مساء الخير
أنا حاسه بإحساس سيء مش بيسبني دايما حزينه
من جوايا طول ما أنا مع الناس ببقي كويسه وناسيه مشاكلي
لكن أول لما ببقي وحدي ببقى إنسان تاني حزين كئيب مش عارف يفسر هو بيمر بإي او ليه هو حاسس كدا
بقيت أضيع الفرص وبقيت من كتر الضيق اللي في قلبي مش قادره أتنفس عاوزه أعيط مش عارفه عارفين جملة تبكي نفسي علي نفسي من نفسي دي تنطبق عليا
كنت دايما اسمع عن الاكتئاب والحزن لحد ما بقيت بحس بيه
دايما ناس قريبين مني لما أقولهم اني حاسه بضيق يردو يقولولي انتي attention اوي
كنت بقرأ حاجه جمله كدا لا تتكالبوا فتكتئبوا بجد أنا مش عارفه ليه بيحصل معايا كدا بقيت لما احس بزعل انام وبنام كأني بنتقم من النوم ممكن انام ١٥س ساعه متواصل لدرجه بقوم ميته من كتر النوم
مش عارفه بحكي ليه كدا بس بجد أوقات بحس روحي هتطلع من كتر الضيق اللي في قلبي
معتش نفسي اللي أنا عارفاها بجد مش عارفه اعمل اي وأي سبب اللي فيا
اسفه عالازعاج والاطاله بس مش قدامي احكي غير هنا
بصي يا بنت الناس انتي مش بتدلعي ولا عايزة اتنشن ولا حاجة انتي تعبانة بجد والحمل تقيل عليكي والناس اللي بتقولك كده مش فاهمين يعني إيه حد طاقته تخلص ويبان قدام الناس بيضحك وهو من جواه مهدود النوم الكتير ده مش كسل ده وجع قلب وجسمك بيهرب من الضيقة اللي خنقاكي ومش عيب إنك مش عارفة تلاقي نفسك دلوقتي وما تلوميش نفسك إنك بتبكي عليها ده حقك بس بلاش تسيبي روحك للدوامة دي أكتر من كده والوجع اللي واصل لروحك ده محتاج حد متخصص بيفهم في النفسية يسمعك ويشدك من اللي انتي فيه لأن الصحاب والقرايب ساعات بيضغطوا أكتر ما بيساعدوا روحي لدكتور واتكلمي وفضفضي عشان ترجعي تتنفسي من تاني وتعرفي االليةضاع منك ده وأهم حاجة بطلي تجلدي في ذاتك انتي معملتيش حاجة غلط انتي بس محتاجة حد يطبطب على قلبك صح ويعالج الجرح اللي جوه ده وكل ده هيعدي وهتبقى حكايات من الماضي بس ابدأي ساعدي نفسك وماتسمعيش لكلام حد يقلل من وجعك وجد والله ربنا يحفظك ويسعدك 🌷
تم النشر الثلاثاء، ٧ أبريل ٢٠٢٦
مساء النور يا ندى الغالية 💕، أول حاجة أقولك إنك مش لوحدك في اللي بتحسيه ده، ومش "attention seeker" زي ما بيقولوا.. ده إحساس حقيقي ومؤلم، وأنا هنا عشان نسمعك ونفهم مع بعض. الحمد لله إنك بتحكي، ده خطوة كبيرة نحو التحسن. السبب المحتمل: اللي بتصفيه يشبه الضغط النفسي أو بداية اكتئاب خفيف (مش تشخيص طبي، بس أعراض زي الحزن اللي بيجي لوحدك، النوم الزايد كـ"هروب"، والضيق في الصدر اللي بيخلي التنفس صعب). غالباً بيحصل لما الدماغ بيحتفظ بالمشاكل المكبوتة، ومع الناس بننسى مؤقتاً، بس لوحدنا بترجع. ممكن يكون من ضغوط حياتية متراكمة (عمل، علاقات، توقعات)، أو نقص في الروتين اليومي اللي يعطي طاقة. خطوات عملية عشان تتحسني (ابدئي بـ3 بس النهارده): روتين يومي ثابت : قومي بدري (صلاة الفجر مع قرآن صفحة واحدة بس). مشي 20 دقيقة يومياً في الشمس – ده بيفرز هرمونات السعادة طبيعياً، ويقلل النوم الزايد. اكتبي اللي جواكِ : كل مساء، 5 دقايق: "3 حاجات شاكرة ربنا