هقولك أكتر من طريقة مجربه واختار اللي تعجبك ولو منفعتش جرب غيرها.. 1- هتطبق يوم كامل وتهلك نفسك فيه شغل وتنام الساعة 10 ف تصحى الفجر .. وطبعا مش من اول مره بس بالتعود هتظبط. 2- هتظبط منبه الساعة 4 ونص ومن بعده كل 5 دقايق يرن تاني لحد ما تصحى .. وتجرب بىامج للمنبهات زي alarmy مثلا هيحددلك تاسك معين تعمله عشان المنبه يطفي.. وطبعا متخليش المنبه جنب ايدك عشتن هتطفيه وتنام على طول خليه بعيد شويه بعحيث تقوم من مكانك .. وتفضل طول اليوم شاغل نفسك عشان متنامش وتيجي على 10 تنام. 3- كل يوم هتصحى بدري عن اليوم اللي قبله نص ساعه لحد ما توصل للمعاد اللي انت عايزه.
تم النشر الأربعاء، ٢١ ديسمبر ٢٠٢٢
طبيعي نخاف من الموت.. مش لما بيبقى عندنا امتحان بنبقى خايفين؟ عادي لأنه حاجه مبهمه بالنسبالنا ومش عارفين بعدها ايه. خلينا نشوف الموضوع من البداية .. في الاصل الحياة الأبدية هتبتدي بعد ما نموت يعني هنا هنعيش مثلا 50 ولا 100 سنة بالكتير وهنعيش هناك على طول بدون نهاية .. جربتي قبل كده تسكني ف سكن مغتربات أو سكن جامعي؟ هتلاقي كل حاجه بشروط بس اللي بيصبرنا إنها فترة وهتعدي، ونرجع نعيش ف بيتنا براحتنا بدون قيود صح؟ اهو فكره زيها كده لو فكرنا ف الجنة ونعيمها هنبقى متشوقين ليها وهنبذل قصارى جهدنا عشان نوصلها وساعتها الموت بالنسبالنا هيكون مجرد بوابة من هنا لهناك. طيب هل الكلام ده المفروض انه يخليكي مش خايفه من الموت؟ لأ مش ضروري أبداً لكن اللي عايزه اوصلهولك ان المشكلة مش ف الموت زي ما المشكلة مش ف الامتحان .. المشكلة ف تفكيرنا احنا ورؤيتنا للموت .. كل فكرة هتجيلك عن الموت هتبحثي عنها وتعرفي أكتر عن اجابة للسؤال ده عشان تشيليه من دماغك. ازاي هتبقي ف القبر لوحدك؟ لا مش لازم تبقى لوحدك .. عملك الصالح هيونسك بدليل (ثبت عن النبي صلى الله عليه وسلم أنه قال عن العبد المؤمن إذا وضع في قبره، وفرغت الملائكة من سؤاله: وَيَأْتِيهِ رَجُلٌ حَسَنُ الْوَجْهِ، حَسَنُ الثِّيَابِ، طَيِّبُ الرِّيحِ، فَيَقُولُ: أَبْشِرْ بِالَّذِي يَسُرُّكَ، هَذَا يَوْمُكَ الَّذِي كُنْتُ تُوعَدُ، فَيَقُولُ: وَمَنْ أَنْتَ؟ فَوَجْهُكَ الْوَجْهُ الَّذِي يَجِيءُ بِالْخَيْرِ، فَيَقُولُ: أَنَا عَمَلُكَ الصَّالِحُ) خايفه تخسري حد حواليكي؟ اتفقنا فوق إن احنا بنموت عشان نروح حياتنا الأبدية اللي هناك .. ف وفاة الناس من حولنا يزعلنا على فقدانهم اه شويه بس بيخلينا نفتكرهم بالخير ونتصدق عنهم عشان يكونوا ف مكان أفضل وعشان ربنا يسخرلنا اللي يعملنا اعمال صالحه بعد وفاتنا .. وفي الاخر كلها كام سمة ونتقابل كلنا ف حياتنا الأبدية. خايفه تكبري عشان متموتيش؟ ايه علاقة الموت بالسن! فكري فيها هتلاقي الموت أجل ومكتوب سواء عند الولادة أو بعدسنه أو اتنين او حتى 100 ف عادي ملوش علاقة بالسن.. وكل ما بنكبر بيبقى عندنا فرصة أكبر نزود حسناتنا .. في رواية في أيام الرسول إن صحابي شاف منام إن في صحابي متوفي داخل الجنة اسرع من صحابي تاني متوفي برضو بس مات شهيد .. فسأل الرسول ازاي والرسول قاله ان الصحابي ده مات عادي مش شهيد اه لكن عاش اكتر من الشهيد سنه كان بيصلي فيها ويصوم رمضان .. ف تخيلي ده كان سبب انه يدخل الجنة اسرع من الشهيد. اللي تخافي منه اعرفيه .. مشكلتنا مع الخوف انه بيبقى معاه جهل .. ف لو شيلنا الجهل عننا وعرفنا اكتر عن اللي مخوفنا هنتطمن أو على الاقل هنهدى شوية.
تم النشر الأربعاء، ٢١ ديسمبر ٢٠٢٢
بتعملي ايه ف يومك؟ ايه الجديد أو التغيير في السنة دي مخليها صعبه عليكي ؟
تم النشر الأربعاء، ٢١ ديسمبر ٢٠٢٢
طب ايه حصل في 2020؟؟ والوضع الحالي مضايقك في ايه؟ يعني شخصيتك دلوقتي مش عجباكي وحابه نفسك الاول ولا حاجه تانيه؟
تم النشر الأربعاء، ٢١ ديسمبر ٢٠٢٢
ده برنامج حلو جداً هتلاقي عليه اللي انت عايزه وزيادة .. https://play.google.com/store/apps/details?id=com.newpro.amr.myapplication
تم النشر الأربعاء، ٢١ ديسمبر ٢٠٢٢
أهلا بيك ي مختار.. مين بالظبط اللي بيكرهك وليه شايف انه بيكرهك؟
تم النشر الثلاثاء، ٢٠ ديسمبر ٢٠٢٢
امنعي الفاست فود والحلويات وخليهم مره كل اسبوعين مثلا ومش بكمية كبيره. قللي النشويات في اكلك زي الرز والمكرونة والعيش والمخبوزات وزودي سلطه وخضار. لما تيجي تاكلي اشربي مايه وبعدها ب10 دقايق أو ربع ساعه ابدأي بالخضار وبعدين البروتين ثم باقي الاكل. اشربي مايه كتير طول اليوم. اتمشي 3 ايام ف الاسبوع على الاقل. متستنيش نتيجه فوريه .. اي تغيير بياخد وقت ف اصبري على نفسك ومتكرهيش نفسك في شكلك الحالي.
تم النشر الثلاثاء، ٢٠ ديسمبر ٢٠٢٢
نسبة الازواج اللي عندهم مشاكل في الانجاب بصورة طبيعيه مش قليله ف متقلقيش نفسك.. حاولي تفكري ف الموضوع من جميع الجوانب .. كده كده محدش بياخد كل حاجه ومفيش شخص كامل . اعرفي وضعه الصحي كويس واسألي دكتور واتنين واعرفي اكتر عن نسبة الشفاء وعن بدائل زي الحقن المجهري واطفال الانابيب وهكذا. ممكن برضو تفكري في تبني طفل اذا لم يتم شفاءه لا قدر الله. اذا كانت مناسبة ليكم خلاص توكلي على الله وشوفوا العلاج هيوصل لفين وهيبقى عندكم أكتر من حل بإذن الله المهم التراضي والاتفاق بينكم وتكونوا متفاهمين وواعين. ولا تنسي الاستخارة طبعا قبل كل خطوة. ربنا ييسرلك الخير ويرزقك بشخص مناسب.
تم النشر الثلاثاء، ٢٠ ديسمبر ٢٠٢٢
ممكن توصفيلي بتحسي بايه عشان كده بتقولي هلاوس سمعية وبصريه؟ وايه علاقة ده بالنوم؟ لما بتتجاهلي اللي بيحصل بتحسي بايه؟
تم النشر الثلاثاء، ٢٠ ديسمبر ٢٠٢٢
هقولك كام خطوة تحاول تلتزم بيهم وتساعد نفسك: 1- اعرف ايه الاسباب اللي وجهتك للتصرفات دي .. لو فراغ؟ اشغل وقتك .. لو هروب من مشكلة؟ واجهها .. لو بتثبت لنفسك بيها حاجه معينه؟ شاركنا بيها ونحاول نساعدك .. لو اي سبب تاني حاول تحله ولو معرفتش توجهه لحد يساعدك في حله .. وطبعا فدني موجود لو موصلتش لحل. 2- (استثمر ذنبك) .. بمعنى كل ما تعمل خطوه تجاه الذنب ده .. على طول تعمل طاعه زي انك تصلي قيام ليل .. تطلع صدقة .. تستغفر 1000 مره .. وهكذا. 3- ادخل على اللينك ده واتبع الخطوات اللي فيه https://youtu.be/2xl3jyhlFNM . 4- دعوة ثابته في الصلاة وبين الاذان والاقامة وعند المطر وفي كل اوقات الاستجابة (اللهم اغنني بحلالك عن حرامك واغنني بفضلك عمن سواك)... اي دعاء تاني شايف انك محتاج استجابته وهيعينك اعمل كده مش شرط الصيغة دي. 5- استغفر طول ما انت مش بتتكلم. 6- اسعى في الزواج ولو مفيش مقدرة حالياً صوم وتلعب رياضه. لقيت نفسك مش قادر تعمل الخطوات دي وبتواجهه صعوبه شديده ف انك تتغلب على ده لوحدك توجه لمنصة واعي على الفيس او التليجرام او الاسك او اي منصة تانيه .. وان شاء الله تلاقي الافادة والتوجيه والمعونه منهم.
