قلوب حائرة

البقاء لله و الدوام لله واحده ربنا يرحمها ويغفر لها ويسكنها فسيح جناته ويربط على قلبك ويلهمكم الصبر والسلوان على فراقها مقدره شعورك الفراق صعب وعزانا انها دنيا وفانيه والملتقي الجنه يمكن مازلتي بتعاني لأنك مش مستوعبه فقدانها ولأنها توفت امامك خدي وقتك واقتنعي احنا في دار ضيوف فيه وكلنا مفارقين وهما السابقون ونحن الاحقون كل ما تشتاقيلها ادعيلها وربنا يجمعك بيها في الجنه كملي حياتك وعيشي عشان متتعبيش اكتر من كدا ربنا يصبرك ويقويكي

وعليكم السلام ورحمة الله وبركاته اولا أمني إن طبيعي الفتره دي بيمر بيها اي حد واغلبنا يعني اكيد حياتك مش هتبقا كلها مستقيمه وانتي هتكوني على طول نشيطه ومفعمه بالحماس فطبيعي جدا حاله الضعف دي بس اللي مش طبيعي إننا نستسلم ليها فهماني لازم تساعدي نفسك على انها فتره وهتعدي وانتي وشطارتك بقا حابه تطولي فيها ولا هتعملي كل اللي هيطلع بأيدك عشان ترجعي زي ما كنتي وأحسن ولا اي لان محدش هيساعدك لو انتي من جواكي مش عايزه تساعدي نفسك بالنسبه للعرسان نصيبك لسه مجاش دا رزق خالص من ربنا سبحانه وتعالي ربنا يرزقك بالزوج الصالح وبعدين صدقيني النجاح مش شرط يكون إنجاز الناس تتكلم عنه لا احنا كل يوم بنعمل إنجازات من اول ما بنقوم من النوم لاخره حبي نفسك واتقبليها وكوني رحيمه بنفسك متبقيش جلاد ل اخطأك او عثراتك واتقبلي نفسك في كل حالاتك

وعليكم السلام ورحمة الله وبركاته لو مصره حاولي تاني وتالت وفي الاخر هيتقبل اللي عايزاه انا كنت بعمل كدا لاخر فرصه باب التحويل كان مفتوح كنت ببدل بين اللي عايزاه واللي جالي وبإذن الله تجيلك فأطمني اهم حاجه تكوني راجعتي نفسك في اختيارك للكليه بالنسبه للسؤال التاني مش فاهمه قصدك بس هشرحلك بيحصل اي في حاجه اسمها تقليل اغتراب دي للناس اللي جالها الكليه في مكان بعيد فبتعملي التقليل الاغتراب دا عشان يجيبك في محافظتك فهماني يعني مش عشان يحطك انتي في المكان اللي انتي عايزاه لو عندك استفسار تاني انا معاكي

وعليكم السلام ورحمه الله وبركاته بصي ي جميله كل حاجه في الدنيا دي رزق ونصيبك لسه مجاش وبعدين مش بالسن ولا الجمال ولا انا معايا كليه اي انا شايفه كدا وبتكلم من منظوري يعني عدم تأخر الزواج أو لسه محدش اتقدملي رغم مميزاتي وقد ايه انا أيه في الجمال ملهمش علاقه دا رزق خالص من ربنا سبحانه وتعالي بعدين عايزه اقولك متتكسفيش من صحابك وهما بيتكلموا عن اللي جالهم وانتي لا واي يعني جالهم عرسان مش فاهمه عملوا إنجاز يعني هههه بعدين برضو حابه اقولك متستعجليش مش عشان إنتي لسه صغيره لا عشان إنتي بتختاري آب لي عيالك وزوج صالح ليكي بتختاري شريك حياه ولكي مدي إن تتخيلي مده السعاده أو التعاسة اللي هتعشيها بناءا على اختيارك فتأني يعني ميبقاش كل فكرك اني اتزوج وخلاص آخر حاجه حابه اقولهالك ركزي على دراستك خلي اهتماماتك في تطورك واهتمامك لي أولوياتك وحبك لنفسك متخليش حد يهز سلامك بكلامه ولا يحطك في وضع حرج موفقه ي جميله وربنا يرزقك بالزوج الصالح

