Ahmed Farouk

وعليكم السلام ،، اي انسان في العالم معرض أنه يصاب بمرض و ربنا سبحانه وتعالى جعل لكل داء دواء ، اتكلمي مع أهلك ان عندك مرض زي اي مرض ومحتاج علاج علشان ربنا يشفيكي وترجعي تشوفي مستقبلك ،، رجاء بلاش فكرة التخلص من حياتك علشان مشكلة لها حل وحرام طبعا انتي عارفه ربنا يشفيكي اللهم امين

صباح الخير.. تابعت اجابتك مع صديقنا المحترم في الاجابات و عرفت كام ملاحظة من كلامك: حصلت مشكله لوالدك طبيعي تأثر سلبي على حياتك كلها مش بس تفكيرك ده طبيعي عشان والدك ومعرفش ايه هي المشكلة ، بعد الدبلوم اعتمدتي علي نفسك و اشتغلتي اكيد عندك اسباب للشغل أولها تعتمدي علي نفسك تكسبي خبره او توفري احتياجاتك ، اتخذلتي في كام صديقه وطبيعي تكون صدمة وتخافي تعرفي حد يكون نفس الشخصيه او اسوء ، ويمكن حاجات تانيه اكتر محدش يعرفها غيرك وانتي لسه 22سنة بس ... حاجه كمان بتحبي الضحك و الفرفشه يعني مش انسانه بتشتكتي من اتفه الأسباب برغم اللي شوفتيه مش اي حد يتحمله الا شخصية تتحمل مسؤولية في زمن صعب للأسف.. الإجابة على سؤالك يا انسة شهد : خدي نفسك شويه اتنفسي وانتي مرتاحة عشان شايلة هم وحمل علي اكتافك لو جبل كان اتهد ده انتي انسانه لحم ودم ، لو جاتلك فرصة بعد الشغل أو يوم إجازة انزلي شمي هوا و اقفي قدام البحر ده انتي في الغردقه بحر وسما وأجواء تحفه ، انا هنا في أكتوبر متجمد من البرد و كمان في الصحراء... الحمد لله على كل حال... ابدأي من النهاردة صفحه جديده مع نفسك هتلاقي اهداف مش هدف للحياة و الشغف والطاقه رجعولك لكن بسن اصغر كمان. ربنا معاكي 🌹

وعليكم السلام، اهلا بيكي وصباح الخير يارب تكوني بخير دايما 🌷 اولا انا مش هقولك نصايح مباشره عشان ممكن تكون تقيلة أو صعبة عليكي ومش هتنفذيها أو تنسيها😂عادي بتحصل كلنا بننسي المهم هحكيلك شوية حاجات حصلت معايا وحاولي تركزي يمكن تفيدك إن شاء الله.. جالي اكتئاب في سن العشرين تقريباً بسبب بعض الأمور اللي حصلت مرة واحدة ورا بعض يعني ف مكدبش عليكي ماستحملتش وتعبت نفسيأ تخيلي وفاة جدتي اللي اتولت تربيتي من وانا عندي سنة تقريبا بعد انفصال بابا وماما و فراق حبيبتي في نفس السنة اللي كنت بحبها جدا يعني زي ما بيقولوا خبطتين في الرأس توجع، المهم مريت بسنة أو اكتر من أصعب ما يكون ربنا وحده اللي يعلم لكن ماستسلمتش و قولت إن شاء الله هرجع احسن من الاول ، روحت لدكتور نفسي قالي عندك اكتئاب شديد ولازم علاج بانتظام وحاول تنسى اي حاجه حصلت مش كويسه انت لسة صغير وبالفعل طبقت كلامه وبفضل ربنا انا احسن بكتير من الاول وعايزك انتي كمان تكوني قوية ومش ضعيفه الحياة صعبة عارف لكن احنا إن شاء الله احنا قدها ، يارب تكوني استفدتي اي حاجه من كلامي وإن شاء الله هتكوني احسن واقوي بالصبر والصلاة والعلاج أيضا مع العلم انا لسه باخد العلاج لغاية دلوقتى وكل سنة بروح للدكتور استشارة يخف منه نوع مثلا بالتدريج فاهمة قصدي ، اتمنالك السعادة وراحة البال والشفاء العاجل يا جميل وانا وكلنا هنا تحت امرك في اي مساعده.🙏

غلط علي صحتك ونفسيتك ، خذ العلاج باستمرار ولا تهمل به اعمل اللي عليك وان شاء الله ربنا هيشفيك شفاء لا يغادر سقما

