Doaaa Syed

للأسف نظرة اهلنا لينا مهمة ومؤثرة جدا في شخصيتنا .. ممكن باباكي شايف انك الكبيرة ومش محتاجة اهتمام وان الصغيرين هما الي محتاجين الاهتمام .. صعب نغير طريقة باباكي بس ممكن تدعي ربنا يهديه عليكي .. واشتغلي على نفسك حبيها وقوليلها كلام جميل واكتبي انجازاتك في الحياة زي انك بتحفظي القران وبتشتغلي دا هيزود ثقتك في نفسك .. حاوطي نفسك بالناس الي بتحبيهم وبيحبوكي عشن تعوضي الشعور السيء الي بيوصلك من باباكي .. واهم حاجة وانتي بتختاري شريك حياتك ماتقعيش فريسة للي يديكي الاهتمام بس والكلام الحلو عشان انتي كنتي مفتقداه من باباكي

معلش أكيد وفاة والدك اثرت على البيت وهتلاقي والدتك شايلة الهم والمسئولية زادت عليها اعذريها .. إنتي حاولي تدوري على حاجة تشغلي بيها وقتك .. ممكن تنزلي تشتغلي او تاخدي كورسات على النت وتتعلمي حاجة جديدة .. إعملي لنفسك بابلز تعيشي فيها وتستمتعي .. لما يناموا بالليل اسهري واعمليلك عشا واتفرجي على حاجة بتحبيها .. إنزلي إتمشي كل يوم نص ساعة .. وعبري عن مشاعرك بالكتابة وطلعي كل الي جواكي من حزن وزعل واحلام .. حبي نفسك وافهميها وطبطبي عليها لأنها تستاهل انها تتحب 😊

انتي ماغلطتيش انتي عملتي حدود لحياتك الشخصية .. ودا من حقك وطبيعي انهم هيزعلوا وهياخدو موقف .. هيا بداية وضع الحدود بيكون صدام زي الي حصل .. بعد كدا هيعملولك حساب .. خلي علاقتك بمراة اخوكي دي رسمية جدا ولو رمت كلمة سخيفة بهزار ارمي برضه كلمة اسخف بهزار برضه .. وبالنسبة لباباكي ومامتك راضيهم وماتزعليهومش وحاولي تكسبيهم الفترة دي بتصرفات كويسة وتبينلهم انك مش عايزة تزعلي حد .. يعني تتمسكني بمعنى أصح وتطلعي انتي الضحية زي مرات أخوكي مابتعمل .. اتعاملي بذكاء عشان تكسبي .. الصدام هيخسرك كتير وهتطلعي انتي الوحشة والشريرة

اضطراب فرط الحركة وتشتت الانتباه مش مرض مخيف هو بس بيحتاج طريقة تعامل مختلفة وجلسات لتعديل السلوك وتنمية المهارات وبيكون في تحسن كبير ماتقلقيش عن تجربة شخصية .. اهم حاجة تعاملك معاه في البيت مافيش ضرب وعصبية وبلاش عقاب قاسي كفاية يكون العقاب انك تزعلي منه .. نوعية الاطفال دي بتحب الاحضان جداا .. والكلام الايجابي بيجيب نتيجة افضل من اللوم والتأنيب .. ولعلمك في مشاهير كتير وعلماء كان عندهم Adhd اضطراب تشتت انتباه وفرط حركة .. منهم السباح العالمي مايكل فيليبس ولا عب كرة السلة العالمي مايكل جيوردان .. فابنك مميز وعنده طاقة لو استغليتيها صح وصبرتي عليه هتفخري بيه لما يكبر

في مرحلة في حياة الإنسان بيكون فيها متلخبط ومتخبط مش عارف هو عايز ايه وغالبا بيكون سن العشرينات .. انتي محتاجة تقعدي مع نفسك بالراحة وتركزي معاها وتفهمي احتياجاتها .. لو انتي بتدرسي يبقى تركزي على الدراسة ومستقبلك . ولو خلصتي دراسة يبقى لازم تشغلى وقتك وتدوري على شغل ولحد ماتلاقي شغل ممكن تشوفي عمل تطوعي يشغل وقتك وكمان هيخليكي تحسي بقيمة نفسك وانك مفيدة .. القراءة جميلة وبتخليكي تطيري في عالم من الخيال .. وممكن تبدأي بقصص تشجعك على القراءة وبعدين تدخلي الكتب الي تساعدك على التفكير الايجابي .. خلي بالك الفراغ عدو خبيث للإنسان ومدخل للشيطان .وقبل كل كدا استعيني بالله وحاولى تقربي منه وتدعيه من قلبك هينور طريقك ويفتح لك ابواب ماكانتش على بالك .. واشغلي وقتك وهتلاحظي تحسن ان شاء الله

