Nahla mohamed

ازاي ممكن تقولي كده وانا بجد من كلامك حسيت انك ماشاء الله شخصيه قويه ومش اي حد يتحمل اللي مريتي بيه ولا يقف واقفه زي دي جنب اهله عشان يكون مكان امه.. انتي في ابتلاء ولازم تعرفي ان ده اختبار من ربنا حطم ليه لسبب معين ومش شرط تعرفيه دلوقتي ومش شرط تعرفي حكمه ربنا ..ربنا ابتلاكي عشان بيحبك عشان شايف انك قدها اه اللي حصلك صعب وموت مامتك صعب وحاسه بيكي بس عمرها ما هتكون النهايه يعني بتقولي لربنا انا ضعيفه وهكفر وهموت نفسي ؟؟ ازاي تقولي كده لو محتاجه مساعده روحي therapist واتكلمي مع حد متخصص لا عيب ولا حرام انتي بتمري بمرحله صعبه والكليه مش نهايه العالم مش هي اللي هتعملك انسانه بالعكس موقفك دلوقتي وانتي شايله مسئوليه كبيره علي سنك هو اللي بيعمل منك حاجة كبيره وبكرا تعرفي..احمدي ربنا ف السراء والضراء وصلي كتير واطلبي من ربنا انه يقويكي وابعدي عنك شيطانك اللي بيوسوسلك تنهي حياتك لان اكيد لو مامتك عايشه عمرها ما كانت هتحب تشوفك كده اعملي دايما اللي كان هيخليها مبسوطه وراضيه وزي ما قولتلك لو تعبانه روحي متخصص يساعدك.. ربنا يقويكي

واجهي مشكلتك متهربيش وهي هتخلص في وقتها الطبيعي محدش بيطلع للدور العاشر من اول سلمه تقابله

حاول تقسم كل ماده لجزء صغير عشان متحسش انها كبيرة وخصص للجزء الصغير time معين انك هتخلص فيه واما تخلصه كافئ نفسك بحاجه بتحبها يعني مثلا اكله او خلي جنبك سناكس معين ده طبعا لو وقت الفطار لكن لو بتذاكر علي صيام كافئ نفسك مثلا بفيديو يفصل مودك شويه او كلم حد من صحابك شات شويه وبرضو خصص time معين لوقت البريك دي وهكذا ، الطريقه دي كنت بذاكر بيها وكانت مريحه جدا معايا

حاول ادام بتمسك الموبايل كتير تستغله في انك تخليه حاجه بتتعلم منها وبتتثقف منها مش العكس يعني مفيش مشكله تخش من ابلكيشن ل ابلكيشن لو مثلا بتقرا pdf او بتتفرج علي افلام وثائقيه مفيدة او بتسمع بودكاستز او تشوف فيدوهات تساعدك تنمي حاجه في شخصيتك او تكتسب معلومه او مهاره ..ساعتها هتحس ان الموبايل مش بيستهلك وقتك ع الفاضي او جاي عليك بتعب

اهتمي بنفسيتك ومتضغطيش علي نفسك نهائي عشان تعرفي توصلي للي عايزاه وتنجحي وحفزي نفسك دايما وكافئي نفسك لما تذاكري شويه ونظمي موادك بجدول ولما تتعبي م المذاكره افصلي وخدي بريك عشان ده بيديكي باور انك ترجعي احسن وتعرفي تستقبلي معلومات اكتر واهم نقطه حددي هدفك وخليكي وراه

مفيش طريقه معينه تنسي بيها شخص كنت بتحبيه لازم تاخدي وقتك كامل وتزعلي وتعيطي وتطلعي كل المشاعر االي جواكي لحد ما تحسي انك خلاص فضيتي او بمعني أصح خلصتي كل اللي جواكي من ناحيه الشخص ساعتها هتحسي انك كويسه وتقدري تبدأي من جديد..لكن لو قولتلك طريقه تنسي بيها او تلهيكي لجزء من الوقت ده اسمه مسكن او هروب وهيكون لفتره معينه وهترجعي لنفس الموضوع تاني

ممكن برضو لو مبتتأثرش بالمذاكره برا البيت تنزل working space هاديه كدا وتذاكر اهو تغيير للمود ودايما حفز نفسك بالطرق اللي بتحبها