Manar Elgebaly

فكرة الحيرة اللى انت فيها دى بداية الصح لأنك لو غلط تماما مش هتحتار ولا هتفكر يبقا الحل انك تفضل تحاول كل محاولاتك انك تكون كويس او تقرب من ربنا دى بتتحسبلك بس الشيطان دايما هيفهمك انها مش هتغير حاجه وانك هتفضل كدا لا طبعا توب وابتدى اول حاجه تعملها تظبط صلاتك ابتدى بنيه جديده اتعلم من جديد مش غلط شوف فيديوهات تعليم الوضوء والصلاه بطريقه صح انا فاهمه انك اكيد عارف تصلى ازاي بس تأكيد ليك وعشان تطمن انك صح حاول تصلى قيام ليل ابتدى اقرا الاذكار وابعد عن الاغانى هتلاقى نفسك بتطمن بالتدريج وهتلاقى نفسك بتعمل عباده ورا التانيه

ممكن تبص للجانب الاجابى هى لسه موجوده طمنها ايوه صعب لانها وثقت فيك اكتر من مره بس حاول وعافر لغاية ماتثق فيك تانى وافتكر ان عندك بيبى فى كل مره هتضعف فيها افتكر ان انت سند لطفلك انت قدوته لسه فيه وقت والاهم منهم عشان ربنا قرب منه اكتر وادعى من قلبك يتوب عليك ويهديك باذن الله هتقدر بس ماتستسلمش لليأس لان دا من شيطانك انت هتكون افضل وهتعافر شجع نفسك دايما واشغل وقتك عشان ماتفكرش

لو صليتى استخارة ومرتاحه اقعدى معاه كمان مره حاولى تاخدى بالك من طريقة تفكيره وكلامه وشوفى علاقته بربنا وبأهله لو كل دا تمام توكلى على الله ربنا مش هيضرك بجد انتى لما يحصل نصيب وهتحبيه مش هتشوفى عيوبه الشكليه تماما فى الوقت دا لو الشخص هيتقى ربنا فيكى ويكون حنين وراجل وجدع ويخليكى مستقرة ماديا خلاص انتى مش محتاجة حاجة تانية

اشغلى دماغك و وقتك باللى ينفعك طول ماانتى فاضيه هتفكرى فيه لو مش هتقدرى تنزلى شغل يبقا جربى تاخدى كورسات اونلاين اسسى نفسك فى اي حاجه انتى حاباها لغة او برمجة او حتى اي شغلانه ممكن تتعمليها اونلاين ممكن تتعلمى الخياطة المهم ماتسبيش نفسك للوقت والافكار تاكلك واستعينى بالله واظبى على صلاتك واذكارك واستغلى اننا داخلين على شهر مبارك احنا محتاجين وقت فوق الوقت عشان نعمل عبادتنا بشكل صح وربنا يصلحلك حالك ويعوضك بالاصلح

اشغل وقتك خلى يومك دايما مليان حاجات تعملها ابتدى اعمل رياضه . طبيعى لما يكون عندك وقت فاضى دماغك تستغلك وهتفضل تفكر وحاول لو تقدر تخلى صلاتك دايما فى المسجد ولو فاضى اقعد فى تجمعات وباذن الله ربنا هيقدرك حط قدامك هدف وهو انك عاوز تبعد عشان رضا ربنا ولأن دا ذنب كبير

انت محتاج تسيب كل حاجه فتره خد بريك وارجع كمل خلى اعتمادك الاول على نفسك جرب تدى وقت لنفسك يعنى اهتم بنفسك كأنك صديقك المفضل شوف ايه اللى ممكن تقدمهوله وقدمه لنفسك انت مثلا علطول بتشوف عيوبك بس وتقلل منها جرب تعمل العكس انت اكيد عندك مميزات كتيره بس انت حاطط قدامها العيوب دايما انت تستحق تشوف نفسك كويس اكتب كل افكارك الحلوه والوحشه وغير روتين يومك ابتدى انزل چيم ماتعتمدش على وجود حد فى حياتك وخصص يوم كة فتره تخرج فيه لوحدك تعمل الحاجات اللى بتحبها

على حسب انتى مرتاحه فى شغلك دا بعيدا عن الشخص دا يعنى. طب لو سيبتى الشغل فى بديل كويس له. ولو فضلتى فى الشغل انتى هتقدرى تكملى. اسئلى نفسك الاسىلة دى وبناءا عليها هتعرفى انتى عاوزه تعملى ايه. بس اوعى تضيعى حاجه كويسه من ايدك بسبب شخص مش كويس الناس تتعوض انما انتى ومصلحتك لا

اختارى نفسك وابعدى بصى انتى فى الحالتين موجوعه لو فضلتى معاه هتتوجعى لانه بيحب غيرك ولو بعدتى عنه موجوعه لانك بتحبيه خلاص اختارى الوجع اللى فيه كرامتك الحب بيقوى مابيضعفش وعلاقتك بيه مش هتعمل حاجه غير انها ترهقك وتخليى دماغك دايما مش رحماكى سبيه ووكلى امرك لله واستغفرى كتير لانه ممكن ربنا يكون بيحبك فبيديكى اشاره تبعدى عن الحاجه الحرام فابعدى وربنا هيعوضك باللى يقدرك ويحسسك انك كفايه