Ahmed .W

انا مش عارف هم المعاقين حركيا بيبقي عندهم القدرة او بيحسوا بالحاجة اللي بيلمسوها ولا لا بس عموما ممكن يبقي زي جوانتي او شراب اي حد عنده شلل مثلا يلبسه ويبقي الجوانتي او الشراب من جوا فيه مستشعرات حسية بتخلي الشخص اللي لابسه يحس باي احساس عايزه وياخد الامر ده عن طريق مثلا ابلكيشن ع الموبايل ويكون ع هيئة فيديوهات نشغل الفيديو مثلا وليكن ع البحر ف يبدأ يحس بالهوا والرملة والمياه اللي بتتحرك او مثلا واقف ع عشب وهكذا وممكن تبقي بدلة كاملة كمان وممكن برضه يبقي مصحوب بنضارة vr عشان يعيش التجربة كاملة 🤷🏼‍♂️

الخل ف الرفض ، خلي مجموعة من الناس تقرب منها ع فترات صحاب بقي اي حاجة يبدأوا يقربوا منها وكلام ع طول والجو ده واول مايعرفوا انها سابت التعليم يرفضوها ويبدأوا يبعدوا عنها بسبب انها مش متعلمة احساس الرفض عنها هيخليها ترجع تتعلم تاني لانها كدة هتحس ان فعلا محدش هيحبها طول ماهي كدة طريقة صعبة وهتاخد وقت الحقيقة لكنها اكتر حاجة مضمونة

توبي وقربي من ربنا، حتى لو كلهم بعدوا عنك ف انتي نويتي توبة وربنا خير المؤنس والصاحب وواحدة واحدة كل الاحساس ده هيروح ان شاء الله وربنا يصلح حالك وحالنا

طالما مش بتحصل غير ف ماسنجر يبقي المشكلة ف ماسنجر جربي امسحيه ونزله تاني او امسحي بياناته وسجلي من الاول ولو المشكلة لسة قائمة جربي ايميل تاني ع فونك او ايميلك ع فون حد تاني وجربي

اللي زي دول احسن حاجة تتعمل معاهم انك اول واهم حاجة اسمعي من ودن وخرجي من التانية تبقي هي بقالها نص ساعة بترغي وانتي مش مجمعة هي بتقول ايه اصلا و ف ختام الكلام لما تطلب حل كلمة مش عارفة هتنزلها من ع دماغك😂 ولو قالت انتي مش حاسة بيا والكلام ده قوليلها طبيعي صاحب المشكلة اكتر واحد بيبقي حاسس بيها وبيعرف يلاقيلها حلول انا بتعامل كدة وبقيت اكبر دماغي والموضوع ماشي فل

لو عايزة تقفلي مواقع معينة انها تتفتح تماما من ع الفون ف فيه فيديوهات ع يوتيوب اكتبي تغيير dns لحجب المواقع وهتعرفي الطريقة في منها واي فاي وداتا عادي انما لو مثلا عايز كام ابلكيشن بس اللي يبقوا شغالين نت وتفصلي الباقي ف في ابلكيشن اسمه NetGuard تقدري من خلاله تفصلي النت عن اي ابلكيشن انتي عايزاه سواء داتا او واي فاي برضه

بودي ال overthinking ده للحتة اللي انا عايزها لحد مانام😂 يعني انا قاعد بفكر ف حاجة مضايقاني بدحلب دماغي واحدة واحدة لحد مابدأ افكر ف حاجة تانية وغالبا خيالية اصلا وبتسحل وازهق وانام😂😂😂😂

ممكن تعملي جنبها فراخ كنتاكي يعني هتشتري دبابيس فراخ وتعمليها بالفجيتار والبيض والبهارات اكيد انتي عارفة وللاسف يعني مبقاش في حاجة اقتصادية دلوقتي كله غالي فعلا ف انتي ممكن كمان بما انك هتعملي فراخ ف تعملي طبيخ خفيف ورز اكيد وممكن محاشي بدل الطبيخ والرز وممكن بقي الحاجات الصغيرة اللي بتبقي جنب الاكل دي سمبوسك بالجبنة مثلا او لحمة دي ممكن تعملي عدد كبير بكمية لحمة قليلة اصلا وبطاطس فرايز تقطعيها بالطول عشان تبقي زي المطاعم وان شاء الله اليوم يعدي ع خير وتبقي عزومة خير

بعد السنة ماتخلص تقدري تتصلي بسامسونج وهتقوليلهم السيريال الخاص بالجهاز وهيفكوا الشفرة عنه او تقدري تروحي لاي سنترال ( محل صيانة) وهيفكلك الشفرة عادي وسريع ف الاستخدام الشخصي

