كنت في يوم من حوالي سنتين رايح مشوار مع اخويا وراكب مكروباص وحسيت من قبلها اني ابتديت اتعب وادوخ كده واحساس غريب فقاومت على قد ما قدرت لحد ما جيت فلحظه وانا فالمكروباص مكنتش قادر قلت للسواق يقف ونزلت بسرعه
كنت حاسس اني بموت مكنتش عارف انا فيا ايه او ايه الي بيحصل قعدت على الرصيف فشارع مش عارف اعمل اي فلقيت قدامي صيدليه الدكتور قالي اني متوتر ولازم أهدى نفسي فضلت حوالي نص ساعه او أكتر حاسس اني بموت وروحي بتطلع وبعدها هديت بقيت بعدها بترعب من حاجه اسمها مكروباصات وكل ما أركب مكروباص حتى لو خمس دقايق اتعب جدا نفس التعب اللي حصل ولكن على خفيف
كان القولون تاعبني جدا ساعتها وكنت فاكر ان القولون عصبي وكنت كل فتره اقلق جامد مره واحده واروح لاهلي عشان يلحقوني وهما مش فاهمين في ايه وانا كنت ببقا حاسس اني بموت وهما مكنوش عارفين فيا ايه ولا يعملو ايه رحت بعدها لشيخ قال لي اني ممسوس وفضلت ماشي على كلامه فتره كبيره لحد ماجه فيوم قالي ان اللي كانت فالجسم خرجت فلقيت الاعراض لسه موجوده وبتعب وبقلق بردو وبتعب في المكروباص
وكان تفسيره ساعتها ان ده القرين لحد ما جيت فيوم مسافر كنت اول مره اسافر لوحدي وكنت راكب قطر خوفا من اني اركب مكروباص عشان متعبش وكنت متوتر جدا كنت قاعد بقرأ اذكار وادعيه طول النص ساعه الي قعدتهم فالقطر ولكن التوتر كان بيزيد والاحساس الصعب جه تاني فأنا كنت عايز أهرب باي طريقه من الاحساس ده فنزلت من القطر
وفضلت قاعد لحد ما هديت وركبت تاكسي وكان معايا حد من اهلي بيطمني على التلفون وانا راجع رجعت فيومها رحت كشفت مخ واعصاب ونفسي لاني كنت اتاكدت ان الي عندي دا مش قرين ولا مس لو كان كده كان راح من الادعيه والاذكار الي انا مببطلش اقولهم رحت للدكتور ومقاليش انا عندي ايه قالي ان المشكله في القلق واني هبتدي آخد ادويه واحاول اقاوم واواجه القلق ده
مشيت معاه شهرين والحال نفس الحال بل اسوأ تعبت جدا في يوم وحسيت اصعب احساس حسيته فحياتي مش عارف أوصفه بس انا كنت قاعد مش عايز اعمل حاجه وبتعذب من كتر العذاب كنت بتمنى الموت اصعب من اي الم جسدي انا جربته اضعاف مضاعفه اكتشفت ان الدكتور دا كان مزودلي الجرعه من ١٠ ل ٢٠٠ رحت لدكتور تاني وقالي اني عندي نوبات هلع واني هاخد ادويه والوضع هيبقى اصعب في الأول
استحملت اول فتره ومع الوقت عدي حوالي ٦ شهور دلوقتي وبقيت كويس واغلب الاعراض معدتش بتظهر عليا غير نادرا فالدكتور دا قالي اني عندي اضطراب قلق و adhd ومش عارف ازاي عرف ان عندي adhd بدون تحاليل وبسهوله دي فكان في دكتوره نفسيه صاحبت والدتي كلمتها وحكيت لها على الموضوع قالت لي اني معنديش حاجه وان كل دا بسبب ضغوطات كنت بمر بيها وانا صغير واني بعد ما هخلص ثانويه عامه هبطل الدوا
لسه قافل معاها من شويه وبمجرد ما هي قالت كده انا دخلت في نوبه هلع بس على خفيف متوتر جدا وقلقان بسبب اني كنت خلاص عرفت انا عندي ايه وبتعالج ومطمن جت هيا شالت الامان دا كله وقالت لي ان الموضوع بايدي وممكن يرجع تاني لو انا مقاومتش
