Esraa Mouawad

انا شايفة انها مشكلة ثقة بالنفس ، انت محتاجة تشتغلى على ثقتك بنفسك ووقت مايتكلموا ابذلى مجهود فى انك تخلى عقلك يبدل التفكير من دا لحاجة تانية خالص ملهاش علاقة بيهم يعنى مثلا فكرى فى حاجة تخصك انت ، فيه ناس كتير بيكون بينهم وبين بعض اسرار مابتتقالش قدام حد ماهو وارد جدا يكونوا بيقولوا اسرار مش بيتكلموا عليكى خالص ، اى حاجة علشان تغيريها هتاخد منك مجهود ودا طبيعى ، وعلى فكرة هتلاقى محدش مركز معاكى اصلا وكلامى مش بشكل سلبى علشان الجملة تتفهم بأكتر من معنى ، ولكن اقصد ان توترك دا ملوش لزمة وع الفاضى ومحتاجة كمان تفكرى فى انه حتى لو بيتكلموا عليكى طب مايتكلموا ، اللى يتكلم فى ضهرك ولو كلام وحش زى مابتقولى يبقى جبان وعارف انه كذاب والا كان هيواجهك ، انا دايما مقتنعة ان اللى فى ضهرى ولا يشغلنى ، المهم ان فى وشى بيتعملى حساب ودا الاهم

بص ياسيدى ، اولا هو القانون مش سامح بيه ولا حاجة ولكن فى الحالة دى احنا بنتكلم على التربية وسيب القانون دلوقتى ، ثانياً مفيش حاجة اسمها البنات كلهم مستغلين ولا الشباب كلهم مستغلين لان الطبيعى ان مادام فيه ارتباط يبقى كل شريك ليه احتياجات معينة ، فيه اللى احتياجاته عاطفية واللى احتياجاته مادية واللى نفسكه يكون أسرة مستقرة وهكذا ، وثالثاً بقى موضوع القايمة ، الدين مافيهوش قايمة بس شارط تبقى انت بتجهز الشقة من الإبرة للصاروخ والعروسة مفيش عليها اى حاجة ، ولكن نظراً لظروف الشباب فأهل العروسة بيقولوا نقسم البلد نصين وهنشيل معاك بشرط طبعاً تضمن حق بنتهم فى كل اللى جابوه ماهو محدش يضمن يشارك ويجهز بنته وفى الاخر ترمى بنتهم وتقول محدش ليه عندى حاجة والنوع دا كتير للأسف ، رابعاً بقى انا طبعاً مش هدخل فى نيتك حتى لو هى باينة فى البوست بس هقولك قبل ماتعمل حاجة حرام وتحاول تبررها لنفسك حط قدامك ربنا وان الغلط هيفضل غلط حتى لو كل الناس بتعمله ، وانك هتتعاقب عليه مهما كانت مبرراتك

طب ماتتكلمى مع باباكى فعلا وفكرى كويس قبل ماتتكلمى معاه وابذلى مجهود فى التفكير ومعاه علشان تقدرى تقنعيه وفهميه انك عايزة تدخلى كلية وعندك هدف وطموح وفكرى فى كل الردود اللى ممكن يرد عليكى بيها وفكرى فى اجابة مقنعة قبل ماتتكلمى معاه ، مثلا لو قالك البنت اخرها بيت جوزها قوليله ماهو الشهادة برضه بتفرق فى العريس يعنى مثلا لو معاكى كلية فالعريس اللى هيتقدملك غير اللى هيتقدملك وانت معاكى دبلوم او ثانوية عامة يعنى شوفى دخلته واهم حاجة تكونى واثقة من نفسك وانت بتتكلمى مش بغرور وكبرياء علشان مايعندش فيكى وواثقة من نفسك علشان يفهم انه هدف حقيقى مش اى حاجة تخليكى تخرجى وخلاص فاهمانى

اولاً ، ابعدى عن اى حد بيتعامل بالطريقة دى حتى لو هى صاحبة عمرك ماهى مش بالسنين اصلها ، ثانياً انت فى فترة من اهم فترات حياتك اللى لازم تركزى فيها جداً وتفوكك من اى حاجة تضايقك ونصيحة منى ماتركزيش مع صاحبتك دى ولا مع غيرها ، تجاهلى الجميع وركزى فى دراستك وهدفك علشان ماتندميش بعدين على كل دقيقة تضيع منك ، ركزى مع هدفك فقطططط، ولا تسمحى لاى حاجة تاخد منك وقت او مجهود يعطلك عن هدفك