ليه محاولتش تدخل أكسر خوفك بالتجربة ؟ طيب سيبك من التلات سنين اللي فاتوا ومتفكرش بسلبيه ومين سابقك وكان المفروض تبقا في سنه كام والكلام دا كله حصل خير هدي نفسك وقول دايما قدر الله وما شاء فعل وربنا بإذن الله هيعوضك خير انا هقولك كنت بذاكر ازاي في الثانويه العامه أو اي الطرق اللي ممكن تساعدك اكيد انت بتاخد حصص سجل للمستر الشرح وعيده تاني يعني يبقا مرجع ليك اسمع فديوهات يوتيوب دايما دا هيساعدك على الفهم والحفظ انت ممكن تعبر بطريقتك خصوصا لو انت دفعه التاب اعتقعد انك من دفع التاب زي والبابل شيت والامتحانات امسكيو فمش محتاج انك تحفظ وتكتب تبيكل افهم وعبر كمان الحل الكتير كويس جدا وبيثبت المعلومه وكمان الطريقتين اللي بتقول عليهم كويسين كل دا هيساعدك بص حط قدامك انك ضروري تدخل السنادي لان مش عندك فرص تانيه وافتكر إن الندم على حاجه عملتها احسن بكتير من الندم على حاجه انت معملتهاش وكان ممكن تحاول ومن خوفك أو اسبابك انك مش جاهز ومش حاسس انك مذاكر كويس وكل دا مخليك متحاولش احساسك بعدين هيبقا وحش ومهلك وضميرك هيعذبك وهتحس انك قصرت في حق نفسك عشان كان قدامك حاجه احسن والأسباب اللي منعتك بعدين مش هتلاقيها فاهمني حاول واسعي تاني وافتكر إن محدش بيحاول ويجيب صفر افتكر انك مسؤول عن السعي من حقك تسعي لأنك تستاهل حاجه احسن انت السنادي بإذن الله داخل يعني داخل الإمتحانات قول كدا لنفسك وسيب الباقي على ربنا وبإذن الله هينصرك حافظ على علاقتك بربنا وادعي كتير وربنا يوفقك

خليك في مجالك اولا لأنه أضمن ليك وعشان مضيعش فرصه عمل زي دي عليك ثانيا تدريجيا انت هتعرف تتعامل بأسلوبك وطبعك او هتغير منهم على حسب طبيعه شغلك ومحيطك سيبك من اللي يقولك شخصيتك هاديه مش نافعه فى مجال الإنتاج والجودة احسنلك وكل الكلام دا معتقدش إننا بنختار مجال شغلنا على حسب اطباعنا انت شوية شوية هتعرف تكون الشخصيه اللي هيحتاجها شغلك ومجالك وهتتخلي عن بعض صفاتك زي الهدوء وكدا موفق ربنا معاك

اللهم بارك ربنا يزيدك بجد انت فخر ومثال للشباب اللي في سنك طبيعي وعادي فتره الاكتئاب ما بين وقت للتاني بسبب الضغوط النفسية والروتين اللي بتعمله خصوصا إن حضرتك بتقول كل تركيزك على شغلك حاول تغير يعني تخرج شويا تعمل حاجه بتحبها وصدقني فتره وهترجع احسن بإذن الله طبيعي تضعف وتبقي ضايع كمان ساعد نفسك انك هترجع احسن بمحاولاتك وصبرك متقولش دي النهايه وندمان على تعبك وعمرك اللي ملوش قيمه لا طبعا كل دا ليه قيمه واكيد انت بغير الفتره دي كنت فخور بنفسك واللي وصلتلوا

اي دواء اكتأب لابد من انه يكون تحت إشراف طبيب لان مؤكد ليه أثر جانبي وبعدين يمكن نوع الدواء دا مش مناسب معاكي انتي يعني اللي كانت بتاخده كان مناسب ليها ومع حاله ونسبه وضع الاكتأب اللي بتعاني منه فهماني متأخديش منه لأنك متعرفيش أضراره ليكي انتي اي ولا حالتك في الاكتأب اي عايزه دكتور يشخص ويديكي اللي يناسبك محدش هنا هيفيدك

