Lolla Ahmed

انا رأيي ترجعيله الاتنين بدون كلام؛ طالما مفيش بينكوا حاجة رسمي فمفيش مبرر انه يبعتلك حاجة ومفيش مبرر انك تقبليها. وبيني وبينك... انه يبعت فلوس يعيد عليكي وانه يبعتلك في رمضان دي حاجة جميلة وتعجب أي بنت، بس اللي مش جميل انه يعمل كدا من ورا اهلك و يكلمك من ورا أهلك، فكان من الأولى انه يهدي الأمور من ناحية أهله، ييجي ويرضي باباكي ب أي كلمة حلوة مثلا و يتوصل لحل يرضي الطرفين. لكن يحاول معاكي انتي، انتي في ايدك ايه!! وبصراحة لو الخلاف اللي حصل بسبب الماديات فانا شايفة ان كل دا مش بيدوم. فلو كان السبب كدا مش السبب حاجة في دينه او اخلاقه مثلا، ممكن تكلمي حد قريب من باباكي وبيعرف يأثر عليه ويلين دماغ باباكي وبعدين يروح للشاب دا ويتفاهم معاه برده، وربنا ييسرهولك لو كان خير ليكي ويرزقك بالأحسن منه لو كان شر ليكي.

فيه نوعين من الخوف؛ خوف يشجعك ويخليك تكمل وخوف يكتفك ويخليك مكانك. لو انت بتشتكي من الأول ف انت تمام، لو بتتكلم عن التاني ف لأ هيكتفك بجد والحل بتاعه انك ماتسمعلوش او ماتسمعش لصوت عقلك وكمل طالما انت ماشي صح كمل.

قريت في كتاب ملفات سرية من داخل العيادة النفسية إن معظم المشاكل النفسية اللي بيمر بيها الإنسان أساسها تربية غلط، فدا واقع بيعيشه كذا حد فماتحسيش انك لوحدك. كل واحد فينا في حياته حاجة بيعافر عشان يصلحها، والشاطر اللي يصبر ويعافر صح ومايستسلمش للحل الأسهل وهو الإنتحار، ولو كان الإنتحار حل مشروع كان أي واحد فينا بمجرد ماتواجهه مشكلة.. يقتل نفسه. نرجع للمشكلة الأساسية... الأهل بيربوا اولادهم بالطريقة اللي اتربوا بيها وبالطريقة اللي فاكرينها صح، ومعظم أهلنا لو تلاحظي ماكملوش تعليمهم واحنا كملنا، ماكانش عندهم كتب يتعلموا منها وهم وفروا لنا الكتب دي، ماكانش عندهم تليفون ونت واشتروا لنا تليفون وغيره...دا كفيل يخلينا نحترمهم ونقدرهم على الرغم من أسلوب تربيتهم لإن احنا عارفين انهم مايعرفوش غيرها. بالنسبة للشخص اللي كنتي بترتاحيله ومات، دا قضاء ربنا سبحانه وتعالى وابتلاء لينا في نفس الوقت، هل هنصبر ونشكر ولا هل هنعترض على قضاء الله؟ آخر حاجة بالنسبة للشخص اللي انتي كنتي بتكلميه، ف انتي يا غالية للأسف حاولتي تلاقي بديل. سمعت شيخ بيقول إن دا بيبقى رزق إما الإنسان ياخده في الحلال اما مايصبرش وياخده في الحرام ويرجع يسأل بعد كدا انا خطوبتي ماكملتش ليه او انا جوازي ماكملش ليه! مانت اخدت رزقك خلاص! لكن يا روحي التوبة تجُبُّ ما قبلها يعني كإنك ماعملتيش حاجة قبلها ف توبي وجاهدي نفسك واصبري واي حد يحاول معاكي اقفلي الباب في وشه ورزقك هيجيلك لحد عندك عاجلا بإذن الله. وحاولي تلاقي البديل دا حاجة تانية، حاولي تشغلي نفسك بالقراءة، ابدئي ب حنان لاشين هتلاقي ليها pdfs كتير على الفيس والنت، روحي الجيم إلعبي مثلا زومبا او رقص شرقي او اي حاجة بتحبيها، اشتركي مثلا في اعمال تطوعية جمعية رسالة او الهلال الأحمر وانزلي معاهم وقت فراغك هتلاقي هناك بنات جميلة صاحبيها. دي كلها بدايل تملي وقت فراغك بحاجة مفيدة بدل ماتمليه ب بديل حرام واهلك تقبليهم لإنهم مايقصدوش يؤذوكي وقوليلهم نعم وحاضر وريحي نفسك وريحيهم مش هتخسري حاجة بل هتكسبي حسنات ولو حاجة ضايقتك ماتعكريش نفسيتك واكتبيها في ورقة واقترحي مع نفسك ازاي تحليها بكل هدوء وقبول او اكتبيها هنا واحنا نساعدك فيها ان شاء الله.

