H .

اولا حاول من ناحية انجذابك للجانب الجنسي تقلله متخلهوش يكون السبب الي انت عايز تتجوز عشانه او غيره الخ، تانياً لازم تكون عارف ان محدش بيعرف يعيش بدون الجنس الاخر خصوصاً عشان تكمل نسلك و تلاقي حد يكمل حياتك من بعدك ، من حيث ابناء او احفاد ، ربما دا مجرد شعور جواك انك مش عايز تكون علاقة و بتكره نسل الاناث لكن كل حاجة ليها سبب .. هل تعرضت لخيانة او كسر ثقة او تفكير غلط ؟ يمكن دا يكون ليه علاقة و خليني اقلك ان من ضمن الغرائز المشاعرية الي هنحس بيها مهما حصل لازم نحس بيها هي المشاعر العاطفية الحب ،متستعجلش علي نصيبك ، ربما فجأة او في يوم من الايام تلاقي نفسك منجذب لبنت معينة و حاسس ان مشاعرك العاطفية اتجاهها فمتتسربعش على حاجة او تحط جوا دماغك تفكير غلط او سريع ، و لو انت حاسس بعدم وجود المشاعر دي من الاساس في دا غلط لان دي تعتبر غريزة من الغرائز الي جوانا و اقتناعك انك انت مش بتحس بيهم يعني حاجتين ، يا انك مضطرب يا انك بتعاني من متلازمة اسبرجر و دا مش صح يعني إن شاء الله و لو لقيت الموضوع اتعقد اكتر و مفيش حل اتجه لطبيب نفسي أفضل لكن إن شاء الله المشكلة دي تتحل.

بوصي للاسف كله بيتعرض للضغط النفسي بحجة اننا ثانوية عامة لكن عدم الالتزام دا ممكن يكون لانك قاعدة تدرسي وانتي مش حطة حاجة قدامك انتي بتدرسي عشانها او طلعتي كل طاقتك في بداية ثانوية عامة و تدريجياً عملتي زي البطارية طاقتك قلت منك تدريجياً و للاسف الاهل مش بيتفهمو ان الضغط النفسي دا اكبر مؤثر سلبي و بيأثر عاي نفسيتك لكن اولاً نقدر نبعد عن كلام الأهل و نتجنبهم قدر المستطاع، اعملي لنفسك جدول و اعمل حسابك انك لازم يكون في يوم فري ليكي ، هتقولي ثانوية عامة مش ثانوية عامة كل حد بيستحق انه يستريح عشان يتشحن تاني و لو مستريحتيش هتلاقي نفسك اخر السنة منهارة و مش عارفة تحلي بعد الشر او حتي في البيت قاعدة زعلانة و مرهقة و مش عايزة تذاكري فا لازم بجد ترتاحي ، تالتاً علاقتك مع ربنا ، قربي من ربنا ، صلي و اقرأي قرآن او انجيل *علي حسب ديانتك * لكن في الحالتين قربي من ربنا و ادعي و استغلي الايام الي بتمطر فيها و ادعي و ان شاءالله ربنا يستجاب ليكي ، و خامس حاجة و اهم حاجة حطي هدف قدامك ، مش غلط انك مش عارفة عايزة تكون اي ف المستقبل مش اجباري لكن وجود هدف بيساعد اوي انك تتشجعي للمذاكرة لانك عارفة انك عايزة تحققي حاجة و فجأة بشكل غير تلقائي هتلاقي نفسك من نفسك بتذاكري منغير ما تحسي بالتعب لان بكل بساطة انتي بتعملي كل دا لسبب معين ، و ان شاءالله خير

اكيد يروحي ، خصوصا عن علم النفس دا مش مجرد مجال بل مجال مميز و معروف و لازم يكون متواجد لكن الموضوع بيعتمد انتي عايزة تشتغلي علم نفس تخصص اي ، عشان للاسف في تخصصات مش موجودة في مصر زي الجنائي مش موجود و مش بعترف بيه لكن لو عايزة تكوني طبيبة نفسية فا المجال موجود و متاح و معروف و حرفيا من افضل الشغلانات خصوصا انك شخص بتحبي مجال علم النفس دا بحد ذاته هيساعدك اوي

