سُوما صَابِر 💗'

لا حول ولا قوة إلا بالله، ارجعي صلي يا غالية، اجبري نفسك على الصلاة، أول ما يُسأل العبد عنه يوم القيامة الصلاة، ف حاولي ترجعي واحدة واحدة تصلي لأن دي أول حاجة بتكون سبب في استقرار علاقتك النفسية بنفسك !, ولو بتسمعي أغاني أو بتتفرجي على مسلسلات حاولي تبطلي على قد ما تقدري يا غالية واستبدلي الحاجات دي بحاجة نافعة ليكِ، واقرأي قرآن واذكري الله كتير، ربنا سبحانه وتعالى بيقول (ومن أعرض عن ذكري فإن لهُ معيشةً ضنكًا)، يعني أنتِ مش بس تركتِ ذكر الله، أنتِ مش بتصلي ! ، ف أكيد حياتك مش هتبقى وردية زي ما تتمنيها، واستبدلي الأغاني والمسلسلات بسماع القرآن أو أنك تسمعي بودكاست وتتفرجي على حلقات تفيدك أو تقرأي في كتاب أو أي شيء، لأن أكيد أنتِ مش حابة حالتك دي وعاوزة تطلعي منها، وأكيد مش هتطلعي منها غير بالإستعانة بالله وأنك تحاولي ترجعي وتتوبي لله عز وجل، وتذكري الله كتير وبإذن الله نفسيتك تتحسن ويبقا عندك قابلية لكل دا، متخليش شيطانك أقوى منك يا غالية، والنصيحة دي من حد كان في نفس موضعك قبل كدا، ولله الحمد على الهداية، الله يردك إليه ردًا جميلًا.

شوفي يا غالية، واضح أن صحبتك شخصياتكم مش متوافقة، يعني مثلًا هي كتومة وأنتِ بتحبي تتكلمي وتعاتبي، أنتِ عصبية وهي هادية في نظرك زيادة عن اللزوم وغيرها حاجات توضح إختلاف شخصياتكم، وبسبب هدوءها هي يمكن شخصية بيتوتية بس عشان أنتم شخصياتكم مختلفة وبتحبوا الخروج ف هي مش عارفة تعبر عن دا، ويمكن هي كمان بتحاول مع نفسها تحب الخروج عشان تبقا شبهكم بس مش عارفة، وفيه كام نقطة تاني حطيهم في الإعتبار، بتقولي أن عندها مشاكل في البيت، ف يمكن نفسيتها مش بتبقا أحسن حاجة بسبب كدا، وفيه ظروف بتحصل معاها مش بتعرف توضحها، خاصة نقطة أنه ممكن أهلها يكونوا من النوع اللي بيقولوا لها سر البيت مش بيطلع برا (ودا الصح في العموم 😅)، ف مش بتعرف تحكي حتى لأقرب صديقاتها بسبب أنها تعلمت كدا ف بيتها، ف بصي التمسي لصديقتك أعذار، أنا عارفة أنه يمكن أنتِ تعبتي منها ومن تصرفاتها، بس هي واضح أنه فيه شيء معاها هي مش عارفة تُفصح عنه، ف خليكِ هادية معاها؛ لأن برضو واضح من كلامك أنه يمكن بتحصل منك وبتتعصبي عليها حبة ف هي ممكن مش بتعرف ترتاح وتحكي، ف هو بصي الفترة اللي جاية خليكِ هادية معاها، وف مرة كدا بكل هدوء بدون أي عصبية قوليلها يا فلانة مالك لو فيه شيء جواكِ احكيلي وأنا هفهمك بإذن الله، متضغطيش عليها ومتحمليهاش فوق طاقتها وقوليلها أنه لو مش هتعرف تحكي دلوقتي مستنياها تيجي تحكيلك ف الوقت اللي يريحها، وبإذن الله الأمور تتيسر وتحكيلك، وهي المشكلة أنه بتقولي حاليًا مش هتعرفي تكلميها على حالها دا في الموضوع دا يعني ف عشان كدا بقولك خليكِ هادية الفترة دي عادي وبعد فترة اسأليها، وخلي بالك هو مشكلة العلاقات الثلاثية في الصداقة أنه في الغالب فيه شخص بيبقا مستبعد حبتين يعني مش كل حاجة بتحصل ف وجوده، ف دا ممكن يأذي مشاعرها لو مثلًا دا بيحصل بينك وبين صديقتكم التالتة وهي ف النص ف أكيد ممكن تزعل، ف لو بتحبيها حاولي تراعي مشاعرها شوية عن كدا، وواضح أنك بتراعي مشاعرها أو زعلانة على حالها عشان كدا سألتي، ف بإذن الأمور بينكم تتيسر وتبقا أفضل بينكم بإذن الله.

بطلي تسمعي أغاني واستبدليها بالقرآن لشيوخ صوتهم قريب لقلبك وهتلاقي فرق كبير جدًا، قلبك هيخشع جدًا وهتلاقي أن قربك لله بيتيسر، وادعي ربنا كتير أنه يرزقك الهداية ويُنير بصيرتك، هتلاقي بإذن الله نفسيتك تغيرت 180 درجة، وأنا حقيقي حاسة بيكِ جدًا عشان كنت مكانك في وقت من الأوقات ودا اللي أنقذني من مشاعري الفوضوية والخنقة اللي كنت بحس بيها بدون سبب، وطبعًا حاولي فروضك تصليها على وقتها وأكثري من الذِكر، ربنا سُبحانه وتعالى قال ﴿ومن أعرض عن ذكري فإن لهُ معيشةً ضنكًا﴾، ف الحل للي أنتِ فيه هو أنك تقربي لله أكتر وأكتر وتُكثرِي من الإستغفار والصلاة على النبي 🫂💗.