ربنا يسترك يا حبيبتي يارب ويصلح حالك ويغنيكي بحلاله عن حرامه وينزع منك حب المعاصي ويبعدها عنك ويبعدك عنها. ربنا سبحانه وتعالى لو رايد يفضحك كان فضحك قدام مامتك على الأقل ولو كنتي رجعتي للذنب كان فضحك بقا قدام الناس، بس هو سبحانه وتعالى أكبر وأحن من كدا فهيبقى عيب أوي لو استغليتي الستر دا ورجعتي للذنب تاني. صفحة واحرقيها ونقطة.

انا قابلني السؤال دا اكتر من مرة وكنت كل مرة بقول صلاة الفجر لإني مريت بنفس اللي مريتي بيه، فدخلتني زميلتي -رزقها الله الجنة- جروب واتساب بنات ولقيتهم كلهم بيصلوا الفجر ويتمموا على بعض انهم صلوه إلا أنا!!!فبدأت أصليه، ف انتي اضبطي المنبه وصلي الفجرانتي كمان. هتقطعي فيه في الأول لكن لما ربنا سبحانه وتعالى يشوف منك صدق ارادتك هيعينك تصليه وهيكون سبب في انك تلتزمي في كل الحاجات التانية وأولهم الصلاة، اللي هو ازاي تصلي الفجر وتفوتي الضهر مثلا! فتلقائي كدا مجرد مالأذان يؤذن هتلاقي نفسك بتتوضي، فهتحسي بالفرق في صلاتك وفي اي حاجة تامية ماكنتيش ملتزمة بيها فهتحافظي على الفجر.

حرفيا الناس الكويسة في الزمن دا حظهم قليل، حاول تطبق الجملة دي على الناس اللي حواليك هتلاقيها صح. ودا مش تعذيب لأ؛ ربنا سبحانه وتعالى بيشوفهم يستاهلوا المكان اللي هو اختاره ليهم ولا لأ. وبناء على تجربتي الشخصية انت مش هتلاقي صاحب اصلا غير لو هيستفاد منك بأي شكل من الأشكال، تكتبه في الحضور مثلا، تخرج معاه، تقعد معاه لكن مش هيصاحبك لله في لله كدا، ف ابني نفسك وكن سند لنفسك ماتستناش حد يسندك

هو تقريبا دا موسم كدا لإني وشوية من زمايلي كدا برده ف مش عارفة ايه السبب! ممكن عشان رمضان واننا متعودين انه يكون في الإجازة مع ان المفروض العكس لإننا بنعمل عبادة. انا مش عارفة الحل دا هينفع مع كله ولا ايه بس انا باعمله وهو اول حاجة اني باعمل اي حاجة عايزة اعملها عشان ماشغلش عقلي بيها وانا بذاكر يعني لو عايزة اثعد مع اهلي باقعد ولو عايزة افتح التليفون بافتحه وهكذا... تاني حاجة اني باعمل مج كبير قهوة سادة بيبقى نصه بُن حرفيا عشان ما اديش عقلي فرصة انه يفكر ينام (انتي لو مش متعودة على القهوة قللي الكمية عشان غلط) تالت حاجة خلاص مش بيبقى قدامي غير اني اذاكر، والفترة دي باتبع اسهل طريقة للمذاكرة وهي اني باسمع الريكوردات، وبالتوفيق

