Mo Raafet

نصيحة من اخ اكبر منك باختصار شديد جدا . ما بني على باطل فهو باطل و الحق احق ان يتبع . يعني اقفلي الصفحة ده نهائي من حياتك لانه مضر ليكي من كل النواحي اللي ممكن تتخيليها و ربنا يوفقك و يعينك .

أولا ربنا يجزيك خير ع صبرك و إبتلائك و اعرف ان الابتلاء على قدر الايمان و ربنا يجعلك من المبتلين أصحاب الايمان القوي إن شاءالله و الحمد لله انك زي ما بتقول راضي . ثانيا بقى كلام الناس أو نظرات الناس مش بتقدم ولا بتأخر و مش هتغير حاجه خالص فحاول تتجنبها و متشغلش بالك بيها خالص لأنها غير مبنية على ثوابت أو أمور صح من الأساس . حاول تشوف حياتك عادي و طور من نفسك و إثبتلهم إن المنطق بتاعهم غلط و انت أحسن منهم أصلا مش أقل ولا حاجه و ده حتى واقعي برده حاليا من غير أي شئ يكفيك انك ربنا اختارك من ما بينهم و ميزك . ربنا يوفقك ف حياتك و يرزقك راحة البال♥️♥️♥️♥️

حاول تتقرب منهم و تتكلم شويه قدامهم عن ميولك و اهتماماتك و عن أي شئ عامة بتحبه و شوف كده حد هيتفاعل معاك زي أنه يقول رأيه برده ف الموضوع اللي بتتكلم فيه ولا لا . أهم حاجة اتكلم بمصداقية و صراحه من غير مبالغة أو تعلي صوتك عادي يعني و خليك واثق من نفسك و انت بتتكلم . لو محدش بقى تفاعل بعد ده كله اسال اللي انت عايزه عن رأيه . فرضا بقى هو اصلا مش مهتم باللي انت بتقوله عادي جدا ممكن تسأله عن إهتماماته و ايه اللي بيحبه و هل هو مميز ولا لا و يا سلام بقى لو عرفت تشجعه أو تثني عليه في حاجة حلوة فيه فعلا مش تطبيل ده هيحببه فيك جدا و هيدي طابع ليك حلو بس اهم حاجه بصدق مش هري و خلاص و بس اكيد هتلاقي بعد كده زي لغة حوار مشترك دائما و ممكن ينجذب ليك في حاجة انت مميز و العكس صحيح وربنا يوفقك و خليك حريص انك تعمل صداقات حقيقية مش كلام و خلاص و إن شاء الله تبقى صحبة صالحة.

هون ع نفسك و اصبر شويه و هتلاقي مع الوقت الموضوع بيتنسي و ربنا يعوضك خير . حاول بعد كده تتصاحب ع اللي يقدرك و يعرفلك قيمتك و انت برده لازم تتعلم تكون شخص ذو قيمة و متكونش متاح دائما الا مع اللي يستحق ده و ربنا يوفقك يا صاحبي .

هقولك ع تجربة ليا لعل و عسى تفيدك انا ليا صديق عزيز عليا جدا و نتيجة لطبيعة دراستي بعدت جامد عنه بس رغم كده كان في اتصال بس مش كبير اوي زي زمان بس لما كنا نتقابل ببقى فرحان جدا و هو كمان نفس المشاعر بعدها بفترة لقيت شويه زي تقل و جفاء اوڤر متوقعتوش من شخصه بصراحه و اكيد حد والله اعلم شوه صورتي قدامه فأنا من وقتها عشان عارفه طيب قولت هعامله باحسن ما عندي و اللي اقدر عليه والله لو رجع معايا زي الاول فهو إنسان ذو عقل و بيحبني فعلا و نيته سليمة ولو غير كده فهو باعني من مجرد كلام سمعه عني غلط لتشويه صورتي و خلاص و انا مش حمل بصراحه مناهدة و انا مش مطالب اني اعمل اكتر من كده و معرفش الدنيا فيها ايه لما مجرد كلام يعمل كده ما بينا ما بالك لو حاجه كبيرة و مستاهلة فخلاص . و سبحان الله رجع تاني زي الاول و تيقن الحمد لله أنه كويس و طلع عاقل . ملخص الكلام ده كله عامليها بما يرضي الله و اوعى تواجيهها أو تلوميها فاي حاجه و اختيارها هو اللي هيحدد خيارك بعد كده و الكرة في ملعبها برده مفيش احسن من كده و ده مش خبث خالص لا ده ذكاء عاطفي و حرص على العلاقة أنها تستمر أو تنتهي بالمعروف .

