احييكي اولا، انا بالمناسبة طالب ازهري، وحاليا في كلية الصيدلة في تالتة ثانوي مأخدتش دروس خالص، لكي ان تتخيلي ذلك، والسبب اني كنت عاوز اوفر وقت للمذاكرة وفرت وقت، وكنت بلتزم احيانا وملتزمش احيانا، وكنت بلجأ لليوتيوب وزملائي لما مش بفهم حاجة، بس كنت مجتهد وبساعد غيري برضو وربنا كرمني الحمد لله اللي عاوز اقوله، امتحانات الازهر بتيجي من الكتاب، ولو حليتي 4-5 امتحانات في كل مادة على الاقل هتجيبي مجموع كويس، المهم الدقة ف الاجابة لأن احيانا بتتحسب حاجات غلط لفروق بسيطة جدا، ف خلي بالك من دقة الاجابة، ويا حبذا لو زي اللي مكتوب ف الكتاب بالظبط لو قسم علمي: المواد العلمية ذاكريها من كتب خارجية، او حاولي تظبطي مواعيد دروسك في 3-4 ايام في الاسبوع بس، وسيبي يومين تلاتة ع من غير دروس عشان تقدري تجمعي الرياضيات: كتاب الوزارة اكثر من كافي، ولو تابعتي حد يشرح مسائل كتاب الوزارة هيكفي ونصف، الامتحان بييجي منه بالارقام، واحيانا من الامثلة المحلولة كمان، ولو تأسستي كويس في رياضات 2 ثانوي (خصوصا التفاضل والتكامل) هتلاقي منهج تالتة بسيط (الديناميكا مش صعبة، ولكن مسائلها طويلة فقط) المواد الشرعية والعربية تقدري تخلصيها بدري، وكل يوم تراجعي اجزاء منها مثلا، وكمان انتي ف تانية ثانوي، عندك فرصة تجربي اكتر من طريقة مذاكرة واللي تلاقيها مناسبة معاكي استخدميها، لان عقولنا مختلفة وتفضيلاتنا مختلفة ربنا يكون في عونك، ويحققلك اللي بتتمنيه، ويجعل مرادك وفق قدره، واتمنى اكون افدتك
تم النشر الأربعاء، ١١ سبتمبر ٢٠٢٤
لعرض الملف الشخصي في فدني اضغط هنا