محدش يقدر يقولك استحملي انتي علي البر والخطوبة فتره تعارف عشان نشوف هنعرف نتأقلم مع بعض ولا لا هعرف اتأقلم مع عيوبه زي ما هيبقا متأقلم مع عيوبي وبنكمل بعض ولا لا كمان بتقولي الحاجه بقيت معاه لوي دراع وانك بتتنازلي كتير وحاسه انك اتهنتي طيب بالله هتكملوا ازاي العلاقه محتاجه تضحيه وتنازل من الإتنين مش منك بس واساس العلاقه الحب والاحترام والتقدير يبقا مقدر اللي بتعمليه واحترامكم لبعض متبادل كمان انتي هتكوني شريكه حياته يعني ياخد رأيك ويشاركك افكاره مش تتناقشوا ويعمل اللي عايزه وبلوي الدراع كمان بصي محدش برضو هيقدر يقولك سبيه انا هقولك راجعي حساباتك لان اختيار واحد غلط بنندم عليه عمر كامل والعكس

بلكيه عشان ميشوفش الاستوري خدي الخطوه دي ومهما ضعفتي عشان تفكيه اقفي لنفسك ومتعمليش كدا الموضوع عايز قرار صادق منك بعدين انتي بتأذي نفسك متعلقه بوهم بيتابع الاستوري أول بأول واي يعني جه صرح بحاجه لا ويمكن فعلا مافيش حاجه وعادي بيتسلي معجب بذوقك في منشوراتك بما انه مقايلش حاجه بصي بلكيه وارمي وراكي انتي معيشه نفسك في وهم وعشان متتعلقيش اكتر مش هقولك انتي فاضيه زي ما قولتي لا هقولك ركزي اكتر علي المليون حاجه اللي شغلاكي ولا كأنه موجود دا بعد طبعا ما تبلكيه وقربي من ربنا وادعي إنه يخرجه من دماغك

بصي بعيدا عن شكلك وحش ولا حلو وانا بأمن إن مافيش مخلوق علي وش الدنيا وحش إلا أن المشكله مش في كدا مش مهم هما شايفينك اي أو ازاي المهم انتي شايفه نفسك ازاي بمعني كوني واثقه في نفسك علي اي حال واي وضع انتي لو شايفه نفسك وحشه ومش واثقه في نفسك مين بعد كدا هيشوفك حلوه فهماني انتي مرآيه نفسك خلي عيونك دايما علي مميزاتك وافتكري دايما مافيش حد مافيهوش عيوب الكمال لله واحده انا دايما بقول اللي بيتنمر عنده نقص بيطلعه على غيره وبالنسبه ل انك بتسألي ممكن اتحب زي البنات هسألك سؤال كان في اعجاب بيني وبين حد مثلا وسابني عشان سناني شكلها مش احسن حاجه دا انا مزعلش عليه بصي الجوهر احسن من الشكل الشكل شكليات سبحان الله ممكن تلاقي واحده في قمه الجمال بس معندهاش قبول فهماني يكفي طيبتك الحنيه صفه آسره بكره هتعملي صحاب بجد ويحبك حد لذاتك ولكونك انتي لأنك تستاهلي

عادي بس اعتقد بعد الكليه هيبقا خاص لأنك فعلا اخده كليه حكوميه فهماني

وعليكم السلام ورحمه الله وبركاته أولا انك تسافري معاه عشان تتجوزوا دا مش حل يعني هتحسي انك عملتي حاجه غلط ويمكن بعدين تندمي دول اهلك برضو وسندك وعشان اكون واضحه محدش هيقول سافرت معاه عشان يتجوزوا الناس هتقول هربت معاه بصي للحته دي من منظور أوسع حتي لو هتقولي وانا مالي ومال الناس هقولك الناس ما بتصدق تتصيد أخطاء الغير حاولي تحلي وتواجهي مش تتهربي وتختاري الحل الأسهل اوصلي لي حل وسط مع اهلك بالنسبه للطلبات التعجيزيه فهميهم إن كدا مش بيضمنولك مستقبل احسن ومش كل دا اللي هيضمنلك حياه سعيده معاه دا هما كدا اللي عايزينه مصلحه اتكلمي معاهم واقنعيهم وفهميهم خليني وراهم لحد ما يوافقوا وبأذن الله خير وهو اتكلمي معاه وخليه يشيل الفكره دي من دماغوا