مبدأيا كده الكلام ده اللي بقوله ده وجهة نظري الشخصية و اتمنى تكون صح . انا شايف إن أي حاجه لو زادت عن حدها فهي وحشة مهما كانت ده شئ جميل حتى العبادات اللي تزيد لدرجة أنها تلهيك عن دنيتك فده شئ مش حلو و الله اعلم. بالنسبة لمشكلتك فأنا شايف انك شخصيه واعية و ادراكك عالي بانك قدرتي تقولي انك عندك الي حد ما نقص شغف و صبر و قرارات مش صحيحة اوي و طبعا معاكي حق انك تزهقي من اللي حواليكي و ده كله وارد بس الغلط انك تقطعي علاقتك بالشخص . الموضوع ابسط بكتير من كده يعني انتي ممكن تقللي خروجك شويه أو الوقت اللي بتقضيه معاها و كده او ع الأقل تقوليها انا تعبانة شوية و محتاجة اقعد مع نفسي شوية و اكيد هي هتتقبل ده بصدر رحب أما بصورة مباشرة انقطاع كده و جفاء ده مش حلو خالص خالص و الله اعلم برده .

🖼️ صور مرفقة

مقموصه ههههه

في بلاي ليست لدكتور راغب السرجاني ع اليوتيوب ممكن تسمعها ليه و هي حلوة جدا كبداية .بس ده اللي انا عارفه مش اكتر 😅.

حاولي تاخدي الموضوع ببساطة و عقلانية شويه . اولا الاصدقاء مراحل ف حياة بعض و محدش بيبقى لحد بمعني اني متضايقيش نفسك ع حد بعد مرة واحدة أو بيتجاهلك و غيره و استحسني الظن برده لعل و عسى ربنا بيبعد عنك شر و انت شايفاه حلو الله اعلم ف الاول و ف الآخر و بالنسبة للموقف أو الوضع اللي فيه حاليا فانا رأيي و الله اعلم اذا كان صح و لا غلط او حتى يناسبك ولا لا اني ببساطة هتعامل مع الشخص زي ما كنت يعامله عادي جدا طالما انا شايفه كويس و مش بيعرضني لأي أذى و هعامله بما يرضى الله غير كده لو بيقلل مني أو شايفني أقل منه لا هبعد بهدوء خالص و اريح دماغي . و نصيحة بعيدا عن الموضوع ده حاولي انك توسعي دائما دائرة الاصدقاء و انك تقويها مش مجرد زمالة وربنا يوفقك و يوفقنا في حياتنا .

بص يا صاحبي إحنا ف ايام مفترجة و انا عارف ان الحياة بقت صعبة جدا بس الحمد لله على كل حال و انا والله كنت اتمنى اكون مثقف شويه ف شغل الاونلاين و كده بس للاسف انا معلوماتي متواضعة جدا ف المجال ده عامة هقولك اللي انا أعرفه أو كنت اعمله لو مكانك . كنت هدور اولا ع اي شغل جنبي بعرف اعمله و يكفيني ليومي مع كام ساعة ف اخر اليوم اتعلم فيهم حاجه تجيبلي فلوس من ع النت زي فوتوشوب و اليستراتور و مونتاج و غيرها . تاني حاجه اسرع شويه موقع اسمه gotranscript ممكن تتفرج ع ڤيديوهات ع اليوتيوب ازاي تشتغل فيه و كده وده لينك الموقع https://gotranscript.com/ . ممكن حاجه كمان حلوة شغل فوتوجرافر بس لازم تتعلم برده فيها . عامة أنا عارف الحاجات ده كلها محتاجه وقت شوية و مهارة انك تتعلمها بس صدقني مربحة و اعتقد متوفرة شويه و كل ما تتميز فيها هتجيب فيها و ربنا يرزقك بحلاله.