حضرتك كام سنة

سبب المشاكل دي ايه ؟

صباح الخير ، ممكن تقول السبب عشان انا أو غيري يفيدك ؟

طيب لو هي سنها اكبر مش في سن المراهقه مثلا و خلاص أصبحت ناضجة بما يكفي وعندها التزامات في البيت و مسؤولية عارف تعمل ايه وانت اكتر واحد كسبان وهتتأكد بنفسك لما تجرب : ترجعها لسن المراهقه وهي في سنها ده و هتعيش اسعد رجل في العالم و حبها هيكون أضعاف طيب تعمل كده ازاي ؟ حاجات كتير اول حاجه افتكر الشوكولاته!! ربنا يسعدك يا اخويا 🌹

اهلا يا صديقي.. احتويها في كل حالتها علشان السن ده جواه مشاعر كتير مختلفة وممكن مش مفهومه للبعض أمر طبيعي ، كتر اوي لو تقدر من الهدايا بالتحديد الشوكولاته و الاكل عموما هتفرق اوي ، اي حاجه بتكلمك فيها اعتبره موضوع مهم جدا و شاركها الحوار بس سيبها تتكلم اكتر وانت اسمع اكتر وبعد ما تخلص كلام تجيب الشكولاته اللي قولتلك عليها و تقدمها لها هتفرق معاها وهتكون طايرة في السما علشان جوزها مقدرها و بيحتويها ، فهمت قصدي ؟

فكرة جميلة جدا ومفيده ما شاء الله ، حضرتك مش تقصير منك ولا حاجه بس عايزة تعملي ترويج للفكرة بشكل احترافي اكتر ، اعتبري الفكرة دي منتج و سلعة عندك وعايزة معظم الناس تشوفها و تستخدمها لأنها مفيده وهادفة طيب ازاي اعمل كده ؟ اعلان ممول على السوشيال ميديا يستهدف اكبر فئة مهتمة بالفكرة و فعلا هتشتري المنتج ده ، التسويق يكون بشكل فيه ذكاء و شطارة علشان الكل يستفيد.

مساء الخير ،، كان هيكلم الاكونت الفيك ساعة يطلع الحزن اللي جواه بعد فسخ الخطوبة ويعمل بلوك ، اكيد غلطان ومش مبرر لكن هو انسان في الاخر ، لو فيه فرصة تسامحيه متتأخريش لو متأكدة أنه بيحبك.

مش شرط يكون ضعيف الشخصية ممكن يكون كريم مع أصحابه وأهله و بيديهم حاجات ك هديه عادي ،، خطيبك متربي وبيحافظ عليكي بلاش تخسريه !

وجهة نظر : كريستيانو رونالدو

قطعتي قلبي وانا بقرأء حرام عليكي بجد تعملي في نفسك كده ، قدر الله وماشاء فعل بلاش تعملي كده تاني لو سمحتي و حاولي تروحي لدكتورة نساء وتوليد تكوني عارفاها كويس من بلدك يعني عشان هي اللي هتفيدك اكتر من خلال الكشف ، حافظي على نفسك عشان تتجوزي وتكوني فخورة بقيمتك مفيش اجمل من حلال ربنا بس الصبر.

عادي تتقدم لوحدك توكل على الله بمنتهي الثقة لإنك داخل البيت من بابه علشان راجل ابن ناس .. ربنا يوفقك

وعليكم السلام .. احنا ناخد خطوة بخطوة الاول عشان ماتتعبيش نفسك ، بكرة إن شاء الله تنزلي دروسك وتكملي تعليمك عادي جدا في نفس الوقت تسألي نفسك سؤال مهم هل الجامعة اللي انا نفسي فيها هي القرار الصح أو الأنسب ليا في المستقبل وهتفيدك ولا اللي اهلك عايزينك ونفسهم تدخليها هي الافيد ليكي برضو في المستقبل ؟؛ الجواب عن السؤال ده هتعرفيه في نظرات اهلك مش شرط يتكلموا معاكي ف المهم دلوقتي ترجعي لحياتك الطبيعية من بكره إن شاء الله وتنزلي الدروس و خليها على الله محدش يعرف بكره مخبي ايه لعله خير ليكي وإن شاء الله كل خير ومستقبلك هيكون جميل.🌷

