ليلى .

بصراحه انا شايفه انك لسه صغيرة و غير كده دة واحد من السوشيال ميديا و كل اللي قاعديين ع السوشيال ميديا م بيكلموكي من فراغ يعني هو الواحد دة مش هيسيب كل البنات اللي عنده عشان عيونك يعني معلش كلامي لو قاسي شويه بس دة الصح تضمني منين انه فعلا بيحبك وعايزك ؟؟ مش اي حد يقول كلام معسول وحب يبقا بيحبك حاليا مفيش اسهل من كلمة بحبك تتقال يعني ومفيش اسهل من المشاعر انها تتزيف يا عمري انا بنصحك كاخت ليكي ..انتي كل تعاملك معاه اي يدوبك شات يا اما مكالمات بتحكيله ويسمعك يحكيلك وتسمعيه فين بقا الحب في كده ؟؟ الكلام المعسول اللي هو حياتي ومراتي وام عيالي و بحبك وماليش غيرك وانتي احلى حاجه في حياتي ..طززز مفيش اسهل من الكلام ..مش يمكن ياخد رقم والدك ويهددك لو معملتيش مسوتييش هيقول لابوكي؟ او امك او اي حد مفكرتيش في كده؟؟؟ وبعدين هو هيسيب بجد البنات دي كلها اللي عنده وحواليه عشانك فكري بالعقل كده يا روحي بلاش بلاش وابعدي عنه احسنلك ❤️❤️❤️وربنا يصلح حالك و ركزي في دراستك طول مانتي ناجحه في حياتك و محتفظه بنفسك للي يستاهلك كله هيتمناكي ويبقا عايز ينول رضاكي متفكريش دلوقتي في الحب و الجواز ❤️

لازم يكون ليك هدف عشان تبطلها يعني والدي بطلها عشاني عشان وانا طفله كان غلط عليا فبطلها عشان هدف ان بنته متتعبش و الحمدلله مرجعلهاش فانت لازم تلاقي الهدف اللي هتبطل عشانه عشان كل ماتحس انك هتشرب تفتكر هدفك ومفيش هدف احسن من صحتك يعني

بص هي ممكن تكون بتحب تقعد معاهم كتير ولكن من حقك حاجه تضايقك ف انت كلمها بس من ناحية دلع يعني اقعد معاها وفهمها براحه بدلع وكده الشويتين دول لكن متقولش الجمله اللي انت قولتها دي عشان بصراحه حرقت دمي انا ...فانت جبلها من ناحية هزار الاول يعني مثلا مثال مش ملاحظه انك بتقعدي بالايام و الشهور عند اهلك ف نشوف ردها لو كان تقبل للكلام ادخل بقا وقولها طب خفي العيال بتوحشني ومش عارفه اي والكلام بتاعكوا دة اللي بتاكلوا بيه عقلنا ولو رفضت او طريقتها ضايقتك متتعصبش اياك تتعصب عشان هتنكد عليك خليك هادي ومبتسم وبتسمعها تقولك مبتسم ليه قولها اي كلام رومانسي يسكتها وبعدها قولها بقا ان هي بتوحشك هي والعيال وغيابها بيسيبلك فراغ وبتحس يومك م متظبط و شويه كلام حلو كده هي المفروض بقا تحس بيك و تقولك ماشي لو بقا قالت لا حاول تاني بطريقه برضو دلع وكده وقولها وبينلها انهم بيوحشوك اهم حاجه تبينلها النقطه دي بس بهدوء وحب و دلع والله بكلمتين حلويين هتخليها زي العجينه بتتشكل في ايديك ❤️ ولو منفعش كلم ابوها او امها او كبير اهلها يعني بهدوء برضو وقولهم ان هي بتوحشك والبيت وحش منغيرها وشويه الكلام دة يعني ع الاقل تروحلهم يومين في الاسبوع م اكتر بس كده وبالتوفيق و لاحظ كلامك قبل ما تقوله لاننا ب كلمه ممكن نقلب الحوار عليك😁او ممكن يكون انها تشيل البنتين دة صعب عليها ف بتروحلهم يشيلوا عنها شويه ماهو موضوع صعب م بالسهوله اللي انت متخيلها ف ممكن بتقعد كتير عشان تحس براحه ولما تبقى كويسه بترجعلك تاني ف انت كلمها برضو في الحته دي بهدوء ودلع وياريت تشاركها الحِمل اللي هي فيه موضوع مش سهل يعني بذات ان البنتين صغيرين ومحتاجين اهتمام مضاعف هما الاتنين وربنا يقويك ويقويها ويخليلكم بناتكم الحلويين❤️❤️❤️

