Dodo Eldesoky

تتخطى بالدعاء وكثرة الاستغفار والصلاه على النبي بصي مفيش حاجه تقدر تلعب في عقلك وتمسحلك الذاكرة عشان تتخطى إللي حصل معاكي ربنا إللي يقدر يعوضك عن الحزن والالم فمفيش طريق غير الاتكال على الله وده احسن طريق

وعلى فكره أنا شوفت راجل ظالم عاش ١٠١ سنه في نعيم وغناء وراحه وبصي كان زي الجنه على الأرض كان فرعون في الأرض وحرفيا ربنا عيشه ١٠٠ سنه بدون بلاء تخيلي ده ربنا بيحبه لو ربنا بيحبه كان ابتلاه من زمان لكن عشان ربنا طرده من رحمته غرقه في النعيم عشان ميبقاش ليه شفاعه لما يطلع عند ربنا (إذا أحب الله عبداً ابتلاه)))))))

إن ربنا بيبتليكي دلوقتي معناه إنه بيحبك وحب يديكي فرصة تصلحي غلطتك إللي ظلمتيهم أو جيتي على حقهم دوري عليهم وصلحي غلطتك معاهم وربنا هيفتحلك كل الابواب وخلي بالك ربنا بيغفر كل الذنوب إلا ذنوب العباد مرهونه بعفوهم يعني لو ظلمتي أو اذيتي حد والله لو حجيتي بيت ربنا ألف مرة ما هيغفرلك إلا لو اللي ظلمتيه ده سامحك وغفرلك

بصي لما تيجي تكلمك تاني قوليلها أقعد حاطه رجل على رجل وانقي الراجل اللي على كيفي أحسن ما اتجوز واطلق كل شويه ما هي الجوهره مش هيبقي سعرها زي الطماطم بصراحه في أشكال مينفعش يترد عليهم باتيكيت وذوق لأني اتعرضت للموقف ده قبل كده ورديت نفس الرد ومع العلم كانت إللي بتتكلم واحده مطلقه بردو أول ما قولتلها كده سكتت

أنا مدركة المعاناة إللي انت فيها يا ريت تروح لدكتور نفسي لانك محتاج تتكلم مع حد مختص وفاهم هو هيقدر يساعدك

عاتبها وبعدين ابعد عنها انت مش كلمتها كذا مره في الموضوع وبترجع تقرره وماشيه مع واحد مش كويس هي حره تأذي نفسها انت لو مش مرتاح لصاحبتك دي ابعد عنها

أنا كمان والدي هو سبب مشاكلي في الحياة هجاوبك الإجابة إللي دايما أخويا يقولهالي لما اشتكي من والدي ( ابوكي إختيار ربنا مش اختيارك ده أمر واقع اتفرض عليكي وزي ما ربنا اختارلك ده هو عارف هيعوضك ازاي في حاجات يا بنتي مبنقدرش نتحكم فيها بطلي تتعبي في نفسيتك على حاجات إنتي ملكيش زنب فيها ) الاب والام والاخوات مش هتقدري تغيريهم حلك الوحيد إنك تصبرب لحد ما تخلصي كليه وتشتغلي ويبقي معاكي فلوس تقدري تساعدي والدتك وربنا يعوضك بالزوج الصالح اللي ينسيكي الأيام إللي عشتيها من والدك

ونسيت اقولك إن الراجل ميحبش يشوف الست أعلي منه في التعليم في اه رجاله كويسه بس سيبك الكويسين دول قليلين هيقعد يقولك في الخطوبه أنا معاكي وهخليكي تكملي تعليمك ومش عارفه اي وهيجي في الآخر يقولك اقعدي بيتك وعيالك أولي بالمصاريف فمتنسيش الكلمتين دول مفيش راجل غير أربعة من الصالحين هيحب يشوف مراته أعلي منه والكلام ده عن تجارب قدامي من أصحابي

بصي أنا 22 سنه وقربت اخلص كليه ولا اتخطبت ولا اتجوزت فانتي 16 سنه السن ده مش سن جواز ولا ارتباط إنتي قدامك العمر طويل خودي وقتك وركزي في دراستك ومش لازم تتجوزي دلوقتي لأن الجواز ممكن يلهيكي عن الدراسة وصدقيني الجواز والدراسة مع بعض ميتفقوش غير في أصعب الحالات وأنتي لسه قاصر متغلطيش غلطه صحبتي اتجوزت في تالته ثانوي وحاليا مطلقه ومعاها عيلين ومكملتش تعليم ركزي في نفسك يا بنت الحلال وفي دراستك مفيش حاجه هتنفعك غيرها والجواز لما تخلصي خالص ده اضمنلك

الحل الوحيد جواك حارب شيطانك وجاهد نفسك واول ما تسمع الاذان قاوم الكسل وقوم وامنع الصوت الداخلي إللي بيقولك اقعد مش دلوقتي لأن مفيش حد هيجي يصلي مكانك ففي مشاكل حلها عندك انت زي دي كده

زوجك مش مهم بيكي وبيتجاهلك قربي إنتي منه واهتمي بيه اقعدي معاه خليه يفضفض عن اللي جواه قوليله اي إللي تاعبك طمنيه قوليله أنا جمبك وأي حاجه هنعديها مع بعض طب انت شايف فيا حاجه مش عجباك في حد مزعلك في الشغل وهكذا وحاولي تفرحيه تعمليله أكله حلوه بيحبها تجبيله هديه

الأول على الجمهورية مره واحده يا عم ربنا يكرمك وتطلع الأول على العالم بس عاوزه اقولك إن ده نصيب وما على الإنسان إلا ما سعي وأن سعيه سوف يري اسعي واجتهد وبس واعمل إللي عليك في أي حاجه ولو مطلعتش الأول اعرف إن ده نصيبك وجهدك لأن ربنا عادل وادعي دايما وقول يا رب اديني على قد رحمتك

انك تكون طبيعي وفاجأه طبعك وشخصيتك تتغير أكيد ليه اسباب نفسيه كتير إن الشخص ده اتأذي جامد من حد فقرر يبقي وحش عشان شايف إن الوحش هو إللي بيمشي أو فقد شخص عزيز عليه أو أهله والبيئة إللي حواليه أثرت عليه لكن لو هو من زمان كده وبتسأل طبعه وحش ليه ده بيبقي التربية والأهل السبب

الاكتئاب درجات في الأغلب اعراضه الاحساس الدائم بالحزن وقله الرغبة في عمل الأنشطة اليومية سواء شغل أو دراسة وكسل دائم وتحسي إن نفسك مسدودة عن الاكل وبتاكلي بالعافيه أو بتاكلي بكميات كبيرة وكمان الانعزال وقله الرغبة في الكلام عاوزه طول الوقت تقعدي لوحدك في اوضتك مش حابه تختلطي بالناس ولا تكلمي حد نفسيتك مقفوله من كل حاجه

والله أنا زيك إنتي مش لوحدك أنا عملت اي عشان اتخطي أخدت وقت للحزن وعيطت واكتئبت وبعد اسبوع رجعت أقف على رجلي تاني واستوعب إن ربنا مبعدش عني حاجه إلا لو كانت شر ليا بسم الله الرحمن الرحيم وعسي أن تكرهوا شيئا وهو خير لكم وعسي أن تحبوا شيئا وهو شر لكم والله يعلم وانتم لا تعلمون فخلي عندك يقين في الله وابدأي من جديد وهتطلعي من الحالة دي صدقيني