امين يارب في حفظ الله يا اخويا 👋

امين يارب يا اخويا ويصلح حالك يا رب العالمين ❤️

اسمع كلامي انا عابر سبيل وعايز مصلحتك اقسم بالله و ربنا شاهد علي كلامي

بما انك عارف غلطك يبقي انت كده بدأت تفوق لنفسك .. عايز نصيحتي وتعمل بيها ارجع ل اهلك وقولهم علي كل حاجه من غير ما تزوق الكلام ولا تكدب تاني صدقني مهما كنت كبير انت في نظر اهلك عيل صغير بيخافوا عليك من الهوا الطاير ، ارجع ل اهلك بكره إن شاء الله حتي لو هيكلفك الأمر ١٤ سنه مش شهر انت الكسبان.

للأسف الابلكيشن هنا مش بيدعم البرايفت ، انا معنديش اي مشكله ويشرفني طبعا لكن احنا محكومين بنظام الابلكيشن

لو فيه اي مشكله شايفها صعبة ممكن تستعين بالطب مش عيب ابدا يعني شوف اخصائي نفسي ليه لا المهم انك تكون بخير وبلاش تضيع وقت تاني. ربنا يفك كربك ويزيل همك يارب

لسه ربنا بيديلك فرص انك تعوض السنين دي بحاجات حلوة ل اهلك الشيطان عايزك تيأس خليك انت اقوي وانت بالفعل اقوي وقوم حالا صالحهم وطيب خاطرهم مالكش بركة الا هما اللي فاضلين لك بجد في زمن صعب ، قوم يا غالي صالحهم وابدء صفحه جديده مع الله اولا ومع اهلك ثانيأ.

وعليكم السلام ليه بتتهم نفسك كدا وحاسس دايما انك قليل في نظرك طيب لما تبقي شايف نفسك قليل تفتكر الناس أو اهلك هيشوفوك كبير؟! مهما كنت مذنب عد الى الله ولو أذنبت الف مره قادر أنه يغفرلك يا صديقي لكن سؤالي الاهم انت ليه حاسس بالذنب تجاه نفسك هل فعلت شيئ غير صحيح اثر علي حياتك ؟

صباح الخير ، لو هنسميه خجل وكسوف ف ده له حلول كتير أهمها انك تتعامل مباشره مع الشخصية المستهدفة بالنسبالك وده محتاج ثقة في نفسك و تحكم في اعصابك هتكسب كل ده لما تتعامل وتختلط مع اكبر عدد من الناس في حياتك ، لو الموضوع عامل نفسي روح لدكتور عادي والكلام معاه 90٪ مشكلتك اتحلت إن شاء الله.

حاولي تنسي اللي حصل علشان دي حياتهم هما ، عارف انهم اهلك لكن ماتخليش مشاكلهم تآثر عليكي بالسلب انتي لسه صغيره والحياة قدامك طويلة عريضة حبي نفسك واعتني بيها بكل السبل ، بالنسبة للجواز لما تتخطبي وتحبي خطيبك قناعاتك في الجواز هتتغير تماما والايام جاية كتير. انسي وعيشي سنك 🌷

بالتجاهل و خلي كل شخص في حجمه الطبيعي في حياتك

لو لاقيتي الكتاب ياريت تقوليلي اسمه عشان أنا بعاني من النرجسية نفسها!😂

مفيش حد بيفضل علي حاله هي بتعيش فترة مؤقتة وهتبقي كويسة زيك ان شاء الله المهم اوعي تضعفي لكلامها وتآثر عليكي انك تكلمي شباب في إطار الارتباط صدقيني كله كلام فاضي و وجع دماغ واحيانا وجع قلب! ربنا يوفقك في الجامعة وتكوني نمبر ون في مجالك 🤩

وعليكم السلام حاولي تقنعيها تصبر لغاية ما تتجوز وعرفيها ان حلال ربنا احلي بكتير من اي كلام في الحرام ،، لو صحبتك ومش قادرة تبعدي عنها بلاش تكوني زيها في أفعالها وخليكي قدوة ليها في كل شيئ واولهم الاخلاق.

بتعلم هوايات جديده والخروج من البيت للتنزه والترفيه ان استطعتي

مفيد بالنسبالي عشان بتعلم من تجارب الآخرين ولو عندي إجابة علي سؤال مش بتأخر وكمان لو عندك سؤال فيه ناس كتير هتفيدك

معلش سؤال مهم انتي بتحبيه ولا مجرد توضيح لموقفك الشخصي؟

مش مرض ده ذكريات في دماغك وايام عيشتيها ف طبيعي تفتكريها ، لكن ممكن تتحول ل اكتئاب خفيف في البداية ولو الموضوع ذاد معاكي هيكون صعب حاولي تخففي التفكير في الماضي علي قد ما تقدري.

