عائشة شفيق

اسفه لانك حاسس بكدا و حاسه بيك جدا الفكره أن في إضرابات نفسيه ممكن تكون هي الي سببتلك الاضطرابات دي عندك زي مثلا الاكتئاب و الي هو اي بقى/ ما انا اتحرك ليه و احاول ليه ما كدا كدا هخسر و مفيش معنى للمحاوله و مفيش امل اصلا أو مثلا القلق و الي بيجي في صورة/ مهو لو جربت ممكن اخسر و ممكن انجح بس لو نجحت ممكن اخسر تاني و حتى لو خسرت أو كسبت في حاجه مستخبيالي معرفهاش أو مثلا اضطراب الوسواس زي / المحاوله كانت صح ولا لا ـ المحاوله كانت صح ولا لا ـالمحاوله كانت صح ولا لا ـالحاوله كانت صح ولا لا و مثلا اضطراب كرب ما بعد الصدمه / و الي هو مش عاوز ارجع للوقت الي خسرت فيه تاني مش عاوزه افتكر و مش هستحمل الي هيحصل فا ممكن يكون حصل معاك كدا في الماضي و انك مش عاوز تجرب حاجه تاني او تعمل حاجه تاني دي كلها انواع اضطرابات ممكن تكون هي الي وصلتك للمرحله دي و خليتك بايع أو متقبل خسارتك في دراستك أو حياتك عمتا ادي لنفسك فرصه انك تفهم نفسك اكتر و تقبل مشاعرك و عشها و لكن متسيبش نفسك يعني ادي لنفسك فرصه بس بالعقل و حاول انك تتعب شويه مع نفسك علشان تعدي الفتره دي على خير الطرق كتيره بس اهم و اول خطوه انك تكون عاوز تتغير من جواك بمعنى انك تكون عاوز تحسن نفسك فعلا فا حاول توصل للمرحله دي بتقبلك و فهمك لمشاعرك و انك تخرج كل الطاقه السلبيه الي جواك بالوقت و توصل لنقطة انك عاوز تبدأ تتغير أو تحسن من نفسك وقتها الطرق هتكون كتير و بسيطه باذن الله حاولت اديك معلومه ممكن بيها تفهم نفسك و تساعدك و ربنا يصلح لك الحال و يوفقك فيما يحبه و يرضى

انا و انا بقرا السؤال حسيت اني شايفه بنت جميله و روحها جميله و ضحكتها حلو و بعدين عن انك عرفتي انسان مش محترم و مش كويس للاسف انتي بس الي خسرتي في العلاقه دي لكن هو محبش اصلا لو كان حبك كان هيشوف فيكي كل حاجه جميله مش ياخد الجميل الي فيكي و يقنعك ب أنه وحش لو كان بيحبك كان هيشوف أن اجمل حاجه فيكي هي سمارك خدي بالك في ناس كتيره جدا الي محليها سمرها فعمر السمار مكان معيار للجمال اصلا و انت من نقاءك و طيبة قلبك خليتي كلمه من انسان زي دا تأثر عليكي كدا انت لو ركزتي فيه هتشوفي فيه العيوب الي بجد شخص مش بيحب راضي عن نفسه و هو بيلعب بحياتي و مشاعر انسانه شخص مش بيهمه الا المظاهر فمش دا الي هناخد منه رأيه فيني و مش دا اللي لو قال كلمه علينا هتكون صح و هيكون عنده حق فيها دا مش الإنسان الميزان الي هنقيس عليه نفسنا و جمالنا و حلوتنا و انتي حد جميل و شخصيتك جميله و مرحة قادره تخلي اللي حواليكي يحبوكي بجمالك و اسلوبك فلازم تصدقي انك فعلا جميله و أنه ميستهلش يكون معاكي و انك انضف بكتير انك تكوني مع حد زيه فركزي بقى على نفسك شويه علشان انتي ضيعتي وقت كتير وانتي مش متقبلاها و بعيد عنها و ربنا يكرمك يا جميله

