هبة الاباصيري

ماينفعش عند مع الزوجه زي ما انتي تعملي أنا هعمل الراجل ليه القوامة معروفه أن الستات اوقات كتير بتبقي الهرمونات بتاعه الحمل و الرضاعه و البريود وكل الحاجات دي بتأثر عليها وعليهم كمان مسؤليه البيت والعيال بتبقي مضغوطه عاملها اكنها بنتك مش تعند قصادها احتويها وخليك حنين عليها واقعد معاها قعده صفا قولها أنا الكلمه دي ودي ودي بتضايقني لو سمحتي متقوليهمش تاني علشان هتخليني ارد عليكي اضايقك ونفتح باب المشاكل انتي عاوزه البيت يتهد بسبب العند والكلام اللي بيضايقنا وادعيلها ربنا يهديها حاول لما تحس ان الدنيا ضاغطه عليها تساعدها وحاول طول الوقت تاخد لقطه يعني ايه لقطه يعني مثلا هي قالتلك اعمل حاجه معينه وانت كده كده هتعملها مش تقولها اديني عملت اهو علي الله نخلص تقولها أنا مبحبش اعمل الحاجه دي بس عملتها علشان خاطرك شوفتي أنا بحبك ازاي كده يعني أنا بديلك مثال شايفها مثلا واقفه طول اليوم تعبانه قولها الله يقويكي ربنا يبارك فيكي ويديكي الصحه ويخليكي لينا طول الوقت تدعمها بالكلام والفعل اعمل كل اللي عليك وزياده علشان كمان ربنا مطلع وعارف انت بتعمل ايه وان شاء يجازيك خير وبعيدا بقي عن كل ده لو انت بتعمل حاجه تغضب ربنا راجع نفسك علشان الحاجات دي بتهد البيوت وبتلاقي البيت أكن في حريقه وربنا يصلح الحال

ملكيش دعوة بحد ممكن ترفضيه وممكن يتقدملك عرسان كتير بعدين وتحسي أنك مش مرتاحه ومش موافقه وبعدين كل واحد واختياره هو بيحب ايه وبيكره ايه هي ازواق كل واحد ليه زوقه الخاص انتي شايفه أنه مناسب افرض رفضتيه ورجعتي ندمتي بقي صحابك هينفعوكي وعلي فكره مش شرط يكون صحابك بيحبوكي ممكن يكونو مش بيتمنولك الخير وممكن يكون عقلهم صغير مش عارفين ايه الكويس وايه الوحش المهم أنه يكون شخص بيتقي الله وعارف ربنا ومايكونش بخيل أو عينه زايغه أو شكاك أو قماص وكده

معلش هو انتي مقولتليش ايه سبب الرفض علشان انتي مش شايفاه مناسب ولا علشان اهلك رفضوه انتي رفضتيه هو لو انتي متأكده انك مش عاوزه شاغله بالك بيه ليه وعرفتي ازاي أنه خطب وفارق معاكي بيراقبك ولا لأ ليه ولما انتي مش موافقه عليه ليه اتكلمتي معاه الفتره دي كلها السؤال مش هو بيحبك ولا لأ السؤال هو انتي رأيك ايه في الموضوع كله بس الحركه اللي عملها أنه يخطب ويكلمك دي حركه وحشه هو مراعاش ربنا في خطيبته

أنا مش فاهمه انت بتدرس ايه انت مذكرتش ده علشان اربعه وعشرين سنه لسه بتدرس أما انت سقطت أو انت في كليه من كليات القمه بص نصيحتي ليك اولا انك تعرض نفسك علي طبيب نفسي تحاول تتصرف في فلوس وتروح لدكتور ممكن يكون بتتخيل حاجات زي انك بتسمعهم بيتفقو عليك وأما كل ده حقيقي انت لازم تتعزل عنهم تماما وانقل الكليه بتاعتك وغير رقم تليفونك واشتغل وفلوس الشغل هتصرفها علي حاجتين اول حاجه تتعالج نفسيا تاني حاجه علي دراستك والبيت اللي انت عايش فيه انت مش هتأذيهم بس هتشتري نفسك وممكن بعد كده تروحلهم بعد مايكون استعدت صحتك النفسيه وتقدر تقف علي رجلك وبرضو حاول انت تكون احسن منهم ربنا يرشدك للطريق الصواب

حبيبتي لازم تفوقي لنفسك وتعملي وقفه قدام نفسك انتي ليه بترخصي نفسك كده انتي لازم تثقي في نفسك اكتر من كده وتأكدي إن ده مش حب ومش هتموتي من غيره جربي تسيبيه هتتوجعي وجع مش طبيعي بس هترجعي أقوى من الاول وفي الفتره دي متحاوليش تتخطبي أو تتعرفي علي اي ولد غيره لانك هتلاقي نفسك بتتعلقي بيه انتي لازم تتعالجي تماما وتاخدي وقتك من العلاقه الأولى وبعدين تفكري انك تتخطبي وفكري بعقلك شويه الشخص ده هيصونك ولا لأ وحاجات كتيره اوي ممكن تكتبيها في ورقه ايه صفات الشخص اللي بتدوري عليه وقبل كل ده ياريت تعرفي قيمه نفسك كويس واقفي قدام المرايا وقولي لنفسك هل أنا تستاهل الذل ده كله والوجع ده لازم أرحم نفسي

