السنه الي فاتت كان في ولد معايا في الجامعه كنت مثلا لما بشوفه بقوله ازيك يعني علاقه سطحيه كده بس كان في تلميحات و بعد فترة اكتشفت انه معجب ببنت تانيه فأنا بعدت علشان البنت دي انا عارفاها و علشان منخسرش بعض و علشان مكنتش بحبه اصلا و بعدين السنه الي بعدها كان في ولد تاني معايا في الجامعه حبيته و المشكله ان الاتنين صحاب فالتاني ده انا بحبه بجد و كان في تلميحات و بعدين فجأه مرة واحده بعد و استنتجت بعد كده ان الاولاني ده يبقى قاله حاجه عني بس المشكله ان اكيد هو و صحابه كلهم بيتكلموا عني و حسه بالطريقه دي ناس كتير هتعرف و بقوا يبصولي بطريقه غريبه و انا مش عارفه هل انا غلطانه ؟ و المفروض أصلح الموقف ازاي علشان سمعتي و علشان التاني الي حبيته ده
انا بجد مخنوقه اوي و مش عارفه اعمل ايه و انا اصلا مش برتبط و له بكلم حد فلو حد يعرف يساعدني
اولا دا مش حب خالص دا اعجاب سطحي - وبالنسبه لاعجابك بحد فيهم ف متدخليش نفسك ف حوارات وعلاقه مترضيش ربنا وانتي اصلا مش ناقصك انتي لسا بتدرسي وكل علاقه بدايتها لاترضي الله نهايتها مش هتعجبك خالص ركزي في دراستك وجامعتك يا اختي وتخلي نهائيا عن المشاعر دي دلوقتي هتلاقي ربنا بعتلك الشخص اللي يرتاح قلبك معاه سواء كان واحد فيهم ابن حلال أو غيره هيقدّرك ويشيلك ف عنيه إن شاء الله -وقربي اكتر من ربنا وصلي وادعي وطول ما يقين قلبك في رب العباد هتاخذ ضعف اللي قلبك يتمناه
تم النشر الخميس، ١٢ مارس ٢٠٢٦
بصي أكبر غلطة ممكن تعمليها هي إنك تدافعي عن نفسك أو تروحي تسألي حد هو فلان قال عليا إيه؟. الحركة دي بتأكد الإشاعة حتى لو مش موجودة. خليكي طبيعية جداً، واثقة في نفسك، والتعامل مع الكل يكون بحدود واحترام. لما بيلاقوا رد فعلك صفر، الكلام بيموت لوحده. ولو هو فعلاً اتغير بسبب كلام سمعه من غير ما ييجي يواجهك أو يفهم منك، يبقى الشخص ده مش شاري وما يتأمنش عليه. الشخص اللي بيحب بجد بيدي فرصة للي قدامه يوضح، مش بيمشي ورا كلام الصحاب. اعتبري اللي حصل فلترة حقيقية لمعدنه وانتي مغلطيش في حاجة؛ إنك تعجبي بحد دي مش جريمة، وإنك تبعدي عن حد عشان مش مناسب ليكي ده حقك. الناس اللي بتبص بصات غريبة بكرة هيلاقوا موضوع جديد يتكلموا فيه وينسوكي، المهم إنك متديهمش مادة جديدة زي العياط أو العصبية أو محاولة التبرير. بصي ركزي في دراستك وفي مستقبلك، والجامعة فترة وهتعدي بكل ناسها. اللي يعرفك كويس مش هيصدق عليكي حاجة، واللي يصدق عليكي من غير ما يعرفك ملوش لزمة في حياتك اصلاً فكك من منهم. انتى انسانه غاليه ومحترمه متتعبيش نفسك ومتديش مجال الشيطان انو يتحكم فيكي ، يعتذر عن الإطالة 😊 وجد ربنا يحفظك ويسعدك
تم النشر الخميس، ١٢ مارس ٢٠٢٦
أما عن موضوع السمعه صلحي الموقف بالتجاهل ولو تقدري تمنعي عن الحضور فتره هيكون افضل وع فكرة هتلاقي كل واحد بيرمي كلمه ويروح ينام وانتي اللي تحطي ف نفسك و تتخنقي -من الاخر متاخديش ف بالك ولا تخلي الموضوع يأثر عليكي ولا يهز ثقتك ونفسيتك ولو تقدري تتعاملي معاهم بشكل مباشر هيكون الموضوع أسهل مش هتقدري ف التجاهل أسهل حل
تم النشر الخميس، ١٢ مارس ٢٠٢٦
لعرض السؤال في فدني اضغط هنا