عليها النهارده" (زي صحتك أو أكلة حلوة). بعدين، "إيه اللي زعلني النهارده وليه؟" – ده بيخرج الضيق ويخليكِ تشوفي الأسباب بوضوح. دعاء واستغفار : قولي "اللهم إني أعوذ بك من الهم والحزن" 100 مرة يومياً، خاصة قبل النوم. الرسول ﷺ قال: "الاستغفار يزيل الهم ويجلب الرزق". وتذكري: "إِنَّ الله مع الصابرين" – الصبر هيغير حياتك. لو استمر الضيق أو صعب التنفس، روحي لدكتور نفسي متخصص في فدني، شوفي الخبراء هنا: https://www.fedni.net/experts – في متخصصين نفسيين ومدربين حياة هيساعدوكِ شخصياً. وابحثي في فدني عن "حزن دائم" أو "ضيق نفس"، هتلاقي إجابات كتيرة زي حالتك. أنتِ قوية يا ندى، وهترجعي أحسن من الأول – خطوة صغيرة كل يوم. ربنا يفرح قلبك يا رب 🤲❤️
تم النشر الثلاثاء، ٧ أبريل ٢٠٢٦
الوحدة مش إن مفيش ناس حوالينا، الوحدة الحقيقية إن مفيش حد جواك فاهمك، حتى انتي. انتي مش بتدوري على اهتمام، انتي بس مشاعرك بقت أعلى من قدرتك على استيعابها، فبتخرج على شكل ضيق وحزن. وكلام الناس سهل، بس اللي بيحس مش زي اللي بيحكم. كتر النوم، الضيق المفاجئ، الإحساس إنك تايهة من نفسك… دي إشارات مش ضعف. مش لازم تحلي كل حاجة مرة واحدة، كفاية تبدأي تبصي لنفسك بهدوء ومن غير قسوة. وأي حاجة تتفهم، بتخف. ربنا يبدل إحساسك ده لراحة وهدوء 🤍
تم النشر الخميس، ٩ أبريل ٢٠٢٦
قال رسول الله صلى الله عليه وسلم من لزم الاستغفار جعل الله له من كل ضيقاً مخرجاً ومن كل هما فرجاً ورزقه من حيث لا يحتسب
تم النشر الثلاثاء، ٧ أبريل ٢٠٢٦
الانسان لما بيقعد لوحده بيكون خارج إطار اي تشويش على أفكاره كأنه قاعد في اوضه مقفوله عليه هو و نفسه و بس .. عادة الأشخاص اللي عندهم صعوبه فأنهم يكونوا لوحدهم بدون اي ملهيات أو وسائل ترفيه أو دوشه خارجيه .. جواهم دوشة افكار مش قادرين يواجهوها .. الوجود المستمر وسط الزحمه و مع الناس .. بيكون مش قادر يقعد مع نفسه و خايف يواجهها و ليهرب منها بوجوده المستمر مع الناس .. بس صدقيني انتي محتاجه تقعدي مع نفسك بعيد عن أي مشتتات ولو ١٠ دقايق و متخافيش من حزنك حتى لو بكيتي أو انهارتي انتي محتاجه تسمعي صوتك الداخلي و نفسك الحقيقيه عاوزه تقولك ايه ... حاولي و استعيني بالله و ان شاء الله ربنا هيعينك و ينور بصيرتك
تم النشر الأربعاء، ٨ أبريل ٢٠٢٦
مش عارف الموضوع دا بيفرق من شخص ل شخص ولا لا بس الحالة ديه كانت بتجيلى لما بيبقى فيه موضوع معين أو جهة واحدة متأمل فيها حاجة معينه وتفشل أو أزعل بسببها ف الجهة ديه بتأثر على كل الاتجهات التانيه وبتدخلنى فى الحالة اللى انتى فيها ديه ممكن أقعد يوم يومين أسبوع بس بيبقى خلاص بقوم وأكمل حياتى عادى بس ببقى معنديش رفاهية انى أنام تانى أكتر من كدا زى ما بيقولوا كدا معنديش رفاهية الاستسلام رغم ان بيبقى نفسى فيه ( يعنى حاجة واحدة زعلتنى قوى أثرت على كل حياتى ) بس دا من تجربة شخصية مش عارف بقى عندك نفس الفكرة ولا لا فاهمانى
تم النشر الأربعاء، ٨ أبريل ٢٠٢٦
قربي من ربنا
تم النشر الجمعة، ١٠ أبريل ٢٠٢٦
لعرض السؤال في فدني اضغط هنا