و عليكم السلام و رحمه الله و بركاته استاذ فتحي حاسه بيك و مقدره مشاعرك و عدم رضاك على نفسك اعتقد ١٩ سنه يعني اولى أو ٢ جامعه يعني في الفتره الي الإنسان بيبدا يغير فيها من نفسه للاحسن بما انك في فترت الجامعه فا من الاحسن انك تهتم جدا بالكورسات لازم كورس انجلش و كورس برمجه و اكسل و ورد لأن دا شبه ضروري و هيفيدك جدا قدامك تاني حاجه اعترافك بغلطك دا شيئ كويس جدا و لو فكرت فيها فا دا ناتج من شخصيتك القويه مش الضعيفه لأن الإنسان مش بيحب يبان حتى قدام نفسه انه غلط حل الموضوع دا انك دايما تستغفر ربنا على اي غلط بتعمله و تفكر في الشيئ قبل أما تعمله مره و اتنين و تلاته يعني مثلا هعمل كذا كذا فكر قبلها انا لو عملت كدا دا هيكون صح؟ طب دا هيرضي ربنا؟ طب دا تمام؟ لو اه فا يلاا لو لا فا متسمحش لنفسك انك تكون ضحيتها بمعني متخليش نفسك تسحبك لحاجه وحشه و متخلهاش تدمرك بمعنى اصح انت الي تسيطر على نفسك مش نفسك الي تسيطر عليك اقرا كتب علم نفس لأن دا هيوعيك و هيضاعف ثقتك في نفسك و تنزل جيم تظبط جسمك و تعمل عضلات حاول بين كل وقت و التاني تشتري حاجه لنفسك حتى لو بسيطه تيشيرت مثلا نوت بوك جديده ساعه جاكت اي حاجه حتى لو بسيطه انت مش ضعيف انت قوي و بما انك خدت نية التغير فا دا معناه انك تقدر تعمل كدا وانا واثقه فيك و اخر حاجه هقولهالك حاول تختار حاجه تشتغل عليه و تكون مميز فيه مثلا دراستك اشغل و اتعب عليه لحد ما تكون مميز فيه أو مثلا الجيم تشتغل على نفسك فيه جدا لحد ما تكون انسان مميز في الشيئ دا الي هو دا فعلا بقى حد تاني اهم حاجه اختار لنفسك مكان تعمل فيه علامتك الخاصه و ربنا يوفقك و يكرمك باذن الله

السلام عليكم و رحمه الله و بركاته في جمله دايما بفكر نفسي بيها و هي " ثلاثية النجاح " في حياتنا الطبيعيه يعني اي الكلام دي يعني في 3 طرق بيسعدونا نكون أشخاص كويسين جدا ١ـالدين ٢ـالمتنميه ٣ـالعلاقات الاجتماعيه علاقتك بربنا لازم تقويها لانك اصلا لو اتجهتي للطريق دا و عملتي كل شيئ ربنا أمرنا بيه مش هيكون عندك وقت فراغ اللجوء إلي الله جميل و مطمئن و مريح و انت مع ربنا ربنا سبحانه و تعالي هيصلحلك كل حياتك و هينورلك كل حياتك فا لازم تشتغلي على دا و تحطي هدف لنفسك في حفظ و تفسير و تدبير القران و تحطي هدف لنفسك في الختمامت و هكذا تاني حاجه و هي التنميه لازم تشتغلي على النقطه دي كويس لازم نفسك تكون فارقالك اكتر من كدا انا حاسه بيكي و بالي انتي فيه بس لازم تساعدي نفسك و تنمي نفسك اقراي كتير في المجال الي بتمليله شويه زي مثلا كتب علم النفس القراءه بتوعي و بتثقف جدا جدا و هتطول منك جدا هتخليكي مدركه لكل أمور الحياه و انك تنزلي جيم دا هيكون كويس جدا هتعرفي ناس كويسه فيه و غير أنه هغير مودك جدا و هيبقى مكانك التاني تالت حاجه و هي العلاقات الاجتماعيه و هي علاقتك بالناس الي معاكي في البيت و عايلتك و اصحابك و هكذا تحاولي تتكلمي معاهم و تعبرلهم دايما عن مشاعرك تجاههم و تحكيلهم اي حاجه مضايقاكي و تخرجوا سوا و تعملي صحاب كويسين و يبقى صحاب القعده الحلو بمعنى ان انا و انا معاهم حاسه ان مبسوطه و بضحك و فرحانه حتي لو هتتكلموا على احزان كدا هتملي يومك و حياتك و مش هتكوني فاضيه أو عايشه الدنيا بطريقه مضايقاكي أو بشكل عبثي و ربنا يصلح لك حالك و يكرمك يارب و ربنا يرحم والدتك و يجعلها من اهل الجنه و يدخلها الجنه بدون حساب ولا سابقه عذاب

