Ghadeer 🤍

يعني انا مش ملمة تماما بالنقطة دي بس جالي تساؤل يمكن يفيدك .. هو البرنامج ده هيروح لجيش بلدك بس ولا ممكن يقدم لدولة اخرى ؟يعني اقصد لو لبلدك بس وبلدك مش بلد شريرة بتهاجم دول بريئة اعتقد تطويرهم للدفاع عن نفسهم مش غلط .. يعني بيتهيالي لو حددتي دولتك عادلة ولا بتهاجم الاخرين .. وحددتي هل هيتم بيع او تقديم البرنامج لدولة تانية ولا فقط لدولتك .. السؤالين دول ممكن يغيروا نظرتك .. واسفة جدا لو انا فاهمة حاجة غلط او ردي مش سليم بصورة كافية

حاول تركز على ايه اللي انت بتعرف تعمله ودور على شغل فيه .. واستغل الفترة دي اللي مافيهاش شغل ب انك تطور نفسك ومهاراتك .. اتعلم حاجة جديدة .. خلي امكانياتك اعلى على اد ماتقدر حتى لو حاجة بسيطة .. وادعي ربنا يكرمك الارزاق بيد الله بس حاول تسعى صح وتخرج من الحالة دي .. ومعلش مش لازم السنادي لبس العيد عادي جدا ان الظروف تتغير .. فكر ف الاهم دلوقتي ان مش عشان مافيش شغل تكون مالكش لازمة .. ساعد اهلك او حد محتاج اي مساعدة .. وطور نفسك واستعين بالله وحاول تسيطر ع الحالة دي .. ربنا يكتبلك الخير كله يارب .. انت مش فاشل انك تسيب مكان بيستغلك ده صح .. بس كمله بالتطوير والبحث عن الافضل .. وكل حاجة بتاخد شوية وقت

حبيبتي محدش وحش بس ممكن حد مش عارف نقاط قوته فين وازاي يظهر الحلو فيه .. حاولي تهدي وتفكري .. اكتبي ف ورقة ايه حلو فيا وايه عيوب ممكن اشتغل عليها .. شكلا ومضمونا .. شخصيتك كمان مش بس شكلك .. ومالكيش دعوة باختك قوليلها من فضلك كلامك بيئذيني وانا مش متقبلاه .. ومش لازم يكون في كراش عليكي عشان تكوني حلوة مش ده المقياس .. حاليا انتي محتاجة تهتمي بنفسك وتحبيها ووقتها هتفهمي انه مش لازم يكون في كراش .. ولما تحبي نفسك وتعرفي قيمتها الناس هتحبك وتعملك حساب عشان حاسسين بحبك وتقديرك لنفسك .. لازم تهدي وتفصلي وتبدأي تشتغلي على نفسك ياحبيبتي

ركز على اكتشاف شخصيتك مش على ارضاء الناس .. خليك وسط الناس وحبهم وهم هيحبوك حتى لو مكنتوش شبه بعض .. مش لازم نكون شبه بعض اصلا ولا نكون بنحب نفس الحاجات عشان نقدر نقبل ونحب بعض .. هنحب بعض وهنتقبل عشان اخلاقنا واحدة .. ثقافتنا قريبة من بعض .. طيبين وبندعم بعض .. وطبيعي هتلاقي مع الوقت ناس شبهك .. حاول تعرف نفسك وتختار طباع ومبادىء نضيفة وطيبة لنفسك .. اعرف هواياتك .. بتحب ايه وتكره ايه .. اكتشف ف نفسك ايه هي ردود افعالك وصفاتك .. وطور نفسك .. حول مجهودك من ارضاء الناس لتطوير نفسك .. انت لسه صغير ولسه شخصيتك بتتكون .. تجاهل الناس ورايهم .. اوعى تستمر ف انك تكون مش نفسك عشان ترضي حد .. ماتدمرش نفسك .. ومهما كنت مختلف طالما مبادئك نضيفة وانسان صالح وطيب اوعى تخاف او تتخض او تغير نفسك .. صدقني تميزك ف اختلافك .. حتى لو مافيش حد شايفه غيرك .. كل ماهتطور نفسك ثقتك هتزيد وكل ماتكبر باذن الله هتفهم الدنيا ونفسك .. ماتضغطش نفسك انت عارف ان لسه شخصيتك بتتكون .. خد وقتك وحب نفسك وخليك رؤوف بيها .. مشاعرك دي انك مش كفاية ممكن تكون من مواقف او مشاكل ف التربية وانت اصغر .. حاول ماتخليهاش تسيطر عليك اوي اد ماتقدر من غير ماتقسى على نفسك .. اي وقت تحتاج حاجة انا موجودة لو حبيت .. انا اكبر يعني ممكن اكون زي مامتك او اختك الكبيرة