من ساعه ما هي قالت لي كده وانا موتر جدا مش قادر اتخيل ان الي كان بيحصلي دا يرجع تاني انا قعدت فتره بتعذب من اول ماصحى لحد ما أنام عذاب ميتوصفش فانا مش قادر اتخيل اني هرجع لكل دا تاني فانا مش عارف دلوقتي هل الدكتور الي انا ماشي معاه صح ولا هي صح ومش عارف اكمل مع الدكتور اللي انا ماشي معاه ولا اروح لواحد تاني
خايف اروح لواحد تاني يدخلني فدوامه تالته وانا مش ناقص وانا مكنتش مصدق اني بقيت كويس ومش عايز ارجع للتعب ده تاني فانا كده عندي ايه واعمل واسف على الاطاله
السلام عليكم ورحمه الله وبركاته. طبعا الاعراض اللي انت بتوصفها زي ما يعني في نصف الاجابات اكدت على الموضوع والدكاتره اللي حضرتك رحت لهم الفاضلين برده اتعاملوا معاك على اساس التشخيص ده ان دي نوبات هلع المهم في نوبات الهلع اه طبعا انت بتحتاج انك تاخذ ادويه عشان تقدر تسيطر لك على نوبات الهلع او تحد من خفتها عشان انت ما تكونش بتلاقي نتيجةتضرك لا قدر الله. ان احنا نعرفه سببها ايه يعني اكيد حضرتك كنت بتركب الميكروباص عادي جدا وكل وسائل المواصلات عادي جدا وما كانش فيه مشكله وما كانتش النوبات دي بتحصل ولكن مع ظروف معينه او مع حدث معين انت بدات تجيلك النوبات دي فضروري احنا نبدا بقى ايه يعني ندخل كده لجوه دواخلك ونشوف هو ايه الحدث الجديد اللي كان حاصل قبل الموقف اللي حضرتك حكيته بتاع الميكروباص اللي خلى النوبات تبدأ معاك واللي بقت مرتبطه باي وسيله مواصلات او اي مشوار انت متحرك فيه او موجود جوه وسيله مواصلات بتتحرك فالامر بيضغط عليك بالشكل ده. خلينا كده نفكر ونشوف وايه اللي حصل وارد جدا تكون حاجات كثير ممكن يكون لا قدر الله حادث حصل لحد وانت تاثرت جدا بالخبر ممكن يكون حادث انت شفته حد ما تعرفوش ولكن حادث شفته على الطريق فده اثر فيك ممكن تكون كلام او تفكير او فكره لمجرد الفكره عن نوعيه الحوادث اللي ممكن لا قدر الله تحصل ممكن تكون في خوف من مساله السفر او الانتقال من مكان لمكان ممكن حاجات كتيره جدا ايه اللي حصل معاك قبل التوقيت ده قبل الحدث بتاع اول نوبة هلع عشان نقدر نشوف الموضوع تقدر ازاي تحله انت من جذوره ومش بس تبقى بتسيطر على نوبات الهلع ولكن تكون قادر تتحكم في ان هي ما تجالكش او يكون نوبات الهلع دي بتيجي في اوقات قليله جدا جدا وفي ظروف استثنائيه جدا.
تم النشر الثلاثاء، ٢٩ أبريل ٢٠٢٥
السلام عليكم و رحمه الله اهلا بيك دي أعراض نوبات الهلع و انت في الأغلب بتتبع سلوكيات الأمان اللي تتعرف عليها بعد كدا انها مش أمان و انك لازم تجرب السلوك المضاد ، و هنا العلاج بيكون لاما دوائي و علاج نفسي مع بعض لاما علاج نفسي فقط و دا بيوقف علي الشده المعاناه اللي انت فيها. لأن الادويه مش هيتغير تفكيرك لازم معاها متابعه مع اخصائي نفسي. و أما عن صاحبه والدتك ف محدش هيحس باللي انت فيه و المعاناه غير نفسك، انت عارف من جواك انك محتاج تتخلص من كم المعاناه، و الاحساس و كأنها آخر لحظات في حياتك و تتنفس كأنك تتنفس من خرم ابره و الاحساسات الجسمية اللي اول ما تحس بيها بتتعب و خليتك تتجنب وسيله المواصلات و خلافه.. انت من حقك تعيش بشكل أفضل و تتعرف علي أفكارك و تتعرف علي هذا الاضطراب حتي تتمكن من العلاج. انصحك لا تترك العلاج من تلقاء نفسك و لازم تدخل اخصائي نفسي مع الدواء تحياتي لك