ممكن تروحي لأقرب مستشفى جامعة و تكشفي هناك بتكون الاسعار رمزية و إن كان بتنتظري مدة طويلة بس ع الأقل تكوني اطمنتي على نفسك و طبعا لازم تجتهدي في مصدر رزق ليكي و حط في اعتبارك إن الظروف بقت صعبة جدا للاسف على الناس

معظم اللي قولتيه ده اسباب فعلا و الرئيسي منها البعد عن الدين و الأهل و للأسف ده بقى خرج اجيال متدمرة حرفيا و هي لسه ف بداية حياتها و تحديات الدنيا بس لسه الكلام ده هيوضح ف خلال عشر سنين و الواعي اللي يدرك دلوقتي النقطة و يعمل أنه لما يتجوز يعلم ولاده الدين الصح و يقعد معاهم و يتفهم مشاكلهم و يكون صديق ليهم فعلا عشان ميدوروش بره

انا دكتور و بقولك الموضوع عادي جدا و مفيهوش خجل خالص و يوميا بييجي عشرات الحالات عشان الدوالي فروح طبعا عشان يحدد درجتها و يشوف محتاجة تدخل جراحي ولا لا و عشان نعرف السبب و منها اطمنت ع نفسك

لا طبعا خليكي حكيمة ف تصرفاتك بمعني انك تعرفيه إن العلاقة ده حرام و لا تجوز و ابعتيله الأدلة على كده و بلغيه انك خلاص مش هتكملي ف حاجة تغضب ربنا . و وقتها ممكن يكون كويس و ينسحب و يحترم رغبتك لأن ده الصح و لعل و عسى ربنا يجمعكوا سوا بعدين ف الحلال، أو هيحاول يقنعك بأي شيء بغرض انكوا تكملوا و هو شايفك صديقه فقط لا غير أو اي حجة و وقتها تيقني انك كنت بتضيعي وقتك ع الفاضي و فوقيها كمان ذنوب فتقطعي و خلاص و مترديش أبدا اقفلي الصفحة و انتي عاملة اللي عليكي بوضوح شديد . لاقدر الله حاول يضايقك أو يستفزك بأي شئ فالجأي للأهل او شكوى ف القسم و إن كنت مستبعد حاجة زي كده بس الله أعلم بما ف النفوس و الناس مبقتش زي الاول للاسف . انا بقولك الكلام ده عشان تبقى واثقة من نفسك و متخافيش فقط لا غير .

شئ طبيعي للاسف ف الزمن ده من غيرة أو حقد للاسف نابع من قلة إيمان و عدم ثقة ف النفس ف بعض الأحيان. و نصيحة امشي بمبدأ استعينوا على قضاء حوائجكم بالكتمان فلو عرفتي تعملي كده اعملي و ربنا يعينك و استمري و ده أساس النجاح والله إن شاءالله.

انت مليون ف الميه صح و احب اعرفك انك هتلاقي مليون من يغويكي و يحرك انك تتكلمي و تصاحبي و الكلام الفاضي ده و نصيحة اوعى تسمعي للكلام ده لانه عبث و إرهاق و حرام و ده الأصل و الأساس و ربنا هيرزقك بابن الحلال. هل جزاء الاحسان الا الاحسان.و ربنا يعينك