دوري على نفسك في الشيء الي انتي بتحبيه علشان تقدري تكوني مميزه في تخصصك هنقول مثلا انك حابه تشتغلي بمجالك رقم واحد حاولي تتعملي لغتين الاول هي الانجليزي لانه الأساسي و التاني مثلا الماني أو فرنساوي او اي لغه تانية و تكون ليها استخدام كتير في مجالك اللغه الاولى اساسيه و التانيه لتميزك في مجالك حاولي تختار تخصص و تنمي فيه نفسك جدا و خدي من على النت كورس اكسل و ورد و برمجه كبداية لو مش متاح معاكي انك تسافري و تشتغلي و كدا يبقى لازم تركزي على المنح التطوعيه الي بتاعنا بتكون اسبوعين شهر اتنين سنه و هكذا و وانتي هناك في الوقت دا هتحاولي تشوفي شغل في مجالك و بالكورسات الي هتخديها حوشي مبلغ يسندك في الفتره الاولى واعملي سيرش و ركزي على الدول الي محتاجه مجالك و اعملي علاقات دلوقتي مع ناس كصحاب من الدوله الي هتقرري تروحيها يكونوا صحاب ليك و معاكي لما توصلي باذن الله واثقه فيكي و واضح انك انسانه طموحه فا انتي قدها و ربنا يكتب لك كل الخير و يوفقك و ييسرلك كل امورك يارب

بص يا فندم التاقلم مش سهل و مش هيجي من يوم وليلة لكن هو من أهم عوامل الاعتماد على النفس والبعد عن الاسرة شوية علشان تلاقي نفسك وتفهم نفسك ولازم يجي عليك وقت تقعد بال 10 و ال 20 يوم تكتفي بس بانك تتواصل معاهم اونلاين فقط. استغل الفرصه دي في إنك تعتمد على نفسك نفسيا لأن ممكن تكون فتره و مؤقته بس اصلا اتعود ترجع البيت متلقيهمش معاك و تساعد نفسك بنفسك و تعمل حاجات بنفسك. خد الفتره دي على أنها تحدي وإنك لازم تنجح فيه طول الوقت فكر نفسك إنك لازم تنجح وإنك اتغربت و بعدت علشان كدا يعني ضريبة نحاجك بعدك عن اهلك فلازم يكون نجاح انت تفتخر به مش شغل بس لا شغل و ثقافه و دين ...الخ ساعتها بس هتكون راضي عن نفسك و هيجي يوم و تقول لو مكنتش بعدت و استحملت مكنتش هوصل للنجاح دا انا مقدره شعورك و خوفك و احتياجك الشديد ليهم دلوقتي و لكن في هدف قدامك و حاول تركز عليه و هتتأقلم لان كل الي قبلك كانو كدا و كل الي مننا و طلع برا بلادنا كانو كدا و في الاخر وصلوا للي هما عاوزينه ربنا يوفقك يارب و يكتب لك كل الخير و ترجع ليهم بالسلامة بإذن الله