أنا اتوجعتلك والله! يا بنتي ايه اللي مخليكي عايشة القرف دا (انا اسفة يعني في الكلمة بس انا عايزة اقولها) ايه اللي جابرك تستحملي المشاعر دي، ايه اللي جابرك تصدقيه او تكذبيه ايه اللي جابرك تكلميه وانتي نفسك قولتي انه حرام؟!!!! أنا بجد زعلانة عشانك ومتضايقة منه جدا يعني. المهم سبيه، توبي انتي ومالكيش دعوة بيه، تاب ما تابش رجعلها مارجعلهاش مالكيش دعوة. النبي صلى الله عليه وسلم قال: "إن الله يغار وغيرة الله أن يأتي العبد ما حرم الله عليه". ف اي حد بيعمل حاجة حرام ربنا سبحانه وتعالى بيغير اللي هو ليه تعمل الحرام وربنا سبحانه وتعالى محلله؟!! ولو فضل الشخص مكابر ربنا سبحانه وتعالى بيعاقبه سواء بنفس الذنب اللي كان بيعمله او بحاجة تانية. فنصيحتي خليكي غالية انا حاسة ان فيكي حاجة كويسة ف سيبي الرخيص للرخيص، آينعم هتتعبي شوية لإنك هتحرمي نفسك من حاجة اتعودتي عليها، لكن ايه المشكلة في مقابل تبقى غالية وعزيزة واللي عايزك لازم يسترجل و يدخل الباب مش يستخبى ويدخل من التليفون!!!!

روح ل دكتور نفسي شاطر، العلاج مش دواء بس؛ الدواء ليه أضرار جانبية صعبة جدا، الدواء المفروض يكون لفترة معينة مع الجلسات لغاية اما تستوعب وتفهم الدنيا و الدواء بيبقى ب بروتوكول معين ومدروس لإنه بيشتغل على الدماغ وعشان تأثيره الصعب جدا لازم لفترة صغيرة ويبدا يتسحب من جسمك ب بروتوكول برده معين يعني ماينفعش تتهاون ابدا مع الأدوية دي ولا تاخدها من نفسك وتضيع يومين.. اسبوع وترجع تاخدها بنفس الجرعة تاني... بتأثر بطريقة عكسية وبيخليك عايش في دوامة شبه اللي انت عايش فيها كدا وفيه بعض الدكاترة اصلا بيتاجروا بالموضوع دا عشان يفضل المريض يزورهم علطول. وأعتقد ان فيه صدمة في حياتك سببت لك الحالة دى ولما حاولت تتعافى ماحاولتش صح. انا مش عارفة ايه هي الصدمة او المشكلة اللي واجهتها ومش عارفة اساعدك ازاي بس عالج أصل المشكلة، عالج السبب مش النتيجة؛ لو فضلت تعافر مع النتيجة وسيبت المشكلة ف انت بتعافر على الفاضي. قوي علاقتك ب ربنا وادعي وخد بالأسباب و روح ل دكتور نفسي شاطر مش مادي .

وعليكم السلام بلاش تعملي كدا؛ يعني فيه كل الصفات دي وظلم وغدر زي مابتقولي وخان العشرة وهينزل اللين على قلبة من رسالة؟!! ببساطة لو عملتي كدا اما هيفكر انك عايزة ترجعي اما هيستمتع لإنه وصل لهدفه وخلاكي في الحالة دي. نصيحتي: اتخطي، ركزي مع نفسك، عيشي بنفسك ولنفسك، عادي كان تجربة فاشلة وانتي صلحتيها، الدنيا مابتقفش على حد. لو فضلتي عايشة في الماضي هتضيعي الحاضر والمستقبل، اشتغلي، ابني نفسك وانجحي ماتوقفيش حياتك عليه

غفر الله ذنبك يا روحي🥹 ربنا يكتبك من المغفورين لهم يارب🥹 صلي كتير وادعي كتير قولي اللهم ارزقني لذة طاعتك واحرمني لذة معصيتك، اللهم ابعد الذنب فلان عني وابعدني عنه، صلي التراويح حتى لو ر٤ ركعات او ركتين وادعي فيهم وبعد رمضان صلي قيام الليل حتى لو بعد العشاء وصلي الفجر ولو قدرتي تقومي قبل الفجر ب ١٠ دقايق صلي قيام وادعي . اكيد ربنا سبحانه وتعالى بيحبك عشان خلاكي تُدركي ان الذنب دا حرام وزرع في قلبك الرغبة في التوبة فلازم توري ربنا سبحانه وتعالى صدق نواياكِ بالعمل الصالح.

