محمد طارق

أنا حاسس بيكي جدًا، واللي كتبتيه يوضح قد إيه قلبك حساس ونضيف. عايزك تعرفي حاجة مهمة: قيمتك مش في اللبس ولا في الشنطة ولا في الحاجات المادية، قيمتك في قلبك، أخلاقك، تفكيرك، واهتمامك بنفسك. ممكن تلاقي حد لابس أحلى هدوم، لكن من جوه مش مرتاح ولا سعيد. الظروف الصعبة دي مش عيب فيكي، بالعكس، دي هتخليكي أقوى وأنضج. واللي بيكبر في ظروف صعبة، بيبقى عنده قوة ووعي أكتر من غيره. أما عن الدعاء: ربنا عمره ما بيتأخر عن عباده، بس ساعات الاستجابة بتيجي بطريقة غير اللي إحنا متخيلينها. ربنا ممكن يديكي قوة وصبر، يفتحلك أبواب تعلم ونجاح، يرزقك بحاجات ما كنتيش متوقعة. المهم تفضلي تدعي وتكلمي ربنا ببساطة زي ما بتكلمي أي حد بتحبيه، قولي له كل اللي في قلبك. حتى لو ما شوفتيش النتيجة دلوقتي، صدقيني الدعاء بيغير حياتك وبيخلي ربنا معاكي في كل خطوة. خليكي واثقة إن المستقبل مش مربوط باللبس ولا الظروف اللي إنتي فيها دلوقتي. المستقبل مربوط بإصرارك إنك تتعلمي وتطوري نفسك. واللي بيسعى وبيتعلم، ربنا بيفتحله أبواب ما تخطرش على باله. نصيحتي ليكي: متقارنيش نفسك بحد، كل واحد له اختبار مختلف. كل مرة ييجي في بالك فكرة سلبية زي "أنا مش هنجح" أو "أنا أقل من غيري"، قولي لنفسك: "لأ، أنا لي قيمة عند ربنا، وربنا معايا". افرحي بأي حاجة صغيرة بتحققيها، دي خطوات مهمة. إنتي غالية أوي عند ربنا وعند اللي بيحبوكي، وما تخافيش من المستقبل، هو في إيد الرحمن الرحيم. 🌷

شوفت كلامك عن المجموع القليل ووعود ربنا، وعايز أقولك حاجة مهمة: ربنا سبحانه وتعالى رحيم ومعانا دايمًا، مش معنى إن حاجة معينة ما اتحققتش إن ربنا مش سامع أو مش رحيم. الصحابة نفسهم كانوا بيدعوا وبيتعذبوا في مكة وما كانش الدعاء بيُستجاب وقتها بالطريقة اللي هما عايزينها، لكن كان ربنا بيجهّز ليهم فتح أكبر ونصر أعظم. ربنا قال: "وأن ليس للإنسان إلا ما سعى". يعني رزقك ونجاحك مربوط بسعيك ومجهودك مش بمجموع ولا ورقة تنسيق. الموضوع مش نهايتك، ولا كليات القمة معناها قمة بجد. دي مجرد وهم اتزرع في دماغنا. بصي حواليك: الطب في مصر مثلًا نص اللي فيه مش بيتابع أبحاث جديدة، وأخطاء التشخيص عندهم كتيرة. واللي بيبقى ناجح فعلًا هو اللي يثبت نفسه في مكانه، مش اللي عنده لقب "دكتور" أو "مهندس". شوفي مثال "الزيرو" كان خريج خدمة اجتماعية، والنهاردة من أكبر المبرمجين في الوطن العربي. الدنيا دلوقتي مفتوحة جدًا، تقدري تتعلمي أي حاجة من بيتك حرفيًا. المهم السعي. ونقطة مهمة جدًا: إنتي نجحتي لأنك مغشتيش، دي أكبر شهادة إنك واقفة على أرض صلبة. أكبر تهديد هيواجهك هو عقلك، هيحاول يزرع جواكي أفكار سلبية: "أنا فشلت"، "مفيش أمل"، "خلاص ضاعت". لازم تفهمي إن مش كل فكرة بتيجي في دماغك صح أو نافعة ليكي. كمان التسويف عدوك، هيفضل يقولك "بكرة"، "بعد شوية"، لحد ما يضيع عمرك. خلي عندك يقين إن اللي بيزرع صح ويحافظ على سعيه بيشوف نتيجة، يمكن مش النهاردة لكن بكرة. واللي مع ربنا عمره ما يضيع.

