Hamed Mahmoud

حياته على السوشيال ميديا غير حياته على أرض الواقع ويمكن بيعمل كده عشان يوقع بنات أكتر وأفضل، لما المشاهير نفسهم معظم حياتهم أونلاين كذب في كذب، ده احنا حتى على أرض الواقع بقينا بنلاقي صعوبة في تقييم الشخص إذا كان كويس أو سيء، ما بالك بالسوشيال ميديا أكيد الموضوع كله بنسبة كبيرة وهم في وهم.

اللي عملتيه هو ده الصح حتى لو خسرتي صداقه زوجته مش مهم المهم رضا ربنا والمفروض كمان تحاولي تسيبي الشغل وتشوفي شغل في مكان تاني لأنه هو طول ما شايفك أمامه هيفتكرك وبالتالي ممكن يحاول يأذيكي بأي طريقه أو يشوه سمعتك بسبب اللي عملتيه معاه لذلك حاولي تبعدي وتطوي هذه الصفحة للأبد وتنسيها وكأنها لم تكن وتابعي حياتك، ولازم تعرفي شئ وهو إنك فيكي خير وإنسانة نظيفة من داخلك ولكن الشيطان حاول يلعب معاكي لعبة خبيثة فأنتي انتصرتي عليه فمبروك ليكي على هذا الإنتصار العظيم.

أهلك خايفين عليكي وعلى سمعتك والدنيا مفيهاش أمان دلوقتي على وجود البنات في وقت متأخر من الليل خارج المنزل لذلك قبل طاعة أهلك لازم تعرفي إنهم خايفين عليكي وإن أنتي لازم كمان تخافي على نفسك فحاولي تشوفي شغل فيه أمان ليكي أكتر ويكون في فترة النهار لو أنتي مصممة على إنك تشتغلي ومتقعديش في المنزل وربنا يوفقك ويحفظك إن شاء الله.

انتي مش قولتي إنك حلوة وطيبة ومحترمة كمان يبقى خايفة من إيه، اللي زيك في الزمن ده يعتبر ثروة نادرة بيبحث عنها الشخص الصالح اللي هو نادر جدا برضوا، فالموضوع بيبقى صعب شوية بس لما يجيلك نصيبك الصالح والمناسب لكي وتشوفي مشاكل البنات اللي كنتي بتغيري منهم ساعتها هتعرفي إنك كنتي الأفضل منهم وحصلتي على الأفضل، وبالنسبة للواد اللي مصاحب صديقتك ده هتغيري منها على إيه ده عيل بيتسلى يعني مش راجل ولو هي هبلة هيضحك عليها ويمكن يعمل معاها حاجة غلط لا سمح الله.

لازم البنات تعرف وتتأكد إن الشاب اللي هيصاحبها ويتكلم معاها سنين هيسيبها في النهاية لأسباب كثيرة أهمهم إنها مش محل ثقة تكون زوجتة اللي تربي أولاده في المستقبل. وبالتالي يوم ما يفكر يتزوج هيروح للي هيختاروها ليه أهله اللي هي محتشمة ومحترمة وملهاش في كل المواضيع الزبالة دي عشان قلبه يطمن وأولاده يتربوا أحسن تربية. والبنت اللي بتعمل كده لازم تعرفي إنك إنتي رخيصة جدا إنتي لا مؤخذة زي اللبانة اللي الشخص بيمضغها وياخد طعمها الحلو ولما يزهق منها يتفها في الأرض إنتي خاينة نعم خاينة لأن كلامك مع شخص غريب بالليل في التليفون بدون علم أهلك فإنتي كده بتخونيهم كما لو أنك متزوجة وبتفعلي هذا مع زوجك. ومعلش أنا آسف لكل بنت هتقرأ الكلام ده سامحوني على الكلام القاسي اللي قولته ومتزعليش مني أنا أخوكي ولازم أقولك كده عشان تفوقي قبل فوات الآوان وتحافظي على نفسك وتبقي من البنات الغالية اللي الشخص يكون أقصي طموحه إنه يشوف وشك ولو من بعيد.

معليش يمكن إنتي أغلى من إن شخص زي ده يستاهلك ومستنيكي اللي أحسن منه.

هو انتي عايشه معاه في بيته عشان تعرفي اذا كان مبسوط في حياته فعلا، وبعدين لازم تنسيه تماما بأي طريقة يعني هو مفيش غيره في الدنيا، ثم إنك فعلا مش انسانه زبالة والدليل إنك هنا وعارفه أن دي غلطة والمفروض متتكررش تاني.

مش عايزك تزعلي من الكلام بس هو مستحيل أنه كان بيحبك أنتي قولتي أنه استغلك جنسيا يعني الموضوع واضح هو خد غرضه منك وخلاص مش عايزك، أنا شاب وبقولك أنا عارف ألاعيب الشباب الزبالة دي كويس ونصيحة مني أوعي تحبي شخص من على النت أبدا أو تبعتيله صورك أو حتى تتكلمي من باب الدردشة لأنه هيشدك مع الوقت لأمور سيئة فخليكي غالية كده ومش أي حد يقدر يوصلك بسهولة وربنا يسترها عليكي.

حاجة حلوة إنك تساعد شخص مش عارفه، مش لازم بخبرتك ولكن عالأقل تشجعه بكلمة حلوة على مواجهة مشكلته وعدم الإستسلام لها، أنا مسجل على التطبيق من فترة ومكنتش متفاعل بس من اليوم هحاول أتفاعل وأرد على كل شخص محتاج إنه يسمع مني حتى ولو كلمة واحدة بس يمكن تغير حياته للأفضل، وأتمنى من الجميع فعل ذلك حتى يتحقق هدف التطبيق وهو (فدني).