السلام عليكم ،
من فضلك انا بحلم بحاجات متلغبطه بس على فترات مختلفه ولكن ديما بيتكرر معايا اني بهرب من حد عايز يقتلني وبحاول اصوت وصوتي مش طالع خالص وبحاول اجري بكل قوتي ولكن في الاول بكون مش قادرة اتحرك وبعدها بجري ببطء شديد وبعدها بيكون حد بيجري قدامي وبفضل اقول امسك ايدي وشدني علسان اتحرك واحيان بتكون ست واحيانا راجل ودا بيتكرر كتير مع اختلاف تفاصيله .
والحلم التاني اللي بيتكرر هو الثعابين وكل مره بتفاصيل غريبه فاكره مره وهي ان ماما لقت ثعبان فاوضتي وانا كنت خايفه وبعدها قامت سابته وهي مكنتش خايفه وانا اتعصبت وكنت عماله ازعق واقولها سبتيه ليه وجريت استخبيت فاوضه تانيه وبرغم اني قفلت الباب كنت قلقانه وحاسه انه هيجي من اي حته .
وكمان اسفه في اللي هقوله بس في حلم مش عارفه اتكرر مرتين ولا هو مره واحده وهي ان بيت شبه مهجور يعني متكسر وكدا بس في النهار وكنت مع واحد معرفهوش ابدا وكان بيحاول يغتصبني وكل مره كان بيمسكني كنت بهرب منه وصحيت من الحلم كارهه الجواز وقرفانه من اي راجل .
والحلم اللي حلمته قريب مش عارفه هلوسه ولا اي ، انا فتالته ثانوي وامتحاناتي قربت والحلم كان عباره عن اني انا وناس من دفعتي ولاد وبنات قاعدين فمكان عالأساس لسه هندخل اللجنه والناس كلها كانت عماله تظبت هتغش ازاي ولكني كنت مصدومه لان لقيت واحده صحبتي مع اختها الكبيره بيعملو كدا برغم انها رفضت تغش فسنتها وصحبتي كمان مش بتغش ابدا فانا كنت مصدومه وعماله اقولها انتي بجد هتغشي وهي تقولي ايوا وكنت مصدومه جدا وانا من الزعل اخدت سجادة صلاة كانت هناك ودخلت اوضه في المكان مكنش عليها باب وبدأت اصلي وانا جايبه السجاده كان في ولدين من دفعتي شافوني .
وللعلم انا الفتره دي مضغوطه جدا ومراكمه كتير وبالنسبه لاي حد مستحيل اعرف اجيب مجموع كويس ولكني واثقه فربنا .
اسفه جدا جدا للإطاله بس باللّه ردي عليا .
بسم الله. واضح تعانى ضغوطات نفسية شديدة و كبت داخلك. بتهربى من هموم و ضغوطات . بغض النظر عن الاحلام اللى بتشوفيها عايزاكى تفضى نفسك نص ساعة كل يوم و اقعدى مع نفسك ع الارض كده. و اقرأى سورة الناس كرريها على مهلك و ركزى فى من شر الوسواس الخناس الذى يوسوس فى صدور الناس . لو تقدرى كل يوم اغتسلى بماء، مرقى بالفاتحة و ركزى على اياك نعبد و اياك نستعين وانتى بترقى المياه. اقرأى السورة كلها و انفخى في المياه. و اغتسلى كل يوم. لو الاغتسال خارج الحمام افضل لو داخله ما فى مشكلة. حتى تنتهى احلامك التوقيقية هذه و ترتاح نفسيتك. و حنى شعرك بحنة بلدى معجونة بماء ورد مرقى بالفاتحة. بعد كل فرض صلاة قبل ما تقومى من جلستك. حطى يديك على فمك كأنك هاتكتمى نفسك. و اقرأى المعوذات كل سورة 3 مرات و انفخى جوا ايديك وبعدها امسحى جسمك من رأسك ل اصابع قدمك. اللى كتبته علاج نفسى و روحى لك هايهدى معك ما تمرى به. المكتوب ده عايزاكى تحسيه.. تحسيى ان منقذك و مطبطب عليكى هو الذى انزل هذا القرآن اللى ها تعالجى نفسك بيه. يبق نتكلم مع ربنا و نقوله ماليش غيرك يخفف عنى اللى فيا..
تم النشر الخميس، ١٨ يونيو ٢٠٢٦
لعرض السؤال في فدني اضغط هنا