اولا عادي ناس كتير بتتكلم بسرعه م عيب ولا غلط ولا حرام ولا شئ يخليك تكرهه نفسك ..بس نتفق اتفاق و دة حل من عندي انا لكن لو محستش بتغيير روح لدكتور تخاطب م عيب ع فكره ولا غلط ولا اي حاجه عادي خالص الحل اللي عندي هو انك كل ما تحس انك هتلغبط في الكلام اسكت وعد من 1 لحد ماتهدى وعيد كلامك تاني بهدوء افضل قررها وانت لوحدك الاول مع الوقت يمكن يمكن تنفع معاك لكن لو مفيش تغيير ف شوف دكتور تخاطب واحكيله مشكلتك ومشكلتك م صعبه او معقده يعني ومتكرهش نفسك انت فل الفل 😉❤️

اولا مهما كانت حجم المشكله ليه يمد ايده؟ ولو هي ضربته شويه ضرب ف مايجيش جنب ضربه حاجه ..ثانيا ممنوع الضرب اصلا الدين و المجتمع رافضه ..ثالثا تصرفه غلط بصراحه وحته انه يكتم بوقها دي مشكله في حد ذاتها معلش الزوج المفروض مصدر امان مش مصدر خوف وبعدين تسرعه وتصرفاته اللي ذكرتها وحركاته دي بتقول انه مش غلبان ولا حاجه و يستاهل بصراحه دي مراته م واحده بيتخانق معاها في الشارع وحتى لو واحده بتتخانق معاه في الشارع ف لا يجرا يجي جنبها اصلا من الاساس كانت الناس اكلته ...ف صاحبك غلطان و لو مثلا عايز يرجعوا ف دة صعب بجد صعب هي مش هتحس معاه بالامان تاني ..ربنا يهديه بجد

بصي اللي انتي فيه دة طبيعي اكيد انتي اتخذلتي وحسيتي بالغدر من اقرب الناس ليكي او خايفه انك تتاذي و يتغدر بيكي ف بتأمني نفسك وعقلك مصورلك ان احنا كده صح عشان منتوجعش طب و الحل الحل بسيط روحي لدكتور نفسي مش عيب ولا غلط ولا هياذيكي بالعكس هيسمعك وهيساعدك او تقراي كتاب مساحه نفسيه هتفهمي نوعية الناس وهيحاول يحتويكي شويه وقربي من ربنا و لو مسلمه اقراي في القران طول ماتحسي انك متوتره و دماغك شغاله سينيوريهات ...بس نصيحه من اخت ليكي شوفي دكتور نفسي احسنلك لان دة مع زيادته ممكن تبقى مريضه بعد كده ف انتي كده واعيه باللي حاسه بيه لو سكتي ع اللي انتي فيه هتدخلي في حالة اللا وعي بعد كده ومش هتعرفي تتحكمي في نفسك تاني وربنا معاكي ويسندك يحبيبتي❤️

