أريج .

انتي كدة شخصية إنطوائية يعني دي حاجة فيكي ومش عيب على فكرة اللي بيميز البشر عن بعضهم الإختلافات والأنطوائيين يقدروا يطونوا صداقات عادي المهم تلاقي الشخص الصح مثلاً حد هادي وإنطوائي زيك أو حد متفهم ومتقبل كونك إنطوائية وحاولي مثلاً تشاركي فى نقاشات أو أنشطة إجتماعية فى دراستك أو شغلك حتى ممكن تجربي تتعرفي على ناس أونلاين بس يستحسن تخلي ده آخر إختيار فى بالك بسبب الأخطار بتاعته للأسف الشديد ولو وصلتي للدرجة اللي مفيش حل غير ده تكوني قرأتي وفهمتي وعرفتي كويس جداً ازاي تتعاملي عالنت وازاي تضمني سلامتك ولو مش عارفة تبدأي مع حد الكلام مثلاً لو منزل بوست أو ستوري أو جه وقت مناسبة خشي كلميه وفى آخر الكلام تقولي "ياريت نبقى نتكلم تاني" أو "كلمني بكرة" أو مثلاً تخشي تقولي "معلش إني مبتكلمش كتير بس أنا إنطوائية حبتين ومش بلاقي مواضيع بس بيبقى نفسي أكلمك فابقى اعذرني وخلينا نشجع بعض نفتح مواضيع" وهكذا تشرحي موقفك إنك مش بتتكلمي مش عشان إنك بتحاولي تعملي نفسك كاريزما والإفتراضات بتاعت اليومين دول واستعيني بربنا وادعيله أصل الدعاء ده فى أي حالة ويمكن هو بيعمل كدة عشان عايزك تدعيله وبرضو اطلبي مساعدة من اللي تعرفيهم أو من أهلك لو مثلاً أهلك يعرفوا بنات فى سنك أو لو عندك إخوات عندهم صحاب فى سنك أو قرايبك وهكذا الموضوع سهل بس خديه بالتدريج ومش شرط عشان انتي هادية وإنطوائية يبقى لازم تغيري شخصيتك وطبعك بالكامل عشان تتعرفي على ناس لو كان الموضوع كدة مكناش هنعيش كلنا وربنا معاكي وإن شاء الله هتلاقي الناس الصح

السلام عليكم ورحمة الله وبركاته. أول حاجة.. ربنا يشفيكي ويفك كربك يارب ثاني حاجة.. متخافيش اللي بتمري بيه ده تجربة طبيعية وبشرية عادية وبالعكس ممكن تمري بيها كزا مرة فى حياتك! ده مش إحباط ده مجرد بفهمك إن ده عادي وافتكري دائماً إذا أحب الله عبداً ابتلاه وربنا مع الصابرين.. الصبر فى مرحلتك ده مهم ولو مكانش ليكي لازمة وكنتي فاشلة فعلاً مكانش ربنا خلقك ربنا خالق كل حاجة وكل حد لسبب مش من فضا! انتي مخلوقة عشان هيبقى ليكي دور فى المجتمع زيك زي أي حد وليكي أهمية، وصدقيني الإنتحار والأذى الذاتي مش حل.. أنا عارفة الرغبة بتاعتك بس جسمك ده أمانة عند ربنا وأنا مش عايزاكي تضيعي حياتك وتتحاسبي أو تموتي كافرة بعد كل تعبك فالعبادة وبعد كل ثانية عملتي فيها عبادة اللي انتي فيه ده طبيعي ﴿لقد خلقنا الإنسان فى كبد﴾ هتلاقي الحياة دائماً طلوع ونزول فترات حلوة وفترات وحشة حلو ومر ضلمة ونور من غير الحزن مكانش هيبقى فى سعادة ولا كان هيبقى ليها معنى ومن غير السعادة مكانش هيبقر فى حزن اللي بيخلي فى معنى لرحلتنا فى الحياة ويخلي الجنة تستاهل ماهو كان ممكن ربنا يدخلنا كلنا الجنة علطول من غير حاجة ولكن الفكرة إنه بيختبر صبرك ويمكن سبب الإتبلاء اللي انتي فيه عشان ترجعيله أو تتوبي أو تذكريه وبالنسبة لصحابك اقطعي علاقتك بيهم فى أقرب وقت لو انتي متأكدة ١٠٠٪ إنهم بتوع مصالح وصحاب مش حقيقيين ومش بيحبوكي فعلاً صدقيني لما تقطعي العلاقات السامة من دلوقتي هترتاحي بعدين وصدقيني هتنسيهم الزمن هيثبتلك.. حتى لو متعلقة بيهم هتنسيهم المهم بعد ما تقطعي العلاقة تحاولي تشيلي الحاجات اللي بتفكرك بيهم وابدأي صافي بعلاقة متجددة مع ربنا وشيلتي كل العلاقات السامة واللي مش كويسة وبالنسبة لمامتك حاولي تتكلمي معاها وتدعي ربنا وتصلي قيام الليل أو تقولي لحد من قرايبك أو حد كبير يناقش مامتك فالموضوع وانتي حاولي على قد ما تقدري تستحمليها يمكن تكون هى السبب إنك تخشي الجنة والجنة تستاهل صدقيني.. لو شايفة إن محدش مهتم بحالتك أنا مهتمة ومش عايزة أي حد أعرفه أو معرفهوش يكون عايز يهدر حياته بسبب مرحلة وحزبة زمنية ليها نهاية زي الإكتئاب ماهى هتروح كله بيعدي مفيش حاجة من المشاعر هتدوم معاكي وتلازم باقي العمر علطول فى تنوع وإختلاف فى مشاعرك والحاجات اللي هتقابليها وابدأي اهتمي بنفسك وبعلاقتك مع ربنا وعلاقنك مع أهلك وبعدها ابدأي دوري على صحاب جداد الناس فى كل حتة وموجودين ولو عايزة مثلاً تتعلمي مهارة جديدة اتعلمي مع نفسك عاليوتيوب أو خدي كورسات فى كورسات أسعارها بتبقى معقولة وكويسة أو لو مثلاً عايزة تحافظي على عادة كويسة اعمليها ولو لمدة دقيقة كل يوم لو مثلاً عايزة تتعودي على القراءة اقرأي صفحة كل يوم يا ستي عشان بس دماغك يتأقلم على كدة وابدأي زودي فالتدريج وهكذا وربنا معاكي إن شاء الله متستسلميش لحتة زلطة اتزحلقتي ووقعتي منها فى طريقك ورحلتك

