لازم نقبل فكرة ان اهالينا مش هيكونوا محور حياتنا طول العمر.. انتي على الاقل 17/18 سنة وانا قدك سناً ف احنا بجد مش اطفال يعني.. الدعم مهم ده صحيح لكن بجد بعد تجارب كتير أدركت ان لو اعتمدنا اعتماد كلي على اهالينا في الدعم مثلا ف مهما عملوا هيفضلوا مقصرين.. ف انتي لازم تتعلمي تعملي لنفسك شخصية و تحبي نفسك و شكلك و مستواكي الدراسي لإن صدقيني نظرة الناس للبني ادم هي مراية لنظرته لنفسه.. ممكن لو انتي قاعدة في مكان ما و شوفتي بنت داخلة بثقه و بتتكلم بثقة تحسي قد ايه دي واحدة ناجحة او قد ايه حلوة بالرغم انها ممكن يكون شكلها عادي و مش ناجحة اوي ولا حاجة.. بس نظرتها لنفسها و نظرة الناس ليها هتكون مختلفة كتييير عن واحدة داخلة بخجل و باصة حواليها مهما كانت حلوة و ناجحة فعلا.. ف صلحي نظرتك لنفسك.. المقارنات هتفضل موجودة طول العمر بالمناسبة.. مرة من اهلك مرة من صحابك مرة من جوزك حتى.. للأسف ده طبع وحش في الناس ف حاولي تتناسي و تتغاضي عن ده علشان تقدري تعيشي يابنتي.. انجحي علشان انتي مش شايفة ان الفشل لايق عليكي لإنك شاطرة و مجتهدة و حبي شكلك علشان اكيد شكلك مميز و يتحب و ربنا بيخلقنا كلنا في احسن تقويم.. ف ابني نفسك الأول علشان تقدري تواجهي الناس و العالم و تكملي
تم النشر الأربعاء، ٧ مايو ٢٠٢٥
بصي انا كمان تالتة ثانوي و ظروفي السنة دي كانت بشعة بس ده مش مبرر.. بالعكس انا اخدت عهد على نفسي ان لو الإجابات جايالي جاهزة و متدبسة في ورقة الأسئلة برضو مش هغش.. احنا مش حمل اننا ناخد مكان حد تاني و يدعي علينا دعوة مظلوم تخلي حياتنا الجاية كلها جحيم.. و بعدين ليه مفترضة الأسوء؟ مش يمكن علشان انتي بارة بوالدتك و اخواتك الصغيرين ربنا ييسرلك الحال و يكافئك بمجموع كويس و حلال و تنجحي عكس تخيلك؟ فمتبقيش انتي اللي ضيعتي على نفسك الفرصة دي.. بالنسبة للفيزيا و الانجليزي يقدروا يتلموا و سهلة ان شاء الله.. الإنجليزي كل يوم خدي 2 units.. ااحفظي الكلمات الجديدة فيها و اسمعي شرح مختصر للجرامر و حلي شوية عليهم و في خلال اسبوع هيكونوا خلصوا و هتفضلي فاكراهم لإن مفاضلش كتير على الإمتحان.. بالنسبة للفيزيا خليكي ذكية فيها.. اسمعي فيديوهات كاملة على الفصل.. فيديو الفصل الأول دكتور كيرلس او محسن الحسيني و ذاكري و حلي قدر الامكان على كل فصل في كتاب المراجعة.. و ركزي على الفصلين التاني و التالت لإنهم الأصعب و اللي بييجي عليهم اكتر من نص الامتحان و ده كفيل ينجحك ان شاء الله بس احنا مش هنكتفي بالنجاح.. كملي و خدي الفصل الرابع و الحديثة بنفس الطريقة و دول سهلين و تقدري تلميهم بسهولة ان شاء الله.. و انسي التأجيل لإني عندي اخ اكبر كان مأجل من سنتين و بجد اسوء تجربة نفسية اتحطينا فيها كلنا مش هو بس.. رفض يذاكر في السنتين و خصوصا في السنة التانية لإن نفسيته كانت وحشة اوي و خصوصا لما شاف صحابه دخلوا كليات وهو لسة في ثانوي و لما النظام اتغير و انه كمان مع دفعة اصغر منه ف بجد متفكريش في التأجيل لا انتي ولا غيرك غير لما تكونوا متعرفوش كلمة في كل المواد ووقتها شهر فعلا مش هيكفي انما في حالتك شهر يكفي و نص ف متاخديش قرار تندمي عليه بعدين.. وبس اتمنى اكون فيدتك 🤍
تم النشر الأربعاء، ٧ مايو ٢٠٢٥
لعرض الملف الشخصي في فدني اضغط هنا