ليه اتوترت يا روحي؟ هو اللي مختل و دينه مختل وقليل الأدب.. ليه دخلتي علاقتك بربنا في الموضوع؟ هل مثلا عشان اتضايقتي فقولتي يارب ليه حطيتني في الموقف دا؟ ولا عشان ايه؟ لو عشان كدا فربنا سبحانه وتعالى عايزك تبقي أقوى، عايزك تعرفي تتصرفي عشان يؤهلك لمواقف جايه في حياتك، وانتي أخدتي حسنات على فكرة لإنه أذاكي ربنا يهديه. المهم... مش مجرد موقف زي دا يهز علاقتك ب ربنا سبحانه وتعالى لأ دا انتي المفروض تشكري ربنا انه عدا على خير والمفروض تستعيني بيه سبحانه انك ماتمريش بمواقف شبهه ولو مريتي تقدري تتعاملي معاها. نصيحتي ليكي من أخت شبهك...ماتسمحيش لحد يؤذيكي، ماتسمحيش لحد ابدا يقرب منك. حتى في المواصلات، استني العربية اللي بعدها، اقعدي وخدي الكرسي اللي جانبك، اتكلمي، علي صوتك؛ الناس اللي زي دول بيستخبوا عشان ماحدش يشوفهم فلما تعلي صوتك هيخافوا...

جميل، جميل جدا بجد. اعتقد اول خطوة للتغيير للأفضل هي الإعتراف ان اللي فات كان غلط وتاني خطوة هي الرغبة والمحاولة للتغيير وتالت خطوة هي الصبر . النبي صلى الله عليه وسلم قال: إنك لن تدع شيئا لله عز و جل إلا بدّلك الله به ما هو خير لك منه. اللي احنا بنقولها "من ترك شيئا لله عوضه الله خيرا منه" ف الولد اللي انتي سبتيه ربنا هيعوضك احسن منه بس لازم سبحانه وتعالى يشوف منك توبة صادقة الأول، ف توبي واندمي لإنك غلطتي في حق نفسك ورخصتيها و أسأتي استعمال حواسك اللي ربنا انعم عليكي بيها وحرم غيرك منها فبدل ماتشكريه يا غالية تعصيه؟!! وغلطتي برده في حق أهلك لإنهم ربوكي ووثقوا فيكي وادوكي تليفون وانتي كلمتي حد من وراهم. فمفيش مجال اصلا انك ترجعي للذنب دا تاني وارجعي ل ربنا واتأسفيله لإنه اداكي نعمة وانتي ما حافظتيش عليها وقال في القرآن "محصنات غير مسافحات ولا متخذات أخدان" وانتي ماسمعتيش برده كلامه. ف اللي تعمليه ايه؟ اتحايلي على عقلك الباطن، افضلي قولي انا هتوب.. انا هتوب، صلي وادعي يارب مارجعش للذنب دا تاني وكرهني في الأغاني وحببني في القرآن. وعشان ماتفكريش ترجعي للذنب دا تاني وقت فراغك او ماتسمعيش فيه اغاني.. اعملي فيه حاجة بتحبيها وانا انصحك تقرئي حتى لو مش بتحبي تقرئي اقرئي منها تنمي ثقافتك ومنها تشغلى نفسك عن الحرام. وبالتوفيق

جرب تعمل حاجة انت بتحبها، جرب مثلا تروح الجيم وهتلاقي اصحاب هناك يشاركوك نفس الهواية ومع الوقت هتتعود عليهم وتحبهم، او جرب تشترك في نادي والعب كورة وهتعمل اصحاب برده أو لو بتحب القراءة إقرأ وروح اقرأ في المكتبة وهتلاقي اصحاب برده بيعملوا نفس الحاجة. ممكن يكون الناس اللي في حياتك مفيش بينكوا اهتمامات ف عشان كدا بتمل منهم لكن لو دورت على حاجة مفيدة بتحبها وعملتها أعتقد هتتعلم منها و هتخفف عنك الشعور دا

إنك تبقى عايزة تغيري نفسك للأحسن دي حاجة جميلة. لو تقدري تروحي ل لايف كوتش... ما تتردديش لو الموضوع دا مش متاح هقولك على طريقة باستخدمها وحرفيا مفيدة جدا، هي الكتابة أو الكلام أيهما أسهل... اكتبي وواجهي نفسك، اكتبي عيوبك وازاي تصلحيها وخليكي صريحة مع نفسك، اكتبي ايه اللي عايزة تغيريه وازاي تغيريه وليه مش قادرة تغيريه واكتبي الخطوات وابدئي خطوة بخطوة

انت لازمك دكتور امراض نفسية وإدمان ؛ لازم تاخد بديل يفرز هرمون السعادة عندك بدل الحشيش ويبدأ الدكتور يسحب منك الحشيش بالتدريج ولما تتعود ان مفيش حشيش هيبدا يسحب الدواء بالتدريج بالتالي بإذن الله مش هتحس بأي معاناة في أي مرحلة من دول .

