انا عايزة أقرب من ربنا وكل اما آجي اصلي او اعمل عبادة قلبي ينتكس و بحاول اجاهد نفسي اعمل اي
انا كنت كدة برضو مش قريبة من ربنا بس لما بصيت لحياتي لقيت مفيش حاجة مفيدة فيها بصيت لقيت معملتش اي انجاز لا في الدنيا ولا في الآخرة واول حاحة عملتها مسحت الاغاني وبقيت بتفرج علي شيوخ علشان اتعظ واشوف مقطع بتاع حمم بركانية وعليه قرآن بقول يا ترا دي نار الدنيا مبالك بقا نار الآخرة جبت ورقة مهام طبعتها تتبع العادات كل ما اصلي فرض بعمل علامة صح وبقيت اقرا قرآن عملت ورد ٤ صفحات كل يوم والحمدلله انا حاليا نوعا ما منتظمة ادعي وانا وبعمل رياضة او خدمة في البيت معايا المسبحة بصلي علي النبي واستغفر واقول اذكار دا بخليني مرتاحة واكتر حاحة عايزة انتظم عليها صلاة الفجر وبعدت عن الصحاب الي مش بتصلي حتي لو هتفضل وحدك من غير صحاب زاي حالتي فكري في نفسك انتي وفي القبر وفي يوم الحساب هتبقي وحدك انا في الأول كنت عايزة حد يشجعني بس ملقتش فأنتي لو حابة حد يشجعك علي الصلاة نتواصل مع بعض ونفكر بعض بصلاة والورد وكدة وربنا يا رب يفرح قلبك ويثبتك علي الصلاة والقرآن ويقربك من ربنا
تم النشر الثلاثاء، ٢٢ أغسطس ٢٠٢٣
هاقول لك على حاجه مفيده جدا ممكن تريح دماغك من الدنيا دي كلها الدنيا ديت ربنا نزلنا فيها وعمال يختبرنا كل شويه عشان يدخلنا جناته يهتم باي حاجه في الدنيا وفكري في الآخره
تم النشر الثلاثاء، ٢٢ أغسطس ٢٠٢٣
بصي ابدأي واحدة واحدة و أهم حاجة تكوني عارفة ان لو ربنا مكنش بيحبك مكنش هيزرع فيكي احساس انك عايزة تقربي منه. اهم اهم حاجة فعلا متفوتيش فروض ، ممكن في البداية يكون صعب انك تلتزمي او مش قادرة تصلي اصلا بس ده فعلا اهم حاجة وافتكري ان الصلاة هي اول حاجة هنتسأل عليها يوم القيامة ، فصلي حتى لو مكنتيش مركزة او يدوبك بتعملي حركات بجسمك بس على الاقل هيكون احسن من مفيش و فعلا مع التزامك بالصلاة هتلاقي انك مبسوطة و مرتاحة و هتلاقي ان من نفسك عايزة تصلي و ممكن تزودي نوافل كمان . هيساعدك جدا في انك تلتزمي بالصلاة كتاب (فاتتني صلاة) للكاتب اسلام جمال . ثاني اهم حاجة ابعدي عن أي صاحب بعيد عن ربنا لحد ما على الاقل تحطي رجلك عن الطريق ، مش محتاجة اقولك عن خطر ان يكون جمبك صديق بعيد عن ربنا في الحالة ده لانه يا اما هيخليكي تضعفي. و تبعدي ثاني يا اما هيفضل يقولك هتعمل فيها شيخة و بتاع و هيحبطك جدا بجد فابعدي عنهم الفترة ده . نفس الكلام مع عيلتك لو انت عيلتك بعيدة عن ربنا حاولي متبينيش في البداية بس عشان ميحبطوكيش او يقولولك شيخة و كلام سلبي و هكذا . حاولي نفسك بناس قريبة من ربنا ، يعني مثلا لو بتستخدم تيك توك كتير اعملي فولو لناس محتواهم ديني (زي مثلا رحمة (رحرح) و مصطفى امين و طارق النمر ) نفس الكلام على اي ابليكيشن حاولي تعملي فولو لناس محتواهم ديني بحيث انك تكوني محاولة بربنا طول الوقت . اسمعي السيرة النبوية لأحمد عامر موجودة على يوتيوب و سبوتيفاي ، هي مش هدف السيرة الاساسي انك تعرفي تاريخ الإسلام و تعرفي النبي عليه الصلاة والسلام على قد ما هدفها انك تتعرفي على الإسلام، تتعرفي على ربنا ، تعرفي ازاي الإسلام عايزك تكوني و ايه صفات المسلم الحق ، هتوريكي إعجاز القرءان و عظمة ربنا و قد ايه الصحابة استعملها عشان الدين و قد ايه احنا في غفلة ! و ماشاءالله احمد عامر فيه قبول رهيب يعمي فيديو مدته ساعة صدقيني مش هتحسي فيهم بدقيقة ملل . بعد ما تخلصي السيرة هتلاقي جلسات تدبر قرءان لأحمد عامر بردة و ده حرفيا عظمة العظمة بجد لازم تسمعيها . انا عارفة ان الموضوع هيكون صعب في البداية بس واحدة واحدة كله هييجي و هتوصلك للي نفسك فيه ، هيعدي عليكي ايام تبقى ملتزمة و ايام تفوتي فروض و ده طبيعي لأنك لسة بتحطي رجلك على الطريق . افتكري ان من توجه إلى الاستقامة وهو شاب كان من السبعة اللي ربنا هيظلهم بلله يوم القيامة ، و من تقرب إلي شبرًا؛ تقربت منه ذراعًا، وإن تقرب مني ذراعًا؛ تقربت منه باعًا، وإن أتاني يمشي؛ أتيته هرولة . و ربنا بيفرح بالعيد التائب و بيتباهى به قدام الملائكة. وان شاء الله ربنا يثبتك و يقويكي و يرزقك حسن الخاتمة و العمل الصالح ♡
تم النشر الثلاثاء، ٢٢ أغسطس ٢٠٢٣
حاولي ومتيأسيش وحاولي تشوفي اصدقاء متدينين علشان يساعدوكي.. وادعي ربنا بأخلاص من قلبك وربنا هيقدر لكي كل الخير
تم النشر الجمعة، ٢٥ أغسطس ٢٠٢٣
لعرض السؤال في فدني اضغط هنا