Abeer M Elfiky

لو قصدك بالتطوير علشان تالته ثانوي ف حاول متشغلش تفكيرك بيها ، هي سنه دراسيه عاديه زيها زي اولى و تانيه متبدأش بدري مذاكرة ليها علشان متتعبش بدري السنه طويله و الوقت كافي للمذاكرة بس المشكله ف الكميه و هتلاقيك بتنسى حاجات كتير و دا علاجه مراجعه و امتحانات على اللي تخلصه كل فترة و دايما اللي مش فاهمه متعديهوش غير لما تفهمه و اسأل مرة و اتنين المهم تكون ملم باللي بتدرسه ، و الماده اللي حاسس انك ضعيف فيها روح لمدرس بيعرف يفهم و هو نفسه فاهم لان الشاطرين كتير بس فيه ناس مش بتعرف توصل المعلومه للطالب ، لو تطوير ذات بقى ف ممكن تروح الچيم و تحفظ قرأن و لو عندك ميول لحاجه معينه ممكن تبحث و تشتغل عليها و تطور من نفسك فيها حاجه مهمه ، قبل م تبدأ ف اي حاجه خلي عندك يقين بالله انك هتحققها و تنجح فيها بس دايما اذكر ربنا موفق بإذن الله

وعليكم السلام و رحمة الله و بركاته🤍 كل عام وانت بخير و سلامة و جميع الامه الاسلاميه، اعاده الله علينا و عليكم بالخير و اليمن البركات و يجعلنا جميعاً من المغفور ذنبهم و يتقبل منا و منكم صالح الاعمال اللهم امين 🤍

دا تعلق مش حب و م الاول هو كان بيتسلى اللي بيحب بجد مش هيقدر ينسى و يسيب الشخص اللي هو حبه ، و زي م سابك هيسيب البنت التانيه و يروح لغيرها ف حافظي ع نفسك و قلبك للشخص الصح اللي يستحقك انتي غاليه جدا متسيبيش نفسك لاي حد حتى لو بتحبيه لازم يضحي و يحاول كتير انه يوصلك و بالحلال ، افتكري ان الشخص السئ دايما بيقع ف اللي شبهه و انتي ربنا بيحبك علشان بعد عنك ف احمدي ربنا و ركزي ع حياتك و اكيد ربنا هيعوضك احسن منه الف مرة ♡

ربنا يصبرك و يعوضك خير ، الشخص دا واضح انه مريض و بعيد عن ربنا ممكن تكلميه و تحاولي معاه يصلي و يسمع قرأن و يعرف عواقب اللي بيعمله دا و انه كدا بيغضب ربنا و لو مش هيستقيم لنفسه ع الاقل علشان اولاده اللي ملهمش اي ذنب ، ممكن حد م اصدقاؤه او اهله يكون ليه تأثير عليه يكلمه و بلاش يفضل لوحده لان دماغه هترجعه للافعال دي انما لو قاعد مع حد هيخاف يكلم بنات و خليه يشارك ف تربيه الاولاد و المذاكرة ليهم و يكلمهم ف اللي بيحصل ف حياتهم لان واضح انه عايش حياته لنفسه وبس و مش شايل هم الاولاد او البيت و ربنا يهديه

هو طبعا انا ضد فكرة الارتباط الغير رسمي ، واضح انك بتحبها بس هي مش بتبادلك نفس المشاعر كمان بدليل انها بتقدر تموڤ اون و تصاحب شخص تاني .... من رأيي انك مش أذيتها بالعكس هي عارفه انك بتحبها و ضامنه وجودك مهما عملت و ان حبك هو نقطه ضعفك علشان كدا بتحسسك انك اللي غلطان وانها مظلومه ... ممكن اسألك سؤال ، هل انت بكل اللي حصل دا ممكن تتجوزها و تكون مسؤله عن بيتك و اولادك ، هل عندك ثقة فيها لو سافرت و سيبتها ؟ بعتذر بس معتقدش انها شخص كويس ، بلاش تضيع مشاعرك و نفسك و اهلك علشان حد مش مقدر حبك و انت تستحق حد افضل

بالنسبالي القرب من ربنا علاج لكل حاجه لما بكون متضايقه من حاجه او واجهت مشكله بصلي و بدعي ربنا و افضفض باللي جوايا و انا عارفه ان ربنا هيستجيب ليا و ان المشكله دي حصلت علشان يختبر تحملي و ايماني بيه و بقول الحمدلله انه فاكرني و حصلي كدا علشان ألجأ إليه ، مجرد م افكر ان ربنا بيحبني و فاكرني بفرح 🤍🤍🤍🤍 دا مش مجرد كلام دا اللي بيحصل معايا بالفعل دايما واظب ع القرآن حتى لو هتسمع بدل الاغاني لشيخ بتحبه ، بردو هتحس براحه و ايجابيه 🤍🤍🤍

بصي هو علشان تتعيني ف الكليه زي م انتي عارفه بياخدوا اعلى درجات م الدفعه ممكن الدرجات تكون ف الرينچ بتاعك و تلحقي و كمان بيكونوا عايزين عدد معين مثلا 10 ف بياخدوا اعلى عشرة مقدمين ف كملي زي م انتي و شدي حيلك لو حابه تتعيني ف الكليه و مش تستسلمي ابدا ربنا مش بيضيع تعب حد و اللي هتعمليه هتلاقي نتيجتة متخافيش 🤍 فكرة بقى يستحق الصراع ولا لا ف حسب ميولك انتي لو بتحبي التدريس ف هيكون حلو بجانب الشغل الاساسي و كمرتب عالي و ثابت و مكانه كويسه لو ملحقتيش ممكن تعملي ماچستير و دكتوراه ف التخصص اللي عايزة تشتغلي فيه بشرط تقدير ميقلش عن جيد فيه و لو الكليه محتاجه مش شرط كفرالشيخ ممكن المنصورة و طنطا و اي مكان محتاج دكاترة بتقدمي عادي ، لو مش حابه التدريس بقى و عايزة تكتفي ب شغلك و كدا كدا نفس المسمى و تختصري سنين الدراسه اللي بعد الكليه ف براحتك بردو و ربنا يقدملك الخير 🤍🤍🤍

ربنا ييسرلكم الامور و يجمع بينكم ف خير يارب مش مهم كلام الناس ولا كأنك سمعاه طالما انتوا عايزين تكونوا سوا ف كملوا و ساعدوا بعض و ادعميه هو محتاج دعمك علشان يكمل بلاش تكوني عليه مع اهله طالما هو شاريكي و بتحبوا بعض كمان بلاش تقولي انك ندمانه ، من رأيي ان كمان سنتين مش مشكله اوي على م يكون ظبط اموره ❤️‍🩹