ثقي في نفسك يا حب خلي اللي يبص يبص مادام مش بتعملي حاجة غلط، وممكن اصلا تكون مجرد تهيؤات.. بالنسبة للبنات ... بوصي في عينهم ماتبصيش بعيد عشان تحسسيهم انك تمام وواثقة من نفسك بالنسبة للشباب.. سيبك منهم كدا كدا هيبصوا حتى لو بصيتي في عينهم.

لو هي متبرجة ف انتي حرفيا بتاخدي ذنب كل واحد شافها وكل واحد نزل صورتها على فونه وكل واحدة شافتها وقلدتها، ف نصيحة مني ابعدي عن المجال دا وبما انك مسحتي الصور ف توبي وماتعمليش كدا تاني وإن شاء الله ربنا هيسامحك.

وعليكم السلام الدكتور النفسي ممكن يتدخل في أي حاجة بتعاني منها مهما كانت بسيطة، ممكن حتى لو عندك مشكلة مش عارفة تحليها تسأليه يقولك ازاي تتعاملي معاها. بالنسب ل ازاي يعالج نفسه بنفسه ف اعتقد دا بيعتمد على المشكلة هل هي بسيطة ولا لأ؛ مش كل حاجة هنقدر نتعامل معاها لوحدنا.

النبي صلى الله عليه وسلم قال: "يأتي على الناس زمان الصابر فيهم على دينه كالقابض على الجمر" . دي حاجة الحاجة التانية هي إن الشخص القليل هيتعمد يقلل من اللي قدامه عشان مايحسش انه لوحده تحت، فتلاقي اللي بيتكلم وتلاقي اللي بيضحك وتلاقي اللي بيتجنبك أصلا... فسيبك من الصنف دا. لو ملاقتيش اللي يمشي معاكي نفس الطريق.. امشي لوحدك، اعتمدي على نفسك وثقي في نفسك ماتخليش كلامهم يجيبك أبدا ورا. كان فيه حديث بس انا مش فاكرة النص بتاعه.. معنى الحديث ان النبي صلى الله عليه وسلم دخل مرة على صحابي وحب يهزر معاه فقاله هبيعك في سوق العبيد، فرد الصحابي وقاله "اذن ستجدني كاسدا يارسول الله" لإنه كان صحابي وحيد مايعرفش حد وماحدش يعرفه بالرغم من انه صحابي. فحبيبتي خدي الموضوع عادي ماتخليهوش يفرق معاكي ومع الوقت مش هيفرق فعلا وشيلي نفسك بنفسك ولو كان تجنبهم وتنمرهم عشان انتي متدينة فصدقيني ربنا هيعوضك.

اقدر افهم من كلام حضرتك ان بنتك اكبر من ٨ سنين؟ حسب مخطط العمر والطول لمنظمة CDC ف طول 125cm العمر بتاعه الطبيعي من ٦ سنين ونص ل ٨ سنين يعني لو بنت حضرتك في العمر دا هي تمام مافيهاش مشكلة. لو هي سنها أكبر من كدا بتشوف هرمون ال GH اللي هو هرمون النمو وبتشوف هرمونات الغدة لإنها بتأثر على هرمون النمو. امتى تاخد علاج هرموني؟ لو عندها نقص في الهرمونين دول. لو ماعندهاش نقص فهيبقى سبب قصرها جينات وراثية ومهما عملت فيها مش هتتغير. وبالنسبة لسؤال حضرتك... ايوا لو اخدت هرمون النمو ومستواه في جسمها طبيعي هتحصل حاجة اسمها Acromegaly او اكروميجالي يعني ايديها ورجليها هيكبروا وهي مش هتطول غير بالقدر اللي تسمحلها بيه جيناتها.

الأعمال الخيرية اللي هتلاقيها في وقت متأخر ماتروحيهاش واسمعي كلام اهلك، روحي في الأعمال اللي بيحطوها بدري

انتي لسه متابعاه ليه يا حبيبي؟ اعمليله بلوك، وافتكري دايما ان من ترك شيئا لله عوضه الله خيرا منه.

