السلام عليكم ورحمة الله وبركاته
أعاني من كثره التفكير بفكر جدا في كل حاجه حصلت في اليوم في كل موقف وبحلل المواقف واقول ده كان قصده كذا وده قصده كذا فبتعب جدا مخي مش بيبطل إلا لما أنام مش عارفه ليه بفكر في بطريقه دي، بعاني من الوسواس إني حد من أهلي مات وأعيش في الموقف وابكي
بصي يا جميلة.. عقلك مش عدوك، هو بس بيحاول يحميكي بزيادة فبيخليكي تحللي كل كلمة وكل موقف عشان تتجنبي الوجع، بس الحقيقة إن ده هو اللي بيوجعك بجد وبياخد من روحك. سيبي اللي حصل يحصل، واللي اتقال يتقال.. مش لازم تلاقي تفسير لكل حاجة عيشي اللحظة مع أهلك واستمتعي بيهم بدل ما تحزني على فراقهم وهم لسه جنبك الخوف ده مجرد وهم بيسرق منك سعادتك الحقيقية. فرغي كل اللي في دماغك في ورقة قبل ما تنامي،د وسيبي الباقي على ربنا.. إنتي تستاهلي تعيشي بال مرتاح.والنوم قبل ما تنامي اتوضي وصلى ركعتين ،وقولي اذكار النوم هتحسي بالفرق . بعتذر عن الإطالة وجد والله ربنا يحفظك ويسعدك
تم النشر الأحد، ١٥ مارس ٢٠٢٦
وعليكم السلام ورحمة الله ، أنا مريت بفتره زي دي والاوڤر ثينك وبقعد افكر ف اي حاجه ملهاش اي لازمه وكنت قبل ما انام او وقت ما ببقى فاضي بقعد اتخيل انه مثلا اخويا او ابويا جراله حادثه او حصله حاجه مع انه ممكن يكون قاعد معانا من شويه عادي والاقي جسمي بيتصرف على انه فعلا الموقف حصل وكنت وقتها بقعد اعيط او ازعل واتضايق جدا كأنه الموقف حقيقي فعلا والحاجات دي وصلتني اني بقيت بتعالج من الاكتئاب ف فتره ما ف حياتي فخلي بالك وحاولي تتعاملي معاها بدري ودا انا بفسره بالنسبه ليا لاني شخصيه شديدة الحساسيه وبفكر ف كل كلمه بتتقال سواء انا بقولها او بتتقال ليا ، يعني مثلا كلمة اتقالت ليا فخلتني قاعد يومين بفكر فيها وكل ما اجي اصلي مش بركز ف الصلاه خالص ، فيعتبر حاسس باللي بتمري بيه جداً، لأن "الأوفر ثينكينج" ووسواس الفقد فعلاً بيخلي الواحد عايش في سجن جوه عقله. فهونّي على نفسك.. أنا عارف إن عقلك مش بيبطل تحليل لكل كلمة وكل موقف، وإنك بتدخلي في دوامة "هو قصده إيه؟" و"ليه حصل كدة؟" لحد ما بتتعبي جسدياً ونفسياً. وعارفة كمان إن أصعب لحظة هي لما تتخيلي فقد حد غالي عليكي وتعيشي الوجع وكأنه حقيقة.. ده استنزاف لروحك أنتي مش مجرد تفكير.عايزاك تعرفي كام حاجة وتجربيهم نفعوا معياا جدا : 1.انفصلي عن أفكارك: لما الفكرة تيجي، قولي لنفسك "دي مجرد فكرة، مش حقيقة". عقلك بيحاول يحميكي من الوجع فبيخليكي تعيشيه قبل ما يحصل عشان "تستعدي"، بس الحقيقة إن ده مش بيحمي، ده بيسرق منك سعادة اللحظة اللي أنتي فيها دلوقتي وهما جنبك.... 2.قاعدة الـ 5 دقائق: لما تلاقي نفسك بتحللي موقف حصل، ادي لنفسك 5 دقائق بس تفكري فيه، وبعدها قولي "خلاص، اللي حصل حصل ومش هقدر أغيره"، وقومي اعملي أي حاجة تشغل إيديكي (ترتيب، حركة، صلاة). 3.عقلك بيكذب عليكي: التحليلات اللي بتوصلي لها في نص الليل غالباً بتكون غلط ومبالغ فيها لأن عقلك بيكون مرهق. متصدقيش أي استنتاج بتوصلي له وأنتي تعبانة. 4.واجهي وسواس الموت بالامتنان: بدل ما تعيشي لحظة وفاتهم وتعيطي، قومي دلوقتي بوسيهم، كلميهم، أو حتى ادعي لهم. حولي طاقة الخوف لطاقة حب وفعل في "دلوقتي"، لأن المستقبل في إيد ربنا وحده والخوف مش هيغيره. 5.التنفس والذكر: أول ما تحسي إن "الخناقة" بدأت جوه دماغك، ركزي في نفسك بس.. شهيق وزفير عميق، وكرري "لا حول ولا قوة إلا بالله" أو أي ذكر بيريحك.. ده بيفصل الدوائر الكهربائية اللي شغالة في دماغك.كلمة أخيرة ليكي: أنتي مش لوحدك، والحالة دي ليها حل، بس محتاجة منك "رفق" بنفسك. متجلديش ذاتك إنك بتفكري كدة، تقبلي إن ده خوف من كتر حبك، وبالتدريج عقلك هيهدا.ربنا يطمن قلبك، ويريح بالك، ويحفظلك كل اللي بتحبيهم ويطول في عمرهم في خير.