هو في أهالي لسه بتضرب لا للعنف تحت اي وضع بجد الله يعينك علي اهلك مأجوره بإذن الله باباكي ساكت ليه مافيش اي حد واقفله ليه ايه يعني انه اخوكي الكبير أو في هندسه ملوش الحق يمد ايده عليكي كل اللي اقدر اقوله ليكي اتجنبيهم طالما مش بيعرفوا يطبطبوا اتجنبيهم عشان مينبكيش الاذيه منهم وربنا يهديهم ويصلح حالهم ويحنن قلوبهم عليكي

بعيدا عن ميولك في الزواج وفكره الدراسه والست ملهاش غير بيت جوزها والمطبخ والكلام دا وهقولك رأي واجددلك شغفك تمام الدراسه إلا اني حبيت إنك عارفه الهدف الأساسي في دنيتنا وهي إننا نسعي لدخول الجنه ودا الفوز العظيم وانك وبتسعي لدا وربنا يوفقك ويثبتك بصي ي سته الدراسه مهمه اه طبعا مهمه ومش متفقه انها تفاخر بين الناس مع إن الناس أصبحت تتفاخر بيها وأنا معايا اي ودارسه اي وبنتي كذا وابني كذا وبقيت مظاهر ولكن شايفه إن التعليم مهم للمرأه وللراجل والست خصوصا لأنهم حصرونا في المطبخ والبيت بس لا انا اقدر اكون ناجحه في كل حاجه وعشان نفسي اكون راضيه عن نفسي ومستواي التعليمي وأكون فاهمه في كل حاجه مش من باب الفتي من باب العلم انا قولت في اول كلامي انها ميول واحتياجات في بنات تفضل الحياه الزوجيه مش زغم ذكاءها وعيها وفي بنات شايفه انها تبني مستقبلها وكريرها ويبقالها كيان الأول بعدين الزواج هل دي صح ودي غلط لا طبعا ميول واتجاهات المهم وبما انك حاسه انك ظالمه نفسك وعايزه زقه اقولك واحده بذكاءك وشطارتك ليه متوصلش لهدف هي عايزاه من التعليم وتستغل ذكاءها وتنجح وتطور من نفسها وتفرح اهلها وتعيش المرحله دي ومتفكرش غير في كدا وكل شيء بأوانه

أحيانا بتكون دي ميول لبعض البنات في سن المراهقة عايزه اقولك انك طبيعية مش مريضه نفسيه ولا عقليه طمني نفسك عشان الموضوع ميبقاش عندك عاملك مشكله وقلق كلامك ممكن يكون ميول مؤقته لسن المراهقة أو ممكن تكوني بتشبعي شعور عندك اتكون غلط عن فكره الشباب اللي بيتسلوا بالبنات فبتثبتي لنفسك انك تقدري تعملي كدا بصي دا حرام شرعا يعني حتي لو زي ما بتقولي بتتكلمي معاهم بأحترام إسألي نفسك كدا مستفادة اي باللي بتعمليه اي شعورك بتحسي ب ايه حتي لو كنتي مبسوطه السعاده مؤقته وزايله وبتخسرك حسنات اشغلي وقتك وعقلك صلي وقربي من ربنا انتي جوهره غاليه مترخصيهاش تحت اي ظرف يعني ممكن تكوني شايفه انك بتسلي نفسك لا خالص

التطبيقات فيه ممكن تنزليهم زي ابلكيشن جميلتي و skin care و Home remedies for hair كويسين الي حد ما وهتلاقي كذا ابلكيشنز برضو وبالنسبه لليتيوب معرفش قنوات معينه بس في كذا حد للعنايه الشخصيه على العموم

