انا بنت عندي ٢٥ سنه بشتغل ممرضه عمليات ولسه بكمل دراستي بإذن الله هكمل علي خير. ..اتعرفت علي زميل ليا في القسم هو مسيحي ومتجوز ومعاه أطفال وطبعا انا مسلمه كنا بنتكلم في الاول في الاديان وكده وبعدين اتعرفنا علي بعض وقربنا من بعض وكمان اتفقنا اننا نكون اصدقاء جدا وفي مره طلب مني اننا نخرج ومعرفش ازاي واافقت بالخروجه بس قولت مش مشكله كده كده احنا أصدقاء وهو واعدني بكده وبصراحه حسيت انو كويس وان اخيرا ربنا بعتلي صديق كويس يحبني ويخاف عليا ويهتم بيا لان اصلا معنديش أصحاب ولما كان عندي والله مكنوش بيسالوا عليا ولا كأني في حياتهم. عشان كده فرحت باهتمامه وبسؤاله ورسايله علي الواتس استمر معايا علي الصداقه بالطريقه دي والاهتمام ده لمده شهرين ونص تقريبا وفجأه بعد فين وفين علي مايبعت رساله او يتصل ولا كأنه صديقي زي ما وعدني انا قلبي وجعني والله لأنه فكرني بالوجع اللي اتوجعته زمان من صحبتي ممكن تقولولي انا اعمل اي مع العلم انا حزفت الواتساب لاني والله قلبي وجعني واصلا هو دخل حياتي وانا وقتها كنت طالعه من اكتئاب وكنت باخد دواء محسن للمزاج مع دكتور نفسي عشان كده فرحت بوجوده في حياتي. اسفه علي الاطاله
أنك للأسف كنت بتضحكي على نفسك بتسميته صديق وعاملتيه كأنه أكثر من زميل .. وضحكت على نفسك مرة تانية لما تساهلتي معاه وعاملتيه كما لو كان صديقتك المفضلة في حين أنه رجل وليس امرأة. أنت تعديت حدود ربنا في علاقتك بالشخص دة وعملت اللي مكانش هينفع يتعمل حتى لو كان خطيبك .. أنت مجرد كان عندك احتياج عاطفي وما صدقت لقيتي واحد أشبع لديك بعض احتياجك وهو كذلك استمتع بعلاقته بيكي شوية وراح لحاله احمدي ربنا أن العلاقة انتهت عند هذا الحد وحافظي على قلبك ولا تعودي لمثلها أبدا.
تم النشر الاثنين، ٢٧ نوفمبر ٢٠٢٣
السلام عليكم ورحمة الله وبركاته ياحبيبتي انا بنت طبعا شوفي هو ليس هنالك صداقة بين الرجل والبنت الاجنبية عنه اي غير محرمه وفوق هذا هو مسيحي يا حلوة أنت غلطي لما سلكتي هذا الطريق شوفي أنا أقول لك حل إن أخذت به فأنت على خير كثير بدل ما تطلبي الحب والقرب من الناس اطلبيه من الله ستجدين نفسك في راحة وسعادة تشترى بمال الدنيا أطيعي الله في السراء والضراء ادعيه اسأليه تقربي اليه اشكريه احمديه وستعلمين حينها اين كنت واين اصبحت وانا انصحك بقراءة كتاب الداء والدواء لابن القيم وإن فعلتي ما اقول لك فإياك والبدع
تم النشر الأربعاء، ٢٩ نوفمبر ٢٠٢٣
الموضوع مش صح من اساسه من الاول .. دينيا مفيش حاجه اسمها صداقة ما بين رجل وامراة .. لان ده باب للفتنة .. وكده كده بنسبة كبيرة جدا، كان حد فيكم هيتعلق بالتاني عاطفيا. ف ليه اساسا نروح نحط البنزين جمب النار .. ده غير اصلا ان الموضوع اصعب اكتر انتي مسلمة وهو مسيحي، ف فرضنا ان الموضوع قلب بمشاعر من نوع اخر! كان هيبقى ايه العمل وقتها؟ فالموضوع من كل النواحي مكانش ينفع يستمر .. احمدي ربنا انه مبقاش موجود .. وابدأي راجعي افكارك وقراراتك .. وشوفي الحلال والحرام ايه لانهم دول لازم يبقوا قدام عينك في اي اختيار واي حاجه تعمليها.
تم النشر الاثنين، ٢٧ نوفمبر ٢٠٢٣
ي حبييتي خير اوي وابعده عنه تماما اه هتتعبي شويه بس خير ليكي م يمكن لو علاقتكم كبرت عن كده يسحبك عن ديانتك وتبقي مسيحيه ودا عادي جدا او ياذيكي باي شكل دا غير كمان انك مسلمه وعارفه ان العلاقات دي محرمه حتى الكلام الغير ضروري محرم ما بالك بالخروجات وي حبييتي ترضي زوجك يمشي مع واحدة تانيه كذالك زوجته... توبي لربك ي حميله واستغفري لذنبك وكوني علاقات مع بنات صالحات تعرفك طريق الجنه ومتنسيش انه ربنا علينا رقيب
تم النشر الاثنين، ٢٧ نوفمبر ٢٠٢٣
مش هقولك فكري ف اختلاف الديانه ولا فكري في دينك بيقول ايه.. هقولك بس فكري شويه مع نفسك بانصاف ف مراته وعياله. لو مش بتهدمي اسرة ف ع الاقل بتاخدتي مساحة من حياتهم وبتشاركي الست ف جوزها والاطفال ف ابوهم
تم النشر الاثنين، ٢٧ نوفمبر ٢٠٢٣
لعرض السؤال في فدني اضغط هنا