تم النشر الثلاثاء، ٢٠ ديسمبر ٢٠٢٢
جدعه إنك بتحاولي تساعدي نفسك👏🏻 ممكن تزوري معالج نفسي في أقرب وقت ولو مش عارفه مكان ممكن تقوليلي منطقتك واقولك اقرب اماكن ليكي.
تم النشر الثلاثاء، ٢٠ ديسمبر ٢٠٢٢
خلينا نقسم السؤال لجزئين جزء معاملة أهلك معاكي وجزء تدخلهم في تربية طفلك... بالنسبة لمعاملتهم معاكي هل هم طول الوقت بيعاملوكي وحش ولا في وقت معين مثلا؟ لو ده على طول ف اتكلمي مع اللي بيعاملك كده لوحدكم وجه لوجهه واسأليها ليه بتعاملك كده وشوفي لو في سبب مضايقها منك مثلا أو مشكلة حلوها سوا ولو مفيش سبب وده بيحصل تلقائي فوضحيلها إنك بتضايقي وانك بتحبيها وعايزة علاقتهم تكون كويسه ومش عايزة تشيلي منها واكيد انتي ادرى بالطريقة المناسبة اللي تتكلمي بيها لكن المهم تكون بدون خناق .. بهدوء عشان منكبرش المشكلة. لو ده بيحصل بناءاً على موقف معين مثلا ف هتتكلمي مع اللي بتعمل كده وتوضحيلها برضو انك بتضايقي وقولتيلها عشان تاخد بالها وتبقى علاقتكم احسن. بالنسبة لتدخلهم في تربيتك لابنك فأول حاجه متزعقيش لابنك قدامهم ولا تعاقبيه لإن ده مش صح .. طبيعي الاطفال مش بيكونوا ملتزمين وهم عند قرايبهم زي ما بيكونوا ف البيت وطبيعي يعملوا تصرفات مش بيعملوها ف العادي .. ف كبري دماغك خالص ومش وقته زعيق قدامهم عشانك وعشانه وعشان علاقتكم .. نيجي بقى لنقطة تانيه .. لو هم بيتدخلوا في كل حاجه ليها علاقة بابنك ف قوليللهم يتكلموا معاكي بس مش قدام الاولاد.. ولما يتكلموا معاكي في حاجه اما تتناقشي معاهم فيها وفي الاخر كل واحد له رأيه إما اسمعي الكلام منهم ومتركزيش فيه من ناحية تبقى مكسرتيش بخاطرهم وعلاقتكم كويسه ومن ناحيه الكلام بينكم وبين بعض وانتي حره مع ابنك ف بيتكم. مهم تقرأي وتعرفي طرق مختلفة للتربية عشان تربي ابنك كويس وعشان تبقى تعرفي تردي على أي حد يعدل عليكي ويقولك اعملي ومتعمليش وتتناقشي معاه وانتي واثقه من كلامك.
تم النشر الاثنين، ١٩ ديسمبر ٢٠٢٢
وعليكم السلام ورحمة الله وبركاته بدايةً الله يرحم والدتك ويصبرك ويقويكي. حاولي تسترجعي المواقف اللي بتتعاملي فيها مع أطفال وقوليلي بتحسي بايه؟ وليه ربكتي بين التعامل مع الاطفال وبين وفاة والدتك والحادثة؟
تم النشر الاثنين، ١٩ ديسمبر ٢٠٢٢
انت/ي واثق/ه ف نفسك عشان كده مبيهونش عليك/ي تزعل/ي حد .. بنسبة كبيرة جداً الشخص اللي بيبقى سهل أنه يأذي اللي حواليه بيبقى جواه ما يكفي من المشاعر السلبيه عن نفسه وبيطلع ده في اللي حواليه .. ف الحقيقة دي ناس تستحق الشفقة ميتزعلش عليهم خالص. طبعا ده مش معناه إننا كل من هب ودب يزعلنا ويضايقنا .. مهم نشوف لما بيحصل موقف بنزعل منه ليه؟ هل الشخص فعلا مؤذي؟ ولا الموقف كان وحش اصلا ككل؟ ولا في. سوء تفاهم؟ ولا حنا حساسين بزيادة وبناخد كل كلمة على أعصابنا؟ طيب بعد ما نعرف نحدد ده هنبقى كدن حددنا المشكلة فين.. لو المشكلة فينا؟ نحاول نشوف أسبابها ونتصالح معاها. لو المشكلة في الطرف التاني؟ هنشوف اذا كان في شخص بعينه هو اللي بيأذينا يبقى نتعامل معاه سواء نخرجه من حياتنا أو لو مينفعش نخرجه نشوف ايه الطريقة المناسبة اللي نتعامل معاه بيها بحيث نقلل الخساير على الأقل. ممكن تحدد/ي المشكلة فين واساعدك نشوفلها حل.
تم النشر الاثنين، ١٩ ديسمبر ٢٠٢٢
وعليكم السلام ورحمة الله وبركاته أهلا بيك.. ممكن توضح أكتر تقصد ايه بالكآبه ومأثره عليك ازاي؟
تم النشر الاثنين، ١٩ ديسمبر ٢٠٢٢
اكشفي مخ وأعصاب عشان يعملك الفحوصات اللازمة وتطمني على نفسك
تم النشر الاثنين، ١٩ ديسمبر ٢٠٢٢
مستواكي قل في الدراسة ده معناه إنك في الاصل ساطرة والاصل غلاب متقلقيش.. ممكن يكون في حاجه مأثره عليكي أو في مشكلة واجهتك الفترة الاخيرة سواء في الدراسة أو غيرها؟ ممكن توضحيلي أكتر احاول اساعدك. في حد بيقولك انتي وحيده ومينفعش تعيشي؟ طب من امتى بيقولك كده؟ وبتسمعي الصوت ازاي؟
تم النشر الاثنين، ١٩ ديسمبر ٢٠٢٢
ربنا أراد لك الخير بالبعد عنه .. لا قدر الله كانت حياتك هتبقى عامله ازاي لو عيشتي معاهم وهو بيضربك بالطريقة دي من وانتي في السن ده .. الحمد لله إن ربنا قدر ليكي المعيشة مع جدتك ويحفظهالك من كل سوء. مقدرة قلقك وخوفك لو فقدتي جدتك الله يبارك في عمرها .. لكن تأكدي إن ربنا هيسخرلك اللي يراعيكي وتقدري تعيشي معاه .. خلينا نفكر ف ايه ممكن تعمليه لمستقبلك سواء في وجود جدتك أو فقدانها لقدر الله وسواء من بعدها قعدتي مع حد كويس أو لأ. سنك مناسب جداً إنك تشتغلي سواء في مكان قريب مع حد موثوق عشان جدتك متقلقش عليكي أو تشتغلي اون لاين بأي مهارة تقدري تتعلميها .. الشغل هيخليكي تتعاملي مع ناس أكتر ويبني شخصيتك ويطور منها .. وكمان هيأمنلك الجانب المالي بشكل مناسب عشان تقدري تحوشي منه ومن الفلوس اللي أهبك بيدوهالك .. وكل ما تجمعي مبلغ اشتري بيهم حاجه دهب مثلا عشان تحفظي قيمتهم. حاولي تحسني علاقتك بوالدتك ووالدك على قد ما تقدري .. خلي في بينكم معاملهووثقة وأمان عشان لما تيجي تاخدي قرار ف حياتك قدام متلاقيش معارضات كتير أو بمعنى أصح بأقل الخساير. ركزي في دراستك وقوي نفسك في مجالك ده هيساعدك تلاقي شغل أفضل في مجالك وهيساعدك تطوري من قدراتك العقلية ويبقى عندك حلفية ثقافيه كويسه .. لو خلصتي دراسة أو مش مهتمه بمجال دراستك ممكن تقرأي اكتر عن مجالات العمل اونلاين زي التسويق والبرمجة وكتابة المحتوى وغيرهم .. واتعلمي حاجه منهم وطوري نفسك فيها من ناحية يساعدك في الشغل ومن ناحية تقوي شخصيتك وتطوريها. متنسيش تدعي ربنا دايما أنه يطمن قلبك ويبارك في عمر جدتك وصحتها وميضيعكيش أبداً في وجودها أو من بعدها
تم النشر الاثنين، ١٩ ديسمبر ٢٠٢٢
على طول مشتت؟ تقصد إنك وراك كذا حاجه ومشتت بينهم ولا تقصد ان تفكيرك مشتت؟ اوصفلي اكتر. بتفكر في حاجات مش عايز تعملها.. هنمسك الفكرة ونتناقش فيها مع نفسنا بهدوء تطلع ايجابيات الفكرة وسلبياتها والمكاسب والخساير.. وفي الاخر هتوصل لقرار اما دي فكرة كويسه فعملها أو مش كويسه ف هبعد عنها وفي الحالتين تخلي الاسباب في دماغك عشان كل ما الفكرة ما تجيلك تفكر نفسك بأسباب قرارك تجاها وتنفذه على طول.. تكرار الافكار السلبية ممكن نتعامل معاه بإننا نتجاهله أو لو احنا ف موقف بيسهل تكرار الفكرة دي نغير الموقف ونبعد عنه قدر الامكان.. نستعيذ بالله .. نفكر في فكرة تانيه حلوه تشغلنا. العصبية ليها اسباب كتير.. لو ده حاصل فجأة ممكن توضحلنا الاسباب أو الاوقات اللي بتتعصب فيها ونحاول نحلها. معزول عن الناس اللي هم صحابك مثلا واخد منهم موقف؟ ولا تقصد ايه بمعزول عن الناس؟ طبيعي تاخد موقف من اللي بيضايقك أو بيأذيك ليه شايف إن دي مشكلة؟
تم النشر الأحد، ١٨ ديسمبر ٢٠٢٢
الشغف والحماس بيبقوا زي الشعله اللي نبدأ بيها أي حاجه هنعملها .. بيختفوا لما تدخل في الحاجه وتتعمق فيها وتبدأ تقابلك عواقب وضغوطات تأثر عليك .. المهم ف الوقت ده إنك تلزم نفسك بالحاجه اللي بتعملها وتستمر ومع الوقت هتبقى مستمتع بانجازاتك وهتقدر تكمل . المهم دلوقتي انك تلتزم وتستمر.. كل حد فينا بيلتزم بطريقة معينه زي التشجيع / انك تكافئ نفسك كل ما تنجز حاجه معينة/ انك تدفع فلوس في كورس مثلا ف بالتالي هتلتزم بيه/ ان يبقى معاك حد وفي تنافس بينكم/ انك تعرف حد معين مهم بالنسبالك وتخاف يعرف انك بطلت مثلا تعمل الحاجه دي ف يزعل منك .. وهكذا . جرب وشوف انت ايه اللي بيخليك ملتزم بأي حاجه وتكمل فيها واشتغل عليها. في جميع الاحوال طبيعي اننا نقع يوم او اتنين .. المهم الفترة دي متطولش ونرجع نكمل تاني ف اقرب وقت. طبيعي يبقى في عقبات تقابلك ف اللي بتعمله او ضغوط من بره تخليك متكملش .. لكن كل ما حاولنا نتعامل مع العقبة دي بشكل اسرع واحنا مكملين او لو وقعنا يوم ولا يومين مش مشكلة .. خليك متصالح مع الفكرة دي. اي محاولة مكتملتش او منجحناش فيها بالطريقة اللي عايزنها بنكون اتعلمنا منها حاجه او فهمنا منها ف مفيش مشكلة ابداً من ان ده يحصل وحتى لو اتكرر عادي طالما بنتعلم وبنكتسب خبرة وبنفهم اكتر. ربنا يوفقك.
