بيتر متي

بص ياخويا احنا شباب زي بعض ف هتكلم معاك ب المفهوميه .. اولا زي ما اخويا اللي قبلي قال ماينفعش تبطل عاده لكن ينفع تستبدل عاده ب عاده .. يعني مينفعش تطلع الهوا من الكوبايه من غير ماتحط ميه .. ده اولا .. ثانيا العاده دي بالذات لازم ليها محفزات يا اما مخيله خصبه حبتين يا اما فيديوهات يا اما صور و هكذا .. احب اقولك ان اللي في الافلام مش واقعي اطلاقا وحتي الممثلين و المخرجين بتوع الحاجات دي عارفين ده ف ده اولا احنا بيتاكل بعقلنا حلاوه ياخويا ف معتقدش انت ترضي ب ده اننا نبقي متغفلين كده .. ولو جربت تشوف فيديو منهم من باب الفضول كده اللي هو ماتركزش غير اللي هو ده حقيقي ولا لا هتفهم قصدي ايه هتلاقي هجص .. و نفس الكلام ينطبق علي الصور علي فكره بالمناسبه بتوع الانستا و بتوع الحاجات دي ده شغلهم بيعملو كده عشان يعملو فلوس بس يعني برضه الموضوع نفسه مش هدفهم ده وسيله لكسب الفلوس علي قفا البشوات اللي بيشوفو .. المخيله دي بقي اللي صعبه شويه اولا اي واحده ف حياتك هي اختك لحد لما تبقي فينا بعد مراتك .. ثانيا اي حاجه في المخيله هي تخيل يعني وهم يعني بلح ف مالهاش لازمه اساسا غير انها بتشيل الواحد ذنوب ع الفاضي و نتايج ماترضيش ربنا ف الاخر .. ثالثا لو الموضوع مش ب ايدك ده عشان اللي بتشوفه فكلنا في كل الديانات مطالبين بغض البصر يعني برضه مالناش مبرر .. خلاص لو وصلنا اننا مش عارفين نبطل تفكير خالض افضل اتعب ف نفسك لحد لما تبقي خلاص مش قادر لازم تنام و افضل اعمل كده لحد لما تنساها .. بالاضافه طبعا انك تدخل ربنا شويه معاك ده اساسي .. و عارف اني طولت بس اخر حاجه انت راجل دلوقتي يعني المفروض تفكر فكر الكبار انت عايز واحده تشيلك و تحبك و تحببك ف نفسك و تقضي معاك سعاده و موده و حب و رحمه و ترفع راسك وسط اهلك و وسط الناس بدون ماتكون اوفر في لبسها او طريقتها .. متربيه من الاخر يعني .. الموضوع اياه ده هيبقي ليه معني تاني في الجواز حتي لو مش بالطريقه اللي متخيلها بس هيبقي مع شخص انت بتحبه ف مهما كان قليل اوي اوي هيكون مرضي ليك اكتر من اي حاجه تانيه

بص هو زي ما اخويا عمر قالك انك تركز علي نفسك لو انت حاسس انك لسه مش جاهز ماديا لكن من اللي انا شايفه انت جاهز ماديا لكن مش جاهز نفسيا .. في حاجات لازم نآمن انها بتيجي كده من عند ربنا و رزق زي الشغل مثلا ده بتاع ربنا في حد ممكن يوصل في سن صغير و ياخد وقت طويل عشان يبقي اللي هو عايزه و في حد ممكن يبدأ بعده بسنتين لكن يوصل اسرع لهدفه كلها بتاعت ربنا و كلها بالتوفيق لانك ممكن تجرب شغل و التاني و التالت و ماترتاحش عادي لحد لما تلاقي اللي هترتاح فيه .. ده شئ مسلم بيه و علي نفس النمط الارتباط و الجواز يأتي بعده .. لازم هتعدي بعلاقه هادمه وبعدها علاقه عاديه ماحركتكش و بعدها علاقه حركتك لكن محصلش نصيب بشكل ما وبعدها ممكن واحده تاني ماتحرككش وهكذا لحد لما تيجي اللي ربنا كتبهالك و هتعكمل معاك للنهايه .. وعلي فكره زي ما سهم الشغل و الطاقه بتاعتك مش ديما ف الطالع يعني ممكن يوم طالع يومين نازل اربعه طالع اسبوع نازل العلاقات كده برضه .. اهدي بس و حط ديما احتمال لكل حاجه و الاهم انك تبقي عارف ان كل حاجه بتحصل ربنا هو اللي عايزها و مكتوبالك من قبل ماتتولد .. ماتخافش و اتحرك في حياتك وربنا هيرشدك للخير ليك