يجوز لكي الطلاق في حالة عدم التفاهم معه و في حالة تقديم الاهانه لكي و عدم احترامه لكي ولكن افضل انك تجربي معاه اكتر من طريقه قبل اتخاذ الخطوه دي طالما فيه اولاد. كان في استفسار، هل هو بخيل ولا دا استخسار؟ إذا كان بخل فالموضوع صعب جدا يتغير و الشيء الثاني اعتقد انك فاهمه شخصيته جربتي تعامليه قبل كدا بأساليب مختلفة و مدروسه زي انك مثلا تكوني مظبطه كل العوامل الخارجيه اللي بيه مش هيتعصب أو هيتكلم بأسلوب مش كويس و هكذا الواضح من الكلام انك مقفوله منه و هو كذلك الأمر جربتي تعبري له عن مشاعرك في وقت هادي حاولي توسعي مجال النقاش الهادي بينكم و تسمعوا بعض في وقت هادي مش خناق جربتي تخرجي معاه بعيد عن الاولاد و الشقه شويه حاولي تهيئي دايما الدنيا لانه يعاملك كويس بمعني اجبريه بأسلوبك أنه يحترمك و يحبك كمان قولي كلام جميل طول الوقت في العادي علشان يبدأ يقنع عقله الباطن أنه بيحبك و ميقدرش يستغنى عنك ففي الوقت اللي الدنيا هتشد فيه هيبدأ يهدى و يتعامل بأسلوب احسن لو كنتي جربتي معاه كل الطرق و هو بردو مش كويس صلي صلاه استخارة و توكلي على الله في موضوع الطلاق و ربنا يقدملك كل الي فيه الخير و يصلح لك حالك و يهديلك امورك

دا ممكن يكون راجع ل ضغوطات أو صدمات أو أو حاجه ليها علاقه بالماضي فا لو في حاجه ممكن تحاول تحكي و من دا هنقدر نشوف حلول سوا لأن انا كل كلام ناتج عن احتمالات و علشان نوصل لمرحله الحلول لازم نكون على درايه بالامور لان ممكن يكون موضوع في الاخر انك محتاج حد تفضفض معاه و بس فا انا بضرب مثال أن الموضوع ممكن يكون بسيط جدا و ميسر باذن الله فا حاول تتكلم اكتر و تقول حاجات انت حاسس انها تعبتك حتى لو بسيطه أو مثلا حاجه بتفكر فيه و شالغه بالك حتى لو من الماضي

مش تتخلص منه بس لا و تحوله من عيب لميزه و ربنا يوفقك

و اياكم يارب العفو على اي كلنا واحد و انت مش لوحدك

تاني حاجه و انا قولتها بس حابه اقولها تاني اوعا اوعا اوعا تسمح لنفسك انها تدمرك دائما اسعى انك متكونش ضحية نفسك طول الوقت خليك واثق انك اقوى من أن الافكار السلبيه تمشيك و تقيدك

دا طبيعي جدا لانك انسان مش ملاك اهم حاجه ترجع عن الغلط و تندم عليه و تستغفر ربنا عليه

السلام عليكم ورحمه الله وبركاته الثلث الاخير من الليل تقريبا كدا من الساعه ١ لحد قبل الفجر

اكيد السبب راجع لضغوط كبيره او صحبه غير صالحه قريبين منها الفتره دي و عقلها الي بدأ يصورلها السجاير هي الي بتهون عليها و بتخرجها من الي هي فيه في الفتره دي لازم تقربه منها جدا كا صحبيه مش رقابه الاسره عليها عامل كبير في مساعدتها لازم تصحبها و تخليها ترتحلك و تحكيلك الي جوها و تفرغ ضغوطها دي معاكم لأنها جايز تكون جربت دا مع صاحبها و هما نصحوا بالسجاير مثلا او عرضوا عليها الفكره حتى لو بهزار و اتكلمي معاها عن ربنا كتير لأن علاقتها بربنا هتبعدها عن كل دا كلميها عن حرمانيه الموضوع و ادعلها كتير ربنا يعفو عنها و يهديها ة اكثري من الدعاء ليها دايما و ربنا يعفو عنها و يصلح حالها