تم النشر الأحد، ١٨ ديسمبر ٢٠٢٢
عشرين سنة صغيرة ما شاء الله .. متشغليش نفسك بفكرة الزواج قد ما تشغلي نفسك بإنك تطوري ضخصيتك وتعرفي نفسك أكتر وتصلحي من عيوب شخصيتك .. خليكي واثقه إن نصيبك لما يجيلك هتطمنيله وترتاحيله وهتتقبلي فكرة إنك تسيبي أهلك وتأسسي بيتك معاه عادي. الاطفال اللي بيعامله أهاليهم وحش جزء كبير جداً منهم بيبقى بسبب تربية أهلهم ليهم.. ف لما تكون الأم صالحة وشخصيتها كويسه وتدرس تربية كويس هتعرف تستعين بالله وتربي ولادها وتحسن معاملتهم عشان يبقوا طريق ليها تدخل بيه الجنة .. مش مطلوب منك خالص تعممي فكرة الثقة في الشباب وتشغلي بالك بازاي هكون زوجة .. لما يتقدملك حد هتقعدي معاه وتتعرفي عليه وتعرفي شخصيته وتصلي استخارة .. لقيتي نفسك مرتاحه ومتقبلاه شكل وشخصية هتعملي خطوبة تتعرفي عليه أكتر وتشوفيه مناسب ليكي ولا لأ وتثقي فيه من معاملته ليكي والمواقف بينكم. أهم حاجه تشغلي بيها نفسك دلوقتي إنك تصلحي من نفسك لإن (الطيبون للطيبات) وطول ما انتي كويسه يبقى هيجيلك الكويس وربنا هيبعتلك نصيبك ورزقك المناسب ليكي في الوقت المناسب.
تم النشر الأحد، ١٨ ديسمبر ٢٠٢٢
ليه شايفه إنها بتغير منك؟ وبتراقبك ازاي؟ ممكن توضحي أكتر ونحاول نساعدك.
تم النشر الأحد، ١٨ ديسمبر ٢٠٢٢
وعليكم السلام ورحمة الله وبركاته.. التسرع ليه أشكال كتير بس بما إنك بتقول في كل حاجه ف اعتقد تقصد انك انك متسرع في قراراتك في حياتك بشكل عام .. هقولك كام حاجه لو قدرت تعملهم هتبقى أفضل. 1- كل يوم هنقعد لوحدنا كده نقفل عينيا مش نغمض جامد لأ خلي اعصابك مسترخيه .. هتاخد نفس من بطنك بتركيز وهتعد على ايدك تاخد النفس في 4 ثواني وتكتمه ثانيتين وتفرغ النفس في 4 ثواني بهدوء.. ممكن في الاول يكون صعب بس هتلاقي تمارين للطريقة دي يوتيوب هتفيدك.. هنكرر الخطوات دي مرتين على الاقل ف اليوم ولما تكون متعصب أو مضغوط أو حاسس بأي انفعالات زيادة. 2- اشغل لسانك دايماً بالذكر والقران سواء سماع أو قراءة .. (ألا بذكر الله تطمئن القلوب). 3- هنأهل نفسنا (وده بالتعود وهياخد وقت شويه بس كل ما تصبر كل ما هتعرف تعمل ده كويس) إنك تسمع كويس اللي قدامك وبعدين تفكر في كلامه وبعدين ترد.. هيتهيألك إن ده هياخد وقت وإن ازاي يعني اللي قدامي يتكلم وانا اسكت شويه وبعدين أرد بس ده مش حقيقي اللي قدامك مش هيلحق ياخد باله من الوقت لإنه هيكون مقدار إنك تاخد نفس عميق كده. 4- لو أي حاجه حسيتها مش واضحه من كلام اللي قدامك (تجنباً لسوء التفاهم) هنسأل اللي قدامنا انت تقصد كذا؟ أو بأي طريقة تانيه المهم نفهم الاول قصده من الكلام ومنصدرش أحكام وناخد رد فعل مباشرة. 5- لو في حاجه هتاخد فيها قرار هتطلب من الشخص التاني مهلة تفكر كويس حسب الموقف ممكن 10 دقايق وممكن يوم أو أكتر حسب القرار اللي هتاخده.. وده مش عيب أبداً ولا هيسببلك مشكلة بالعكس ممكن التسرع يسببلك مشكلة أكبر. 6- افصل مشاعرك عن أي قرار هتاخده .. متاخدش قرار وانت متضايق ولا وانت مبسوط.. استنى لما نشاعرك تهدى وبعدين خد القرار .. ابعد عن القرارات اللحظية. 7- لما تيجي تاخد أي قرار احسب مميزاته وعيوبه ومكاسبه وخسايره ووازن القرار صح واعرف عواقبه ايه وايه أسوء سيناريو ممكن يحصل عشان تتوقع هتتعاما معاه ازاي. 8- أخر حاجه وأهم حاجه إنك تدعي دايما ربنا يرزقك الصبر والحكمة والتأني في أمورك كلها. بتمنى أكون أفدتك ولو في حاجه مش واضحه ممكن تقولي.
تم النشر السبت، ١٧ ديسمبر ٢٠٢٢
الدعم النفسي مهم لينا كلنا وبيساعدنا تكون حياتنا أفضل أكيد .. لكن عدم وجوده مش معناه أبداً إننا مش هنقدر نعمل حاجه أو ملناش قيمة. اتعرفي على نفسك أكتر وقدريها واعرفي نقاط قوتك وعززيها وكبريها واعرفي نقاط ضعفك واشتغلي على تحسينها سواء لوحدك أو بمساعدة متخصص.. عشان وقت ما تحتاجي دعم تلاقي نقاط قوتك أول مصدر ليه وأول عكاز تسندي عليه.. طبيعي حياتنا يكون فيها ناس بناخد منهم دعم لكن احنا مش بنعتمد عليهم ... ومش بنستنى الدعم من حد معين بصورة معينه عشان ده معناه انك ربطتي حياتك بالشخص ده وسيباه هو يقرر بدلا عنك.. حياتك في أيدك انتي وتحت سلطتك انتي ولو مفيش حد بيديكي دعم خالص ف انتي لوحدك تقدري تقفي على رجلك وتكملي حياتك ممكن يكون فيه بعض النواقص اه لكن حياتنا مش بتقف أبداً. اذا كنتِ بتواجهي مشكلة في ده ف انصحك تزوري متخصص نفسي يساعدك.
تم النشر السبت، ١٧ ديسمبر ٢٠٢٢
الوسواس القهري مرض زي الضغط مثلا.. لا ينفع تتجهله ولا تطنش دواه ولا تقصر ف المتابعة مع طبيبك.. لأن الخسران الوحيد هو المريض نفسه واللي حواليه. لو عندك أعراض شايف إنها وسواس قهري ممكن تزور طبيب في أقرب وقت وتتابع معاه أو تشاركنا بتحس بايه ونحاول نقدملك المساعدة اللازمة قدر المستطاع.
