السلام عليكم،
انا بنت عمري 14 سنه، عالموبايل بتاعي انا منزله الفيس والانستجرام يعني اغلب مواقع التواصل وشات. انا مش عارفه اتكلم منين، بس هتكلم مع اني مش عارفه ارتب الكلام، بس هتلكم وخلاص،
انا عمري ما كلمت ولد تمام!، بس كان نفسي يعني بجد اني اجرب شعور الحب عارفه انه كلام عبيط، بس ده اللي كان في بالي وقتها. عملت اكونت عالفيس ومكنتش بكلم ولاد ابدا او ارسل طلب صداقه اول اقبله، بس كان فيه اولاد بتبعت وانا برد علي قد السؤال يعني بنتلكم كأننا اخوات عادي جدا.
والشات اللي كنت منزلاه كنت اتلكم مع اي حد وخلاص وبعدها احذف المحادثه واحذفه كمان. بس انا بقي قلت بدال ما اقعد امسح واحمل اخليه وخلاص واصلا محدش بيفتش في تلفوني، بابا متوفي وامي "غير متعلمه"، واخويا اصغر مني بسنتين ومعاه هو كمان تلفون. وللامانه كنت بسمع" ابا... حيه" للاسف ابن خالتي هو اللي عرفني عليها لاول مره،
والمشكلة اني كنت مسجله كل الفيديوهات القذرة دي اللي سمعتها، المهم والمشكلة اللي اساسا بتكلم عنها. خالتي مش بتيجي عندنا علطول يعني مره كل كم شهر بس امي بتروح عندها عالطول المهم هي جت وقعدت تمسك تلفوني انا ارتبكت وخفت، يعني اكيد كل المصايب والحاجات اللي عليه طبيعي هخاف،
أخدته منها واتحججت بأن ابنها الصغير هيشبط فيه،، قالتلي مش هديهوله بس هاتيه ثانيه، قولتلها هتعملي بيه ايه، قالتلي هلعب بيه شويه، قولتلها معلهوش لعب، قالتلي طيب هاتيه دقيقه مش هاكله والله، دلوقتي مبقاش فيه حجه وانا اكيد مش هدهولها،
رحت قلت هروح اشرب واجي، قلبي وقع في رجليا روت وحاولت علي قد ما اقدر احذف اللي عليه وهي عماله بتنادي عليا وانا بحدف الحاجات اللي عليه.. روحت ادتهولها وقلبت فيه يعني دخلت حتي عالفديوهات والصور وكل حاجه حرفيا بس انا نسيت احذف جوجل جت تدخل عليه نتشته منها،
قالتلي خايفه ليه اكيد عليه حاجه غلط قولتلها معلهوش حاجه قالتلي امال خايفه ليه، حرفيا بجد مسكنا فيه احنا الاتنين وطبعا مسبتهوش غير لما اخدته منها وحذفت جوجل. وهي قعدت تقول لامي خديه منها. خطر عليها ومعرفش ايه.
يعني انا مش عارفه ليه هي اصلا بتتدخل يعني مفكره نفسها كبيره، وهي اصلا عندها حوالي 28 سنه يعني مش كبيره...،.. هي اصلا وحده متدخله بشكل فظيع يعني من كم سنه كان ابن خالتي عنده 17 سنه مش فاكره وقتها قالتله ايه ومرضيش والله العظيم ضربته،
ضربته بالكف علي وشه، مش كف واحد،.. يمكن هي مفكره انها لما ضربته بتقدر تضربني، اصلا انا مش هسمحلها تمسك تلفوني تاني وهعمله باسووورد.... دلوقتي يا جماعه ان غلطانه ولا هي مع اني متأكده انها هي الغلطانه
السلام عليكم ورحمه الله وبركاته بصي يا جميله انت 14 سنه اللي اكبر منك واللي هي في يعني مقام اجتماعي ان هي خالتو. عندها 28 عندها 30 اكبر منك بسنه او بسنتين لازم تبقي فاهمه كويس قوي إنه هي مركزه علشان هي بتحبك وعايزه تطمن إن انت كويسه وعايزه تطمن ان انت في وضع أحسن. فاصرارها على إنها تمسك التليفون علشان هي عارفه ايه اللي بيحصل مع البنات اللي في سنك واللي بيكون اللي حواليهم مش متابعينهم ولانها عارفه ان والدتك يعني مش عارفه اي حاجه في الحاجات دي فمش تقدر تتابعك فيها وبالمناسبه دي وظيفه الناس اللي أكبر مننا دي وظيفتهم ان هم يعملوا كده ان هم ياخذوا بالهم مننا في الحاجات اللي احنا فاكرين انها عادي وان احنا نعرف نتصرف فيها ل،ا هو احنا بنحتاج الشكل ده من اشكال المراقبه والشكل ده من اشكال التقويم بقول لك تعالي وريني بتعملي ايه عشان خاطر لما ألاقي حاجه انبهك عليها واقول لك لا دي ما تنفعش او اخد معاكي اجراء عشان احميكي ده وظيفه الكبار هم مش موجودين عشان خاطر يبقوا بيتحكموا او كده بيتدخلوا ده مش تدخل خالص ده شكل من أشكال الاهتمام وشكل من اشكال الحب وشكل من اشكال المسؤوليه لازم تبقي فاهمه ده كويس طول الوقت بالعكس انت لما تلاقيها تقولي كويس ان انا عندي حد ياخد باله مني بالشكل ده كويس ان انا عندي حد يركز معايا علشان الدنيا ما تاخدنيش في سكه انا ممكن ما اعرفش ارجع منها مين الغلطان هنا اولا انت غلطانه لانك عملتي كل الحاجات دي من الاول وانت عارفه كده انها كلها حاجه غلط انت غلطانه علشان خاطر فاكره ان هي كده بتدخل ده غلط منك هي مش بتدخل انت الغلطانه فانك تبقي بتشدي منها التليفون وكأنها هي اللي بتاذيكي ولكن في الحقيقه انت اللي بتاذي نفسك بالوضع ده الواحد لما بيغلط غلطه طبيعي بيبقى عايز يعني داري على نفسه خلينا ناخد من هنا مبدأ مهم جدا تبداي تتعاملي بيه في الحياه ولازم تعرفيه من دلوقتي وافتكريه طول الوقت الحاجه اللي تتكسفي إن حد يشوفك وانت بتعمليها بتعمليهاش اصلا اعرفي ان الحاجه دي الافضل انها ما تتعملش. حاجه اللي تتكسفي ان حد يعرف انك بتعمليها وما تقدريش تتكلمي قصاد حد انك بتعمليها وقفيها فورا علشان ده معناه إن الحاجه دي الافضل ما تتعملش سواء قدام حد او مش قدامه.
