مُهاجرَة :))

مش عايزة أحبطك، بس الموضوع دا محتاج تفكير كبير في كونه ينفع أو لأ، أكتر من التفكير فيه كمشروع إيه يضمن لك ان جميع السيدات اللي هتتعاملي معاهم كلهن أمينات؟ ميبقاش في تسجيلات للرحلة، أو تصوير (بتكلم إن في سيدات هتبقى واخدة راحتها أوي فهيحصل زي ما بيحصل في أي تجمع نسائي من كشف النقاب، أو الغناء، أو الضحك بصوت عال) إيه يضمن لك ان الصور دي مش هيطلع عليها رجال؟ إيه يضمن لك سلامة سلوكهم برضو ؟ إيه يجبرك على تحمل مسؤلية الرحلة، بالأشخاص اللي فيها؟ العائد المادي اللي هيطلع منها أقل بكتير من شعور الخوف من مسؤوليتهم! ومش هتعرفي تتبسطي بشكل كويس لأنك هتكوني شايلة هم كل حاجة، وحتى لو هما أشخاص كبيرة، فهما مازالوا في مسؤليتك! أتمنّى تعيدي التفكير في الموضوع تاني وتعرضي الفكرة على أقاربك الرجال (زوجك/أبوك/أخوك) وتشوفي الفكرة من منظورهم تنفع أو لأ، وهل هما ممكن يوافقوا لحد من محارمهم بالخروج رحلة مع سيدات لا تعرفهم أو لأ

وعليكم السلام ورحمة الله وبركاته 22 سنة لسة صغيرة ما شاء اللّه، اللّهم بارك، وفرصتك في الحياة، والزواج لسة كويسة، مش معنى إن حد طلع وحش يبقى الكل كدا، ولا معناها إنك مش مكتوب لك الزواج، الحياة لسة مخلصتش، ولا هتقف لحد كدا، استمري في عبادتك، وتطويرك لنفسك، وشغلك، واعملي اللي أنت عيزاه، شوفي لو حابة تكملي دراسة إضافية، تعملي دبلومة، تنزلي تحفيظ في دار، شوفي الأنشطة اللي تحبيها واعمليها بحيث متبقيش حاسة بالملل، ودماغك توصلك للتفكير فِي الموضوع دا، كل شيء بيد الله عز وجل، إن شاء اللّه ربنا ييسر لك الأمور، ويكرمك، ويزوجك بأحب الرجال إليه ياربّ 💙 بخصوص الخنقة، ارقي نفسك، واعطي فرصة تقعدي مع اللي بيتقدمولك، وشوفي، واتشرطي، دا حقك جدًا أنت لسة كتكوتة صغيرة والله، حتى لو اللي في سنك متجوزين ومعاهم أطفال!

10 شهور مدة كويسة جدًا لإنه يعترف لك لو في مشاعر تجاهك، طالما مقالش يبقى هو مش موجود، واقفلي معاه، وانهي العلاقة دي، أما بالنسبة لضيقك من العريس المتقدم لك، فعشان قلبك متعلق، ومشغول بحد تاني، حاول تنهي العلاقة، وتاخدي وقت في التعافي، عشان تقدري تفكري في العريس وتاخدي قرار في الموضوع (قرار بكل حيادية بدون تحيّز لزميلك عشان أنت عرفاه، وبينكم حجات مشتركة، وبدون مقارنة بين الاتنين) عشان زميلك ما صرّحش بمشاعره، ولا وعدك بحاجة، أنت اللي حاسة كدا، وعايشة قصة الحب دي مع نفسك فقط، ولو جيتي تقوليله حاجة هيقولك أنا موعدتكيش بحاجة، ورجعت في كلامي معاكي ولا حاجة، والصراحة عنده حق، أنت اللي حكمتي إن دي علاقة أساسًا سواء صداقة، أو حب (من طرفك بس طالما التاني مقالش إنها حب) راجعي نفسك، واعطي نفسك فرصة تفكري كويس، ويمكن العريس دا فرصة حلوة ليك، ربنا يوفقك، ويكتب لك الخير ياربّ :))