تم النشر السبت، ١٧ ديسمبر ٢٠٢٢
الاول قبل ما تلاقيها اتعرف على نفسك الاول .. اعرف طباعك الحلوه والوحشه وراقب نفسك وتصرفاتك وحسن من نفسك عشان تكون شخص أفضل مما انت عليه دلوقتي .. وده عشانك انت مش عشان حد خالص. ادعي ربنا يرزقك الزوجة الصالحة وييسرلك أمورك اللي تقدر تتزوج بيها سواء المادية أو المعنوية زي ما قلنا فوق في نقطة الصفات. كون فكره عن المواصفات اللي انت عايزها ف شريكة حياتك .. مش الشريكة المثالية لأ .. الشريكة المناسبة ليك انت. لما تلاقي بنت فيها مواصفات من اللي انت عايزها .. اتقدم لها وابدأ اتعرف عليها وشوف اذا كانت مناسبه ليك ولا لأ بعيداً عن المشاعر.. يعني بتعرفوا تتكلموا .. بينكم حاجات مشتركة.. متفاهمين في اختلافكم.. متقبلين بعض باختلافاتكم وعيوبكم ومشاكلكم. وأهم حاجه تواظب على صلاة الاستخارة عشان تتطمن إنك مع الشخص المناسب ولو مش مناسب ربنا هيظهره ليك. بتمنالك التوفيق.
تم النشر السبت، ١٧ ديسمبر ٢٠٢٢
دايماً مرهقه وتعبانه وقلقانه؟ طب في سبب لده بدني أو نفسي؟ ممكن تقرأي كتاب أول مره أصلي هيساعدك تنتظمي في الصلاة. ممكن نسمع محاضرات تزود حب ربنا فقلبنا زي محاضرات شرح أسماء الله الحسنى. لو مش قادرة تنتظمي في ورد القران اسمعيه .. خلي اول حاجه قدامك انك تسمعي قران في أي وقت مواصلات/ في المطبخ/ وانتي بتنامي/ اول ما تصحي وهكذا. ربنا يحبك ويزيدك قرب منه.
تم النشر الخميس، ١٥ ديسمبر ٢٠٢٢
غالبا انتِ ف الجامعة .. لأن بنسبة كبيرة دي المرحلة اللي بنكتشف بيها اننا بنذاكر غلط أو مبنعرفش نذاكر ٱصلا.. المذاكرة ليها طرق كتير ممكن لو جربتي الطريقة دي ومنفعتش معاكي تقوليلي ونجرب طريقة تانيه .. مبدأياً مش كل المواد بتتذاكر بنفس الطريقة .. يعني مثلاً في ماده امتحانها مقالي بنص الكتاب .. ف دي بنبقى محتاجين نفهم المادة دي بتقول ايه ونقرأ المنهج كله قراية سريعة كده بفهم وبعدين نبتدي نقسم المنهج ونبدأ نحفظ بالتكرار وبعدين كتابة وبعد كام يوم نكرر تاني ونكتب تاني.. في مادة مقالي اه بس بأسلوبك .. دي هنقرأ المنهج كله ونفهم ايه بيربط المواضيع ببعضها وبعد كده ناخد كل جزء نفصصه كده وتثبتي المعلومات الأساسية وتقسمي الموضوع لنقاط تقدري تكتبي تحت كل نقطه وتتكلمي فيها .. واعتبري كإنك عندك بريزنتيشن عن الموضوع ده ف بتفهميه من جميع الجوانب عشان تقدري تكتبي فيه .. وكل موضوع تعملي بروفه كده كتابيه وتشوفي انتي كده تمام ولا محتاجه تكرري الموضوع شويه بحيث تثبتيه أكتر. في ماده امتحانها بيكون mcq ودي بنقرأ المنهج أول مره بفهم وتركيز .. بعدين نقرأه تاني واحنا بنفكر ايه الاسئلة اللي ممكن تيجي في كل فقرة وهيساعدك في ده الامتحانات السابقة. مهم قبل كده تعرفي الكام حاجه دول.. 1- حضورك المحاضرة بيفرق كتير جداً في فهمك للمادة وفهمك للدكتور وامتحانه. 2- اسألي كل دكتور عن ازاي تذاكري مادته وتجيبي فيها تقدير حلو .. واكيد انتي عارفه مين الدكاترة اللي ينفع تسأليهم ومين لأ تسألي بنات الدفعة الأكبر منك. 3- الامتحانات السابقة مهمه جداً وكل دكتور بيبقى في حاجات معينه مهمه بالنسباله اعرفيها منه أو من البنات الأكبر. 4- لما تيجي تذاكري ابعدي تماما عن أي حاجه تشتتك .. وخلي جنبك ورقة عشان اي حاجه تيجي ف دماغك عايزه تعمليها سواء في المذاكرة أو بره المذاكره تكتبيها. 5- شغّلي أكبر قدر من حواسك وانتي بتذاكري. 6- من وجهة نظري بلاش طريقة المذاكرة انك تذاكره 25 دقيقة وتاخدي بريك 10 دقايق. 7- الافضل تحددي موضوع معين وتمسكي الكتاب تذاكريه ولما تخلصيه خدي بريك أو لما دماغك تفصل. 8- البريك مش موبايل خاالص .. البريك ممكن يبقى تقومي تحضري سناك / تتحركي شويه ف الشقة/ تعملي تمارين للضهر والرقبة عشان اغلبنا بيقعد غلط/ تتكلمي مع حد ف البيت في حاجه/ تقفي في البلكونه شويه/ وهكذا. 9- الموبايل لما تخلصي خالص مذاكرة .. طالما لسه هتكملي يبقى بلاش موبايل خالص. 10- مش مهم تقعدي على مكتب وتفردي ضهرك وما إلى ذلك.. ده الصح والأفضل أكيد بس متهتميش بده على حساب تركيزك وراحتك .. اقعدي قاعده مريحه في مكان هادي ومتسمعيش حاجة وانتي بتذاكري .. ركزي في حاجه واحدة بس. 11- لاحظي نفسك واعرفي اكتر انتي بترتاحي ازاي وبتركزي امتى وانهي وقتك مناسب ليكي تذاكري فيه .. جربي كذا وقت بعد الفجر مباشرة/ بعد الشمس ما تطلع على 8 مثلا/ بعد الضهر أو العصر/ بعد العشاء لحد الفجر.. اختاري الوقت الاريح ليكي واللي بتبقى مركزه فيه أكتر. 12- لو عندك مشكلة في التركيز اكشفي .. لو عندك أنيميا اكشفي وواظبي على الدوا. 13- وأهم حاجه تعينك وتوفقك قبل المذاكرة اقرأي ورد القران بتاعك .. ومتنسيش دعاء قبل المذاكرة وبعد المذاكرة. 14- ادعي دايما لنفسك ولصحابك وللمسلمين جميعاً بالفهم والتركيز والتوفيق. ربنا يوفقك ويرزقك الفهم والحفظ والحكمة ويعينك على المذاكرة ويقويك على أي عقبات تقابلك.
تم النشر الخميس، ١٥ ديسمبر ٢٠٢٢
الصحاب بالمواقف .. كل موقف هيقدمكم خطوة أو يرجعكم خطوه في علاقتكم. الصاحب مبادئه ومبادئك مش متعارضه. الرسول صلى الله عليه وسلم قال ( المرء على دين خليله، فلينظر أحدكم من يخالل) لو صاحبك مش زيك في الاخلاق والمبادئ اعرف انك هتبقى زيه في يوم من الايام ... ففكر كويس. مش لازم تبقوا متفقين في كل حاجه ( في الحاجات اللي ممكن نختلف فيها عادي) لكن تبقوا متفاهمين عشان مش كل شويه خناق ومشاكل. صاحبك يقف في ضهرك ويشجعك في أي حاجه بتعملها صح ويقف ف وشك ويمنعك ويصدك في أي حاجه غلط بتعملها.. يعني مش بيسايرك وعادي معاك في أي حاجه. مش عارفه تقصد ايه بانك بتخسر حاجات كتير لو وضحتها اكتر ممكن افيدك اكتر.
تم النشر الخميس، ١٥ ديسمبر ٢٠٢٢
وعليكم السلام ورحمة الله وبركاته تطوري من نفسك كشخصية؟ ممكن نسمع دورات تفهمنا أكتر عن النفس البشرية وتفكيرها زي دورات الدكتور عبد الرحمن ذاكر الهاشمي.. وممكن ناخد دورات على منصة إدراك أو رواق مثلا. التطوير في مجالك ممكن توضحلنا مجالك ونحاول نساعدك أو تسأل المتخصصين في مجالك عن كتب/ كورسات/ تدريبات/ ازاي تكتسب خبرة أو معلومه بشكل عام .. وحسب مستوى دراستك أو خلفيتك عن المجال هتشوف هتبدأ بايه. التفقه في الدين ليه جوانب كتير .. ممكن مثلا تلتحق بأكاديمية علم شرعي زي زاد / البناء المنهجي وغيرهم كتير.. وممكن تسمع محاضرات سيرة للدكتور راغب السرجاني .. وممكن تعرف أكتر عن المسلمين من بدايتهم ودورهم الديني المواكب للعصر الحالي من محاضرات المهندس أيمن عبد الرحيم.. ممكن تجيب كتب فقة من أي مكتبة اسلامية وتوضح لصاحب المكتبة عايز تتعلم ايه بالظبط ويكون بلغة بسيطه سهله تكون سلسه وتشاعدك تكمل وهيوجهك للكتاب المناسب.. مم كن تسمع محاضرات أ/ أحمد عبد المنعم في تفسير وتدبر القران هيساعدك اكتر تتعلق بالقران وتفهم اياته وتطبقها.. سؤالك جميل جداً وواضح منه رغبة سائله في أنه يستفيد من حياته ويستغل وقته ويتعلم ما ينفعه في الدنيا والدين.. لكن هقولك كام حاجه تاخد بالك منها عشان تكمل ومتقفش كتير.. 1- متبدأش كل ده مع بعضه .. ولا حتى جزء صغير من كل حاجه منهم .. ابدأ بأهم حاجه وأكتر حاجه ممكن تبقى سهله بالنسبالك. 2- ابدأ بنص ساعة بس ف اليوم ولو تلت ساعه كام مش مشكلة .. مش أكتر من كده .. المهم تستمر عليها وتحافظ على الوقت ده بشكل يومي وتنجز في الحاجه اللي هتبدأ فيها. 3- بعد اسبوع ممكن تزود حاجة كمان سواء في نفس النقطه او في نقطه تانيه .. وبرضو كمية بسيطه وزود شويه بشويه. 4- كل فترة وكل انجاز كافئ نفسك عليك .. مهم جداً عشان مخك يبقى عنده حافز يكمل .. المكافأة ممكن تبقى تمشية مع صديق/ حاجه حلوه/ تشتري حاجه نفسك فيها/ تخرج في مكان معين/ تقابل ناس بتحبهم .. وهكذا. 5- طبيعي جداً انك تزهق وتمل وتوقف كمان بس هات أخرك .. يعني صحيت النهاردة مش قادر تعمل اللي وراك زق نفسك وقولها كب النهاردة بس .. تاني يوم طب بس هعمل كذا (حاجه أقل) .. تالت يوم لو خلاص مش قادر خده بريك واليوم الرابع كمل. ربنا يوفقك وتقدر تحقق ما تتمنى .. لو في حاجه مش واضحه انا معاك/ي.