ربنا يخليك لبنتك ويخليها ليك يارب .. طبيعي يكون عندك الشعور ده عشان مالكوش غير بعض .. بس طبعا ربنا كبير وموجود .. بس بيتهيألي أحسن لو حاولت يكون ليك دايرة معارف واصحاب صالحين ومع الوقت باذن الله هتقدر تقيمهم وتعرف مين فيهم صالح انه يكون امين على بنتك وعليك ف اي ظرف .. ربنا يبعد عنكوا اي شر .. بس احسن سيب الست دي عشان بالوضع اللي بتحكيه انت وبنتك هتدمروا .. اجل اي فرص جواز فترة لحد ما نفسيتك ونفسية بنتك تستقر وربنا باذن الله هيكرمك بواحدة صالحة تراعيك وتراعي بنتك وتكونوا خير ليها يارب .. البنت لسه صغيرة اوي ربنا يحميها يارب ويصلحها .. انا عارفة ان الوضع حساس وعندي نفس المخاوف اللي عندك تجاه والدتي واختي .. عشان كده حاسسة كلامك وفهماه .. موجودين كلنا لو احتجت اي معلومة تساعدك مع بنوتك

العفو ربنا يكتبلك كل الخير يارب

العفو على ايه 💚🌷 .. شكرا جدا لذوقك .. يارب ينتهي الاحساس ده ف اقرب وقت 🌷

العفو ياحبيبتي على ايه .. ربنا يفرح قلبك يارب 🩷🌷🫂😘

ياقلبي انتي انا موجودة اي وقت تحتاجي اي حاجة 🌷🩷 يارب ياحبييتي انا وانتي يارب ويوهبلك الزوج الصالح اللي يكون محل ثقة ويصونك ويعوضك بكل الخير يارب 🌷🩷 .. انا بحبك اكتر ياحبيبتي اوي اوي 🩷🌷😘 طمنيني عليكي كل ماتقدري واعتبريني اختك 🫂

الحمد لله .. ربنا يثبتك ويحميكي يارب .. استمري ع الاستخارة وماتفتحيش اي باب لاي حد غير رسمي وبحدود .. الذئاب البشرية بثوا اكتر من الطيبين .. حاولي قدر المستطاع تمشي بمثل امشي عدل يحتار عدوك فيك .. يمعنى ان كل ماتمشي ع الصح اكتر هتقفلي عليهم فرص انهم يلاقولك مداخل ياحبيبتي .. ومش قصدي خالص انك مش ماشية صح بالعكس انتي طالما اتضايقتي ورفضتي ده معناه انك كويسة ماشاء الله .. هو بس المثل عشان اوصلك المعنى منه مش اكتر 🩷