بصي هو الجواز مش كل حاجه بل بلعكس هو ممكن يكون اخر حاجه تفكري فيها ..اولا انتي لو خريجه اشتغلي بشاهدتك لو مستواكي مثلا قليل م مهم خدي كورسات انجلش فرينش ايطالي اي لغه كل اللغات مطلوبه حاليا طيب ليه يعني عادي اعرفي حاجه جديده جددي من نفسك متفضليش عايشه ع امل مانا اكيد هيجي يوم واتجوز لا غلط طول مانتي عايشه جددي من نفسك من لغه طريقة تعامل ..م هعرف اخد كورسات و ماليش دماغ م مهم شوفي حاجه بتحبيها بتحبي الطبخ افتحي مشروع طبخ فشلتي مرة التانيه م مهم افضلي حاولي عادي متستلميش م بحب الطبخ خلاص شوفي انتي بتحبي تعملي اي كورشيه بتعرفي تسوقي لحاجه اياً يكن اي اللي بتحبيه ابدعي فيه وطوري فيه طب انا م بعرف اعمل كل دة خلاص عندك اكتر من حل اتعلمي اللي مبتعرفيش تعمليه هتستفادي م هتخسري حاجه او انزلي جيم ضيعي وقتك في حاجات مفيده م هتحسي بان حياتك واقفه وانك محتاجه تثبتي نفسك و ثبات النفس م بالجواز انك تثبتي نفسك و تحسي انك عملتي حاجه دة ليكي انتي عشان كيانك انتي لكن الجواز مفيش اسهل منه يعني و في الاخر كل ماعليك تراعي اللي بتحبيهم طيب في الفترة دي اكتسبي خبرة من الدنيا زي ما قولتلك كل دي افكار او ممكن تدوري ع شغل م عايزة تشتغلي خلاص فكري ف اللي قولتهولك طيب انا م عايزة اعمل حاجه خلاص فرحي نفسك اشتري اكله بتحبيها اسعدي نفسك بقا اعملي الحاجات اللي انتي عايزة تعمليها بس تكون في اطار يليق بدين و الاحترام م اي حاجه وخلاص😂 ..بس يستي وربنا معاكي ويسندك و يرزقك بابن الحلال واتمنى تكون فيدتك يعني ❤️❤️❤️

اولا انتم الاتنين غلطانين مفيش حد فيكوا صح..حضرتك عشان مينفعش الواحده تقول اسرار اهلها لجوزها مهما كان بقا ظروفكوا زي مانتي مش عايزة تطلعي اسرار بيتك لاهله انتي كمان المفروض كنتي كتمتي ع اسرار اهلك عشان في رجاله بتستخدم الاسرار دي بعد كده في الخناقات ومش هتخلصي منها ف دة اول حاجه غلطانه فيها تاني حاجه انك مسكتي موبايله ودة معناه عدم ثقه وبتشوفي بيعمل اي ولا بيقول اي انتي مبقتيش واثقه فيه ماهو اي اللي يخليكي تمسكي فونه مفيش مبرر ..وجوزك غلطان انه راح حكى الاهله حاجه تخصك مفكرش انك حكتيله عشان حستيه امانك وسرك معلش يعني هو حاليا اقرب حد ليكي فهو غلطان ..لكن هو دلوقتي قالب التربيزة عليكي في حتة ماسكة الفون طب الحل الحل انك عيالك توديهم لاهلك وتقعدوا تتصافوا سوا بهدوء وحاولي تحتويه لحد مايبقى هادي خالص وخلاص انتي صالحتيه وتراضى تقومي قايلاله يصالحك هو بقا لقتيه بيزعق وبيقول كلام يعصب حاولي تهدى اعصابك وهدي الدنيا لغايه مايهدى ودورك انتي بقا جيه اقعدي عاتبي دة جوزك يعني مش حد غريب عاتبيه قوليله واحد اتنين تلاته قوليله كل حاجه ضايقتك واعترفي بغلطك قدامه عادي مش عيب وكل كلامك بهدوء وشويه دلع من بتاعنا دة الدنيا هتبقى فل وقوليله ان انتي وهو بس اللي شايلين بعض محدش تاني هيشيلكوا وانتوا ملكوش غير بعض وعيالكوا مالهمش غيركوا دايما فكريه بالنقطه دي انكم مالكوش غير بعض في الدنيا و عيالكوا فكروا في عيالكوا قبل اي خطوة مابينكم ❤️❤️❤️

لازم تستشير دكتور مخ واعصاب لانك لو فضلت ساكت ممكن لقدر الله يحصلك شلل ..