احساسك دليل علي صحوه القلب وطبيعي الإيمان يزيد وينقص دا حتى الصحابه إيمانهم يزيد وينقص في البدايه تحاولي تعملي تخلية يعني أوقف الذنوب مع تحلية يعني اضافه عبادات جديده ومش شرط تكون كبيره تكفي ركعه قيام الليل أو دعاء للأهل وللنفس او تصدق ولو بجنيه ابتسامه في وجه صديقاتك انويها لله طب لومعرفتيش تبطلي ذنب معين خلاص استمري في التحلية مع الدعاء وانصحك تتابعي محتوي ديني زي الشيخ علاء حامد في سلاسل التفسير او سلسله إصلاح النفوس وانصحك بودكاست وعي وايه المشكله ولاتنسي الدعاء الدعاء فوالله هو من اقوي الاسلحه لدى المؤمن

وحابب اضيف انت بتذاكر وبتنجح لنفسك متهتمش بصوره الناس عنك اهم حاجه تكون صورتك عن ذاتك سليمه وكون رحيم بنفسك

حسب تجربتي وما قرات أكبر عدو ليك هو عقلك العقل عايز الجسم ميبذلش اي مجهود ويبقى في منطقه الراحه فبيستخدم اسلحه زي الخوف والكسل واحيانا التعب الجسدي فلازم تفهم انه المشاعر الي بيستخدمها العقل ضدك دي مشاعر مؤقته ونصيحه اعمل جدول بسيط للمذاكرة ولو حاسس انك مش قادر تذاكر قول لنفسك انا هقوم اقرا صفحه واحده فقط وبمجرد ماتقرأ هتلاقي نفسك اتفتحت علي المذاكره واستخدم قاعده ال5 ثواني وابحث عنها اكتر وكافئ نفسك بعد المذاكره بحاجه بتحبها واستخدم تشات جبتي يعطيك حلول افضل وأهم شئ لاتنسي انه لاحول ولا قوة الا بالله العلي العظيم وافتكر انه اكبر حاجز يمنعنا من فعل الأشياء يكون داخلنا وفي البدايه هتلاقي الموضوع صعب بس لو التزمت اسبوعين هتلاقي الموضوع سهل وادعي ربنا انه يوفقك متخافش انت لسه في البدايه والموضوع هيكون بسيط بفضل الله

اولا الحمد لله على قضاء الله وقدره وعمره ماكان النجاح انه يتقال للشخص يادكتور او يامهندس ياما ناس في طب وهندسه ومنجحوش اهم حاجه تختاري صح وتختاري الحاجه الي هتحسي انك هتبدعي فيها قبل ماتدخلي اي كليه ابحثي عنها وشوفي مجالاتها وأثبتي نفسك في المكانالي هتكون فيه والمؤمن كالغيث أينما حل نفع قيمتك في ذاتك وماتعتقدينه مش في طب وهندسه وادعي ربنا انه يلهمك للطريق المناسب

اولا تقبلي مشاعرك الي بتحسي بيها وكلنا لما بنبص حوالينا بنلاقي الناس متقدمه علينا فمتقارنيش نفسك بحد حاولي تقعدي اكتر مع العيله وتشوفي حاجه بسيطه بتخليكي سعيده واعمليها مثلا كوبايه شاي في البلكونه وحاولي تنجزي ولو حاجه بسيطه في اليوم وتكافئ نفسك عليها وانا عن نفسي كنت بستخدم تشات جبتي وبساله وساعدني في حاجات كتير واختلطي اكتر بالناس ومتنسيش تدعي ربنا انه يفرج همك ويرزقك السلام النفسي

ابدئي بخطوات صغيرة مثلا تنزلي الصبح بدري وتنزلي كتير مع حد لو الموضوع صعب في البدايه وخلي كل مرة تنجحي فيها تكبر ثقتك بنفسك مش لازم تنجزي كل شيء مرة واحدة، الأمان جواكي ومع الوقت هتحسي بالشجاعة أكتر متنسيش انه لن يصيبك الا ماكتب الله لكي وتوكلي علي ربنا وادعي انه ربنا يساعدك