انتي لسه عشرين سنه مش فاهمة انتي مستعجلة علي ايه وكمان ليه عاوزه تتجوزي راجل مطلق ازاي متأكده أن هو محترم عرفتي ازاي وانتي قعدتي مع طليقته شوفتي سبب الطلاق معظم الرجاله اللي بتطلق بيقولك هي السبب ومتتعاشرش هو عاوز يتجوز يتجوز واحده مطلقه يعني ايه الحاجه اللي تخليكي تستغني عن فكره انه متجوز قبل كده غني اوي وعنده منصب عالي راجل دين وأخلاقه عاليا طب لو هو فيه المواصفات دي ليه طليقته هتسيبه هو ليه الراجل المطلق ليه الحق انه يتجوز بنت بنوت والست المطلقة ماينفعش تتجوز راجل متجوزش قبل كده والدنيا كلها تتقلب

ماتلوميش نفسك ده درس تتعلمي منه انتي قوية وجميلة وتستاهلي احلي حاجه في الدنيا انجحي واكبري ومتتنازليش عن حقك اعرفي قيمة نفسك الاول لانك بجد ليكي قيمة وقيمة كبيرة مش معني أن الظروف ضدك يبقي انتي متستاهليش لا انتي تستاهلي احلي واجمل حاجه صدقيني ربنا سبحانه وتعالي خلقك كلك معجزات وسخر الكون ده كله علشان اتعرفي علي ربنا كويس مش معني انك تتنازلي يبقي ده اللي بيرضي ربنا اعرفي ايه اللي بيرضي ربنا بجد واعمليه وتأكدي أن اي حاجه في تعزيز ليكي احترامك لنفسك تقديرك لقيمتك حبك وتصالحك مع نفسك هو ده اللي يرضي ربنا اعرفي قيمتك واتعرفي علي ربنا متخليش حد يعرفك ربنا بطريقه غلط كل مشكلة بإذن الله ليها حل ضاقت فلما استحكمت حلقاتها فرجت وكنت أظنها لا تفرج عززي نفسك انتي غالية

ياحبيبتي انتي ربنا سترك تقومي انتي تقولي مافيش شرع بيقولك انك تعرفي خطيبك او شريك حياتك بماضيك مايجيش ربنا يسترك وانتي تقولي ده اكبر غلط المهم لو حصل أي ارتباط تاني اوعي تقولي وانسي الشخص ده خالص بقي علشان هو انسان مش محترم ومكانش المفروض يقولك كلام زي ده وانتي متسمحيش لاي حد يقلل من قيمتك الناس كلها بتغلط ماحدش معصوم من الخطأ طلعيه بقي من دماغك

انتي عندك كام سنه

ده انسان مش محترم اعمليله بلوك من كل حاجه ولو تعرفي تغيري رقم تليفونك اعملي كده متحاوليش حتي تتكلمي معاه الإنسان اللي زي كده مجرد متردي عليه ده هيقلل منك

بص احنا مش بنكدبك بلاش اتكلم بصيغه الجمع علشان يمكن مشوفتش التعليقات كلها بس انت عارف المنطقه دي بالذات حساسه اوي نخاف نقولك كلام نكرهك فيهم أو يقسيك عليهم وناخد ذنب واعتقد لو كنا شايفينك كداب مكانش حد رد عليك لأن محدش بيعمل اعتبار للشخص الكداب أنا عارفه أن فكره ان كل الكلام يكون دفاع عن الاب والام ده مستفز جدا جدا جدا بس سبحان الله كلنا بنبقي عاوزين منقولش كلمه في حق الاب والام علشان ربنا وصانا عليهم واحنا مقولناش انك كداب بس قولنا أن في حلقه مفقوده وانت قولت أن الموضوع خاص جدا رغم أن اسمك مختفي وانت مجهول يعني حتي لو حكيت محدش هيعرف انت مين بس لازم نحترم الخصوصيه دي وانا شخصيا قولتلك حاول يبقي ليك دخل خاص بيك أو انك تستحمل الكام سنه بتوع الكليه لحد ماتتخرج وكل ده ينتهي ولما تتجوز وربنا يكرمك بأولاد تغمرهم بحبك وحنانك هما وزوجتك وعلي فكره محدش اتكلم في الموضوع القانوني لاني زي ماقولتلك انك بتتكلم في منطقه حساسه وهما الوالدين نخاف نقولك ارفع قضيه واحنا كمان مش عارفين التفاصيل ربنا ييسر لك الأمور

طب ليه بيضغطو عليك عاوزين منك ايه ايه سبب المشكله اكيد في سبب للمشكلة يعني كل المشاكل دي بلا سبب وكمان انت ممكن تشتغل ومتقولش عشان يبقي ليك دخل أو حتي تشتغل اون لاين وتقدر تستقل عنهم بس زي ماقولتلك لازم يكون في سبب يعني والدتك بس كده ولا والدك بس لو انت اهلك صعبين ليه هيهتمو بيك وتدخل هندسه في حاجه ناقصه انت موضحتهاش

انتي عارفه يابنتي اللي بيتمارض بحاجه بتجيله أن اللي بيكدب ويقول أنا عندي مرض كذا ربنا بيبتليه بالمرض ده هما بقى هينفعوكي اخر حاجه تفكري فيها اهتمام الناس بيكي وحب الناس ليكي اهتمامك بس لربنا سبحانه وتعالي اوعي تحاولي ترضي حد غيره سيبك من الناس ومن شكلك قدامهم وبطلي تكدبي في اي حاجه تاني علشان محدش هيصدقك وكمان ده مايرضيش ربنا

بصي يا بنتي ربنا عمل فترة الخطوبة ليه علشان نتعرف علي بعض اتخطبي ومستعجليش في الحكم عليه يمكن يطلع شخص كويس صدقيني القعده الأولي مش بتبين اي حاجه ويمكن اتكلم بطريقه اتفهمت غلط أنا من رأيي تصلي استخارة قبل كل شيء وتاخدي خطوة الخطوبه بس تركزي في شخصيته كويس مش فتره حب وكده لا دي فتره تعارف تبقي ساعتها عرفتي هو ده الشخص المناسب أو لا وربنا يوفقك