أولاً: ربنا يشفيك ويعافيك يارب ويساعدك تتجاوز الشعور ده. ثانياً: أنت مش ناقص عشان تحس بكدة ﴿لقد خلقنا الإنسان فى أحسن تقويم﴾ الفكرة من الإختلاف هو إختبار عشان الناس اللي حواليك لما تشوفك اللي هيعاملك وحش ويشوفك قليل هيتحاسب واللي هيعاملك كويس وعادي زيك زيه ربنا هيديله حسنات والناس اللي بتتريق على اللي عندهم مشاكل فى جسمهم الحمدلله قلوا عن زمان عشان مجرد ما تقوله "أنت هتعترض على خلقة ربنا؟" هيسكت.. عشان مش أنت اللي فصلت شكلك وإمكانياتك قبل ما تتخلق أنت إتخلقت بشكل واسم وإمكانيات وشخصية كل دول مختارتهمش ودي الفكرة إن محدش إختار حاجة وبنبدأ نتأقلم على أساس كدة وإن شاء الله ربنا هيعوضك.. إذا أحب الله عبداً إبتلاه وربنا عظيم ويمكن متفهمش الحكمة من المشكلة اللي سببهالك فى رجلك دلوقتي بس المهم إن كل حاجة بتحصل لسبب أنت زي الفل طلاما مش بتعمل حاجة غلط يعني ما أنت دماغك مش أصغر من اللي حواليك وفى ناس غيرك برضو اتولدوا بأمراض تانية وعرفوا يحققوا إنجازات أنا مش بقارن أنا بقولك إن المشكلة اللي عندك مش عجز ومش حاجة تقلل ثقتك من نفسك أنت زيك زي الباقي محدش هيتحاسب بطريقة مختلفة كله هيتحاسب لوحده من غير تفرقة ربنا مش بيفرق بين حد غير فى التقوى ولا ربنا هيعاملك معاملة مختلفة عن غيرك.. كل حاجة فيها حكمة من الخالق ومتحبسش نفسك فالبيت بسبب كدة ومتستغربش لو الناس بصتلك يمكن بيدعولك يمكن متعجبين عشان مش بيشوفوا ناس زيك بتنزل وعندها ثقة عشان للأسف اللي زيك عنده نفس المشكلة يمكن أنت تشجع غيرك إنه يبقى عنده ثقة فى نفسه! انزل الجامعة وانزل الشارع ولا يهمك حد ولا نظرات حد عشان أنت برضو مش عارف نيتهم ايه وبيفكروا فى ايه ويا سيدي لو قلقان كدة كدة الناس اللي هتشوفك فالشارع دي مش هتفتكرك أو يمكن متشوفاكش تاني.. الموضوع سهل إنك تتجاوزه إن شاء الله وربنا معاك.