انتي محتاجى تروحي لربنا زي ماانتي هو الوحيد الي هيقبلك من غير مايعايرك .. ولو مش قادرة تصلي ادعي وقوليلوا عايز اتوب وسامحني واقبل توبتي .. وحاولي تستغفري كتير وتشغلي وقتك مع بنتك وبيتك وجوزك .. اعتبري الي فات صفحة واقطعيها .. وإبدأي بداية جديدة مع جوزك ومع ربنا وماتتطلقيش ولا تحكي حاجة اجوزك .. ربنا سترك ماتفضحيش نفسك

محتاجة استشارة طبيب وتعملي تحاليل وغالبا الكسل والارهاق نقص فيتامين د او انيميا .. والدكتور هيكتبلك على علاج .. وومكن تاخدي فيتامينات تساعدك لحد ماتروحي لدكتور .. زي فيتاماكس او رويال فيت جي .. دي مكملات غذائية فيها مجموعة فيتامنات هتساعدك ان شاء الله وسعرها مش غالي

من حقك كل الحق انك ماتجاوبش على سؤال مش عايز تجاوب عليه والي عايز يزعل يزعل دي خصوصياتك .. ولازم تحط حدود لحياتك ممنوع حد يعديها .. بالنسبة للاسئلة عن درجات اوي اي شيء خاص هترد بالحمد لله وتغير الموضوع بانك تسأل الشخث اي سؤال تاني .. ولو رجع وسألك برضه هترد بالحمد لله .. ربنا سترها معايا وشكرا على كدا .. وماتحسش بالضغط او الإحراج وحط في دماغك هو مالوش حق يعرف .. بالنسبة للسخرية على الشكل مثلا فهترد بانها خلقة ربنا مع ابتسامة بسيطة لو على صفات زي غبي او تافه هترد بانك احسن من ناس كتير وانك مش شايف نفسك كدا مع ابتسامة بسيطة وتقوم من المكان او تبدا كلام مع حد تاني بحيث انك توصله رسالة ان الكلام خلص ويوقف سخرية

ليه تتجوزي في السن دا ؟وبالطريقة دي .. عند محامي .. مش شايفة انك قلتي اي ظروف تخليكي تتجوزي شخص اكبر منك .. انتي لسه صغيرة اوي اوي ولسه هتشوفي ناس وطريقة تفكيرك هتتغير .. ماتستعجليش عشان تلبسي فستان الفرح .. الجواز مسئولية كبيرة اوووي والاطفال كمان .. خلصي دراستك واشتغلي وبعدين فكري في الجواز .. واختاري شخص تقدري تعيشي معاه ويكون شريك حياتك وتلاقي في الصفات الي تحبي تكون في جوزك وابو عيالك .. فركشي طبعا ياحبيبتي

هيا الناس بتتغير دا طبيعي وسنة الحياة . واخوكي كمان اتجوز واولياته اتغيرت غصب عنه وانتي لازم تفهمي دا وانتي كمان لما هتتجوزي اولوياتك هتتغير وانتي هتتغيري .. ومش لازم تحكيله حاجة طالما مراته بتعرف والموضوع بيقلب باذى ليكي .. وحتة تخبي مشاعرك ربنا خلقنا عندنا مرونة ونقدر نتعلم اتعلمي تخبي مشاعرك لان العتاب مش هيفيدك طالما النفوس مش صافية ..شيليهم من حساباتك وعيشي حياتك

واضح ان بنوتك مفتقداكي ومحتاجة حنانك ووجودك جنبها .. وواضح ان الاهل وانتي بتدلعوا البنت الصغيرة وواخدة اهتمام زيادة عن الكبيرة ودا سبب لعنف البنت الكبيرة بتحاول تشد انتباهكم ولو حتى بالتصرفات الغريبة او العنف او رفض الاوامر.. حاولي تبدأي تبني علاقة كويسة معاها حاولي تحضنيها وتقوليلها كلام حلو وتجيبلها حاجة حلوة معاكي وانتي راجعة من الشغل هيا لسه طفلة على فكرة ..ابعدي عن التهديد والتخويف والعقاب عشان هيخلي الأمور تسوء اكتر .. حسسيها انها بنوتة كبيرة وتقدر تخلي بالها من اختها الصغيرة .. تجنبي تمدحي الصغيرة قدامها وتدلعيها ولو حد من الأهل دلع الصغيرة ونسي الكبيرة انتي احضنيها وقوليلها انتي كلام حلو ..