تم النشر الخميس، ١٥ ديسمبر ٢٠٢٢
الدبلوم بيكون في تخصص معين وعشان تخديها لازم تكوني اخدتي ليسانس اداب علم نفس في الاساس.. اعتقد تقصدي بالدبلومة دي انها كورس واسمه دبلومة كذا
تم النشر الخميس، ١٥ ديسمبر ٢٠٢٢
فرق السن مش كبير خالص عادي مش مقياس. في حاجات تانيه أهم تكونوا متوافقين فيها وعارفين تتعاملوا مع بعض ومتفاهمين.
تم النشر الأربعاء، ١٤ ديسمبر ٢٠٢٢
هقولك حاجه.. كل حد فينا في ف حياته كام حنفيه كده كل حنفيه منهم بياخد منها حاجه .. ممكن ياخد دعم مالي / حنيه /حب/ طاقه نشاط/ طاقه دينيه/ وهكذا.. بمعنى اصح الحنفيات دي بتُشبع احتياجاتنا العاطفية والنفسية والجسدية والروحية .. ممكن نكون مستنين من حنفيه معينه حاجه هي مش بتقدر تديها .. ف الحاله دي هنعمل حاجتين: اول حاجة هنشوف احنا ممكن نُشبع الاحتياج ده لنفسنا ازاي بدون الاعتماد على اي حد .. يعني مثلا ممكن تكوني بتفرحي لما بتقابلي صحابك وبتفرحي برضو لما بتجيبي لنفسك شيكولاته ف لو مش عارفه تقابلي صحابك ومتضايقه ممكن تشتري شيكولاته وهتبقي احسن، وهكذا بقى ف اي حاجه تانيه. تاني حاجه طبيعي منقدرش نُشبع كل الاحتياجات لنفسنا بشكل كامل .. ف بنشوف مصدر (حنفيه) تقدر تُشبعلنا الاحتياج دن فناخد منها. متزعليش من أهلك أنهم مش قادرين يدعموكي في حاجه معينه .. ممكن يكونوا مش فاهمينها أو مش عارفين يدعموكي بالطريقة اللي انتي عايزاها وبيدعموكي بطريقة تانيه أو ممكن يكونوا مش عارفين يعملوا الطريقة اللي انتي عايزاها .. فعادي تمام أهلنا وبنحبهم وهنتقبل الدعم اللي بيقدموه لينا بطريقتهم ونشوف صحابنا أو حد من قرايبنا ناخد منه الدعم بالطريقة اللي عايزنها.
تم النشر الأربعاء، ١٤ ديسمبر ٢٠٢٢
المهم عشان تستمر انك تلزم نفسك بالحاجه اللي بتعملها .. كل حد فينا بيلتزم بحاجه معينه زي التشجيع / انك تكافئ نفسك كل ما تنجز حاجه معينة/ انك تدفع فلوس في كورس مثلا ف بالتالي هتلتزم بيه/ ان يبقى معاك حد وفي تنافس بينكم/ انك تعرف حد معين مهم بالنسبالك وتخاف يعرف انك بطلت مثلا تعمل الحاجه دي ف يزعل منك .. وهكذا . جرب وشوف انت ايه اللي بيخليك ملتزم بأي حاجه وتكمل فيها واشتغل عليها. في جميع الاحوال طبيعي اننا نقع يوم او اتنين .. المهم الفترة دي متطولش ونرجع نكمل تاني ف اقرب وقت. طبيعي يبقى في عقبات تقابلك ف اللي بتعمله او ضغوط من بره تخليك متكملش .. لكن كل ما حاولنا نتعامل مع العقبة دي بشكل اسرع واحنا مكملين او لو وقعنا يوم ولا يومين مش مشكلة .. خليك متصالح مع الفكرة دي. اي محاولة مكتملتش او منجحناش فيها بالطريقة اللي عايزنها بنكون اتعلمنا منها حاجه او فهمنا منها ف مفيش مشكلة ابداً من ان ده يحصل وحتى لو اتكرر عادي طالما بنتعلم وبنكتسب خبرة وبنفهم اكتر. ربنا يوفقك.
تم النشر الأربعاء، ١٤ ديسمبر ٢٠٢٢
فقدان الشغف مش حاجه مهمه اوي تننا نركز معاها .. عادي يبقى ملناش نفس نعمل اي حاجه ف يومنا ونبقى عايزين نقضي اليوم ف السرير .. الشغف ممكن يحركنا يوم او اتنين يمكن شهر .. لكن مش مستمر معانا ومش كلنا زي بعض ف النقطة دي .. اللي بيحركنا الالتزام والمسؤولية .. ودي شويه نصايح تساعدك تتغلب على الكسل .. 1- نحاول نكشف ونعمل تحاليل لو الموضوع مستمر ومش بنبقى قادرين فعلا اننا نتحرك ونعمل حاجه .. نتطمن اننا كويسين او لو في مشكلة نعالجها. 2- اتطمنا وكله تمام؟ .. نحدد لنفسنا حاجات نعملها الزامية كل يوم حتى لو نص ساعة رياضة مثلا. 3- كل اسبوع نزود مهمه جديده نعملها زي اننا نتعلم حاجه جديده او نشتغل وهكذا. 4- كل اسبوع ندي مكافأة لنفسنا حتى لو هتشتري لبان .. اي حاجه بتحبها المهم متبقاش المكافأة اننا هنأنتخ يوم ولا ناخد اجازة من حاجه الزامية ورانا. 5- لو قدرنا يبقى في ناس قريبه مننا تشجعنا ونستمد منها طاقة ودعم حتى لو بنعمل حاجه بسيطه مش على قدر كبير اووي من الاهمية بالنسبة للشخص ده. 6- لعب الرياضة والدش بتاع الصبح بيفوقوا وبيجروا الدورة الدموية ف الجسم وهيفيدونا ف اننا منرجعش للسرير تاني. 7- اي نشاط مهما كان مينفعش ابدا ابدا ابدا يكون على السرير.. ويفضل ان منبقاش ف الاوضة اصلا واي حاجه نعملها بره الاوضه عشان منكسلش ونلاقي السرير واخدنا بالحضن 😂. 8- منتضايقش من نفسنا ولا نفقد الامل لما نلاقي نفسنا كسلنا يوم ولا طنشنا الحاجات اللي ورانا .. ده طبيعي جداً خصوصاً ف الاول .. المهم اليوم ميجبش اللي بعده واللي بعده .. بوظنا يوم؟ مش مشكلة نبدأ تاني يوم.
تم النشر الأربعاء، ١٤ ديسمبر ٢٠٢٢
ممكن جداً الاعراض اللي عندك ميكونش ليها علاقة بالتشخيص اللي قولتيه. ممكن تزوري طبيب نفسي وهيكون ادرى بجمع الاعراض وتشخيصها التشخيص المناسب وتوجيهك للعلاج المناسب. مش كل الكلام اللي بنقرأه بتكون مصادره موثوقه ف متاخديش أي كلام على نفسك وتأكدي ان الطب النفسي مجال كبير جددا وعميق جدا اكتر بكتير من ان القراءة العامة تخلي أي شخص مُلم بيه، لأن ممكن جداً القراءة ف الطب النفسي توهم الشخص بأعراض معينه أنها بتحصله فعلا ويكون مش حقيقي أو ليه أبعاد تانيه بعيداً عن اللي قرأه وده بيحصل كتير جداً.
تم النشر الثلاثاء، ١٣ ديسمبر ٢٠٢٢
علاقتنا بشكل عام مش بيحكمها قانون أو قواعد معينه .. وفي اسباب كتيره ممكن تكون سبب ف انتهاء أي علاقة. مش مهم هي انتهت ليه.. المهم إنها انتهت. نتعلم منها زي أي تجربة ف حياتنا ونتخطاها. لو سمحت ليك الفرصه انك تواجهها وتعرف منها الاسباب الحقيقية لانهائها علاقتكم عشان ترتاح اكتر اعمل كده .. مفيش فرصه لده خلاص .. تجاوزها واشغل وقتك وفكرك بحاجات تانيه وواحده واحده مش هتبقى شاغله بالك زي دلوقتي. حاول متعممش اي موقف تاخده من العلاقة دي على علاقاتك كلها .. يعني متدخلش ف علاقة مع بنت تانيه بناءا على تصورك عن البنت اللي كانت معاك وتعاملها معامله هي متستاهلهاش. فكر كويس لما تكون عايز تدخل ف علاقة مع حد وادخل البيت من بابه على طول .. هتكون متطمنين لبعض وواثقين ف بعض اكتر وفي حالة ان العلاقة هتنتهي لقدر الله ففرصة انها تنتهي بشكل حضاري هتكون اكبر وهتكون فاهم قرار الطرف التاني او هتكونوا متفقين عليه. بتمنالك التوفيق.