بصي انا بشمهندس شغال java backend developer .. ماعلينا من ايه هو ده بس الفكره انك عايزه تتعلمي ايه بالظبط في البرمجه او تراك ايه بالظبط عشان كل حاجه ليها طريق معين تمشي فيه .. في frontend و في backend و في android development و في ios development و في cross platform development .. ايه بالظبط اللي عايزه تدرسيه او تكملي فيه ؟؟

بصي عايزك تخلي حاجه قدامك ديما .. محدش بيتعلم ببلاش .. دي من اكتر الجمل الواقعيه اللي سمعتها في حياتي .. الدرس قاسي لكن لازم افهمه صح يعني مابقاش اتقرصت جامد و ماتعلمتش المغزي من الدرس برضه و فهمته غلط .. الدرس هو الحرص .. الحرص العادي مش الزايد عن اللزوم عشان مايقلبش ب عقده .. طبيعي تقابلي ناس قذرة ف الدنيا .. و لسه هتقابلي كتير علي فكره ف تأهبي .. الفكره بقي انك تبقي حريصه و تتقبلي الصدمات علي الاقل اكتر من دلوقتي و حطي ديما احتمال ان ممكن مايحصلش .. صدقيني ده هيحميكي من صدمات كتير و ان حصل هتبقي متوقعاها ف هتبقي اخف في المفعول .. تلخصيا افضل شئ انك تكوني ديما كويسه مع الكل مع وضع الاعتبار انهم ممكن يبقو مش كويسين او بمعني اخر حرص ولا تخون .. لو علي الحب انا عارف انها كسره جامده انا شخصيا مريت ب حاجه زي كده و عارف انها مش بسيطه لكن لازم تعديها و تكملي لان مفيش سبيل تاني و انتي لو قعدتي بينك و بين نفسك هتعرفي انك تستحقي احسن بكتير ف ماتديهوش اكبر من حجمه لو سمحتي .. هو مشي ياريت ياخد كل حاجه معاه حتي الزعل عليه او بسببه

بصي هو مفيش حاجه تستاهل تخليكي توصلي للوضع ده .. تكرهي نفسك ده معناه انك حد مش راضي عن نفسه و ده شئ كويس نسبيا علي فكره يديكي دافع انك تتغيري للافضل .. لو فيكي عيوب كلها قابله للتصحيح .. اولا لو انتي فيكي عيب صحي عادي انا شخصيا عندي كذا مرض مزمن وانا ٢٤ سنه انا كمان علي فكره و مع ذلك بشد حيلي و بحاول افيد نفسي صحيا قدر الامكان .. بالمناسبه شفت اللي ف سننا و اللي فاقد بصره و اللي فاقد عضو عنده و عايشين في سلام مش عندي انا شخصيا .. لو مشكلتك شكليه ف كل واحد جميل بشكل مختلف حقيقي في حد تحبي تتكلمي معاه ف حاجه و نفس الشخص تكرهي تتكلمي معاه ف حاجه تانيه عادي جدا .. لو مشكلتك سلوكيه انك مش بتعرفي تتعاملي مع الغير دي قابله للتعلم كلها .. لحد اخر يوم ف عمرنا هنفضل نتعلم ف مش عيب انك تتعلمي ازاي تتعاملي و ازاي تفرحي نفسك و غيرك و تكوني مريحه في التعامل .. لكن الاهم تكوني مرتاحه انتي و متقبله ان مش كل الناس هيحبوكي لان حتي الانبياء جم الارض و مش كل الناس حبتهم ف ماتتوقعيش انك هترضي الكل او تتحبي من الكل المهم تكوني مرتاحه و حاسه برضا و ده مش هييجي غير بالتعلم .. و حاولي تقري كتب عن الموضوعات دي هتستفادي

الموضوع محتاج تفكير حبه يعني مثلا انت عارف انها بتحبك هل في سبب فعلا يستاهل انك تسيبها .. لو قي سبب و قابل للتعديل اتكلم معاها و طالما بتحبك هتحاول تعمل ده عشانك .. لو عشان ظروف احكيلها برضه و اتناقش معاها .. يعني ملخص كلامي حاول اكتر تشوف حلول قبل ما تقرر انك تقفل الموضوع و تفكر تقفله ازاي لان موضوع انها تعمل حاجه ف نفسها عشان بتحبك ده بيبين كمية حب كبيره و ده مش بتلاقيه كل يوم

ربنا يقف معاك و بأذن الله تعدي المحنه دي و كل حاجه هتبقي بخير

true caller