تم النشر الاثنين، ٢٨ أبريل ٢٠٢٥
السلام عليكم، أولًا ألف سلامة عليك وإن شاء الله ربنا يعينك وتتخلص من الحالة دي تمامًا. هو أنا مش هقدر أعطيك إجابة متخصصة والخبراء هنا بإذن الله يجاوبوك من الناحية التخصصية. بس أنا هكلمك من تجربتي، أعتقد الحالة دي بتحصل مع ناس كتير، وحصلت معي أكثر من مرة، أكون فجأة في الشارع أو المواصلات وتحصل لي، نفس الإحساس اللي وصفته، انسحاب الأنفاس والدوخة وضربات القلب السريعة بتحسسك إنك بتموت. أنت ممكن اللي حصل معك أول مرة خوفك جدًا وبدرجة صعبة فعملت عندك هاجس من تكراره وده اللي دخلك في الدوامة دي كلها. أنت ربطت بين اللي حصل والميكروباص فبقيت تعيش نفسك الحالة كل مرة. ** هو عمومًا محدش عارف إحساس الموت عامل إزاي والقلق من انتظار اللحظة دي وتخيلها مش هيفيد بحاجة ولا هيغير منها، هي مكتوبة في معاد مش هنقدر ندفعه أو نقاومه، فالقلق والخوف وترقب تكرار الحالة هو اللي عامل المشكلة عندك. الموضوع كله نفسي وبدليل إنك كنت اطمنت إن الدواء جاب نتيجة واتعالجت وعقلك اتبرمج إن القلق خلاص راح بالدواء فجت الدكتورة نزعت الأمان النفسي زي ما قلت وده رجعك لنقطة الصفر وأعطاك شعور إن الحالة ممكن تتكرر، وده طبعًا خلاك دخلت في نوبة هلع بعد ما قفلت معها. ** ده تحليلي والله أعلم، إن شاء الله الخبراء يفيدوك بإجابة أكثر تخصصًا.
تم النشر الاثنين، ٢٨ أبريل ٢٠٢٥
عزيزي، أشعر بك تمامًا وأقدر ما تمر به من مشاعر صعبة وتجارب مؤلمة. إن القلق ونوبات الهلع من الأمور التي تؤثر على حياة الشخص بشكل كبير، ومن المفهوم أن تكون مشوشًا بشأن خيارات العلاج والآراء المختلفة التي تتلقاها. أولًا، من المهم التأكيد على أهمية استشارة متخصص نفسي موثوق فيه، وأن تكون جاريًا في خطة العلاج التي يصفها. يمكن أن تشمل العلاج الجلسات النفسية والدعم النفسي بجانب الأدوية، وأن تتحدث مع طبيبك عن أي قلق تشعر به بشأن أدويتك أو حالتك. بالنسبة لموضوع ADHD، قد يكون لدى الطبيب أسباب واضحة تشير إلى هذا الاضطراب بناءً على تقييمه لحالتك، حتى دون القيام بتحاليل عميقة، فالتاريخ الطبي والسلوكيات المعروفة لدى الشخص يمكن أن تساعد في ذلك. إذا كنت تشعر بعدم الراحة مع طبيبك الحالي، يمكنك دائمًا البحث عن رأي طبي آخر أو استشارة أخصائي نفسي آخر، لكن من المهم التأكد من أن هذه الاستشارة يمكن أن تعزز من فهمك لمشكلتك وتحسن من حالتك. فيما يتعلق بمشاعرك من الخوف من عودة الأعراض، حاول التركيز على كل خطوة إيجابية حققتها حتى الآن. تذكر أن القلق قد يظهر أحيانًا كرد فعل طبيعي للضغوطات والتغييرات الكبيرة في الحياة. من المفيد أيضًا أن تعمل على تحسين أساليب التأقلم الخاصة بك مثل التواصل مع العائلة والأصدقاء الذين يمكنهم دعمك. يجب أن نهتم بأنفسنا ونبحث عن الدعم في الأوقات الصعبة، فهذه هي الخطوة الأولى نحو التعافي. تذكر أن العلاج عملية طويلة تحتاج إلى صبر ومثابرة. أطلب من الله أن يمنحك القوة والهدوء لتجاوز هذه المرحلة.
تم النشر الاثنين، ٢٨ أبريل ٢٠٢٥
لعرض السؤال في فدني اضغط هنا