خوفك طبيعي لدخولك مرحله جديده نصيحه الفكره مش في حاجه سهله ولا حاجه صعبه الفكره في حاجه بنحبها فأبدع فيها أنصحك تشوفي ميولك للكليات المتاحه ليكي بمجموعك وتختاري بناءا علي كدا ومتفكريش بسطحيه بالنسبه ل اختك ربنا يهديها مش عارفه في العاده معاكي كدا ولا خانها التعبير أو غيره اخوات وانصحك كمان تثقي في نفسك وبالتبعيه محدش هيقدر يتنمر عليكي لا في قراراتك ولا في شكلك ولا في اي حاجه طول ما انتي واثقه من نفسك ومن اللي بتعمليه بالنسبه للجامعه اكيد هتعرفي تعملي ناس وتتعارفي اضمنلك دا وعايزة اقولك محدش بيتنمر غير الناقص بيطلع عقده في غيره يعني يخليه في نفسه يستحسن وانتي متاخديش في بالك عشان مدايقيش نفسك

مشاعرنا خارج إرادتنا معتقدش في حل ل اعمل اي في مشاعري برضو مش شايفه إن في حاجه اسمها محدش هيحبني زيه بس لو انتي شايفه كدا ليه مش قادره تحبيه رغم انك حاولتي بصي صارحي نفسك بجد عايزاه هتلاقي نفسك في محاولاتك معاه مش عايزاه خلاص ابعدي واقطعي اي طريقه تواصل معاه كمان عرفيه انك حاولتي تحبيه معرفتيش وملكيش سلطان على قلبك عشان يحاول هو يبعد وينساكي وميتعلقش اكتر من كدا

حط في اعتبارك إن واقعي جدا إن مش كل الناس هتحبك شوف احنا كام مليار على الأرض هل منطقي كل الناس هتحبك انت بأسلوبك هتجبر الكل يحترمك بس استحاله تعرف تجبر الكل يحبك ركز مع اللي بيحبك وحاوط نفسك بيهم والباقي مش مهم وربنا يحبب فيك خلقه

اولا التعافي بياخد وقت ومع مرور الوقت هتنسي انتي بس حاولي تلهي وتشغلي نفسك عشان متديش مساحه لعقلك إنه يفكر فيه ثانيا حد كويس زيه وطور من نفسك ليه مش هيبقا عاوز خطوه رسمي يعني ممكن تكوني بالنسباله صديقه أو حب يساعدك من باب الإعجاب بيكي ممكن تكوني انتي بس اللي حبيته حب من طرف واحد بقولك كدا عشان تراجعي نفسك وتشوفي كان شايفك ازاي وانتي اللي هتعرفي انتي بالنسباله اي ولما تصارحي نفسك هتبقي عايزه تتعافي من العلاقه دي واهم حاجة في التعافي عايزه اقولهالك انه قرار انتي بأيدك تعالجي نفسك بقرار صح وتنفذيه أو تفضلي كدا

وعليكم السلام ورحمة الله وبركاته كنت بقرأ كتاب نفسي كان بيتكلم عن مشكله فقدان الشغف في النص يعني زي مشكلتك راجحها لعوامل نفسيه كتير يعني ممكن تكوني مريتي بتجربه واحشه في الماضي ف أثرت على حاضرك زي خوف النهايات ف اتعلمتي تسيبي الحاجه قبل ما تسيبك زي ما ذكرتي إن اصحابك بتزهقي منهم وبتبعدي ولا كأنك تعرفيهم وقيسي على دا كل اللي ذاكرتيه انتي انا شايفه مشكلتك لعوامل نفسيه وممكن تكون مش بس خوف النهايات القلق والتوتر والخوف من المجهول حاولي تعرفي انتي ليه مش بتحبي تكملي الحاجه للنهايه جربي تتكلمي مع لايف كوتش غيري روتينك جددي شغفك دايما بأي حاجه انتي بتحبيها هتفرق معاكي اوي

قربي منها اكتر شاركيها حاجات تخصك وخدي رأيها عشان تبدأ تثق فيكي وتكلمك عنها شايفه لو انتي واجهتيها ب اللي عرفتيه وخصوصا انه من وراها هتعتربه انك بتشوكي فيها أو مراقباها وممكن تسوء الأوضاع بينكم فحاولي تقربي منها وتصاحبيها لحد ما تيجي هي وتحكيلك ولو معرفتيش واجهيها انتي الكبيره من حقك توجهيها للطريق الصح واسمعي منها واحتويها وفهميها الصح من الغلط وأنها في فتره مراهقه محتاجه اهتمام خاص وبأذن الله تسمعلك وتتحل المشكله