اتعامل بقدر الحاجة، ومتتكلمش مع حد عليه، ولا تذكره بأي شيء.. روح الشغل، اعمل الشغل، وخلص وامشي، ولا تركز معاه، ولا تواجهه، ولا تحسسه إنك واخد بالك أساسًا وجرب تجتهد في شغلك، وتتفادى وجود خصم، أو ملاحظات، أو أي شيء، ولو حصل اتعلم منها، ومتخليش أخطاءك، وملاحظاتك متكررة، ولو تقدر تسعَي إنك تشوف شغل في مكان تاني بنفس المقابل، أو فرصة مماثلة للشغل الحالي يبقى كويس، مكانش حاول تجتهد، وتسعَي، وتستحمل لحد ما ربنا يكرمك بعيد عنه اللّه يوسع عليك، ويرزقك من حيث لا تحتسب، ويوفقك ياربّ :))

حبيبتي،المتجوزين عمومًا بنخرّجهم من دماغنا أساسًا، ولا نعطي حتى فرصة لعقلنا يفكر فيهم، ودايمًا نحط نفسنا مكان أهلهم، يعني قبل ما تفكري في انجذابك له، فكري في زوجته، هل هتقبلي الأمر دا لو كنتي مكانها؟، تاني حاجة : أنت بنت في مقتبل عمرك ما شاء اللّه، ليه تحصري نفسك في حاجة زي كدا؟ ليه تقبلي تكوني زوجة تانية حتى لو افتراضًا؟ إن شاء اللّه الفرص قدامك كتير، وإن شاء اللّه ربنا يكرمك بأحسن، عشان أنتِ تستاهلي الأحسن! وعمومًا اللي أنتِ فيه دا نتيجة إن دا بتتعاملي معاه دايمًا، وإن دماغك مصور لك ان مفيش إلا دا، فحاولي تشغلي نفسك، ومتديلهاش فرصة تفكر فيه، ودايمًا فكري نفسك إن اللي يربطك بيه شغل، وبس، ولازم معاملتك تكون رسمية معاه بحيث لا تُعجبي بيه، ولا يُعجب بكِ لأن الموضوع صعب، وتقيل، ومش هتقدري على احتماله، دا لو افتراضنا موافقة أهلك ع الموضوع، بالتوفيق 💙

يبقى نتكلم معاهم، ليه رافضين؟ عشان المسافة وكدا أو التعب يبقى نشوف حاجة قريبة لمكاننا، أو مفيهاش تعب أوي، فهمي مامتك إن النقاب ملوش أي علاقة بكونك تتجوزي أو لأ، النقاب لا يمنع رزق، ولا يؤخره! أنا أكبر منك في العمر، ومش لابسة نقاب، وبخرج كل يوم للناس بوشي عادي، ولم يأذن الله لي بالخطبة أو الزواج إلي الآن! فكشف الوجه، أو تغطيته مش دي العائق، كل واحد ليه رزقه، بس في وقت مناسب، مينفعش نستعجله، ولكن بنحاول نشغل نفسنا بس ونعيش حياتنا، جه أهلا وسهلا، مجاش مش مشكلة، مخسرناش حاجة، كل حاجة هتيجي في وقتها المناسب إن شاء اللّه، المهم نختار صح، وربنا يكتب لك الخير يا فاطمة، ويرزقك بالزوج الصالح عاجلًا غير آجل ياربّ 💙

اعملي بلوك يا حبيبتي، وريحي نفسك من الضغط، والحِمل دا، ومتفرضيش نفسك على حد، هو لو كان عايزك بجد مكانش في حاجة هتوقفه، لا ظروف مادية، ولا غيرها، المُحب مُحاوِل! وأنا مش شايفة مُحب، ومُحاوِل في العلاقة دي غيرك! اقفلي كل السبل اللي توصله بيكي، واحفظي قلبك، ومشاعرك للي يستحقهم، بلاش تهدريهم على أي حد، وقبل ما قلبك يتدخل في الموضوع حكّمي عقلك الأول، وخلي العاطفة آخر حاجة، ربنا يرزقك الحب اللي تستاهليه، وزيادة ياربّ 💙:))