موضوع الرفض ده لازم تشتغلي عليه .. ده له علاقة بالتربية للاسف .. للزم تكسريه لان ده من اكبر الاسباب اللي ممكن تخسرك حياتك .. بخصوص العرسان ماتثقي بس خدي بالاسباب وخلي المواقف تثبتلك .. انا اسفة لو ماانتبهتش لكلمة توضح بس انا مش عارفة لو انتي مسلمة استخيري كتير على اي حد وتوكلي على الله وخدي بالاسباب .. وحتى لو الامر تيسر وبعد كده باظ لحكمة او درس يعلمه الله .. بس وقتها هتكوني ع الاقل مش حاسسة بالذنب .. ولو مش مسلمة استشيري اهلك او حد كبير بيعجبك رايه او اسمعي وشوفي ڤيديوهات تساعدك تقييمي الناس وخليكي برضو ف كل الاحوال ياحبييتي حذرة .. وحتي لو مسلمة مع الاستخارة ذودي وعيك وخبرتك النت مليان حااجات مفيدة تطورك

فاهماكي وحاسسة بيكي .. وبيحصلنا كلنا صدمة ف حد وثقنا بيه بعد كل التراست ايشوز اللي عندنا .. انا نفسي حاصلي كده حاليا وسيبت خطيبي بعد ماوثقت فيه وانا لا اثق ف حد اصلا وخذلني .. وحاسسة زيك بندم اني وثقت فيه .. هو مكنش نفس سبب مشكلتك بس اللي اقصده اني حاسة بيكي جدا .. حاولي ماتركزيش ع الشعور ده .. خليكي حذرة واتعلمي .. وحاولي تبعدي عن العلاقات اللي مش رسمية .. وحتى لو اتخطبتي حافظي على حدودك .. في رجالة بتخطب عشان الحاجات دي وتسيب الواحدة بعد كده .. واتعلمي ان الثقة مكتسبة مش هبة بنقدمها .. يعني اثق فيك لما تثبت انك تستحق ده مرة واتنين وتلاتة والف .. وبرضو خدي حذرك

كويس جدعة .. مش غلطك انك كنتي صادقة وطيبة .. بس لازم يعلمك .. يعلمك ماتثقيش بسهولة وماتبرريش اعوجاج سلوك حد .. لو مااتعلمتيش من التجربة هيكون ده الغلط وقتها ياحبييتي

سامحي نفسك وانتي من ده اتعلمتي .. وخلي ندمك يتحول لرفض تام لكلامك معاه بدل ماتجلدي نفسك

على فكرة هو بيحسسك بالذنب عشان تفضلي تحت سيطرته .. لكن هو فعلا وحش دي كلمة قليلة عليه .. هو وسخ انا اسفة .. فوقي ياقلبي لنفسك وماتتناقشي معاه عشان هيضحك عليكي تاني

الله يسلمك من كل شر ياحبيبتي .. ابتزاز صريح وخداع عشان يثبتك .. ابعدي عنه نمطه معروف ومفضوح .. انتي يمكن لسه صغيرة او لسه بريئة ماتعرفيش اد ايه الناس خبيثة ووحشة .. ارجوكي احمي نفسك منه هيجرك لاكتر من كده وهيفضل يخدعك ويطاردك .. والله العظيم لو بيحبك عمره ماهيعمل كده .. ابعدي عنه نهائي ارجوكي ده شخص مش شريف ياحبييتي ..

اوعي تكلميه تاني ده شخص مش محترم وبيستغلك .. وده نمط معروف جدا من الصنف ده بيضغط بيه عليكي عشان تخضعي له .. انهي علاقتك بيه تماما لان ده استغلال جنسي صريح وابتزاز عاطفي نفسي غير محترم وغير شريف .. واوعي تقولي ع النوع ده طيب واصل انا ضايقته اوعي تقعي ف الفخ ده .. واوعي تسحلي دماغك بسؤال ليه في ناس كده عشان سؤال مالوش لازمة ياحبييتي .. الناس دي كتير اوي وعمر طيبتك ماهتخلي الاشرار طيبين معاكي .. في مقولة كده بتقول ما معناه ان مش عشان الغزالة نباتية يبقى الاسد هيقدرها ومش هياكلها .. واوعي تعاتبي ولا تناقشي عشان هيسحبك لدايرته الملعونة دي تاني .. ربنا يعافيكي ويحميكي من كل شر يارب