بصي انا هطول معاكي بس هقول كلام كتير من واقع تجربتي وخصوصا اني دفعه 2022 تاني دفعه لنظام الاوبن بوك التاب ترويج للخاص اصلا النظام كله دلوقتي عشان يتيح فرص للمجالات الخاصه والجامعات الأهلية دي نقطه تاني حاجه عايزه اقولك على حته معترف بيها أو مش معترف بيها في الشغل فدي بتاعه ربنا محدش يقدر يضمنلك شغل سواء كنتي في القطاع الخاص أو العام خدي بالك من الحته دي انا هتكلم معاكي عن تجربتي بما إني في القطاع الخاص وأنا اطلاقا مبشكرش فيه ولا بنصح بيه وهقولك ليه انا زي اي حد في سنه مصيريه ومهمه زي دي بتكلم عن 3 ثانوي عملت كل اللي طالع بأيدي اعمله وبذلت اقصي ما عندي في المذاكرة عشان حلمي وأوصل لكليه حكوميه مش عايزه اطول المهم جبت 52% دا قدري ورضيت عشان ربنا يراضيني مش هقولك مزعلتش لا زعلت وجدا ولليوم يعلم ربنا بيكي على النتيجه المهم المجموع دا في ظل النظام دا ميدخلش حاجه غير خاص واكيد مش بعد كل دا هقعد كدا بعد الثانويه العامه منصحش ولا ادعم القطاع الخاص ل أسباب كتيره خليني اقولك الأول إن الثانوية دلوقتي ماشيه بالغش والتزوير في الكنترول خليني اعرفك إن الشاطر بيتمسح بيه الأرض والبليد بيلاقي كليه حكوميه ويدخلها عشان يعاير الشاطر اللي دخل خاص بجد حسبنا الله ونعم الوكيل من كل قلبي على دا نظام ودا حال وأنها ماشيه كدا حاجه قبل ما نسي في دفعتي دخلت نسبه كبيره طب 60% منهم رسبوا عشان داخلين بالسمعات والغش وغيره بعد كل دا لازالت الناس بتدخل الثانوي وهما صح مهما كان النظام هيدخلوا ومحدش هيستغني عنها اكيد لانها الوصول لكل حلم وكمان مستقبل هتقوليلي مستقبل ازاي بعد دا كله هقولك لعل تصادف احلامهم ربنا ميحرمش اي طالب بفرحته بنجاحه وحقه وتعبه وبالنسبالي الثانويه احسن من باقي المجالات ودا مش تقليل من باقي المجالات لا كل واحد وميوله واللي ربنا كاتبهوله بس بفضله بالنسبه للقطاع الخاص اولا الفلوس مشكله كبيره في ظل الاقتصاد الواقع خصوصا اني شايفه بيجبروا الأهالي كمان التعليم مش كويس شايفين حضرتك البنت الفاشله اللي مجبتش مجموع ف انتي بالنسبالهم كتله فلوس مصدر دخل ليس إلا ملهمش دعوه بقا مظلومه مش مظلومه شاطره ولا بليده خليني اتكلم على نظره الناس برضو دي مجبتش مجموع دي باليده ودي ودي ومش هتخلصي رغم اني ماليش دعوه بكلامهم وبحاول اطنش بس برضو بتدايقي آخر حاجه حابه اقولها الثانويه غداره وياما ظلمت ناس على حساب ناس والنظام دا تحديدا

وعليكم السلام ورحمة الله وبركاته بصي اللبس الشرعي أكيد عمره ما هيكون عائق ل اي حاجه كفايه إنك بترضي ربنا سبحانه وتعالى حطي دا في دماغك واللي ربنا رايده هو اللي هيكون بخصوص اللبس في التمريض العسكري هما ليهم زي معين على حسب هما بقا هيسمحولك بلبسك دا ولا لازم اليونيفورم دي نقطه بالنسبه للكشوفات الطبيه فهي إجراء روتيني لضمان سلامتك فقدمي شوفي بما انك مايله ليه اكتر وربنا يكتبلك اللي فيه الخير ليكي بالنسبه ل سياحه وفنادق انا طالبه في سنه 3 السنادي وانا بصراحه مش مختمره بلبس طرح بس معايا بنات مختمرين ولبسهم شرعي ومش عائق ليهم دا في الكليه ولو غرضك في الشغل ف لا برضو مش عائق البنات سألوا وكذا دكتور قال اللبس مش هيقيدك من أداء شغلك أو مهامك اي كانت

