بصي يا حبيبتي هقولك حاجة..انا عارفة ان ساعات احنا كبنات بنحب نلاقي الحب ده وبنبقى نفسنا فيه ولكن هقولك حاجة..الحب ده مجرد حاجة وقتية يعني زي الطفل بظبط اللي مصمم على لعبة او حاجة حلوة..هو ليه رغبة في الحاجة دي بس اول ما تيجي وتبقى هيقعد شوية وبعدين ممكن يتصرف فيها غلط يإما يُكثر منها فيطلع مبذر ويخلص فلوس اهله على الفاضي يإما يفضل بياكل الحاجة الحلوة لحد ما يتضر ويجيله السكر ..كل ده ليه؟ لإنه مجرد دلوقتي محتاج حاجة ونفسه عايزاها ولكن بدون تفكير وبدون عمل حسابات لأثر هذا الموضوع..الله عز وجل خلق فينا غرائز معينة وفي نفس الوقت حط لينا شرع حكيم وخلق فينا ارادة وقرار وعقل. والانسان في الدنيا دايما مختبر يإما بالخير يإما بالشر وكمان الإنسان بيختبر في مشاعره دي والمؤمن بجد هو اللي يبعد نفسه عن الحرام ويسيطر على حاجته وشهوته لإنه يعلم ان الله حرّم ذلك وابدله بالحلال ألا وهو الزواج..فرأيي انك دلوقتي تسألي الله عز وجل الإعانة انه يعفك ويرزقك زوج صالح ويرزقك غض البصر ويملئ قلبك بالنور والإيمان وحب الله ورسوله صلى الله عليه وسلم..حاولي تشغلي نفسك بالتقرب إلى الله وانك تنمي نفسك دينياً وعلمياً ومهنياً وثقافياً وانك تقفلي اي باب بيوصلك بعلاقة الحب دي تاني..حاولي تتدبري القرآن وتعملي لنفسك ورد قراءة يومياً وتتعلمي علم شرعي وتنمي نفسك في مجال دراستك او عملك او اي مجال فريلانس حلال بتحبيه او اي شغل او موهبة حلال عندك نمّيها واشغلي وقتك بما ينفعك مع الدعاء بإن الله عز وجل يرزقك الزوج الصالح التقي النقي الذي يعينك على حسن عبادة الله وحده وعلى طاعة رسول الله صلى الله عليه وسلم وتعينوا بعض على امور الدنيا والآخرة حتى تدخلوا الجنة بسلام بإذن الله. حاجة كمان عايزة اقولهالك يا حبيبتي ان احنا جايين الدنيا دي لعبادة الله رب العالمين وهنسيبها فجأة في لحظة..يعني الموت مبيستأذنش وربنا عز وجل قال { وَمَا خَلَقْتُ الْجِنَّ وَالْإِنْسَ إِلَّا لِيَعْبُدُونِ } [سُورَةُ الذَّارِيَاتِ: ٥٦] بواسطة تطبيق وحي: https://onelink.to/wahy وربنا هيسألنا كلنا عن عمرنا عملنا فيه ايه وشبابنا ابليناه في ايه وصحتنا وفلوسنا جبناها منين وصرفناها فين فدايماً كوني مستعدة للقاء الله وتوبي واستغفري الله واسألي الله الهداية لإن الحب في خارج اطار الزواج محرم فنصيحتي ليكي يا حبيبتي بصي قدامك وحواليكي وشوفي..كام بنت شابة ماتت فجأة والله اعلم هي في الجنة ولا النار دلوقتي..كام بنت ماتت وهي بتكلم شباب..بصي حواليكي وتأملي في الدنيا والسموات والسحاب والمخلوقات وتدبري القرآن حتى وإن آية يومياً وقرّبي من ربنا واسألي الله العافية والمعافاة في الدنيا والآخرة والتوبة النصوح والهدى والتقى والعفاف والغنى والثبات والمغفرة والرحمة وقولي اللهم يا مقلب القلوب ثبت قلبي على دينك وساعتها هتكتشفي ان كل الفتن دي طريق من الشيطان وآخرته مش كويسة وهتعرفي حاجات كتير.. ايوه من حقنا نستمتع بالدنيا بس بالطريقة اللي ربنا وخالقنا شرعها لنا..لإن احنا سايبين الدنيا دي فجأة وهنروح لدار تانية خالص يإما تبقى في نعيم يإما تبقى في عذاب.. نسأل الله العافية. ربنا يصلح حالنا جميعاً ويتوب علينا ويرزقك العفاف والزوج الصالح وكل خير في الدنيا والآخرة.
تم النشر الاثنين، ١٤ يوليو ٢٠٢٥
لا إله إلا الله..محمد رسول الله التوحيد واتباع رسول الله صلى الله عليه وسلم .. ان توحد الله وتخلص له في عبوديتك له سبحانه وتعالى اعتقاداً بالقلب وقولاً باللسان وعملاً بالجوارح وان هذا العمل يكون خالص لله رب العالمين وحده لا شريك له ويكون كما فعله رسول الله صلى الله عليه وسلم فهذا يعني اتباع رسول الله صلى الله عليه وسلم والصحابة الكرام رضي الله عنهم وارضاهم.
تم النشر الاثنين، ١٤ يوليو ٢٠٢٥
التوحيد الخالص لله تعالى والإخلاص لله واتباع رسول الله صلى الله عليه وسلم والصحابة رضي الله عنهم
تم النشر الاثنين، ١٤ يوليو ٢٠٢٥
لعرض الملف الشخصي في فدني اضغط هنا