عارفة الاحساس ده .. بيتهيالي فكرة انك تفضل تتواصل معاهم بسلام من وقت لاخر بدون انتظار مقابل ده عشان ماتخسرهم .. ومش طول الوقت عشان هيزود احساسك انك مش مقبول وانك بتستناهم .. بس بخصوص احساسك والغصة دي قصة تانية .. يعني بعتقد انه تحط جواك قناعة انك خلاص مش مستني منهم القرب ده حتى وانت بتتواصل معاهم .. عشان توقف الانتظار منهم .. وتبدأ تملا حياتك بتفاصيل تخليك مشغول اكتر حتى لو هتتعلم حاجة جديدة .. عشان ماتتسحلش ف شعورك ده وتخرج منه شوية .. وحاول تحب الوقت اللي بتكون فيه مع نفسك .. حب صُحبتك لنفسك .. وابدا بعدها اعرف ناس جديدة معارف واسعة .. مش دايرة صغيرة تحط فيها العشم كله تاني .. لحد ماتوصل لمعرفة مين فعلا حابب يكون قريب منك وتقدر وقتها تعتبره ف دايرتك القريبة

صدقني حالة العبث والسوء اللي واصل ليها الجيل ده ابعد واسوء من كده بكتير .. وبعتقد ان بعيدا عن ان في اسباب كتير اوي لكن السبب الاكبر هو التربية من الاهل للاسف

حبيبتي بعيد الشر عنك من شعور الوحدة .. حاسسة بيكي وبحس زيك كده .. انا موجودة لو حبيتي 🩷 .. الضغوط اللي انتي فيها واحساسك انك لوحدك فيها بيزود الشعور ده .. حاولي تدعي رينا يرفع عنك الضغط ده ويصلح حالك .. وزي ما قولتلك لو حبيتي انا موجودة .. وفي طرق كتير نتعرف بيها على ناس بس المهم تتاكدي الاول كويس اوي انهم مجال للثقة .. عشان ماتتعرضي لضغط نفسي اكبر لو لا قدر الله اتصدمتي ف حد

شكرا ذكية لذوقك 🌷

اسال محامين فعلا وحاول يكون ليك معارف طيبين وثقة عشان يساعدوك ف الاطفال رينا يحميهم .. بس يكونوا ثقة اوي عشان الاولاد مايتئذوش من حد .. ربنا يخليك ليهم

حبيبتي عندي نفس مشكلتك .. ده وسواس قهري وبيكون جزء منه وراثي وجزء بسبب مشاكل الطفولة واضطرابتها النفسية بسبب التربية الغلط .. والوسواس اوقات بيكون من القرين لانه بيحب يخلينا زعلانين .. حاولي تداومي ع الصلاة واذكار الصباح والمساء بعد الفجر مباشرة وبعد العصر مباشرة .. وحاولي تفكري ف حاجة تانية اول ما تجيلك الافكار دي مع الاستعاذة من الشيطان .. وشغلي رقية القرين من النت بتهدي الوسواس .. وحاولي تقرأي سورة الناس ١٠٠ مرة صباحا ومساءا .. واستعيذي بالله من الشيطان .. اقري الفاتحة ٧ مرات والمعوذاتين والصمد واية الكرسي على مياه الشرب .. واقري عليها اعوذ يكلمات الله التامات من شر ماخلق .. و بسم الله الذي لا يضر مع اسمه شيء في الارض ولا في السماء وهو السميع العليم .. والله العظيم ده كلام شيوخ مش كلامي ومافيهوش اي حاجة حرام ولا فيه طقوس غريبة .. بس اهم حاجة المداومة وربنا يشفيكي ويعافيكي ويبعد عنك اي شر وحزن ووساوس يارب ويفرح قلبك ويطول عمرك وعمر اهلك كلهم يارب