وعليكم السلام ورحمة الله وبركاته، الله يهدي أهلك ويرشدهم الصواب يا رب، بإذن الله ليس عليكِ ذنب، المهم أنك تستمري في الدعاء ليهم وحقيقي الدعاء بيفرق جدًا سُبحان الله، وأنتِ عملتي اللي عليكِ ونهيتيهم عن الفعل دا؛ مش هقولك خلاص يبقا هما براحتهم وأنتِ عملتي اللي عليكِ، لا خليكِ وراهم، بس عاوزة أقولك شيء يمكن طريقتك في النصيحة متعجبهمش أو كدا وميرتاحوش ف برضو يعملوا اللي ف دماغهم، ف لو حسيتي أن كلامك معاهم ناشف شويتين ممكن تحاولي ترققي الكلام معاهم، لأن حوار أني أسمع كلام حد بينصحني بيختلف من شخص للتاني، ممكن تحاولي تبعتيلهم فيديوز لشيوخ بيتكلموا في الأمر دا يمكن يسمعوا لهم ويحاولوا يتغيروا، وربي سُبحانه وتعالىٰ قال (وأمر أهلك بالصلاة واصطبر عليها) يعني اصبري عليهم، في الزمن اللي احنا فيه اللي الحرام بقا مُباح عادي ف هتلاقي الإستجابة المبدئية صعبة، ولكن خليكِ وراهم وزي ما قولت لك ممكن تغيري أسلوب النصيحة بما يتماشى مع شخصية اللي قدامك ودا بيفرق جدًا وادعيلهم كتير خالص، وطبعًا بإذن الله ليس عليكِ إثم أنتِ عملتي اللي عليكِ والحمد لله، المشكلة أن دول أهلك مش صحابك مثلًا ف هقولك اجتنبيهم وهكذا، ف بما أنهم أهلك ومعاكِ ف نفس البيت كدا كدا ومعارضة لكل شيء بيعملوه فما عليكِ إلا النصيحة والدعاء وبإذن الله ربي يرزقهم سبيل الصلاح، ولا تكلي ولا تملي منهم، لأن هما أهلك، أكيد هتتمني يكونوا معاكِ في الجنة بإذن الله، وخلي قلبك لين في سبيل الدعوة مفيش حاجة بتيجي من مرة واحدة، أنتِ قولتِي أنك نصحتيهم كذا مرة ف تابعي واحتسبي الأجر والنية لله سبحانه وتعالى وبإذن الله لكِ الأجر والله يجعل هدايتهم وصلاحهم بفضل منك بعده سبحانه وتعالى 🌸.

أنا معنديش مشكلة في سؤالك، سؤال طبيعي ولكن الفكرة أن أغلب اللي ردوا عليكِ، بيقولوا دا للست الناشز وبيكون آخر حل ومش شرط بالمسواك يعني ودا مثال على خفة الضربة ليس إلا !، لكن أنتِ مُصرة على فين الرحمة في كدا ومضايقك أن المرأة بكونها مرأة هتتعرض للضرب حتى لو بخفة ! ، لاحظي أنك بتتكلمي في شرع الله، وأنك معترضة على شيء اللي شرعه هو الله سبحانه وتعالى اللي خلقنا وأعلم بماهيتنا وهو أقرب إلينا من حبل الوريد يعني أعلم حبيبتي بما هو أصلح لنا واي لا ! ، حبيبتي الفكرة هنا أنه فيه أشخاص جدًا سيئين وفي شيء اسمه حدود لو حد تعداها بيُعاقب عادي جدًا، يعني هو أنتِ لفت نظرك أنه المرأة تُضرب ولو حتى بمِسواك (كمثال زي ما الأخ وضح فوق) ولم يلفت نظرك أن السارق والسارقة (ولاحظي يعني هنا برضو ذكر كان أو أنثى) تُقطع أيديهم ! ، مش مجرد ضربة !، وافتكري أن الدين نقل وليس عقل !، يعني هو ما نُقل عن الرسول صلى الله عليهِ وسلم وبلاش تخلي عقلك يفكر كتير في أمور زي دي، لأن محدودية عقلك مش هيستوعبها، ودا من رحمة ربنا بينا على فكرة هو إقامة الحد على السارق أو الزاني أو حتى شيء بسيط زي الضرب الخفيف للمرأة الناشر ! ، عشان المجتمع لو لم تُقام فيه الحدود أو غيرها هيفسد، الموضوع بالضبط زي مثلًا القوانين اللي بتُقيمها الدولة للقاتل أو السارق أو المرتشي أو غيرهم عشان لما حد يشوف القوانين دي واي اللي بيحصل فيهم وأنهم بيُسلبوا حريتهم المفروض يعني أنهم يتعظوا وميكرروش أخطاءهم !، يعني الأمر بسيط جدًا، واحنا طبيعتنا كنساء عاطفيات جدًا، ف الحاجات دي بتؤثر فينا طبيعي، بس لما تعرفي أنها من رب رحيم وهي أشياء بس عشان الناس تتعظ ليس إلا، ف متخافيش، صِدقًا الموضوع أيسر من كدا، وأهون من كدا، متفكريش بعاطفتك أو عقليتك بس، فكري أن اللي أجاز شيء زي دا هو اللي خلقنا وأقرب إلينا من حبل الوريد وأعلم بنا منا .