منار أحمد

السلام عليكم يا جميلة هو مين أصلاً اللى حدد ان التخين وحش والرفيع حلو مين اللى حدد معايير الجمال بالنسبة للبشر لا فرق بيننا إلا بالتقوى يوم القيامة ربنا مش هيحاسبنا بشكلنا ولا مين الأحلى فيدخل الجنة لا مين اللى عمل صالح، الله ينظر لقلوبنا لا لجمالنا الخارجى لإننا كدة كدة كلنا اتخلقنا فى أحسن تقويم، وبعدين انتِ تأخدى ليه بكلام الناس دول هما ايه من محور حياتك مين هما علشان يحكموا عليكى مجرد ناس فاضية رأيهم ولا ليه لازمة وبثقتك انتِ فى نفسك كلامهم والله ولا هيفرق معاكى انتِ بس اللى من حقك تحكمي على نفسك مش حد تانى، وتقدري تنزلى جيم او تتابعى مع دكتور لو حابة تخسي وده فى الأول وفى الأخر برضو علشانك انتِ انتِ وبس مش علشان رأى حد فيكِ، وانتِ مش نازلة الجامعة علشان رأيهم فيكِ أكيد انتِ نازلة تحققى الهدف اللى عايزاه، دمتِ بخير

أولاً يا حبيبتى مش الأبراج هى اللى بتحدد شخصية البنى آدم ومش هتحكمى على حد أكيد من صفات البرج والهبل ده ما أنا عادى ممكن برجى كذا مثلا وصفاتى غير الصفات اللى بيتكلم عنها البرج ده غير انها حرام أصلاً، طيب انتِ بتقولى انك عايزاه غشيم هل انتِ هتستحملى لو حصلت بينكم مشكلة ردة فعل الشخص الغشيم ده ضرب مثلاً كلام جارح، على عكس الشخص الحنين اللى مش هيقدر يعمل ده او على الأقل هيكون متفاهم معاكى وبعدين مين قالك ان الحنين ده مش هيحكمك مثلاً بس ده فى الصح ما هو في النهاية رجل برضو، وفى حتة الفلوس دى لو انتِ مش هتستحملى وضعه فبلاش لإنك هتشيليه حمل كبير بمطلباتك لو هو مش قادر يوفرها وهتظلميه انما لو انتِ هتكوني قادرة تساعديه وتشجعيه يوصل للأعلى وتفضلي فى ظهره للآخر وقتها قرري بقا

السلام عليكم يا جميلة أولاً ربنا مخلقش حد فينا وحش "ولقد خلقنا الإنسان فى أحسن تقويم" ف انتِ محتاجة ايه أكتر من كدة ربنا عزوجل بيأكد لينابنفسه اننا اتخلقنا فى أحسن شكل وأحسن صورة والحبوب اللى مضايقاكى ليها طرق علاج كتيرة جداً لو معندكيش القدرة انك تكشفى مثلاً ففى وصفات كتيرة طبيعية ومفيدة كمان والحبوب حاجة طبيعية بتحصل لينا كلنا مش لوحدك بيحصل ليكى كدة، كبرى من قيمة نفسك وخليكى متأكدة انك جميلة وكل صفاتك الروحية والشكلية جميلة لان انتِ لو مبدأتيش بنفسك مفيش حاجة هتساعدك وكمان انك تشوفى مشكلتك وتدركيها دى حاجة مهمة ودليل على انك فعلاً عايزة تغيرى منها وادعى ربنا كتير جداً، "ما لا يُنال بالاسباب يدرك بالدعاء"