خايف من حاجه او مستني شيء مهم ؟

وبالنسبة للموبايل قللي من التصفح فيه خليه للضرورة فقط عشان تركزي في حياتك ومستقبلك

انتي لسه صغيره ممكن تكوني خسرتي جولة لكن الماتش لسه شغال مخلصش ارجعي تاني زي الاول واحسن حبي نفسك وحبي دراستك وصحبتك دي اقطعي علاقتك بيها نهائي وخليكي واثقة في نفسك انك هتقدري ترجعي حياتك زي الاول بيرفكت واحسن تاني انتي لسه صغيره والحياة قدامك طويلة وجميلة ان شاء الله بالتوفيق يا باشمهندسة أو دكتوره اللتنين لايقين عليكي 🌹

خطوة بخطوة سيبي الكلية لوقتها و ركزي في دراستك حاليا بجد انتي بتعيشي اجمل ايامك استمتعي بكل لحظة فيها صدقيني انا نفسي ارجع يوم واحد ايام الدراسة لكن الحياة العملية واخدة كل وقتي ، الحمد لله على كل حال المهم اتبسطي دي ايامك

ايه السبب من الاول هل حدث فعل منك زعلها ؟

مساء النور .. ابدئي صفحه جديده وبلاش تفكري في الماضي عشان هتتعبي وهيأثر سلباً علي صحتك ، خطوة مهمة انك عرفتي غلطك واتصالحتي مع نفسك ومع ربك اهم شيء كلنا بنغلط ومليانين عيوب محدش كامل المهم نعرف الغلط ونعالجه. بالتوفيق في حياتك ونصيحتي دي مامتك مهما عملت هتفضل مامتك طول العمر

ممكن تجيبي كتاكيت صغيره وتربيهم عندك لو فيه مكان بعد شهر او اقل هتبعيهم وتكسبي ان شاء الله

اتعلمي حاجة جديدة تعمليها في البداية هتكون مملة ومفيش شغف لكن حاولي تشغلي نفسك في حاجة تسلي وقتك وطبعا تصلي وتدعي ربنا انه يهون عليكي ومع الوقت هتكوني كويسه اتمنالك السعاده وراحة البال.

عاش يا بطل ، كمل طريقك ودي اعراض انسحابية انك تحس بفراغ و وحدة والخ اعمل اي حاجه بتحبها ذاكر روح اعمل اشتراك في الچيم واتعرف علي ناس شبهك هتتغير للأفضل وانت بالفعل في وضع أفضل من السابق طبعا بالتوفيق.

معنديش تفسير للأسف

النسيان حل لكن صعب بالنسبالك عشان بتشوفيه في الدرس مثلا ف طبيعي هتفتكري الكلام اللي بينكو غصب عنك لكن انتي عملتي الصح و ربنا مش هيسيبك برافو انك بتصلي وادعي كتير ربنا سامعك وشايفك ربنا يوفقك في اللي جاي

اول حاجه لازم تعمليها انك تحبي نفسك وشكلك وماتخليش حد يآثر عليكي بكلمة بايخة اعرفي انك حلوة في عين نفسك قبل عيون الناس وثقي بالله ثم بنفسك هتبقي اجمل واحدة في الدنيا 🌹

ده حلم ولا في الواقع ؟

استعذ بالله من الشيطان الرجيم وأقرأ قرأن أو اسمعه علي الموبايل

ولا يهمك يا باشمهندس بتحصل كتير خصوصا في الشغل اللي فيه انتاج وتارجت مطلوب المهم متزعلش نفسك وكبر دماغك انا شغال في شركة مواد غذائية وحصل الموقف ده مع زميل وكبر دماغه عشان مايكبرش الدنيا

مشيت خالص من البيت و روحت اشتغلت في مكان بعيد تقريبا عايش لوحدي لكن الحمد لله مبسوط وحاسس أن عملت حاجه كويسه وبنزل زيارات البيت الموطن الأصلي لكن بالنسبالك انتي عندك مذاكرة ودراسة ف صعب تمشي من عندك الا لو هتتجوزي ان شاء الله ويكون عندك بيتك الخاص اللي ترتاحي بجد فيه.