أهلاً Maha! مبسوط إني أول مشارك بإجابة على سؤالك، والأهم إني وقعت في نفس المشكلة! في أسباب كتير ممكن تندرج تحت إنك بتضيعي وقتك: مش حابة الكورس فعلاً، مش مستعدة نفسياً، شعورك إنك مجبرة تخلصي.. وغيره وغيره. هحكيلك لما كنت زيك عملت ايه، وطبعاً ممكن يناسبك واحتمال لأ، فـ خلينا نشير مع بعض: ١. أركن الكورس أو الموضوع ده لوقت تاني. ٢. أجرب طريقة تانية، يمكن مش شخصي بصري، أكون سمعي مثلاً فأسمع بودكاست عنه، أو أقرأ كتاب. ٣. لو لازم أخلص لأني محتاجه، يبقى أمشي بمبدأ "خير الأعمال أدومها وإن قل"، يعني ربع ساعة كل يوم أحسن من ساعة مرة في الأسبوع. ٤. أدور على زملاء في نفس المجال نذاكر سوا. ٥. أسأل حد Mentor مثلاً إزاي أقدر أستفيد بالكورس أو الطريقة المثلى للتعليم منه. ٦. أحدد وقت على Calendar بشكل يومي وله reminder عشان ماسقطش. ده أغلب اللي عملته واللي الحمد لله جاب نتيجة. أتمنى تكون فيهم حاجة مفيدة. وأتمنى لك كل التوفيق! 🙏🏻
تم النشر الخميس، ٨ يونيو ٢٠٢٣
أهلاً كمال! مبسوط إني أول اللي بيشاركوا اجابتهم على سؤالك العظيم. إنت بتعمل مجهود عظيم جدا، عقلك قدر يخزن كتير سواء كلمات أو تعبيرات وحتى سياق الكلام.. طيب وبعدين؟ محتاج بقى تطلع كل المخزون الهايل ده.. إذن هذا وقت التدريب! لازم تعود دماغك ولسانك إنهم يتكلموا، وتبقى بتدور على الكلام في عقلك.. فـ تقطع وتفضل تقول "ااااا ايه.. اااا" ده مهم جدا. ليه؟ بالظبط لأنك بتمرن دماغك إن في طريقة تانية للتعبير محتاجه يتعود عليها. محتاج تدور على أبلكيشنز تتمرن فيها على الكلام مع Native، ممكن حلقات Conversation Club، أو حتى تتكلم مع صحابك اللي حابين هما كمان يتمرنوا. طبعاً تقدر تستخدم الذكاء الاصطناعي زي Bard من مايكروسوفت -على الأقل- وتقدر تسأل عن مواقع أو أبلكيشنز تساعدك في ده. أتمنى اجابتي الطويلة تفيدك قدر الإمكان.. and let's start practicing ahead! 💪🏻😎
تم النشر الأربعاء، ٧ يونيو ٢٠٢٣
أهلاً بيك يا زميل! بما إني إتش آر، وتحديداً في مجال التوظيف خليني أشير معاك كام نقطة قد تفيد مع باقي ترشيحات الزملاء. ١. اقرأ كتير عن المجال ومن مصادر عربي وانجلش زي SHRM, HRCI, ناصر طه، محمد اليماني، ياسمين الشيخ وغيرهم. ٢. لازم تستخدم لينكدإن، ده مكان التجمع! ظبط بروفايلك كويس جدا وتابع كل الزملاء. ٣. حالياً مفتوح كذا internship على لينكدإن في جزء Jobs. ٤. تابع موقع وظف بشكل أساسي يومياً، عليه فرصة لطيفة للي بيبدء. ٥. اقرأ كتير تاني. ليه؟ عشان تعرف إنت عايز تشتغل في أي جزء من الإتش آر! والأهم أي Industry. ٦. السعي مهم، انزل وجرب وخبط على كل الأبواب. ٧. ابعت لي وخلينا نظبط ال CV ولينكدان كمان وندردش مع بعض أكتر، لعل وعسى يكون فيها إفادة. أخيراً.. المجال ده بيتجدد كل يوم، وبيعتمد على شخصيتك في المقام الأول وليست الكورسات أو الدورات! سيمون سنيك بيقول جملته الشهيرة اللي الكل بيستخدمها: "You don't hire for skills, you hire for attitude, you can always tech skills". وربنا يوفقك إن شاء الله لكل خير 🙏🏻
تم النشر الاثنين، ٥ يونيو ٢٠٢٣
أهلاً @Asma بما إني HR خليني أرد على نقطة وأؤكد على كام نقطة تركزي فيهم. الايموجي زي ما الأصدقاء جاوبوا ممكن تدخل تحت كذا سيناريو ومش ضروري يكون سئ أو له مدلول مريب. بس على الهامش خدي حذرك من النقط دي: ١. مفيش شركة محترمة هتقولك ابعتي CV على واتساب. ٢. لازم إعلان الوظيفة يتكتب فيه اسم الشركة. ٣. تبحثي عن الشركة سواء لها بيدج على فيسبوك أو لينكدإن أو موقع website. ٤. ابحثي عن عنوانها على Google Maps واتأكدي إنها موجودة مش مجهولة. ٥. اسألي عن الشركة على جروب زي Don't Work There على فيسبوك ممكن تلاقي حد أولريدي بيشتغل هناك. ٦. خلي ال CV من غير صورة أفضل، ده لو ضايفه صورتك. ٧. اعرفي من ال HR هتقابلي مين اسمه ووظيفته. وربنا يوفقك لما فيه الخير 🙏🏻
تم النشر الاثنين، ٥ يونيو ٢٠٢٣
أهلاً يا كمال! شكراً ليك على تعقيبك. أقصد -مش النطق- بس إنك تفكر في الكلمة المناسبة. بالبلدي كدة: دماغك بتعطل ثواني علشان تلاقي الكلمة أو الوصف المناسب اللي تكمل بيه الحوار. في هنا في اسكندرية clubs زي دي وممكن تشوف في جروبات على فيسبوك حسب المحافظة أو أونلاين طبعاً. وأخيراً أتمنى لك كل التوفيق. Let's Rock it!
تم النشر الأربعاء، ٧ يونيو ٢٠٢٣
ممكن تشوف فرص Internships من موقع وظف، وده اللينك. بالتوفيق
تم النشر الثلاثاء، ٦ يونيو ٢٠٢٣
https://wuzzuf.net/a/Human-Resources-HR-Jobs-in-Egypt?filters%5Bjob_types%5D%5B0%5D=internship
تم النشر الثلاثاء، ٦ يونيو ٢٠٢٣
عظيم جدا، العفو بالتوفيق إن شاء الله 🙏🏻
تم النشر الاثنين، ٥ يونيو ٢٠٢٣
لعرض الملف الشخصي في فدني اضغط هنا