الموضوع ده أنا بواجه شخصيًا، وبالأخص في الإلتزام، الحمدلله قد منّ اللَّهُ عليَّ بإمامة الناس في بعض الأوقات و ده عمل ضغط أكبر، وأغلب الناس عندهم نفس فكرة الشخص المثالي، بالأخص لو ملتزم، ومش بواجه الموضوع بالعكس بقيت بتقبّله عادي، وأنا هتعب نفسي ليه يعني، وعارف إن مينفعش نجبر حد يطلع عند حسن ظننا، بس مش كل البشر واحد، ما عليكي إلّا أن تتقبلي الأمر، والتعامل معه بأريحية، و ادعي الله بالثبات في الأمر والعزيمة على الرشد، ومهما حصل التزمي بالأمر بالمعروف والنهي عن المنكر واتباع الحق دائمًا، مهما واجهك الناس بغلطاتك لأن ده بيبقى أغلب الرد، و اللَّهُ المُستعان.
تم النشر الأحد، ١٣ أغسطس ٢٠٢٣
مفيش حرام بيغيّر للأحسن يا صديقي، العلاقة بالجنس الآخر غير الجواز هتفضل حرام، سواء صحاب أو حب زي ما بيتقال، حتى لو في نية الجواز ولسه محصلش.. محدش هياخد حاجة مش بتاعته مهما عمل، ولو بدأناها غلط النهاية مش هتعجبنا حتى لو وصلت للجواز في خسارة أكيد، أقسم بالله حتى لو بتساعدوا بعض على الطاعة، هتفضل العلاقة مُحرّمة، والأكبر من الحرام إننا نشوف مبرر نقوله للغلط بدل ما نحاول نتغيّر، والأكبر من كده إن القلب يتعوّد على الغلط وحياته ماشية عادي.. الموضوع كبير وعقابه شديد، وخليك فاكر دائمًا إن ما عند اللّٰه لا يؤخذ إلّا بطاعته.. أنت عانيت لأنك بعيد.. أنصحك بالقرب من الله وطاعته، وبالنسبة للتعامل مع المشكلة اقرأ كتاب الداء والدواء للإمام ابن القيّم رحمه الله.
تم النشر السبت، ١٥ يوليو ٢٠٢٣
﴿وَعِندَهُ مَفاتِحُ الغَيبِ لا يَعلَمُها إِلّا هُوَ وَيَعلَمُ ما فِي البَرِّ وَالبَحرِ وَما تَسقُطُ مِن وَرَقَةٍ إِلّا يَعلَمُها وَلا حَبَّةٍ في ظُلُماتِ الأَرضِ وَلا رَطبٍ وَلا يابِسٍ إِلّا في كِتابٍ مُبينٍ﴾ [الأنعام: ٥٩].. ﴿إِنَّ الشَّيطانَ لَكُم عَدُوٌّ فَاتَّخِذوهُ عَدُوًّا إِنَّما يَدعو حِزبَهُ لِيَكونوا مِن أَصحابِ السَّعيرِ﴾ [فاطر: ٦].. ﴿إِنَّ اللَّهَ عِندَهُ عِلمُ السّاعَةِ وَيُنَزِّلُ الغَيثَ وَيَعلَمُ ما فِي الأَرحامِ وَما تَدري نَفسٌ ماذا تَكسِبُ غَدًا وَما تَدري نَفسٌ بِأَيِّ أَرضٍ تَموتُ إِنَّ اللَّهَ عَليمٌ خَبيرٌ﴾ [لقمان: ٣٤].. أوليس بذلك كافٍ لكِ!! ، إنما هي نفسٌ بعيدة وشيطان، فارجعي.
تم النشر الأربعاء، ١٢ يوليو ٢٠٢٣
{قُلْ يَا عِبَادِيَ الَّذِينَ أَسْرَفُوا عَلَىٰ أَنفُسِهِمْ لَا تَقْنَطُوا مِن رَّحْمَةِ اللَّهِ ۚ إِنَّ اللَّهَ يَغْفِرُ الذُّنُوبَ جَمِيعًا ۚ إِنَّهُ هُوَ الْغَفُورُ الرَّحِيمُ} ، خلاص عرفتي غلطك وندمتي، اتجهي للوجهة الصحيحة بقى، اذهبي لله فهو المأوى والأمان والاستقرار للعبد، توبي لله وادعي أن يغفر لك ويرحمك، و صلّحي من نفسك، الشيطان بيستغل بني آدم في لحظات زي اللي انتي فيها، في ناس ماتوا ملحقوش يعملوا الصح، وربنا لما اداكي الوقت والصحة يبقى لسه فيه فرصة، استغليها صح يرحمك اللّٰه.
تم النشر الثلاثاء، ١١ يوليو ٢٠٢٣
خلينا متفقين أولًا إن كل شيء بإذن الله، المهم الإخلاص في النية لله، ثانيا هتبحثي على اليوتيوب عن تعلم التجويد وأحكام القراءة وده سهل تتعلميه بالمتابعة، ثالثا هتبدأي تحفظي حاجة بسيطة حتى ولو آيتين مش مشكلة وتسمعي القرآن بصوت الشيخ الحصري وده الأفضل في مخارج الحروف والتجويد، شوية شوية هتلاقي نفسك بتحفظي أكتر. ولو بطلتي ترجعي تاني مش مشكلة المهم الاستمرارية ولو مفيش محفظة تقدري تراجعي معاها ابقي راجعي مع نفسك وانتي بتصلي قيام الليل باللي حفظتيه وده هيثبته إن شاء الله ، رابعًا بقى والأهم البعد عن المعاصي وكل ما يهلك النفس، حتى لو وقعتي في معصية اوعي تستصغريها وتوبي إلى الله، و ربنا يجعلك من أهل القرآن.
تم النشر الاثنين، ١٠ يوليو ٢٠٢٣
لو ركزت في كل اللي انت بتقوله هتلاقي بتتكلم عن نفسك فقط، إنك أنت اللي بتعمل وانت اللي قادر، المشكلة في إنك معتقد إنك الحل، بس بداية الحل للمشكلة إنك تبقى متأكد إنك متقدرش تعمل اي حاجة مهما كنت متقن فيها إلّا بإذن الله، تروح لربنا وأنت ضعيف ومذلول له وتنسى نفسك خالص وتعرف إنك ولا حاجة بدون التوفيق منه، وكلامي مش على الإمتحانات والمذاكرة وبس لا، حياتك كلها، تجرّد من حولك وقوتك إلى حول الله وقوته، وكن على يقين دائما قبل بدايتك في شيء إن مشيئة الله قبل كل شيء
تم النشر الأحد، ٩ يوليو ٢٠٢٣
لعرض الملف الشخصي في فدني اضغط هنا