انا اعرف واحدة واحد معاها في الجامعة برده كان بيحبها فقالها، اديتله رقم باباها وقال ل باباها كل حاجة وطلب انه يخطبها بس مش هيقدر يجيب حاجة غير لما يخلص ويشتغل وفعلا باباها وافق ودلوقتي مخطوبين رسمي بس بدون دبلة. ف كلميه واطلبي منه يكلم باباكي وعادي يكون الدهب بعدين ولو وافق مبروك مقدما، لو لأ يبقى بيتسلى

مقبول إن شاء الله؛ الإغتسال شرط للصلاة مش للصوم

هم بيضيفولك ايه!

تجنبيه بس ماتقاطعيهوش يعني قوليله صباح الخير يا بابا وتصبح على خير واعمليله شاي ك نوع من التعبير عن المشاعر وبلاش تجادليه وكل اللي هتقوليه هم نعم وحاضر وماظنش باباكي عايز منك حاجة اكتر من كدا، ويمكن مش قاصده يعاملك كدا هم بيربونا بالطريقة اللي اتربوا بيها وفاكرينها صح مكانش عندهم امكانيات تعلمهم ايه الصح وايه مش صح فنراعي احنا النقطة دي ونراعي انهم مهما كانوا اهلنا ومهما عملنا هيفضلوا يحبونا ويمكن حنيتهم مش بتبان غير وقت التعب بس موجودة وانتي اكيد شوفتيها

ربنا يرحم باباك وبلغه الفردوس من الجنة اللهم آمين وربنا مايحرمكش من مامتك ومايحرمهاش منك

يعني بعيدا عن المعجزات بتاعتهم لإني ماسمعتش عنها قبل كدا. انتي شايفة إن أحكام الدين بتاعهم تنفع أحكام؟ شوفي أحكام الدين الإسلامي وأحكام أي دين تاني وانتي هتعرفي انهي دين هو اللي بيحفظك ويعلي مكانك "حرفيا" وماتسمعيش لأي حد وخلاص؛ أي حد بقا عايز يتشهر اما يسمي نفسه ملحد ويضحك على الناس اما يطلع يعمل حاجات مايستوعبهاش العقل.

من الأفضل اسألي دار الإفتاء

مش لوحدك عامة؛ أي حد بيحاول يغير من نفسه بيحاول مرة واتنين و ألف ومش لازم تيأسي لإن اليأس دا إما بيكون من الشيطان لإنه مش عايزك تبقى أحسن إما من عقلك الباطن لإنه برده مش عايز يتعب، مش عايز يسيب حاجة هو متعود عليها فلازم تحاولي ولما تقعي حاولي تاني وابدئي من تاني ودايما كرري مقولة "أنا هاقدر" واكتبي الحاجة اللي عايزة تغيريها في ورقة كبيرة والزقيها قدامك على الحيطة عشان تتغلبي على عقلك الباطن وادعي ربنا انه يساعدك مهما كانت الحاجة بسيطة وبجد هيساعدك

ماعرفش والله مكانهم فين بالضبط لكن ممكن تسأل في مستشفى جامعة عين شمس لو قريب منها لإن معظم دكاترة السايكتري عندنا من عين شمس او ممكن تسأل المستشفيات القريبة منك لو فيه دكتور سلوكي متعاقد معاهم لإني أعتقد سعرهم في المستشفى هيكون اقل بكتير من لو عيادة برا، آخر حل بقا ممكن تبحث على جوجل على عيادة قرببة منك

نصيحتي أيوا روح لدكتور سلوكي بس بلاش اونلاين عشان هتلاقيهم استغلاليين

قوليله "هم السابقون ونحن اللاحقون" وخلاص على كدا

لو انت شايف انهم كويسين بس فيهم الحتة دي بس... انت ممكن تكلمهم براحة يعني مثلا تقولهم فلان عمل واحد واتنبن وتلاتة هل دا ينفع وبكدا هتكسبهم ان شاء الله وتبقى واحد منهم، وراعي برده انك جديد وهم عارفين بعض من زمان ومن منطقة واحدة فمش عايزين يخسروا بعض، و لو دا مانفعش اهو تبقى حاولت وركز في شغلك بحيث تقرب من المدير اكتر وكدا بما انك عارفة وف نفس الوقت ماتبقاش لوحدك

الإنسان بيستغل الإنسان الأضعف منه.. طور نفسك واستقوى بعلمك وخبرتك، خد كورسات، ما تتكسفش تقول "لأ عيب، لأ ماينفعش كدا"، دافع عن نفسك وماتعملش حاجة على حساب راحتك. وصدقني لما يشوفوك متميز وشخصيتك قوية هيعملولك ألف حساب