خليني اقلك ان مفيش حد بيفشل و الي بيفشل و بيقع بيقوم تاني مهما حصل الا لو كان شخص متكاسل اكيد هيفضل واقع ،بلص تقدر تتجه للحاجات الي بتحبها و تستغلها لصالحك ، عايز تشتغل شغل معين عايز تعمل مشروع معين عايز تكون مشروع عشان تظهر هواياتك ، المهم تحط هدف قدامك لان دا هو الي هيقومك من الارض و يخليك تكمل حتي وانت مش قادر لانك عارف ان شاءالله النتيجة هتكون حلوة و تستحق العناء و التعب ، و اذا كان البشر بحد ذاتهم من ضمن الاشياء الي عملالك احباط ، تشتت ، الخ ،تجنب الفئة دي و ركز مع الفئة الايجابية و حرفيا انت لو لقيت رسالة واحدة ايجابية من حد هتحس بمشاعر حلوة و هتحس بطاقة و شغف وانك عايز تكمل، و ايوة كلمة واحدة احتمال تكون المؤثر فا متفقدش الشغف و اعرف ان المرء طبيعي يقع و يقوم تاني و المهم قرب من ربنا و ان شاءالله خير

دا بيقع تحت مسمي متلازمة جوسكا ( التخيلات و السيناريوهات ) و فرط التفكير و متخفيش دي حاجة طبيعية ، اصل العقل بحد ذاته مش هيوقف تفكير او تخيل مهما حصل دي حاجة طبيعية و احيانا التخيلات دا بتدي جزء من السعادة او الأمل حتي لو مش بتتحقق ربما مش بتتحقق لان لو تحققت هتكون وحشة ليكي ؟ ربما ربنا بيعمل كدا عشان يحميكي ؟ فا المفروض تحمدي ربنا و لو نفسك في حاجة اوي تتحقق ادعي ربنا و قولي ان شاءالله تحصل و ادعي و قولي لو خير لي ف اجلبه و لو شر لي ف ابعده ، و بالنسبة لدراستك ،احيانا لما الدرس بيكون ممل عقلك بدون وعي بيقرر يفكر تاني لانه شايف حاجة مملة قدامه عكس لو درس جذب تفكيرك او خلاكي تفكري و دا مش بيحصل طول الوقت،لكن حاولي تستغلي الحاجات دي لمصلحتك وانتي بتذاكري مثلا اقعدي اتخيلي و فكري ف الدرس و اسالي نفسك اسالة و اتخيلي مثلا الحاجة دي بتحصل ازاي ، لو انتي ادبي و بتذاكري جغرافيا او تاريخ تخيلي الاحداث بحيث تثبت ف دماغك ،لو علمي تخيلي التجارب العلمية دا بتتنفذ ازاي جوا دماغك بحيث انك تستغلي فرط التفكير و متلازمة جوسيكا لصالحك و ان شاءالله خير

احتمال يكون اعتمد علي فكرة انها قريبة منه اكتر منك عشان كدا ركز معاها و صدقها هي بس حرفيا النوعية دي من الذكور red flag اوي و لازم اي بنت تبعد عنهم لان بكل بساطة حاولي متحبيش ولد عنده اصحاب بنات لانه يتحجج انها قريبة منه اكتر منك

مبدئيا الولد الي عنده اصحاب بنات كتير او يخبي عليهم ف يريت نبعد عنه لانه مش فئة تتحب و غلط نحبه لانه هيبقي اسوء شخص ، ثانياً انتي معملتيش حاجة غلط دا مجرد حوارات هايفة و احتمال تقع تحت مسمي الغيرة علي الولد دا لكن بجد فكرة اني بعدتي او هتبعدي يريت ابعدي عنه و عن البنتين دول و ركزي في حياتك و المغامرات بتاعتك و حبي و اتحبي و اعرف ان احيانا في اوقات زي دي انتي مش بتعملي حاجة غلط بل الصح

الأهل بحد ذاتهم متعودين علي حاجات معينة ف الماضي ف انهم يشوفو حاجة مختلفة احتمال يقولوا حاجة ملهاش علاقة زي مريضة نفسياً او حتي المقارنة مع بنت خالتك بكل بساطة عرفيها انك ملكيش دعوة بحد لان انتي ليكي شخصية و بنت خالك ليها شخصية ، مفيش حد شبه حد ف المجتمع دا شكلاً و شخصياً فبكل بساطة اعملي الي هيريحك بجد و هو بكل بساطة تجاهلي الي هي بتقوله و اعتمدي و ثقة ان دي شخصيتك و شخصيتك حلوة و جميلة و فكرة كرهك للافراح دي مش حاجة وحشة خالص ،اقصد حتي انا مش بحب الافراح و ولا التجمعات بسبب كرهي للازدحام و البشر الكتير و الاصوات العالية فا عادي متهتميش ب اي حاجة تتقلك

دي مش حاجة وحشة يروحي دا مجرد جزء من شخصيتك و هو انك شخص عنده حساسية من الاصوات العالية و التجمعات و الازدحام و البشر الكتير و الي احيانا يخليكي تحسي بشعور غير مريح او ضيق تنفس لكن دا مجرد حاجة نابعة من شخصيتك و واضح من دا انك شخصية هادية و خليني اقلك ان دا مش يعني انك انطوائية