهمني نفسي اعرف اللي بحبه وايه اللي بكرهه نفسي اعرف موهبتي جربت كل حاجة مش نافعه حاسه اني ضايعه مع اني حلمي كبير بس هو صعب جدا لو حد مر قبل كده زي ياريت يقولي اعمل وشكرا 🥺🩶
السلام عليكم، إحساسك مفهوم وطبيعي خاصة لو كنتِ صغيرة بالسن، والإنسان عادي ممكن يعيش عمره كله بيحاول يفهم نفسه فلا تخلي النقطة دي عائق نفسي بالنسبة لك. فهم نفسك هيحصل من خلال تجاربك وتفاعلك مع الحياة وكمان إنك تلاقي موهبتك وميولك، لو هنصحك بحاجة مهمة تفيدك فهي القراءة، لو مش عندك عادة القراءة ابدئي نميها من دلوقتي، القراءة هتوسع مداركك وانفتاحك على العالم والحياة ومع الوقت عقلك وشخصيتك هتتطور وهتفهمي نفسك أكتر. ** كمان ممكن يفيدك تعملي تحليل لنمط شخصيتك، هيقربك شوية لفهم شخصيتك وميولك. جربي الاختبار ده وحاولي تلتزمي بالتعليمات بدقة عشان نتيجة الاختبار تكون دقيقة. https://www.for9a.com/personality-test ابحثي عن نموذج عجلة الحياة المتوازنة على يوتيوب، دي بتقسم حياتك لجوانب عدة (روحاني ونفسي وصحي ومالي ومهني وهكذا...) ولما تحللي كل جزء منها هتشوفي إيه النقص في كل جانب من حياتك وإيه محتاج تشتغلي عليه عشان تكون حياتك ناجحة ومتوازنة وتقدري تحققي أحلامك إن شاء الله. https://www.youtube.com/watch?v=e2MpsTo73a4 جربي كده ولو لسه عندك أي استفسار اكتبي لي في تعليق. بالتوفيق.💚💚
تم النشر الثلاثاء، ١٦ يونيو ٢٠٢٦
أول حاجة، أنا فاهمة شعورك تمامًا يا قمر، إنك حاسة إنك ضايعة ومش عارفة نفسك رغم إن عندك حلم كبير. ده شعور طبيعي جدًا بيمر بيه كتير من البنات في مرحلة معينة، ومش معناه إنك فاشلة أو إن حلمك مستحيل. العكس، ده دليل إنك بتدوري على نفسك بصدق، وده أول خطوة مهمة. عشان تفهمي نفسك أكتر، جربي طريقة بسيطة وفعالة: كل يوم اكتبي في ورقة أو مذكرة 3 حاجات عملتيها وحسيتي فيها بالراحة أو الفرحة، حتى لو حاجة صغيرة زي إنك رسمتي أو قرأتي كتاب أو ساعدتي حد. وكمان اكتبي 3 حاجات حسيتي فيها بالملل أو الضيق. مع الوقت هتكتشفي نمط واضح عن اللي بتحبيه واللي بتكرهيه. كمان، اسألي نفسك أسئلة زي: إيه النشاط اللي بيخليني أنسى الوقت؟ أو إيه اللي بيخليني أحس إني مفيدة؟ ده هيساعدك تعرفي موهبتك تدريجيًا بدون ما تجربي كل حاجة مرة واحدة. بالنسبة لحلمك الكبير اللي شايفاه صعب، قسميه لخطوات صغيرة جدًا تقدري تعمليها يوميًا، زي إنك تتعلمي مهارة واحدة مرتبطة بيه أو تسألي ناس ناجحين في نفس المجال عن تجاربهم. كتير من اللي مروا بنفس الإحساس دول بدأوا بخطوات بسيطة زي كده ولقوا طريقهم. لو عايزة أفكار أكتر، ابحثي عن أسئلة مشابهة على فدني عشان تشوفي تجارب بنات تانيين. أنتِ قادرة، وهتوصلي إن شاء الله، خليكي صبورة مع نفسك 🩶
تم النشر الثلاثاء، ١٦ يونيو ٢٠٢٦
التجارب والمواقف اليوميه هي اللي هتخليك تفهمي نفسك ،، يعني ركزي في شعورك عند المواقف في مواقف هتحسي إنك متضايقه لما بتحصل وفي مواقف هتكون متفقه جدا مع مبادئك ومن الملاحظات المتكرره هتبدأي تفهمي نفسك
تم النشر الثلاثاء، ١٦ يونيو ٢٠٢٦
لو سنك اقل من ٢٠ ف ده طبيعى لسه شخصيتك بتتكون ومستقرتش على حاجه معينه ترتاح فيها .. لو فيه نصيحة ممكن اقدمها ف اللى متاح قدامك امشى واسعى فيه لحد ما هتيجى وقت تلاقيكى اختارتى من غير تفكير
تم النشر الثلاثاء، ١٦ يونيو ٢٠٢٦
لعرض السؤال في فدني اضغط هنا