تم النشر الاثنين، ٢٦ مايو ٢٠٢٥
السلام عليكم، طيب ليه مقولتيش إن خالتك خايفة عليكِ وعارفة كويس البلاوي الموجودة على النت وخطورة الموبايلات واللي عليها خصوصًا في سنك ده؟ أنتِ جواكِ عارفة ومتأكدة إنك غلطانة، صح؟ أنتِ عارفة إنك غلطانة في كذا حاجة... أولا، في الكلام مع الولاد حتى لو كان كلام عادي لكن مع الوقت ممكن يقلب لكلام مش عادي... لما تفتحي الأبواب وتزيلي الحدود اللي ربنا وضعها فأكيد هتقعي في الغلط والكلام في يوم هيروح لمناطق ربنا لا يرضى عنها. ثانيًا، مش مهم مين دلك على الإباحية... المهم إنها حرام وأكيد أنتِ عارفة كده. والدليل إنك خفتِ خالتك تعرف إنك بتشوفيها، لكن للأسف مخفتيش ربنا اللي شايفك طول الوقت. والدك متوفي ومامتك مش متعلمة وأخوكِ أصغر منك... ده يساوي عندك مفيش رقابة فعادي نغلط؟ وفين رقابتك على نفسك، فين رقابة ربنا؟ ترضي لا قدر الله تموتي وأنتِ بتتفرجي على حاجة زي كده؟ هتقولي إيه لربنا لما تقفي قُدامه؟ ثالثًا، خالتك كبيرة... حتى لو هي 28 سنة فهي أكبر منك... هي ضعف عمرك... أكبر منك وشافت أكتر منك. ليه أخدتِ نيتها إنها سوء وتدخل.. ليه مفكرتيش إنها خايفة عليكِ؟ جايز تصرفها وإلحاحها كان غلط وكان لازم تستخدم أسلوب تاني أفضل لكن هي عملت اللي شافته صح. *** نصيحتي، ربنا أعطاكِ نعمة... الموبايل والانترنت سلاح ذو حدين.. هو نعمة من ربنا لو عرفتِ تستغليها صح. وهتُسألي يوم القيامة عن استخدامك لها وعن وقتك اللي ضيعتِها عليها في كلام فارغ مع الولاد ومشاهدة إباحية بدل ما تستغلي وقتك في حاجات تنفعك وترضي ربنا. ارجعي لربنا حبيبتي وقربي منه، توبي عن التصرفات الغلط ومتغضبيش ربنا أكتر. فكري في مستقبلك وحياتك وابنيها صح. مشاهدة الإباحية هتدخلك في إدمان وطريق وحش جدًا ممكن متقدريش تتخلصي منه بعدين. متخليش الكبر والعناد ياخدك ويخليكِ تستمري في طريق أنتِ عارفة كويس قوي إنه غلط في غلط. معلش لو حسيتِ إن كلامي قاسي لكن أي حد عاوز مصلحتك وخايف عليكِ هيقول لك كده. ربنا يهديكِ ويبعد عنك أي شر.
تم النشر السبت، ٢٤ مايو ٢٠٢٥
مش هقولك مين الغلطان لكن بس هسألك سؤال الأول لو تلفونك مكنش فيه حاجه كان هيبقى عادي تقلب فى التلفون مكنش هيفرق معاكي اصلا ف انتي غلطانه جدااااااااا لانك عارفة ان البتعمليه غلط و مكمله فيه رغم معرفتك و بعيد عن انه غلط فهو حرام و ده الأهم ثانيا انتي لازم تاخدي ده أشارة ليكي انك لازم تبعدي عن اي حاجه وحشة او حرام و متفكريش فى الموقف ناحية مين الغلطان ركزي ع نفسك انتي غلطانه قد اى فى الانتي بتعمليه و خليكي انتي المراقب عليكي متستغليش عدم معرفة مامتك فى التلفونات و ان اخوكي اصغر منك ف محدش هيحاسبك انتي كبيرة و مميزة اى الصح من الغلط بدليل الخوف الكان جواكي ف انتي حاسبي نفسك متستنيش حد يحاسبك و خلي فبالك ديما ان ربنا شايفك و خافي من ربنا قبل م تخافى من اي حد لان صدقيني لو عملتي حساب البتعمليه ده حرام او لاء قلبك مش هيبقى فيه خوف من اي حد لان سعتها انتي الهتبقي رقيب على نفسك و افعالك مش حد فى لحظة يدخل فى قلبك خوف متتمنيش انه يحصل تاني
تم النشر الجمعة، ٣٠ مايو ٢٠٢٥
لعرض السؤال في فدني اضغط هنا