فاطمة مصطفى

معذرة في السؤال بس هو الطفل الطبيعي عند حضرتك هو اللي بيخاف من أمه جدًا؟ يعني بنتك كانت طبيعية لما كانت تخاف منك جدًا والبنت الصغيرة بتقلدها رغم إنها بتخاف منك جدًا ده غريب بصراحة.. المشكلة هنا مش في الأطفال حضرتك عندك إشكالية في طريقة التعامل معاهم وده اللي وصل بنتك لكده لما انتي بعدتي عنها آسفة لو كلامي شديد بس اللي لاحظته إن بنتك الكبيرة لما انتي انشغلتي عنها حست بالأمان لأن مصدر خوفها بعد فبقت تعمل اللي هي عايزاه + بالإضافة إن العاطفة اللي هي محتاجاها منك قلت برده بسبب شغلك فشوفي هتعوضيها ازاي وهتحلي مشكلة الخوف منك ازاي برده.

حاجة معطلة حياتك زي ما بتقولي وانتي مش قادرة تحليها لوحدك ابحثي عن مساعدة مختص مفهاش مشكلة خالص .. ربنا يقدرك لك الخير حيثما كان اللهم آمين.

مشاعرك حقيقة والحقائق مينفعش نبعدها أو نتجاهلها زي الطفل الصغير اللي بيعيط لو تجاهلتيه هيعيط أكتر فمشاعرك لو تجاهلتيها هتتراكم وتتعبك انتي أكتر تقبلي مشاعرك وحاولي تعملي حاجة تخفف عنك اتكلمي مع حد عن أفكارك أو اكتبي كل حاجة شوفي ازاي تقدري تخففي حدة مشاعرك الفترة الجاية بحيث مش تعطلك عن المذاكرة بس مهم تتقبليها وتعبري عنها عشانك قبل كل شئ.

جزانا وإياكِ يارب❤️

ترجعي تاني ازاي لياسمين القديمة مش هترجعي انتي هترجعي ياسمين محتلفة بعد الابتلاء اللي مريتي بيه في الثانوية فيه مفاهيم هتتغير عندك وثوابت هتتبني وده دورك ابني نفسك من تاني أول خطوة إنك ترفقي بنفسك وتسمحي لنفسك بالحزن على اللي فات وانتي راضية الحزن مش عكس الرضا خالص طبيعي نحزن بس بنجمد ربنا وبنكون متيقنين إن ربنا قدر لنا الخير بعد كده تعرفي ربنا اقرأي عن أسماء الله الحسنى كتاب هنيئا لمن عرف ربه لدكتور خالد أبو شادي رائع وكتاب لأنك الله كمان وتاني شئ تعرفي طبيعة قلبك اسمعي أو اقرأي عن طب القلوب والباقي هيجي بالتدريج.. هتصدقيني لو قلت لك إن ثباتك في المحنة ديه هيخليكي تستشعري لطف ربنا بيكي ومعيته أدام وهتلاقي المنحة في وسط المحنة ربنا ينور بصيرتك ويجبرك جبرًا يليق بكرمه اللهم آمين.

بالنسبة للثانوية العامة خليكي عارفة إن انتي عليكي السعي وليس عليكي النتيجة وإنه أي كانت النتيجة فهي أكيد الخير ليكي احنا مش بنعبد ربنا ونصلي وندعي عشان يستجيب لينا في المقابل ولو دعاءنا مش استجاب يبقى ربنا مش سامعنا لأ خالص احنا بنعبده لأننا محتاجين نعبده ولأننا الفقراء إليه سبحانه وهو القوي واللي ربنا يقدره هو الخير ده لسان حال المؤمن إن أمره كله له خير فإن أصابه خير شكر وإن أصابه شر صبر فكان خير له والشر من نظرتنا كبشر هو خير لينا بحكمة ربنا سبحانه وتعالى..

ازيك يا ياسمين قرأت كلامك ووصلي كل حرف كتبتيه .. عايزة أفكرك إن القلب متقلب مش ثابت على حال واحد عشان كده كان من أكثر دعاء الرسول صلى الله عليه وسلم ( اللهم يا مقلب القلوب ثبت قلبي على دينك) وكان بيدعي بكده للصحابة كمان على الرغم من درجة إيمانهم وثباتهم إلا إن الرسول صلى الله عليه وسلم أوصاهم بالدعاء ده فالوصية ديه في حقنا أولى مش كده بفكرك بكده عشان مش تيأسي من نفسك ومش تبطلي دعاء ..