شايفه الاتنين بيكملوا بعض ماينفعش اختار حاجه واحده يعني جلال الدين الرومي قال هروبك مما يؤلمك سيؤلمك أكثر لا تهرب تألم حتي تشفي ودا واقعي جدا وبيعلمنا المواجهه ونتألم عشان تتم مرحله الشفاء الهروب مش حل وديما هيرجعنا للصفر فعشان ننسي ونعدي نواجهه كل مخاوفنا ونكون صادقين مع نفسنا عشان نتشافي من الالم ودوستويفسكي قال لا يمكنك أن تشفي في نفس البيئة التي جعلتك مريض غادر ؟ لا أغادر ليه طيب لو حبيت ارجع ل موطني محيطي اللي جعلني مريض مش هعرف ما انا سافرت ليه من الأول ف هنا المفيد اتعالج واشفي في البيئة واواجهه حتي عشان اتحرر ما انا لو غادرت هعاني برضو عشان معالجتش مكمن الوجع

أدبي في اللغات احسنهم الالسن واعلام فيها قسم للترجمة لحد علمي وآداب كمان

بجد انا فخوره بيكي لأنك قويه ومش بتستسلمي وشايفه حلمك وبتسعيله بأذن الله هتوصلي كملي واستمري ربنا يوفقك يارب عايزه اقولك كمان إن احنا ك بنات من حقنا نحلم ويكون لينا كيان مستقل بينا زينا زي الرجاله او زي اي حد من حقنا نختار الحاجه اللي بنحبها وشايفين نفسنا فيها احنا متخلقناش عشان يكون كل دورنا فى الحياه اننا نتزوج ومش شايفه في الدنيا اي حاجه ممكن تعيق طريقك لأنك بنت وحقيقي مافيش حاجه اسمها مستحيل ولا اللي بتطلبيه مستحيل وعادي جدا تعيشي الحياه اللي نفسك فيها موفقه دايما وربنا يكرمك وتوصلي للي عايزاه

الموضوع كبير ومتسكتيش عن حقك والافضل ان اهلك يعرفوا عشان ياخدوا إجراءات قانونيه ضده ودا اقل حاجه شايفه ناس بتقولك متتكلميش واستري على نفسك ازاي وانتي صاحبه حق ؟ نصيحتي ليكي ومن منظوري الشخصي لازم مامتك وباباكي يعرفوا عشان يعرفوا يتصرفوا معاه المجتمع اللي عايشين فيه مش بيرحم حد وبصي لقدام لما تيجي تتجوزي وانتي ساكته ومش عايزه تقولي لحد هيكون اي وضعك بعدين اتكلمي عشان ياخد جزاءه اتكلمي عشان يكون عبره ل امثاله متسبيش حقك

اولا دي حاجه كويسه مش مقلقة ابشري خير إن شاء الله انتي عارفه تفسير السوره من أحب السور اللي قلبي

عفوا

انتي حاسه بالخوف من الفراق وانتي على يقين اللي بتعمليه حرام يمكن عشان كدا حاسه بالخوف رغم أن اهلك عارفين انك بتكلميه احساسك بالذمب اكبر

طيب جربي تتكلمي معاها وتصارحيها خدي قرارك وكلميها متخافيش كله لصالحها

معرفش بصراحه ومافيش حد هنا بيفسر الأحلام لا يعلم الغيب إلا الله ، بس ممكن تبحث في جوجل

حلم دا ولا حقيقي

عفوا وربنا يوفقك

ايوا قدمي في معاهد معتمده لان فعلا في معاهد عشان الفلوس ولا في تعليم ولا حاجه بتبقي جوده التعليم مش اللي هيا