تم النشر الثلاثاء، ١٣ ديسمبر ٢٠٢٢
مش عارفه سنك كام وسن والدك لكن خلينا نتكلم ف نقطه تانيه .. مش دايما بيبقى في لغة تواصل وتفاهم بين الاهل والابناء ودي مشكلة مش صغيرة .. بنحاول كأيناء نتعامل معاهت مش نغيرها .. يعني ايه؟ يعني مش هينفع نقنعهم انهم غلط او انهم يتغيروا او نسيبهم ونمشي ونشوف اهل تانين .. طيب ممكن نعمل ايه؟ ممكن نقلل الخساير ونحاول نتعامل معاهم زي ما هم ونتقبلهم ونحبهم زي ما هم .. منتوقعش منهم حاجة طول عمرهم مش بيعملوها زي انهم بيدونا طاقه سلبيه مثلا.. خلاص نكبر دماغنا ومندخلش معاهم في جدال عارفين اننا هنطلع منه خسرانين حتى لو خسرانين طاقة ومجهود .. نحاول قدر الإمكان نفرغ الطاقة السلبية اللي جوانا ونشحن طاقة إيجابية عشان نفسنا وعشان نعرف نتعامل معاهم ونحتوي المواقف اللي بيننا. حسب ما فهمت انهم بيحملوك فوق طاقتك الصحية.. واكيد هم مش قادرين أو مش عارفين يعملوا الحاجه اللي بيقولولك تعملها .. ف قدامنا كام حل زي انك لو هتعرف تعمل الحاجه دي بس الوقت مش مناسب ليك هتوضح بكل هدوء (انك تعبان جداً وإنك هتهتم باللي هم عايزينه وهتعمله اول حاجه ف يومك بكره عشان زعلهم غالي عندك ومش عايز تضايقهم) حاجه مش هنقدر نعملها خالص؟ هنوضح بكل هدوء برضو ان ده صعب عليك وهتضطر تلجأ لفلان أو للطريقة الفلانية عشان الحاجه دي تتعمل. في اسوء الاحوال وده يكون نادرا نرفض بهدوء وبأدب واعتذار انك مش هتقدر تتصرف ف الحاجه دي. حاول مترفضلهمش طلب اولا من باب البر والاحسان ليهم .. ثانيا ان هم لو مش محتاجينك مكانوش طلبوا منك. ادعي كتير ان ربنا يعينك على برهم وعلى تنفيذ كل اللي يطلبوه منك وادعي بصلاح الحال بينكم. دايما لما تيجي تساعدهم ف أي حاجه جدد نيتك واحتسب الاجر. افتكرلهم أي حاجه حلوه عملوها قبل كده حتى لو زمان عشان متبقاش شايل منهم جواك ومتضايق. افتكر دايما ان ربنا في عون العبد ما دام العبد في عون اخيه فما بالك بوالديك. ربنا يعينك ويقويك ويرزقه الطاقة والصحة والصبر عليهم.
تم النشر الاثنين، ١٢ ديسمبر ٢٠٢٢
أهلا بيكي، الانعزال اشكاله كتير ومراحله كتير اووي .. ف كل ما نقدر نقاومه من بدري كل ما يكون أفضل لينا قبل أي حد. طيب ازاي متبقيش منعزله؟ اشتركي ف أنشطة سواء تبع الجامعة مثلا. أو في جمعية خيرية أو أي نشاط تحبيه. ممكن لو في وقت فاضي عندك تشتغلي ويكون شغل فيه تعامل مع الناس. ممكن كمان نفهم عن نفسنا اكتر وعن الناس عموما وطبيعتنا البشرية وهكذا وارشحلك البرنامج ده لدكتور عبد الرحمن ذاكر الهاشمي https://youtube.com/playlist?list=PLvGpI5t1gJ8QJzbA7fP4Iq6XtumVZ2sY6 وممكن تشوفي دورة تانيه لو لقيتيها مناسبة ليكي اكتر المهم تعرفي اكتر عن طبيعتنا كبشر وعن اختلافنا عن بعض وازاي مع اختلافنا يبقى عندنا صحاب ونبقى بنتعامل كويس ومفيش بينا خلافات عادي. ممكن كمان بعدها تعرفي اكتر عن الذكاء الاجتماعي والذكاء العاطفي وهتلاقي دورات كتير متعلقة بالموضوعين دول على منصة ادراك او رواق وغيرهم.
تم النشر الاثنين، ١٢ ديسمبر ٢٠٢٢
وعليكم السلام ورحمة الله وبركاته.. خلينا نبدأ من الاخر للاول .. ايه مفهومك عن الفراغ؟ يعني حاسس بفراغ من ناحية انك مش بتعمل حاجه في يومك مع انك بتعمل ويومك مشغول؟ ولا حاسس بفراغ انك مستفدتش باي حاجه عملتها وانك ضيعت يومك ف حاجات مش مفيده؟ ولا فراغ من نوع تاني؟ حاسس انك موصلتش لحاجه مع انك وصلت وحققت بتتمناها .. ده سلاح ذو حدين.. ممكن جدا الفكرة دي تبقى هي الدافع ليك إنك تعلي طموحك وإنك تشتغل وتتطور اكتر .. وممكن جداً تكون هي السبب في هدم كل ده والاحساس بالفشل واليأس لإنك مش مقتنع بيها. ف وجود الفكرة في دماغك بالنسبالي مش حاجه مُضره لكن تبعيات الفكرة هي اللي ممكن تبقى مضره حسب تعاملك معاها. جرب تقسم اي هدف عايز توصله لاهداف صغيرة وكل هدف صغير توصله تكافئ نفسك وتقضي وقت حلو مع ناس بتحبها او مع نفسك لو بتفضل ده اكتر وتتكلم مع نفسك في كل اللي فات واللي عملته وتوضح قد ايه مبسوط بنفسك .. المهم انه يكون وقت تطلع منه حاسس انك عملت حاجه فعلا وانك فعلا انجزت. نيجي لاخر جزء ليه ممكن ندفع فلوس في حاجه مفيده لينا ومنعملهاش؟ من وجهة نظري في أسباب كتير ممكن تخلينا نعمل ده وانت ادرى بنفسك وبايه اللي ممكن يكون سبب ليك فعلا .. ممكن مثلا تكون بتيجي على نفسك جامد ومفيش وقت راحه وترفيه كافي .. ممكن كمان بتلزم نفسك بانك تدفع فلوس بس مش دي الطريقة الالزامية ليك يعني مش دي الحاجه اللي هتخليك ملتزم، ممكن مثلا تكون بتلتزم بالتشجيع أو ان يكون عندك دافع قوي يحركك أو انك يكون عندك تهديد بحاجه معينه مش هتحصل عليها لو معملتش ده.. ف منكن تفكر مع نفسك شويه ف النقطه دي وتشوف الانسب ليك.. ممكن كمان تكون بتحاول تعمل كذا حاحه ف نفس الوقت يعني مثلا عايز تطور نفسك في مجال دراستك أو شغلك وعايز تطور نفسك بدنياً من ناحية الرياضة وعايز تطور موهبة عندك .. ف طبيعي جداً متقدرش تبدأ كل ده مع بعضه .. لكن تبدأ حاجه وبعد فترة اسبوعين او تلاته تكون اتعودت على الحاجه دي ف تبدأ ف حاجه تانيه وهكذا. اتمنى اكون افدتك ولو في نقطه مش واضحه او محتاج تسأل اكتر هكون في انتظارك.
تم النشر الاثنين، ١٢ ديسمبر ٢٠٢٢
ممكن نزور طبيب نفسي أو طبيب مخ وأعصاب ... هنعمل تحاليل ونتأكد ان صحتنا تمام وممكن بعدها ناخد فيتامينات مخصصه.. والطبيب النفسي هيساعدك اكتر بخطوات عملية ازاي تقدري تتخلصي من التشتت وتقدري تقوي تركيزك.
تم النشر الاثنين، ١٢ ديسمبر ٢٠٢٢
الطيبة واللين عمرهم ما كانوا عيب أبداً والرسول صلى الله عليه وسلم قال: (ألا أخبركم بمن يحرم على النَّار، وبمن تحرم النَّار عليه؟ على كلِّ هيِّن ليِّن قريب سهل) وكمان قال: (مثل المؤمنين في توادِّهم وتراحمهم وتعاطفهم، مثل الجسد، إذا اشتكى منه عضو، تداعى له سائر الجسد بالسَّهر والحمَّى). ف ده عمره أبداً ما كان عيب. لكن خلينا نفكر لسبب تاني للأذيه.. هل مثلا سهل حد يضحك عليكي ويقنعك بحاجه غير مبادئك وطبيعتك؟ هل بتتساهلي ف إنك تاخدي حقك أو مبتعرفيش أصلا تطالبي بيه؟ هل بتتعامل بطيبه ولين مع كل الناس وفي كل المواقف؟ ساعات بيبقى في مواقف مينفعش نتعامل بلين فيها عشان ميتمش استغلالنا وساعات بنقع ف ناس مش كويسه بيستغلوا الموقف والناس المحترمة. ممكن لو وضحتي اكتر ازاي بتتأذي وهل نفس المواقف بتتكرر ولا لأ ونحاول نساعدك اكتر ازاي تتعاملي ف مواقف زي دي.