العفو أنا معملتش حاجة ومبسوطة إن كلامي فرق معاكي وربنا يسعدك يارب ❤️

أنا متفهمة حالك بالذات فى موضوع الوسواس ده بس حقيقي كلنا غلطنا.. سيدنا آدم غلط وسيدنا يونس غلط ويعتبر كل البشر غلطوا المهم إنك تتعلمي من الغلط وتحللي سلوكك وقتها الغلط ده عملتيه ليه وازاي؟ ولو كان الغلط مش عادي مكانش ربنا خلى في إختيار التوبة ماهو خلقنا بنغلط وخلق مع ذلك إختيار إنك تتوبي عشان دي فطرة فالإنسان ملهوش تحكم فيها وبرضو لو كان الغلط عيب مكانش ربنا خلقنا بيه كل ما تجيلك الأفكار دي شوفي غيرك اللي بيغلط برضو وشوفي اللي بيغلط غلطات أكبر وبتأثر على المجتمع اللي حواليه وفالآخر بيتجاوز الموضوع برضو وبيصلح غلطه ودي مش حاجة وحشة ١٠٠٪ على فكرة ده معناه إنك بتراعي ربنا فى الحاجة اللي بتعمليها وبتسعي لإنك تبقي أحسن نسخة ممكنة فى نفسك بس خلي الموضوع ده بنسبة متوسطة متضغطيش على نفسك زيادة بالذات لو الغلطا بسيطة وافتكري إن كل اللي شافك غلطتي هينسى مش هيقعد يقول ايه ده! دي غلطت ويقعد يتكلم ويفكر فالموضوع كل يوم الحقيقة إن الدماغ نفسه والشخص ده نايم بيشيل الفكرو والذاكرة دي تلقائياً واحنا مخلوقين عشان نعبد ربنا ونغلط ونتوب ونجرب ونشوف ونعمر فالأرض.. اللي بتمري بيه ده تجربة بشرية طبيعية بل وواجبة فى بعض الأحيان ولو حابة تستشيري حد خبير فى موضوع الوساوس أو دكتور نفسي ده مش هيخليكي مجنونة زي ما الناس مفترضة كلنا عندنا مشاكل نفسية الفوبيا من أي حاجة ذات نفسها محطوطة فى قسم المشاكل والأمراض النفسية وبرضو لو فى حد معاكي علطول أو معاكي بنسبة كبيرة فى يومك قوليله الكلام ده ولما تغلطي ارجعيله وقوليله أنا عملت كزا وهو يساعدك ويقنعك إنه عادي ومع التكرار الفكرة هتترسخ فى دماغك وحاولي لما تجيلك الوساوس تعملي أي نوع من أنواع العبادة وتشغلي نفسك فالتيليفزيون أو فيديوهات بتضحك عالموبايل أو تكلمي حد بتجبيه وهكذا وربنا معاكي

العفو على ايه؟ وإن شاء الله ليكي نصيب وناس زيك اللي بيطلبوا مساعدة وفى نفس الوقت متمسكين بحلمهم قليلين ونادرين دلوقتي فخليكي زي ما انتي انتي كدة ماشية صح المهم هتستحملي أهلك حبتين بس لحد ما هتلاقيهم اتعودوا خلاص هم بس قلقانين من التغيير

طلاما انتي بتجري ورا حاجة مش غلط وانتي حباها وربنا شايفك يبقى لا حلمك ولا تعبك ضايع.. أوقات بتيجي لينا وساوس وأفكار من دي وطبيعي فى رحلتك لتحقيق أهدافك هتلاقي تحديات فى طريقك عشان لما توصلي للهدف ده وتيجي تعملي مراجعة على رحلتك تحسي إنها تستاهل وأهم حاجة استعيني بالله وتوكلي عليه بالنسبة لموضوع الأهل ممكن بسبب إن حلمك غريب وجديد أو مختلف عليهم طبعاً بسبب إختلاف الزمن وانتي جيلك غير جيلهم وإختلاف الإمكانيات وزمان مكانش فى الحاجات اللي موجودة دلوقتي وكلنا عارفين كدة وبسبب كدة بقينا نلاقي ناس ناجحة فى سن صغير فانتي حطي فى دماغهم وخلي الوعي بتاعهم يستوعب إن فى إختلاف أزمنة وأن هدفك مفيهوش حاجة تخوف وأكيد أي حلم وهدف هيبقى فيه صعوبات وحاجات هتقابلك وطلاما انتي شايفة نفسك فى الحاجة دي مكانش ربنا هيزرع جواكي حبك وشغفك ليها لو ملكيش فيها نصيب

للأسف يا ذكية أوقات بيبقى بسبب الخوف والتردد وأوقات بسبب إن الشيطان بيفضل يوسوس ل اللي عنده إجابة بحاجات زي "بعد ما تعبت كل ده وعرفت الإجابة هتديها لحد غيرك بالساهل كدة؟ ما تسيبه يتعب زيك" والإنسان بينسى مفهوم التعاون والرحمة والمساعدة