لا عادي بس على حسب المكان ، حتي عشان تطمني في ناس بتأجل الدراسه وبعدين بتكمل وبيبقا سنها اكبر من سن طلاب وطالبات في الجامعه السن بأذن الله مش هيكون عائق ليكي وبعدين هتتخرجي على 22 سنه ولو ناويه تقدمي علي طول فمش حاجه

مشكله العلاقات إننا بنصنفهم اصحاب وهما مجرد محطات عابرة وبعدين بنرجع نشتكي من خذلانهم كوني انتقائية في علاقاتك والثقة اللي راحت مع الوقت هترجعي تثقي في الشخص الصح نص دروسنا بالحياه علي هيئه أشخاص لنتجنب امثالهم هقولك حاجه بقولها لنفسي ما بقول علي شخص خسرته بقول درس واتعلمته بتفرق ولابد من الخساره

بالله حاسه بيكي وفاهمه كويس قساوه الأخ أو الأهل بتكون عامله ازاي ومقدره شعورك قربي من ربنا واشكيله همك وادعيه يفرج كربك واحنا هنا معاكي لو عوزتي حاجه في اي وقت وانا بطلب منك طلب ادعي ل اخوكي ب الهدايه وصلحان الحال متدعيش عليه اصبري واحتسبي أجرك عند الله وبشر الصابرين

عفوا يارب نكون فدناكي

فهماكي ومش عارفه اقولك تجبهالوا ازاي غير بطريقتك اتكلمي معاه وقوليلو علي اللي حساه واعتذري وإن شاء الله هيفهمك

بصي مافيش حد مبيغلطش وانا مقولتش انك ملاك وفي اي علاقه الطرفين فيها بيغلطوا محدش معصوم من الغلط بس انا بقول طول ما انتي حتي بينك وبين نفسك عذراه مش هتساعدي نفسك انك تتعافي من العلاقه

تركزي على حياتك ازاي بأنشغالك انشغلي في اي حاجه بتحبيها تنسيكي ، اكيد هترجعي كويسه وهتعدي الفتره دي

نصيحه بطلي تدوريله على مبررات بما انك قررتي وسؤالك كان عن التعافي فمتخلقيش ليه اعذار عشان تنسي وتعدي

ولو والله صدقيني اللي شاري وعايز بجد مهتفرقش معاه حاجه بصي الغاوي بجد يجي لحبيبه من آخر الدنيا زي ما بيقولوا لو عاوزك بجد كان اثبت أنه شاري ومش هيسيبك لغيره حتي مع قله إمكانياته وظروفه كان جه قرأ فاتحه ربط كلام مع اهلك

واي اللي حاصل دلوقتي متمسكش ليه

طيب دلوقتي مش هو اللي عايز يسيبك ؟ ولعلمك في فتره تعبك حتي لو مش عايزه حد جمبك كان عرف يحتوي النقطه دي وفهم رغبتك احتياجاتك

طيب ودا يتأمن سابك مع أول خلاف وحتي بعد ما حاولتي معاه ، بعيدا عن انك عارفه إن دا حرام واللي بيبدأ بحاجه لا ترضي الله نهايته مش هترضينا بس دا واحد ميتزعلش عليه وربنا مبيعملش فعلا غير الصالح لينا قوي قلبك على فراقه واعرفي انك هتتخطيه طول ما انتي عايزه كدا وهتنسيه لما ربنا يحط في طريقك اللي يستاهلك ويكون حبه وافي ليكي وميتخلاش عنك ربنا يعوضك ويجبر كسر قلبك

تجاهليها هتحرقي دمك واعصابك على أي وممكن هي طبعها كده وعشان انتي مركزه معاها ف شايفه انها بتتعمد تستفزك سلامك النفسي وراحه بالك اهم يعني حتي لو قصدها مضايقتك انتي اتجاهليها أو ممكن تجربي تتكلمي معاها وتفهمي منها ليه بتعمل كدا

معاكي راحت عليها بس في الأول والاخر كل واحد وقدره مكتوبله ولكن سيظل النظام فاشل وظالم

عفوا وربنا يوفقك ويكتبلك اللي فيه الخير يارب

انا مقصدتش حد بعينه وكلامي بناءا على اني شوفت كلمه زي دي وان هي ممكن تعمل كدا وهي صاحبه حق عمتا بعتذر