تم النشر الاثنين، ١٢ ديسمبر ٢٠٢٢
التسويف يحتاج منك تخطيط بليل لليوم التالي .. تحدد هتعمل ايه امتى ولمدة قد ايه.. حدد لنفسك 3 مهام بس تعملهم كل يوم وانتظم عليهم وبعد اسبوع من الانتظام زود مهمه كمان. أي حاجه تيجي في دماغك عايز تعملها اكتبها ف ورقة او نوته وجمع كل اللي وراك فيها وكل يوم بليل تختار اللي هتعمله تاني يوم. تقعد ف البيت لمدة شهر؟ طب ليه؟ مفيش التزام او مشوار يتعمل بره البيت يبقى نعرض نفسنا لشمس الصبح من الشباك او البلكونه .. الشمس مهمه جداً جداً جداً.. ننزل نجيب طلبات البيت ومش لازم نجيبها من اقرب مكان ممكن نبعد شويه بحيث نتمشى ف الشمس ونشوف الناس .. حد من صحابنا أو أخ أو أخت نتفق معاه وننزل نتمشى شويه / نشرب عصير .. أي حاجه المهم ننزل .. اذا كنت شاب ف انزل صلي في المسجد. مينفعش يعدي أسبوع من غير نزول حتى لو لوحدك .. نزول الشارع والتعرض للشمس والتعامل مع الناس هيفرق ف صحتك النفسية والبدنية كمان وهتقدر تركز ف أي حاجه بتعملها لو بدأت اليوم بانك تقعد ف الشمس شويه ..
تم النشر الاثنين، ١٢ ديسمبر ٢٠٢٢
لو كان تم التنازل بالمحكمة فلا رجوع. اما اذا لم يكن تم التنازل في المحكمة فيمكن حضور المجني عليه شخصيا امام القاضي والاقرار بانه لم يتنازل برضاه عن القضية وانه وقع عليه تهديد واجبار للتصالح. ويمكن اثبات التهديد عن طريق الشرطة قبل الحضور امام القاضي بطريقة أو بأخرى.
تم النشر الأحد، ١١ ديسمبر ٢٠٢٢
اختار الشريك الثقة، الأمين. ثم اختيار المجال على الاقل يكون عندك 70% خبرة فيه وعدم المجازفة في مجال بدون درايه. التكلفة المبدئية لا تكون بجميع المال.
تم النشر الأحد، ١١ ديسمبر ٢٠٢٢
صعب للأسف أن كام سطر هنا يساعدوكي تعدي من المحنة دي. أتمنى تزوري معالج نفسي في مركز أو عيادة أو مستشفى قريبه منك في أقرب وقت. بتمنالك تلاقي نفسك وتعيشي حياة هادية مستقرة.
تم النشر الأحد، ١١ ديسمبر ٢٠٢٢
التغافل والتسامح من أهم الصفات لنجاح أي علاقة .. لو كل غلطه عملتيها هنقف عندها بالشهور والسنة يبقى حياتنا هتمشي ازاي؟ لو مش هتبقى متطمنه وانتي مع شريك حياتك وبتتصرفي بطبيعتك بدون ما تفكري ف ردة فعله عشان حاسه انك في أمان .. امال هتحسي كده مع مين؟ دي اسئلة مهمه تتكلمي معاه فيها لو مش هيقدر انه يتجاوز عن غلطه عملتيها وانتو مخطوبين امال هيتعامل معاكي ازاي بعد الجواز وانتو كل حياتكم بحلوها ومرها هتكونوا فيها مع بعض؟ اتكلمي معاه وجهاً لوجه ولو مفيش استجابة وموصلتوش لحل وسط انفصلي دلوقتي احسن من بعدين. أهم حاجه قبل ما تتكلموا استخيري وقبل ما تقرري تكملي او تسيبيه استخيري تاني .. ربنا يقدرلك الخير.
تم النشر السبت، ١٠ ديسمبر ٢٠٢٢
ممكن أسألك كام سؤال افهم بيهم اكتر المشكلة؟ سنك قد ايه؟ ليه شايفه انك ضايعه ومكتئبه؟ ايه بيحصل بيخليكي حاسه بكده؟ اهلك بيضعطوا عليكي ف قراراتك زي اي مثلا؟ ليه مش عارفه تبعدي عن الشخص ده؟
تم النشر السبت، ١٠ ديسمبر ٢٠٢٢
مبسوطه بيك ي أحمد إنك مهتم بمذاكرتك ودراستك ده دليل إنك مجتهد وليك مستقبل بإذن الله. اول حاجه هنظبط مكان المذاكرة بحيث ان ميبقاش قدامك اي حاجه خالص غير المادة اللي بتذاكرها .. ومادة واحده بس مش اكتر عشان متتشتتش.. هنسيب الموبايل صامت او مقفول بره الاوضة عشان منبقاش مشغولين بيه وده مهم جداً عشان الموبايل بيشتت أي حد فما بالك بقى لو عايز تذاكر؟ حاجه كمان .. اول ما تيجي تذاكر هتتفق مع نفسك انك هتخلص درس (دراسات مثلا) وتحل عليه وبعدها هتقوم تعمل تمارين لمدة 10 دقايق مثلا عشان تفك عضلاتك وتنشط مخك وتقدر تكمل. بعد كده هتذاكر درس من مادة تانيه وتحل عليه وتظبطه ولما تخلصه خالص هتقوم تاخد الموبايل وتمسكه لمدة نص ساعة بس وبعدين تعمل حاجه خفيفه تاكلها او تشرب مشروب بتحبه ويا سلام لو عصير فريش او فاكهه وتروح تكمل مذاكرة. لما تيجي تمسك الموبايل متمسكهوش ف نفس الاوضة اللي بتذاكر فيها .. امسكه ف الصالة مثلا او في مكان تاني غير اللي بتذاكر فيه وبعد كده سيبه مكانه وهو صامت او مقفول وروح مكان مذاكرتك. هنرجع بعد كده لمذاكرتنا ونختار مادة تالته نذاكر منها درس برضو وتحل عليه وتثبته كويس. كده تبقى ذاكرت 3 دروس من 3 مواد مختلفين ف اليوم .. لو معندكش درس او مدرسه ممكن تاخد ساعتين مثلا بريك وترجع تذاكر ماده أو اتنين كمان وانت وشطارتك بقى. ناخد بالنا اننا لازم اول حاجه ف اي مادة اننا نبقى فاهمين اللي بنذاكره قبل ما نحفظه. لو لقيت صعوبة ف درس معين سيبه وذاكر درس غيره وارجعله بعدين .. لما جيت ترجعله مفهمتوش برضو اسأل حد كبير في عيلتك أو المدرس واول ما تفهمه ذاكره كويس اووي وحل عليه. مهم انك بعد ما تفهم الدرس تكرره كام مره عشان تثبته كويس وبعدين تحل عليه عشان تبقى اتأكدت من فهمك ومذاكرتك. لو حاسس انك مش بتعرف تركز خالص وبتفهم كل المواد بصعوبة اطلب من مامتك او حد مسؤول ف البيت انه يروح معاك عند دكتور مخ واعصاب او باطنه هيطلب منك تحاليل عشان ممكن يبقى في شوية انيميا مثلا مأثرين على تركيزك وبدوا بسيط هتبقى زي الفل. لو في حاجه في كلامي مش واضحه ممكن تقولي واوضحها اكتر .. ربنا يوفقك.
تم النشر السبت، ١٠ ديسمبر ٢٠٢٢
الله يبارك ف عمر والدك. هقولك كام حاجه تحاولي تتعاملي بيها معاها عشان نقلل الضغط عليكي .. 1- ابعدي كل البعد عن الخناق والمشاكل .. رفضت حاجه أو عارضتك؟ قوليللها تمام وادخلي اوضتك او غيري المكان اللي انتي قاعده فيه ومتتسحبيش ابداً لدايرة الجدال والرد بزعيق وعمل مشكلة من كل حاجة.. انتي اكيد مجربه الطريقة دي وعارفه انها مبتجبش نتيجه خالص. 2- تدخلها في أمور حياتك وخصوصياتك شئ طبيعي بالنسبالها .. فهناخد الموضوع بسلاسة وخليكي واضحة واحكيلها على قد ما تقدري وعلى قد ما ينفع تعرف .. وده يبقى بكل هدوء وتبينيلها انه عن طيب خاطر منك وتتعاملي على أساس انك بتقوليللها كل حاجه وانها تعرف كل شئ عنك حتى لو ده مش دقيق. 3- اتحكمي في غضبك قدر الامكان ومتضايقيش نفسك من أي تصرفات بتحاول تعملها .. حاولي تبقي ساكته وهاديه قدامها ف أي موقف. 4- تجنبي الاحتكاك بيها بدون هجر .. اشتري دماغك واقعدي ف اوضتك واشغلي نفسك بأي انشطه ولو مش بتشتغلي انزلي شغل عشان تقضي وقت كبير بره البيت وتقللي الاحتكاك بيها. 5- متقصريش في بِرك بيها بإنك تطيعيها لو طلبت منك حاجه ف البيت أو تخصها.. أما اختيارتك انتي ف حياتك انتي خاصة بيكي انتي زي الجواز. والدراسة وهكذا (اعملي سيرش واعرفي اكتر عن بر الوالدين عشان متشيليش ذنب) .. فقدر الامكان تصممي على اختياراتك بدون دخول ف مشاكل. 6- قربي من باباكي قدر الامكان عشان وقت ما تحتاجيه تقدري تشرحيله وجهة نظرك ويفهمك واذا امكن يقف ف صفك. الله يعينك ويقويكي واذا احتاجتي دعم ف أي وقت هنكون ف انتظارك.