01555234220 ده رقم HR ف شركة تيلي سيلز ف المعادي الثابت بتاعك اظن هيبقي ٣٥٠٠ والمتغيرات هتوصل معاك من ٥٠٠ ل٥٠٠٠ ع حسب التارجت اللي هم حاطينه ومتقلقش تقدر تحقق التارجت بسهولة يعني كلام بسيط وربنا يعينك ويصلح حالك وحالنا المهم متيأسش وتفضل تحاول

نصيحة من شخص يمتلك موهبة الكتابة ولكنه لا يستخدمها😂 اكتبي كل حاجة تيجي ف دماغك اي افكار بتجيلك اكتبيها ع جنب اعملي حتى لو اجندة افكار بس وابدأي اكتبي فيهم حتى لو الافكار مش احسن حاجة او لو الفكرة حلوة جدا بس القصة نفسها مش احسن حاجة مش مشكلة كل ماتكتبي اكتر كل ما هتكتسبي خبرة اكتر وقدرة اكبر ع الكتابة وفي نصيحة كتير قالوهالي اني اقرأ كتب كتير بس انا معتقد اني لو قرأت لغيري كتير اسلوبي هيتأثر خصوصا ان ليا اسلوب وبيبان اوي ف كتاباتي بس اكتر من حد قالي انها هتطور اساليب الكتابة عموما وتنمي لغتك اكتر ف ممكن النصيحة تبقي صح ومعتقدي يبقي خاطئ ف انتي شوفي الامثل ليكي وابدأي بيه يا اما الكتابة كتير وكتابة كل اللي ف مخيلتك يا اما الكتابة المعتدلة مع القراءة اكتر

جربي مش هتخسري حاجة، السن الصغير معروف انه سن التجارب جربي حاجة والتانية والتالتة لحد ماتلاقي شغفك ونفسك ف الحاجة اللي بتحبيها، بس اهم حاجة اوعي تيأسي خليكي صبورة ع نفسك وخطي طموحك قدام عنيكي

حاولي تكشفي وتعملي تحاليل الدكتور هيقولك عليها لان غالبا اللي انتي فيه ده نقص فيتامينات

شرب المياه بانتظام بيساعد على نشاط الجسم والاكل الصحي اكيد والخضار بس عن تجربة اول ما معدل شربك للمياه يزيد جسمك بيبدأ يتحسن ف حاجات كتير، زي الكسل والخمول ونشاط الدورة الدموية، اهتم بشرب المياه اسبوع مثلا وهتشوف الفرق

اكيد لا هي بتبقي راحة نفسية طبعا قبل كل حاجة انتي ممكن بعد المعاملة معاه تكتشفي انه شخص كويس جدا بس انتي اصلا مش مجبرة تتعاملي معاه وليكي حق الرفض لان ف الاول و ف الاخر الموضوع بيبقى قبول من عند ربنا

يبقي تمام اوي هينفعك جدا وخصوصا مع ملفات ال pdf ، وربنا يوفقك

توكلي ع الله بس معلومة هو مش معمول للالعاب والبرامج التقيلة هيشتغل عادي بس مش هتحسيه سلس معاكي ف انتي لو استعمالك هيبقي للقراية الرسم او فيس وواتس الحاجات دي هيبقي تمام اوي معاكي

كدة قليلة فعلا هتلاقيها من الاسباب برضه المسببة للصداع ، وممكن تحاولي تتظمي اكلك وتاكلي اكل صحي اكتر وتحاولي تاكلي سبانخ كتير والاكلات اللي بيبقي فيها حديد وان شاء الله مع العلاج هيجيب نتيجة، و ع فكرة علاج الانيميا بياخد وقت مش زي بقيت التعب مثلا اسبوع ويكون راح بالعلاج، الانيميا بتطول شوية بس خير يعني ان شاء الله ربنا يعافيكي باذن الله

طب حتى اي معمل تحاليل يكون قريب ياخد منك جرعة دم ف خمس دقايق يعملك التحاليل واي صيدلي هيقولك التحاليل فيها ايه عادي

بصي هو ف الاول و ف الاخر حقك لان دي مفهاش مجاملة دي حياة كاملة هتبقى مبنية ع الاختيار ده ف ياتختاري راحتك يا اما تعمليها بجميلة وكسوف وانتي وحظك! ف اكيد تختاري راحتك ودي مفهاش اي حرمانية يعني