Aya Leila

بصي في الاول كنت بتصدم وارجع البيت اعيط لإن كان عندي اعتقاد ان الناس كلها كويسة بس بعد شوية تجارب علي شوية صدمات مبقتش اتفاجئ من اي سلوك بشري وقويت ثقتي في نفسي وبقيت بحرج اللي قدامي فا بيتكسف وبيقعد عدل عشان ميجبش لنفسه التهزيق ويحط نفسه في موقف محرج

فترة مراهقتي كانت اصعب فترة مرت عليا وكانت مليانة صدمات ومشاكل لدرجة اني دخلت ف اكتئاب حاد ولكن حاليا بقي نادرا لما حاجة تأثر فيا وبقيت بعرف اتعامل مع مشاكلي .. هتحس دلوقتي ان الموضوع صعب جدا ولا يحتمل بس كمان كام سنة هتحس انك اكتسبت خبرة وبقيت تتعرف تتعامل مع مشاكلك وانت لسة سنك صغير

بص هو الموضوع شبيه بالرياضة انك تبقي بتلعب رياضة كل يوم هتحس ان الاداء البدني عندك عالي وان الموضوع بسيط ولكن لما تريح فترة طويلة وترجع تلعب تاني هتلاقي ان الاداء البدني بقي ضعيف وعضلاتك وجعتك ولسة محتاجة منك انك تتمرن فترة عشان تقوي وترفع من الاداء البدني تاني .. العقل نفس الموضوع في الفترة اللي انت قطعت فيها دراسة عقلك اتعود علي الراحة فا انت محتاج تمرنه عشان تقدر ترفع من الاداء العقلي بإنك تقسم اللي وراك لمهام صغيره وكل فترة تكبر المهام دي

الحل انك تتقبل الواقع او تغيره عشان ميبقاش فيه سبب يخليك تهرب منه حاول تعرف عاوز تهرب منه ليه ؟ ايه هي الحاجة اللي مش قادر تتقبلها؟ وتحاول تتقبل وجود الحاجة دي لو مفيش ف ايدك انك تعمل حاجة زي وفاة شخص عزيز مثلا او تحاول تلاقي حلول وتغير الحاجة دي .. بالنسبة لتغيرها ازاي فا المشكلة دايما بتبدأ من افكارك مجرد فكرة بتتبناها بتخلق جواك مشاعر والمشاعر بتترجم لسلوك .. يعني انا لو اتبنيت فكرة اني شخص فاشل هحس بالاحباط والحزن وفقدان الشغف والمشاعر دي هتخليني لو جالي انترفيو اقرر اني مروحش لإني حاسة اني فاشلة ومش هيختاروني وسلوكي دة هيخليني اضيع علي نفسي فرص كتير لإني كان ممكن اتقبل عادي لو روحت وكتر ضياع الفرص هيقوي الفكرة ان حياتي وحشة واني فاشلة وان مفيش امل وممكن يدخلني في دوامة الاكتئاب فا شوف ايه الحاجات اللي مخلياك تهرب وايه الافكار اللي ورا السلوك دة وحاول تغيرها