تم النشر السبت، ١٠ ديسمبر ٢٠٢٢
طب ايه في حياتك اتغير في 2020 ؟
تم النشر الأربعاء، ٢١ ديسمبر ٢٠٢٢
الاختيار التاني إنك قبل ما تروحي تكلميها وتشوفي نظامها ايه .. قوليلها فاضيه اجي ولا الوقت مش مناسب عشان عايزه نقعد وقت حلو مع بعض وروحي بحاجه حلوه عاملاها ف البيت (بس مش كل مره) وحاولي تكسبي ودّها .. لقيتي مودها وحش متروحيش وقوليلها هجيلك وقت تاني.
تم النشر الثلاثاء، ٢٠ ديسمبر ٢٠٢٢
قدامك اختيارين من وجهة نظري .. إما تعتبريها من قرايبك ولما تلاقيها متضايقه تتصرفي معاه بلطف أكتر وموده وحب أكتر وكل شخص وله المدخل بتاعه اللي تعرفي تسايسيه بيه .. هتكسبيها وعلاقتكم هتبقى أحسن ومع الوقت هتحكيلك اللي مضايقها وتشيلوه سوا أو هتعاملك أفضل
تم النشر الثلاثاء، ٢٠ ديسمبر ٢٠٢٢
اقرب مستشفى وروحي اكشفي انتي ادرى بنفسك ومش لازم يبقى في حد معاكي أو خدي حد من صحابك .. ولو مفيش حاجه تبقي اتطمنتي .. شفاكِ الله وعافاكِ.
تم النشر الثلاثاء، ٢٠ ديسمبر ٢٠٢٢
من امتى حاسس بكده؟ .. بتفكر في ايه وبتعمل ايه وانت قاعد لوحدك؟
تم النشر الثلاثاء، ٢٠ ديسمبر ٢٠٢٢
العفو ي جميلة على ايه ربنا يطمنك ويسعدك دايماً ❤️ .. هدعيلكم أكيد.
تم النشر الاثنين، ١٩ ديسمبر ٢٠٢٢
تحبي اساعدك ازاي؟
تم النشر الاثنين، ١٩ ديسمبر ٢٠٢٢
افتكريلها الحلو من زمان وبصي لقدام وفكري كمان سنين تحبي علاقتكم تبقى عامله ازاي وابنيلها من دلوقتي .. الله يجمع بينكم ويسعدكم.
تم النشر الاثنين، ١٩ ديسمبر ٢٠٢٢
لا تتبعي خطوات الشيطان فيفرق بينكم .. اسعي إنك تحسني علاقتكم واصبري عليها واستعيني بالله وربنا هيقدرك على ده .. أنا شايفه غلاوتها عندك من كلامك ف متضيعيش اختك من بين ايديكي .. بكره يبقى كل واحد منكم عنده حياته وتفضل مكالمتكم وسؤالكم على بعض يهون عليكم...
تم النشر الاثنين، ١٩ ديسمبر ٢٠٢٢
جزانا وإياكِ ي جميلة.. ربنا يطمنك دايماً ❤️
تم النشر الاثنين، ١٩ ديسمبر ٢٠٢٢
طيب فهمت كلامي ازاي تتعامل مع الافكار السلبية ولا محتاج توضيح حاجه معينه؟
تم النشر الاثنين، ١٩ ديسمبر ٢٠٢٢
الله يعزّك بالتوفيق.
تم النشر الاثنين، ١٩ ديسمبر ٢٠٢٢
عامليها زي ما تحبي انها تعاملك بدون انتظار مقابل.. فترة قليله وهتمشي ف احسني معاملتها في الفترة دي وبعد كده علاقتكم هتبقى بحدود أكتر .. ربنا يصلح ما بينكم.
تم النشر الأحد، ١٨ ديسمبر ٢٠٢٢
خلي التعامل بينكم بحدود وبدون قطيعه.. متستنيش منها دعم أو إنها تنصفك في موقف معين انتي عارفه انها مش هتعمل ده فيه.. وضحيلها حبك وصاحبيها واسمعي منها وناقشيها في كلامها طالما ده مش هيعمل بينكم مشاكل.. ساعديها في تجهيزاتها واعرضي عليها المساعدة قبل ما تطلب....
تم النشر الأحد، ١٨ ديسمبر ٢٠٢٢
استخير وتوكل على الله ربنا يوفقك
تم النشر الأربعاء، ١٤ ديسمبر ٢٠٢٢
واضح إنها مكانتش حد موثوق كفايه وطالما شايف إنك مقصرتش معاها ف متلومش نفسك ولا تيجي عليها.. الخذلان ده ناتج عن إنك عملت اللي عليك معاها .. فتخطى الموضوع كله بإنك تشغل نفسك في دراستك أو شغلك والاحساس ده هيروح بالوقت.
تم النشر الثلاثاء، ١٣ ديسمبر ٢٠٢٢
بعد ما تجهز حاجتك وتعرف ايه النظام ف الجامعة ومطلوب منك ايه بالظبط .. ابدأ ذاكر ساعتين ف اليوم على الاقل وكل اسبوع زود ساعة أو أكتر .. بتمنالك التوفيق
تم النشر الجمعة، ٩ ديسمبر ٢٠٢٢
15 ساعة شغل كتير جداً.. لو لقيت فرصة تانية بوقت أقل وتحققلك نفس الدخل المادي يومك هيبقى أطول .. حاول تثبت ساعتين ف اليوم تعرف فيهم اخبار الجامعة والمذاكرة للمواد بتبقى ازاي وجدول الامتحانات والملازم منين وهكذا .. جهز كل الداتا اللي هتذاكر منها بحيث لما تيجي تذاكر ميبقاش عندك اي معيقات.
تم النشر الجمعة، ٩ ديسمبر ٢٠٢٢
لو معرفتيش تعملي كده يبقى حاولي تزودي دخلك بانك تجيبي حاجات وتبيعيها مثلا ملابس /منتجات غذائية / اعمال يدوية .. اللي في استطاعتك بحيث تقدري تكفي احتياجاتك انتي وبنتك وتحوشي لأي ظروف.
تم النشر الخميس، ٨ ديسمبر ٢٠٢٢
ممكن نحاول نقتنص جزء من المرتب تحوشيه بدون علم حد لأي ظروف خاصة بيكي أو ببنتك .. من رأيي تقولي لوالدك لما تيجي تديه المرتب المره الجاية انك محتاجه تجيبي حاجات ليكم وتديه نص المرتب مثلا أو حسب ما انتس شايفه مناسب .. ده مفيهوش احراج لأنه حقك ومجهودك وفلوسك وفي تفاهم بينك وبين والدك.
تم النشر الخميس، ٨ ديسمبر ٢٠٢٢
مصاريف الادوية لو هيبقى فيها مشكلة .. وضحي للدكتور وهيكتب ادوية تُصرف من المستشفى قدر المستطاع .. خطوة العلاج مهمه جداً ومش اختياريه خالص وبكل الطرق تقنعوها ف أقرب وقت لحياة أفضل ليكم وليها.
تم النشر الخميس، ٨ ديسمبر ٢٠٢٢
ومستشفى سيد جلال ومستشفى الحسين الكشف فيهم بسعر كويس في حدود 20 جنيه تقريبا والدكاترة هناك شاطرة جداً.
تم النشر الخميس، ٨ ديسمبر ٢٠٢٢
مستشفي الدمرداش الكشف ب ٢٠ جنيه .. حد، اتنين، أربع من ٨ : ١٠ الصبح . وبعد كده جلسات بتبدأ من ١٠٠ جنيه ومش أسبوعية. وفي مستشفي العباسيه الكشف بجنيه واحد فى العيادات الخارجيه ، والجلسات النفسيه بنفس السعر تقريبا. وفي مركز الارشاد النفسي بجامعة عين شمس ب 100 ج.
تم النشر الخميس، ٨ ديسمبر ٢٠٢٢
مهم جداً ان الكبار يقدروا يشتغلوا ويصرفوا على نفسهم على الأقل حتى لو المعاش بيكفي .. لأن عندنا بند مهم محتاج نصرف فيه وهو العلاج النفسي بشكل أساسي للأم .. العلاج النفسي مش غالي .. هحط ف الكومنت الجاي اماكن تقدروا تتابعوا معاها وفيهم دكاترة شاطرين جددا فعلا.
تم النشر الخميس، ٨ ديسمبر ٢٠٢٢
كلنا عندنا هموم صح .. لكن بنسند على بعض وبنشارك بعض عشان نهون على بعض والحياة تمشي.
تم النشر الثلاثاء، ٦ ديسمبر ٢٠٢٢
الدنيا دار ابتلاء واختبار وكل داء له دواء بإذن الله تقدر تلاقيه عند أخصائي نفسي
تم النشر الاثنين، ٥ ديسمبر ٢٠٢٢
في مواقع زي شيزلونج أو اسأل أو فيزيتا بتقدري تبحثي من خلالها عن المناسب ليكي وممكن تتابعي أون لاين
تم النشر الأحد، ٣١ يوليو ٢٠٢٢
حساب فيسبوك حساب لينكد انلعرض الملف الشخصي في فدني اضغط هنا