تم النشر الأحد، ١٥ مارس ٢٠٢٦
وعليكم السلام ورحمة الله وبركاته يا عزيزتي، أشعر بتعبك تمامًا، وهذا النوع من التفكير الزائد والوساوس شائع جدًا، خاصة مع القلق عن الأهل والموت. الحمد لله إنكِ تسألين، ده خطوة كبيرة نحو الراحة. إليكِ خطة عملية بسيطة، عشان تتخلصي منها خطوة بخطوة: 1. قطعي الوساوس بالذكر والاستعاذة : كل ما يجي الوسواس (مثل "حد هيموت")، قولي فورًا: "أعوذ بالله من الشيطان الرجيم" ثلاث مرات، ثم "لا إله إلا الله وحده لا شريك له، له الملك وله الحمد وهو على كل شيء قدير" 100 مرة يوميًا (أفضل بعد الصلاة). الرسول ﷺ قال إنها تكفي من الهم والحزن. اقرئي سورة الإخلاص والمعوذتين 3 مرات صباحًا ومساءً لحماية نفسكِ. 2. نظمي تفكيركِ اليومي : حددي 10 دقائق فقط قبل النوم لمراجعة اليوم: اكتبي في دفتر 3 أشياء إيجابية حصلت، و3 دروس تعلمتيها. بعد كده، قفلي الدفتر وقولي: "خلاص، خلص الوقت". لو فكرتِ في موقف، اسألي نفسكِ: "هل ده هيغير حاجة دلوقتي؟" لو لا، غيري الموضوع فورًا بقراءة قرآن أو كتاب مفيد. 3. غيري روتينكِ لإرهاق الجسم والعقل : مارسي نشاط بدني يوميًا زي المشي السريع 30 دقيقة بعد الفجر – يفرغ الطاقة السلبية ويحسن المزاج طبيعيًا. اجعلي يومكِ مليانًا: صلي، اقرئي، طبخي، ساعدي في البيت. العقل المشغول عدو الوساوس! 4. تذكري التوكل على الله : الموت بيده سبحانه، مش بيدكِ. قولي: "حسبي الله ونعم الوكيل" كل صباح. اقرئي آية الكرسي يوميًا، وتأملي فيها: الله حافظكِ وأهلكِ. ابدئي اليوم ده، وهتشوفي فرق في أسبوع. لو استمر التعب، شوفي خبراء النفس في صفحة الخبراء على فدني: https://www.fedni.net/experts – فيه متخصصين رائعين يقدموا استشارات. وابحثي في فدني عن "وسواس الموت" هتلاقي إجابات كتيرة مفيدة. أنتِ قوية يا حبيبتي، ربنا يريح قلبكِ ويبدل همكِ فرحًا. لو عايزةِ تتابعي، قوليلي! 💕
تم النشر السبت، ١٤ مارس ٢٠٢٦
متسبيش وقت فاضي في يومك يعني حتى لو آخر الليل اتلي القران لغاية ما تنعسي وتنامي او شغليه وركزي في الايات واشرحيها في دماغك
تم النشر السبت، ١٤ مارس ٢٠٢٦
وسواس قهري ،، حاول تشغل نفسك باهتمامات تبعدك عن كترة التفكير ،، اقرا قرآن فيه شفاء لما في الصدور ،، تابع وثائقيات شوف اكتر حاجة بتحبها واشغل نفسك بيها
تم النشر السبت، ١٤ مارس ٢٠٢٦
لعرض السؤال في فدني اضغط هنا