ألف سلامة على حضرتك.. طبعََا الأفضل زيارة الطبيب لأنه ربما تكون حساسية وإن شاء الله بسيطة.. لكن بشكل عام المشروبات الدافية قبل النوم وأول ما تصحى على الريق بتفيد كتير في الموضوع ده وممكن تزور أقرب عطار وتشوف المتاح عنده والمتاح بالنسبة لميزانية حضرتك وتشتريه وهو هيكون عنده خبرة أفضل في أحسن الأنواع
تم النشر الجمعة، ٢ ديسمبر ٢٠٢٢
معظم الحملات الإعلانية من سنين موجهة للعنصر النسائي بشكل خاص جدََا، تربية البنات دايمََا بتكون مقترنة بإنها لازم تلبس وتتزوق ويبقى عندها ٥٠٠ حاجة من نفس النوع علشان هي بنت ومحتاجينها تلفت النظر وتتجوز، وأخيراً إن الستات أصلاً بتهتم بالتفاصيل أكتر من الرجالة فبيكون في مساحة أكبر للمعروض من المنتجات وتنوعها وبالتالي بخليها طول الوقت معرضة لأنها في السوق بتشتري حاجة او بتتفرج على حاجة... لو ركزت هتلاقي بنات قليلة اوي متربية بشكل عملي وشخصيتهم عملية ومش استهلاكيين وعندهم فعلاً الوعي اللي بخليهم يجيبوا اللي محتاجينه بس ومن غير ما يكون أفضل المعروض بالضرورة.. لكن للأسف في مجتمعاتنا بيعتبروها رخيصة وفرصة للتوفير ودايمََا بيحاولوا يتجوزوها الرجالة تحت بند انها عاقلة لكن في الحقيقة هو يقصد انها مش مكلفة ومش هتغرمه كتير.. فكرد فعل طبيعي الستات دي يا بتفضل مستخبية يا بتبطل ترخص من نفسها وتبقى استهلاكية هي كمان
تم النشر السبت، ٢٦ نوفمبر ٢٠٢٢
"اللهم أصلح ذات بيننا وألف بين قلوبنا واهدنا سبل السلام" الدعاء ده جميل جدََا تدعيه لنفسك ولغيرك كمان لو في مشاكل زوجية.. طبعََا كمان لازم يكون في نقاش وحلول وأنا شخصيََا أفضل زيارة مختص لو ماديََا وثقافيََا ده متاح لكن ما تدخلوش الأهل لأن الموضوع بيزيد سوء في الغالب إما بالتسخين وتصعيد المشاكل أو تلفيق الصلح بين الزوجين بدون حل حقيقي للمشكلات الموجودة.. لو ضروري تدخلوا الأهل يبقى حد تثقوا فيه انتم الاتنين وبس لكن مش أي حد مؤهل لأنه يدخل بين زوجين ويصلح بينهم.. ربنا يصلح ما بينكم ويعوضكم خير يا رب ❤️
تم النشر الجمعة، ٢٥ نوفمبر ٢٠٢٢
لأن كل ما الزمن بيتقدم والعلم بيتطور بيتم كشف مشاكل اكتر كان بيتعرض لها الأطفال في الأزمنة السابقة خصوصاً فيما يخص ملف الصحة فالموضوع بيزيد الضغط على الأمهات الجدد لأنه بيضيف تفاصيل جديدة وبيخلينا كمان نعمل حاجات عكس المألوف وده بيخلي الموضوع أصعب وأصعب لأنه بيتم انتقادك على اهتمامك وعلمك كمان.. ده غير إن الحاجات اللي بيتعرض ليها الأطفال دلوقتي تربويََا وسلوكيََا اكتر بكتير بسبب التلفزيون والانترنت وانتشار النوادي وغيره.. بدون شك التربية أصبحت مرهقة جدََا لكن بشكل عام ده بيخلي النتايج في التربية أفضل وبينتج أطفال أسوياء نفسيََا وجسديََا أكتر.. كان الله في العون يا رب ❤️
تم النشر الجمعة، ٢٥ نوفمبر ٢٠٢٢
محتاج تعرف إن في مميزات مهمة في المناطق الشعبية دي منها سهولة الوصول لمعظم الأماكن داخل القاهرة وتوفر الخدمات المختلفة بأسعار معقولة جدََا وكمان هتوفر معاك لو شغلك وسط البلد علشان مش هتصرف كتير في المواصلات.. لكن طبعاً المدن الجديدة أنضف من حيث الهدوء والنضافة وظروف السكن والمعيشة.. فلازم تحسبها كويس بس مش اكتر
تم النشر الجمعة، ٢٥ نوفمبر ٢٠٢٢
لعرض الملف الشخصي في فدني اضغط هنا