بصى هو اولا انت مش فاشلة وطريقة التفكير دى غلط ، اى شهادة بتحتاج مجهود علشان تشتغلى بيها ومفيش حاجة اسمها مفيش راجل بيوافق يتجوز محامية دا مش علشان هى وحشة لا علشان هى فاهمة قانون وعارفة حقوقها وواجباتها ودا بيخوف بعض الناس اللى بترتكب اخطاء يعاقبه عليها القانون زى مثلا انه يضربها وهو عارف ان القانون هيجبلها حقها ، وبالنسبة للشغل ففيه شغل كتير جدا مش بيطلب نوع الشهادة ولكن المهم يبقى معاكى مؤهل عالى وخدى كورس انجليزى وطورى نفسك فى الكمبيوتر وهتلاقى شغل كتير ان شاء الله ، بصى ياحبيبى انا واحدة حاربت الدنيا كلها علشان اعرف اكمل دراستى وادخل حقوق اللى مش عجباكى دى وبعد كل المهزلة اللى مريت بيها فى الاخر ماوصلتش بس مايأستش ولسة بسعى وبكمل علشان عندى هدف وطموح ، اشتغلى على نفسك وطول ماانت بتجتهدى وبتسعى ماتزعليش لان السعى عليكى والنتيجة دى بتاعة ربنا

تبطلى تدى اوردر لعقلك انك بتحبيه ، وكل ماييجى على بالك الهي نفسك فى اى حاجة وماتسمحيش لعقلك يكمل تفكير ولازم تتجاهليه وتتجاهلى اى حاجة تخصه من جواكى مش بس من برا

خليك واثق فى حكمة ربنا ، وان دا بيحصل علشان يعلمك حاجة معينة جايز انت لسة مش عارفها دلوقتى ، بس الأكيد ان ربنا شايلك الشخص اللى يستاهلك ويعوضك بيه واوعى تستقل بنفسك مهما حصل وتشكر ربنا على خلقته اللى انت ملكش يد فيها وتحب نفسك زى ماانت ، واللى بإيدك بقى هو اخلاقك وشخصيتك ، اهتم بنفسك وبشكلك وطور فى نفسك وفى عقلك واهتم بشغلك واهتم بتطوير نفسك والشخص اللى من نصيبك ربنا هيبعتهولك ماتقلقش

اتمرن مع نفسك فى اوضتك انك تتكلم فى مواضيع مختلفة بطلاقة ، ومثل مع نفسك قدام المراية بس مش لفترات طويلة قدام المراية ، اتعلم تشوف ع النت سكريبت وتتمرن تعمله بأداء معين وتحسن ادائك وكدا موضوع التمثيل مع نفسك دا هيفرق معاك جدا ، وأقرأ ثم اقرأ ثم اقرأ لان القراية هتوسع مداركك جدا ومع الوقت هتبقى واثق من نفسك وفى كلامك وفى معلوماتك ، وأقرأ فى مجالات مختلفة علشان توسع وعيك وتبقى ملم بمجالات كتير

وارد جدا تكون دماغك هنجت ومحتاجة تترستر بإنك تاخدى يومين بريك كدا تروقى على نفسك ، مثلا خرجى نفسك خروجة بس تكون حاجة كدا من العيار التقيل مش خروجة عادية ، اعملى حاجة تخلى دماغك فعلا تفصل يعنى مثلا انا فى المواقف دى بحب اروح ملاهى والالعاب وانى اطير فى الجو فترة دا بيخلى دماغى تترستر وانت شوفى ايه اللى ممكن يعمل معاكى كدا ، وكمان حاولى على قد ماتقدرى تلتزمى بالأذكار وارقى نفسك بالرقية الشرعية البسيطة كل يوم وان شاء الله ترجعى احسن من الاول

بس انت متأكدة انها خيانة ولا كلام عادى ولو خيانة وصلت لحد فين

وتهزقيها هى ليه ما الغلط الاكبر على جوزك ، احنا ملناش دعوة بتربية الناس ، اللى يخصنا اللى تبعنا